Ne ba Ifanile mwa naha ya Ecuador

Muzwale wa mutangana ya pila mwa naha ya Italy naa swanela ku eza katulo ya butokwa hahulu. Kihona ha naa sa zo feza sikolo mi naa fumani linepo ze nde hahulu. Ba lubasi lwa hae ni baluti ne ba mu susuelize kuli a ye kwa yunivesiti. Kono lilimo kwamulaho, Bruno naa ineezi ku Jehova mi naa mu sepisize kuli naa ka eza tato ya hae mwa bupilo bwa hae kaufela. Ki katulo mañi ya naa ezize Bruno? Bruno u talusa kuli: “Ne ni bulelezi Jehova mwa tapelo kuli ni ka taleleza sepiso ya ka ya ku mu sebeleza mwa bupilo bwa ka kaufela.” Bruno hape a lapela kuli a ikole ku sebeleza Jehova ni ku eza misebezi ye miñata.

 Hamulaho wa lilimonyana, Bruno a yo pila kwa Ecuador, ili kwa South America. Ka nako ya cwale, Bruno u bulela kuli Jehova u mu file lika ze ñata ku fita za naa kupile. Ha naa fitile kwa Ecuador, Bruno naa komokile ha na izo fumana mikulwani ba bañata ba ne ba tutezi kwa sibaka ko kuli ba yo eza ze ñata mwa sebelezo ya bona ku Jehova.

MIKULWANI BA BA SEPILE JEHOVA

Jehova u lu mema kuli lu mu sebeleze mo lu konela kaufela ni ku sepa kuli u ka lu fuyaula hahulu. Jehova u li: “Mu ni like ka seo, . . . mi mu ka bona nji ni si ke na mi tibululela mahaulo a kwa lihalimu.” (Mal. 3:10) Bruno ni mikulwani ba bañwi ba bañata ba amuhezi memo yeo ye zwa ku Jehova. Bakeñisa lilato la bona ku Jehova, ne ba iketezi ku itusisa nako, maata, ni maluwo a bona kuli ba yo sebeleza kwa naha i sili ko ku tokwahala hahulu bakutazi ba taba ye nde ya Mubuso.

Hamulaho wa ku fita mwa naha i sili yeo, mikulwani bao ne ba lemuhile kuli “lukau ki lo lutuna, kono babeleki ki ba banyinyani.” (Mat. 9:37) Ka mutala, Jaqueline, ya pila kwa Germany naa ñozi cwana mwa liñolo la naa lumezi kwa mutai wa kwa Ecuador: “Se ni sebelelize mwa Ecuador ka lilimo ze fitelela ze peli, mi se ni na ni lituto za Bibele ze 13, mi zee ne kwa lituto zeo za fumanehanga kwa mikopano nako kaufela. Kana taba yeo ha i tabisi? Chantal, ya pila mwa naha ya Canada naa bulezi kuli: “Mwa silimo sa 2008, ne ni tutezi kwa sibaka sa kwa likamba la Ecuador ili ko ne ku fumaneha feela puteho i liñwi. Ka nako ya cwale se ku na ni liputeho ze taalu ni mapaina ba ba fitelela 30 mwa  sibaka seo.” Chantal u bulela kuli kwa tabisa luli ku bona batu ba banca ba bañata ha ba zwelapili mwa niti. Cwanoñu fa Chantal naa tutezi kwa tolopo ye yahezwi fa lilundu la Andes mi ku zwa fafasi ku ya fo i yahezwi tolopo yeo ki limita ze 2,743 mwahalimu. Batu ba ba pila mwa tolopo yeo ba fitelela 75,000, kono ku na ni feela puteho i liñwi. Chantal u bulela kuli batu ba bañata ba amuhela niti ni kuli wa ikola musebezi wa ku kutaza kwa sibaka seo.

HAKI NTO YE BUNOLO KAMITA

Ku sebeleza mwa naha i sili haki nto ye bunolo kamita. Mane ne kuli taata kwa mikulwani ba bañwi ku eza katulo ya ku tutela kwa naha i sili. Kayla ya pila kwa United States u bulela kuli ba bañwi mwa puteho ya hae ne ba mu bulelezi kuli a si ke a tutela kwa naha i sili. Batu bao ne ba sa utwisisi libaka ha na bata ku yo ezeza bupaina kwa naha i sili. Kayla naa ziba kuli batu bao ne ba bata ku mu tusa, kono naa swabisizwe ki ze ne ba bulezi. Fokuñwi naa kakanyanga haiba ne ku swanela ku yena kuli a tutele kwa naha i sili. Naa lapezi hahulu ku Jehova mi a ambola ni mizwale ni likaizeli ba ba hulile ka za taba yeo. Ku eza cwalo ne ku mu tusize ku utwisisa kuli Jehova u fuyaulanga batu ba ba bata ku eza ze ñata mwa sebelezo ya hae. Kabakaleo Kayla a ikatulela ku tutela kwa sibaka seo.

Batu ba bañata ba fumani taata ku ituta puo i sili. Siobhan ya pila kwa naha ya Ireland u bulela kuli: “Ne ku li taata ku na ku bulela puo i sili inze ni lukuluhile. Ne ni tokwa ku ba ni pilu-telele, ku ituta hande puo, mi ne ni sehanga ni nosi ha ne ni ezanga mafosisa. Anna ya pila kwa Estonia u bulela kuli: “Ku ituta puo ya Spanish ne ku li taata hahulu kuli mane miinelo ye ne lu kopana yona ye cwale ka ku pila mo ku cisa, mo ku na ni maluli, ni ku sa tapanga mezi a futumala ne i sa lu bilaezi hahulu. Fokuñwi ne ni ikutwanga inge ni ka zwafa. Ne ni itutile ku isa pilu kwa zwelopili ye ne ni eza, isiñi kwa mafosisa e ne ni panga.”

Hape ku pila kwahule ni lubasi ni balikani haki nto ye bunolo. Jonathan, ya pila kwa United States naa ikutwile bulutu ha sa fitile mwa naha i sili. Kono naa ikutwile hande hasamulaho wa ku itusisa nako ya hae ye ñata kwa ku ituta Bibele ni ku ya mwa bukombwa. Hamulaho wa nakonyana, naa bile ni tabo hape kabakala lika ze nde za naa kopananga ni zona mwa musebezi wa ku kutaza ni kabakala balikani ba banca ba naa fumani mwa puteho.

 Ku kona ku ba taata hape ku twaela mupilelo wa mwa naha i sili. Mwendi bupilo bwa kwa naha i sili ha bu koni ku swana ni bupilo bwa mwa naha ya mina. Beau, ya pila kwa Canada u bulela kuli kwa naha ya zwa, ne ba banga ni malaiti ni pompi, kono ka nako ye, ha na lika zeo mwa naha ya pila ku yona. Hape mwa linaha ze ñata linzila li kona ku sa ba ze nde. Mwa linaha zeo hape ku kona ku ba ni batu ba ba li babotana ni ba ba sa zibi hande ku bala ni ku ñola. Ines, ya pila kwa Austria, u zwezipili ku ba ni tabo kakuli u isanga pilu kwa tulemeno to tunde to ba na ni tona batu. U bulela kuli: “Ki batu ba ba na ni kamuhelo, musa, ba ba lata ku tusa ba bañwi, ni ba ba ikokobeza. Kono sa butokwa ni ku fita kikuli ba na ni takazo ye tuna ya ku ituta ze ñata ka za Mulimu.”

‘NA MI SULULELA MBUYOTI MANE SIBAKA MO MU KA I AMUHELELA SI TAELE’

Nihaike kuli mikulwani ba kaufela ba ba sebeleza mwa Ecuador ne ba itombozi ku eza cwalo, Jehova u ba file lika kaufela ze ba tokwa. U ba file limbuyoti ze ne ba si ka libelela. (Maef. 3:20) Ba ikutwa kuli Jehova u ba ‘sululezi mbuyoti mane sibaka mo ba ka i amuhelela si taele.’ (Mala. 3:10) Mikulwani bao ne ba bulezi cwana ka za bukombwa bwa bona:

Bruno: “Ne ni kalezi ku sebeleza kwanu kwa Ecuador mwa sibaka se si sinde sa Amazon. Hasamulaho, ne ni tusize mwa musebezi wa buyahi kwa mutai wa kwa Ecuador. Mi cwale ni sebeleza fa Betele ya kwa Ecuador. Ha ne ni sa li kwa Italy, ne ni ezize katulo ya ku bata ku sebeleza Jehova pili mwa bupilo bwa ka kaufela. Mi kaniti luli Jehova u sweli wa ni fuyaula hahulu mwa bupilo bwa ka, mi ni peta misebezi ye shutana-shutana mwa sebelezo ya hae.”

Beau: “Bulikani bwa ka ni Jehova bu tiile kamita bakeñisa kuli mwa Ecuador ni kona ku itusisa nako ya ka kaufela kuli ni sebeleze Jehova. Hape na kona ku yo pota kwa libaka ze nde ze ni tabela ili nto ye ne ni batanga ku eza.”

Anna: “Ka ku ba kaizeli wa likwasha, ne ni nahananga kuli ha ni koni ku pila sina mulumiwa. Kono cwale na ziba kuli kwa konahala. Na itumela kwa mbuyoti ya ni file Jehova ya ku luta batu ku ba balutiwa, ku yaha Mandu A Mubuso, ni ku fumana balikani ba banca. Ni ya tabile luli.”

Elke: “Ha ne ni sa li kwa naha ya hesu ya Austria, ne ni lapelanga hañata ku Jehova kuli a ni tuse ku fumana tuto ya Bibele i liñwi. Kono kwanu ni na ni lituto za Bibele ze 15! Ni banga ni tabo ye tuna luli ha ni bona zwelopili ye ba eza baituti ba ka inze ba tabile.”

Joel: “Ki nto ye tabisa luli ku sebeleza Jehova mwa naha i sili. Ku sebeleza mwa naha i sili ku tahisa kuli mutu a itinge hahulu ku Jehova, mi kwa tabisa ku iponela Jehova ha fuyaula buikatazo bwa eza mutu! Mwa silimo sa pili se ne ni tilo sebeleza kwanu kwa United States, palo ya bahasanyi ba ba fumaneha kwa sibaka se ne ni tilo sebeleza ne i hulile ku zwa fa 6 ku ya fa 21. Batu ba 110 ne ba fumanehile kwa kupuzo.”

MINA BO?

Mizwale ni likaizeli ba mikulwani, kana mwa kona ku yo sebeleza ko ku tokwahala hahulu bakutazi ba taba ye nde? Mu si ka eza kale katulo ye cwalo, mu swanela ku nyakisisa ka tokomelo ze tokwahala. Fahalimu a zeo kaufela, mu swanela ku lata hahulu Jehova ni batu. Haiba mwa lata Jehova ni batu, mi mwa kona ku tutela ku sili, mu lapele ku Jehova kuli a mi tuse ku yo sebeleza kwa naha i sili. Ku zwa fo mu ambole ni bashemi ba mina ni baana-bahulu ba mwa puteho ya mina ka za takazo ye mu na ni yeo. Mwendi ni mina mwa kona ku ikatulela ku sebeleza Jehova ka nzila ye tabisa yeo.

[Manzwi a fa likepe 3]

“Ku lapelanga nako ni nako ku Jehova ni ku ambolisanga hahulu ni mizwale ni likaizeli ba ba hulile kwa moya ku ni tusize ku bona kuli Jehova wa fuyaulanga batu ba ba na ni moya wa ku ifana.”—Kayla wa kwa United States

[Mbokisi/Siswaniso se si fa likepe 6]

Mo lu kona ku itukiseza ku yo sebeleza kwa naha i sili

• Mu be ni mukwa wa ku itutanga kamita

• Mu nyakisise litaba ze mwa Bukombwa Bwa Luna Bwa Mubuso bwa August 2011, makepe 4 ku isa 6

• Mu ambole ni batu ba ba kile ba sebeleza kwa naha i sili

• Mu eze patisiso ka za sizo ni lika ze ñwi za mwa naha ye mu bata ku yo sebeleza ku yona

• Mu itute lipulelo nyana za mwa puo ye mu ka yo itusisanga mwa naha yeo

[Mbokisi/Siswaniso se si fa likepe 6]

Batu ba bañwi ba ba sebeleza kwa naha i sili ba fumananga masheleñi ka . . .

• Ku sebeleza mwa naha ya bona ka likweli-nyana mwa silimo

• Ku telisa ndu kamba ku fa mutu yo muñwi kuli a eze pisinisi ya bona

• Ku sebeza ka ku itusisa Intaneti

[Maswaniso a fa likepe 4, 5]

1 Jaqueline wa kwa Germany

2 Bruno wa kwa Italy

3 Beau wa kwa Canada

4 Siobhan wa kwa Ireland

5 Joel wa kwa United States

6 Jonathan wa kwa United States

7 Anna wa kwa Estonia

8 Elke wa kwa Austria

9 Chantal wa kwa Canada

10 Ines wa kwa Austria