Mu Zwelepili Ku Pila Sina Bayahi Ba Mubuso!

“Mu zamaye ka mukwa o swanela taba ye nde ya za Kreste.”—MAFIL. 1:27.

MU KONA KU ALABA CWAÑI?

Ki bo mañi ba ba kona ku ba bayahi ba Mubuso?

Ku talusañi ku ituta puo, litaba za kale, ni milao ya Mubuso?

Bayahi ba Mubuso ba bonisa cwañi kuli ba lata milao ya Mulimu?

1, 2. Ki kabakalañi pulelo ya kuli “mu zwelepili ku pila sina bayahi” ha ne i naa ni taluso ye tuna kwa puteho ya Filipi?

MUAPOSITOLA Paulusi naa susuelize mizwale ni likaizeli ba mwa puteho ya mwa Filipi kuli ba “zamaye ka mukwa o swanela taba ye nde.” (Mu bale Mafilipi 1:27.) Pulelo ya kuli “mu zamaye” ye bulezwi mwa timana ye, i talusa “ku zwelapili ku pila sina bayahi,” kamba ku ba sina muyahi wa naha. Pulelo yeo ne i naa ni taluso ye tuna kwa puteho ya Filipi. Ki kabakalañi? Bakeñisa kuli ku bonahala kuli Mubuso wa Maroma ne u lumelelize Mafilipi kuli ba pile sina Maroma ni kuli ba silelezwe ki mulao wa Maroma. Mafilipi ne ba ikutwa hande ku ba bayahi ba Roma kakuli ne ba fumana lituso ze ne fumanwa feela ki batu ba banyinyani ka nako yeo.

² Mizwale ni likaizeli ba ne ba li mwa puteho ya Filipi ne ba naa ni libaka le linde la ku ikutwa cwalo. Paulusi naa hupulisize Bakreste ba ba tozizwe kuli: “Kono munzi wa luna u kwa mahalimu.” (Mafil. 3:20) Ne ba li bayahi ba Mubuso wa Mulimu, ili Mubuso o maata ku fita mibuso ya batu kaufela. Mubuso wa Mulimu ne u ba silelelize ni ku ba tusa ili lika ze ne ba sa koni ku fiwa ki mubuso ufi kamba ufi.—Maef. 2:19-22.

3. (a) Ki bo mañi ba ba kona ku ba bayahi ba Mubuso? (b) Lu ka nyakisisañi mwa taba mo?

³ Kelezo ya naa file Paulusi ya ku “zwelapili ku ba bayahi” sihulu ne i ama batu ba ba ka yo busa ni Kreste mwa lihalimu. (Mafil. 3:20) Kono kelezo yeo hape i kona ku ama ni batu ba ba ka pila fa lifasi ili ba ba ka busiwa ki Mubuso wa Mulimu. Ki kabakalañi? Bakeñisa kuli kaufela luna lu sebeleza Mulena ya swana, Jehova, mi kaufela luna lu latelela milao ye swana. (Maef. 4:4-6) Kacenu, batu ba bañata ba sebezanga ka taata kuli ba be bayahi ba naha ye fumile. Kono tohonolo ya ku ba bayahi ba Mubuso ki ye tuna hahulu. Kuli lu utwisise butuna bwa tohonolo yeo, ha lu bapanyeñi milao ye miñwi  ya swanela ku latelela mutu ya bata ku ba muyahi wa naha ye ñwi ni milao ya swanela ku latelela mutu ya bata ku ba muyahi wa Mubuso wa Mulimu. Hasamulaho lu ka nyakisisa lika ze taalu ze lu swanela ku eza haiba lu bata ku zwelapili ku ba bayahi ba Mubuso.

ZE TOKWAHALA KULI LU BE BAYAHI BA NAHA

4. Puo ye kenile ki nto mañi, mi ku bulela puo yeo ku talusañi?

⁴ Mu itute puo ya naha yeo. Mibuso ye miñwi i tokwanga kuli batu ba ba bata ku ba bayahi ba naha ba itute puo ye bulelwa hahulu mwa naha yeo. Batu ba bañwi ne ba sebelize ka taata ili ka lilimo ze ñata kuli ba itute ku bulela hande puo ye nca, mi mane ba ezize cwalo nihaiba hamulaho wa ku ba bayahi ba naha. Ba kana ba ituta kapili-pili milao ya puo yeo kono mwendi ba tokwanga nako ye ñata kuli ba fite fa ku ziba ku bulela hande puo yeo. Mubuso wa Mulimu hape u tokwa kuli batu ba ba bata ku ba bayahi ba ona ba itute puo ye nca. Bibele i biza puo yeo kuli ki “milomo ye kenile” kamba puo ye kenile. (Mu bale Zefania 3:9.) Ki puo ifi yeo? Puo yeo ki niti ye i luta Bibele ka za Mubuso wa Mulimu ni milelo ya hae. Ku bulela puo ku talusa ku utwa milao ya Mulimu ni likuka za hae. Ka ku ba bayahi ba Mubuso wa Mulimu, lwa kona ku ituta lituto za matatekelo za mwa Bibele kapili ni ku kolobezwa. Kono ha se lu kolobelizwe, lu swanela ku lika ka taata kuli lu bulele puo ye kenile hande. Lu kona ku eza cwañi cwalo? Mañi ni mañi wa luna u swanela ku lika ka tata ku zwelapili ku sebelisa za ituta ku zwelela mwa Bibele mwa bupilo bwa hae.

5. Ki kabakalañi ha lu swanela ku ituta litaba ze ezahezi kwa batu ba Jehova?

⁵ Mu itute litaba za kwaikale za naha yeo. Mutu ya bata ku ba muyahi wa naha a kana a bata ku ituta litaba za naha za kwaikale za mubuso wo. Bakeñisa kuli lu bata ku ba bayahi ba Mubuso wa Mulimu, lu swanela ku ituta ka za ona. Lu swanela ku likanyisa mutala wa bana ba Kora ba ne ba sebelize mwa Isilaele ya kwaikale. Ne ba lata Jerusalema ni sibaka sa ku lapelela mi ne ba lata ni ku ambola litaba za kwakale za tolopo yeo, libaka le ne ba latela Jerusalema ne si bakeñisa bunde bwa yona, kono ne li bakeñisa kuli ne li “munzi wa Mulena yo muhulu,” Jehova. Sibaka seo sa ku lapelela sa mwa Jerusalema ne li sona ko ne ba yo itutelanga batu Milao ya Jehova ni ko ne ba mu lapelelanga. Batu be ne ba busiwanga ki Mulena wa Jerusalema ne li batu be ne ba shemubiwa ni ku latiwa ki Jehova. (Mu bale Samu 48:1, 2, 9, 12, 13.) Mwa linako za luna, Mulimu hape u na ni batu ba ba swalisani mwa lifasi. Sina bana ba Kora, lu swanela ku tabela ku ituta ni ku bulelela ba bañwi ka za litaba ze ezahezi kwa batu ba Mulimu. Ha lu nze lu ituta ka za batu ba Jehova ni mwa sweli ku ba tuseza, Mubuso wa Mulimu u ka ba wa luli ku luna. Ku eza  cwalo ku ka tiisa takazo ya luna ya ku kutaza taba ye nde ya Mubuso.—Jer. 9:24; Luka 4:43.

6. Ki kabakalañi ha ku li ko ku utwahala kuli Jehova u tokwa kuli bayahi kaufela ba Mubuso wa hae ba itute ni ku mamela milao ni likuka za hae?

⁶ Mu zibe milao ya mwa naha yeo. Mibuso ya batu i tokwanga kuli batu ba ba pila mwa naha yeo ba itute ni ku mamela milao ya mwa naha yeo. Kamukwaocwalo, kwa utwahala Jehova ha tokwa kuli bayahi kaufela ba Mubuso wa hae ba itute ni ku mamela milao ni likuka za hae. (Isa. 2:3; Joa. 15:10; 1 Joa. 5:3) Milao ya batu ha i si ka petahala mi i kona ku sa ba ye minde. Kono “mulao wa Muñaa Bupilo u petehile.” (Samu 19:7) Kana mwa ikolanga ku bala Bibele zazi ni zazi ni ku ituta milao ni likuka za Mulimu? (Samu 1:1, 2) Mañi ni mañi wa luna u swanela ku eza buikatazo bwa ku ituta milao ya Mulimu. Ha ku na mutu ni yo mukana ya kona ku lu ezeza cwalo.

BAYAHI BA MUBUSO BA LATA LIKUKA ZA MULIMU

7. Ki kabakalañi bayahi ba Mubuso ha ba mamelanga milao ya Mulimu?

⁷ Kuli lu zwelepili ku pila sina bayahi ba Mubuso, lu tokwa ku ziba milao ya Mulimu ni ku i lata. Bayahi ba bañata ba mibuso ya batu ba bulelanga kuli ba lumelelana ni milao ya naha. Kono haiba ba sa lati mulao o muñwi kamba haiba ha ku na mutu ya ba bona, ha ba koni ku u latelela. Hañata ba mamelanga milao ilikuli ba tabise batu. (Makolo. 3:22) Bayahi ba Mubuso ba mamelanga milao ya Mulimu ka libaka le li shutana ni leo. Lwa lata Jehova. Ki lona libaka ha lu tabela ku mamela milao ya hae, nihaike kuli ha ku na batu ba ba lu bona.—Isa. 33:22; mu bale Luka 10:27.

8, 9 Mu kona ku ziba cwañi kuli luli mwa lata milao ya Mulimu?

⁸ Mu kona ku ziba cwañi kuli luli mwa lata milao ya Mulimu? Mu swanela ku nahanisisa mubonelo wa mina. Ka mutala, mu nahane mo mu ikutwelanga ha mu fiwa kelezo. Mwendi mu kona ku fiwa kelezo fa taba ye mu ikutwa kuli ki keto ya mina ya ka butu ye cwale ka mutinelo wa mina. Pili mu si ka ituta kale niti, ne mu sa isezangi pilu kwa ponahalo ya mina, kamba mwendi ne mu tinanga ka mukwa o kona ku tahisa kuli ba bañwi ba kone ku ba ni milelo ye maswe. Lilato la mina ku Mulimu ha ne li nze li hula, ne mu itutile ku tina ka mukwa o kutekehisa Mulimu. (1 Tim. 2:9, 10; 1 Pit. 3:3 4) Mwendi ne mu nahana kuli ha ku na se si fosahalile kwa mutinelo wa mina ka nako ya cwale. Kono haiba muuna-muhulu a mi taluseza kuli batu ba bañata mwa puteho ba ikutwa kuli mutinelo wa mina ha u si ka luka, mu ka ikutwa cwañi? Kana ne mu ka bata mabaka a ku ikemela, ku nyema, kamba ne mu ka hana ku eza licinceho ka za mutinelo wa mina? Wo muñwi wa milao ya butokwa hahulu wa swanela ku mamela muyahi wa Mubuso ki wa ku likanyisa Kreste. (1 Pit. 2:21) Paulusi naa bulezi kuli, “Nihaiba Kreste naa si ka eza ze tabisa yena muñi” mi mañi ni mañi wa luna u swanela ku ‘tabisa yo muñwi kuli a ezeze yo bunde ni ku mu yahisa.’ (Maro. 15:2, 3) Kuli mwa puteho ku zwelepili ku ba ni kozo, Mukreste ya hulile kwa moya u swanela ku tokolomoha ku ezanga lika ze kona ku sitatalisa mazwalo a ba bañwi.—Maro. 14:19-21.

⁹ Ha mu nahane ka za mubonelo wa mina wa za somano ni linyalo. Batu ba ba si bayahi ba Mubuso wa Mulimu ba kona ku nahana kuli ha ku si ka fosahala ku eza kalombe, ku buha maswaniso a mapunu, ku buka, kamba ku lelekana ni mutu yo nyalani ni yena. Kono bayahi ba Mubuso ba itutile ku nahana ze kona ku zwa mwa likezo za bona ni mo likezo za bona li kona ku amela ba bañwi. Pili ba si ka ituta kale niti, ba bañata ne ba ezanga buhule. Kono cwale batu bao ba ziba kuli somano ni linyalo ki limpo ze zwa ku Mulimu. Ba lata milao ya Jehova mi ba ziba kuli batu ba ba sa mameli  milao ya Mulimu ya za somano ni linyalo ha ba koni ku ba bayahi ba Mubuso. (1 Makor. 6:9-11) Kono hape ba lemuha kuli pilu ya bona i kona ku ba tahiseza ku eza lika ze maswe. (Jer. 17:9) Kamukwaocwalo ba itebuha kuli ba fiwa litemuso ze ba tusa ku zwelapili ku mamela milao ya Mulimu.

BAYAHI BA MUBUSO BA ITEBUHA LITEMUSO ZE BA FIWA

10, 11. Ki litemuso mañi za butokwa ze u lu fa Mubuso wa Mulimu, mi mu ikutwanga cwañi ha mu fiwa litemuso ze cwalo?

¹⁰ Mibuso ya batu i kona ku lemusa bayahi ba yona kuli ba tokolomohe ku ca lico ze ñwi ni ku nwa milyani ye miñwi. Haki lico ni milyani kaufela ze li ze maswe. Kono haiba nto ye ñwi i bonahala ku ba ye lubeta, muuso u ka sileleza bayahi ba ona ka ku ba lemusa kozi ye kona ku ba tahiseza butata. Ki swanelo ya muuso kuli u fe litemuso zeo. Mubuso wa Mulimu ni ona u fa litemuso kwa bayahi ba ona. Mubuso wa Mulimu u lu lemusa lika ze kona ku lu tahiseza kuli lu si ke lwa mamela milao ya Mulimu ili ze kona ku sinya silikani sa luna ni yena. Ka mutala, batu ba bañata ba itusisa Intaneti kwa ku ambolisana, kwa ku ituta, ni kwa ku itabisa. Kopano ya Mulimu i itusisa Intaneti kwa ku eza lika ze ñata ze nde. Kono buñata bwa libaka ze fa Intaneti haki ze nde kwa batu ba ba bata ku zwelelapili ku eza lika ze lukile. Libaka ze bonisa maswaniso a mapunu li maswe hahulu. Ka lilimo ze ñata, sitopa sa mutanga ya sepahala si lu lemusize ka za libaka zeo mi lwa itumela kwa litemuso zeo!

¹¹ Cwanoñu fa, batu ba bañata ba zwezipili ku itusisa sibaka se siñwi sa fa Intaneti. Sibaka seo sa fa Intaneti si itusiswanga kwa ku lumelana litaba. Sibaka seo sa kona ku lu tusa kono hape sa kona ku tahisa butata bo butuna. Kamukwaocwalo, lu swanela ku tokomela hahulu ha lu keta ku itusisa sibaka se si cwalo. Lu kana lwa ambolisananga ni batu ba ba na ni mikwa ye maswe. (1 Makor. 15:33) Kona libaka mutanga ya sepahala ha lu file litemuso kuli li lu tuse ku ba ni mubonelo o munde ka za Intaneti. Kana mu balile litaba kaufela ze zwa ku mutanga ya sepahala ze bulela ka za ku itusisa libaka za fa Intaneti? Ne ku ka ba ko ku lubeta ku itusisa sibaka sa fa Intaneti lu si ka bala kale lihatiso zeo. * Ne ku ka swana sina ku nwa mulyani mu si ka bala kale litaelo za mwa ku nwela mulyani wo.

12. Ki kabakalañi ha kuli ko ku butoto ku sa utwa litemuso?

¹² Batu ba ba sa utwi litemuso za lu fa mutanga ya sepahala ba ka ipumana mwa butata mi ba ka kenya balatiwa ba bona mwa butata. Batu ba bañwi ba itwaelize hahulu ku buhanga maswaniso a mapunu kamba mane ba ezanga buhule mi ba nahana kuli Jehova ha boni ze ba eza. Ki butoto ku nahana kuli Jehova ha koni ku bona ze lu eza kwa mukunda! (Liprov. 15:3; mu bale Maheberu 4:13.) Jehova ha na ku tuhelela batu ba ba zwelapili ku sa utwa milao ya hae kuli ba be bayahi ba Mubuso wa hae, sina feela mubuso wa butu ha ne u si ke wa lumeleza batu ba ba eza lika ze maswe kuli ba zwelepili ku ba bayahi ba naha ya ona. * (1 Makor. 5:11-13) Kono Jehova u sishemo mi u itusisa baana-bahulu kuli ba like ku tusa batu ba ba ezize sibi. (Magal. 6:1) Batu ba ba baka ni ku tuhela ku eza lika ze maswe ba kona ku ba balikani ba Jehova ni ku zwelapili ku ba bayahi ba Mubuso. (2 Makor.  2:5-8) Ki tohonolo ye tuna ku sebeleza Mulena ya lilato cwalo!

BAYAHI BA MUBUSO BA ITEBUHA TUTO

13. Bayahi ba Mubuso ba bonisa cwañi kuli ba itebuha tuto?

¹³ Mibuso ye miñata ya batu i ezanga buikatazo bwa ku luta bayahi ba yona. Mibuso yeo i yahanga likolo ze tusa batu ku ziba ku bala ni ku ñola. Bayahi ba Mubuso wa Mulimu ba itebuha lituto ze ba fumana ili ze ba tusa ku ziba ku bala ni ku ñola ni ku ba luta lika ze ñwi ze ka ba tusa mwa bupilo. Ba ezanga ka mo ba konela kaufela ilikuli ba fumane tuso ku zwelela kwa tuto yeo. Kono ba itebuha hahulu tuto ya ba fa Jehova ka kopano ya hae. Ka mutala kopano ya Jehova i lu susueza kuli lu balange. I susueza bashemi kuli ba no balelanga bana ba bona. Ka kweli ni kweli, mutanga ya sepahala u hatisanga limagazini za Tawala ya mulibeleli ni Mu zuhe! Limagazini zeo li na ni makepe a sikai. Kamukwaocwalo, haiba mu balanga makepe a likani ka zazi, mwa kona ku feza ku li bala kaufela mwa kweli i liñwi. Ha mu ka eza cwalo, mu ka zwelapili ku tusiwa ki tuto ya lu fa Jehova.

14. (a) Ki tuto mañi ye lu lutiwa? (b) Ki liakalezo lifi ze mu itusisize za mwa ku lapelela sina lubasi?

¹⁴ Sunda ni sunda, bayahi ba Mubuso ba lutiwanga kwa mikopano ya bona ya puteho. Ka mutala, lilimo ze fitelela 60, Sikolo sa Bukombwa sa Teokratiki si tusize baituti ba sona kuli ba be baluti ba bande ba Linzwi la Mulimu. Kana mu iñolisize mwa sikolo se? Hape, mutanga ya sepahala u koñomekile butokwa bwa ku banga ni Nako ya ku Lapela Sina Lubasi sunda ni sunda. Tuto ye i tusa lubasi kuli lu swalisane hahulu. Kana se mu itusisize liakalezo ze hatisizwe mwa lihatiso za luna ka nako ye mu lapelanga sina lubasi? *

15. Ki tohonolo ifi ye tuna ye lu na ni yona?

¹⁵ Bayahi ba bañata ba mibuso ya butu ba lika ku hapeleza batu ba bañwi kuli ba ikenye mwa litaba za naha. Mane ba bañwi ba yanga fa ndu ni ndu kuli ba eze cwalo. Mwa lifasi kaufela, bayahi ba Mubuso ba bonisa kuli ba yemela Mubuso wa Mulimu ka ku kutaza kwa batu mwa mikwakwa ni fa ndu ni ndu. Ka mutala, mulelo wa magazini ya Tawala ya Mulibeleli ki ku zibahaza Mubuso wa Jehova. Mi sina mo ku taluselizwe mwa taba ya pili, magazini ya Tawala ya Mulibeleli i abelwa hahulu mwa lifasi kaufela! Lu na ni tohonolo ye tuna ya ku bulelela ba bañwi za Mubuso wa Mulimu. Kana mu ba ba tukufalezwi ku kutaza taba ye nde ya Mubuso?—Mat. 28:19, 20.

16. Mu kona ku bonisa cwañi kuli mu ka ba bayahi ba bande ba Mubuso wa Mulimu?

¹⁶ Hona cwale-cwale fa Mubuso wa Mulimu u ka ba ona feela o ka busa lifasi. Milao ya Mubuso wa Mulimu i ka ba yona feela ye ka zamaisa batu. Kana mu ka ba bayahi ba bande ba Mubuso wa Mulimu ka nako yeo? Ye ki yona nako ya ku bonisa kuli mu ka ba bayahi ba bande ba Mubuso wa Mulimu. Mwa likatulo ze mu eza ka zazi ni zazi mu eze lika kaufela kuli Jehova a lumbekwe ka zona, mi ha mu eza cwalo mu ka bonisa kuli mu bayahi ba bande ba Mubuso wa Mulimu.—1 Makor. 10:31.

[Litaluso za kwatasi]

[Lipuzo za Tuto]

[Manzwi a fa likepe 14]

Kana mwa mamela litemuso ze zwa ku mutanga ya sepahala ze bulela ka za Intaneti?

[Siswaniso se si fa likepe 12]

Sina bana ba Kora, kana mwa lata bulapeli bwa niti ni litaba za kale ka za bulapeli bo?

[Siswaniso se si fa likepe 15]

Nako ya ku Lapela Sina Lubasi ya kona tusa lubasi lwa mina ku ba bayahi ba bande ba Mubuso