Susuezo ye ne Zwa Kwa Banana

Mwa kweli ya December, ili ka silimo sa 2009, hamulaho wa katulo ye ne yemezwi ki Kuta ye Tuna mwa Russia, kopano ya bulapeli bwa Lipaki za Jehova mwa Taganrog, ili kwa Russia ne i kwalilwe. Lipaki za Jehova ne ba amuhilwe Ndu ya Mubuso, mi lihatiso za luna ze 34 ne li ngilwe ku ba ze maswe hahulu kwa sicaba. Piho ya taba yeo ne i beilwe fa sibaka sa fa Intaneti sa Lipaki za Jehova ni maswaniso a Lipaki ba mwa Taganrog, ku beya cwalo ni maswaniso a banana.

Likwelinyana hamulaho, mutai wa Lipaki za Jehova mwa Russia ne u amuhezi mbokisi ni liñolo ze ne zwa kwa lubasi lwa Lipaki lwa kwa Queensland, kwa naha ya Australia, ili lubasi lo ne lu boni piho ye ne bonisa za katulo ye ne ezizwe ki Kuta. Lubasi lo ne lu ñozi cwana mwa liñolo mo: “Kwa mizwale, bana ba luna bo Cody ni Larissa ne ba susuelizwe hahulu ki tumelo ni miliko ya balikani ba luna mwa Russia. Bana ba luna ba ñozi mañolo, mi lu beile hamoho limpo nyana ze lu bata ku lumela banana ba mwa Taganrog, ili ku ba zibisa kuli banana ba bañwi ba ba pila kwahule ni bona ili ba ba sebeleza Jehova ka busepahali ba ba hupulanga. Bana ba luna ba mi lumelisa ha lilato.”

Ha ne ba amuhezi limpo zeo, banana ba mwa Taganrog ne ba ñozi mañolo ni ku swanisa maswaniso mi ba lumeleza lika zeo kwa lubasi lo lwa kwa naha ya Australia ili ku bonisa buitebuho bwa bona. Muzwale ya sebeleza kwa mutai wa Russia naa susuelizwe ki ze ne ba ezize bo Cody ni Larissa, kuli mane a ba ñolela liñolo. Mwa liñolo leo, muzwale yo naa ñozi kuli: “Kwa utwisa butuku luli kuli banana ni ba bahulu ne ba nyandiselizwe lika ze ne ba si ka eza. Mizwale ni likaizeli ba luna ba mwa Taganrog ha ku na ze ne ba fosize, kono ne ba amuhilwe Ndu ya Mubuso ya bona. Nto yeo ne i ba utwisize bumaswe luli. Ba ka susuezwa hahulu ha ba ka ziba kuli mutu yo muñwi ya pila kwahule wa ba hupulanga.” Muzwale yo a itumela ku bona bakeñisa kuli ne ba bonisize lilato ni sishemo.—Samu 8:2.

Kaniti luli lu mwa lubasi lwa mwa lifasi kaufela, mi lilato la luna ku yo muñwi ni yo muñwi la lu tusa kaufela luna kuli lu tiyele miliko ni butata bo lu talimana ni bona mwa bupilo. Lipaki za Jehova ba tamelelizwe kuli ba susuezanga batu ku toyana. Kono bana ba luna ba ba pila mwa linaha ze shutana-shutana ili ba lizo ze shutana ba bonisize lilato la bona ku yo muñwi ni yo muñwi. Moya o ba na ni ona u bonisa kuli manzwi a Jesu a latelela ki a niti: “Se ki sona se ba ka ziba ka sona batu kaufela kuli mu balutiwa ba ka, haiba mu latana mwahalaa mina.”—Joa. 13:35.

[Maswaniso a fa likepe 32]

Banana ba mwa Russia (kwa nzohoto) ba ne ba amuhezi limpo ze ne zwa kwa banana ba kwa Australia (kwa bulyo)