“Baenyi mwa Lifasi” Ba Swalisani Mwa Bulapeli Bwa Niti
“Baenyi mwa Lifasi” Ba Swalisani Mwa Bulapeli Bwa Niti
“Bana ba basili ba be balimi ba mina, ba lime ni likota za mina za veine. Kono mina mu ka bizwa kuli ki mina baprisita ba Muñaa Bupilo.”—ISA. 61:5, 6.
MU KONA KU ALABA CWAÑI?
Batu ba bañwi ba nga cwañi bazwahule, mi Bibele i lutañi ka za bazwahule?
Batu ba macaba kaufela ba memiwa ku ezañi?
Ki kabakalañi ha lu kona ku bulela kuli ha ku na bazwahule mwahalaa Lipaki za Jehova?
1. Batu ba bañwi ba nahanangañi ka za bazwahule, mi ki kabakalañi ha ku si ka luka ku nahana cwalo?
SINA mo ne lu itutezi mwa taba ye felile, batu ba bañwi ha ba tabeli bazwahule kamba batu ba ba zwanga kwa linaha li sili. Batu ba bañwi ba kona ku nahana kuli batu ba kwa naha i sili haki ba butokwa ku ba fita. Kono ha ku si ka luka ku nahana cwalo. Ha ku na mutu wa butokwa ku fita ba bañwi. Bukanyana ye bizwa The Races of Mankind i bulela kuli, batu ba matalo a shutana ki mizwale sina mo i bulelela Bibele. Nihaike kuli mizwale ba na ni lisimuluho ze shutana, kaufela bona ki mizwale.
2, 3. Jehova naa nga cwañi bazwahule ba ne ba pila mwa Isilaele wa kwaikale?
2 Mwa linako za Bibele, Jehova Mulimu naa ezize buitamo, kamba sepiso ya ku eza Maisilaele ku ba batu ba hae ba iketezi. Nihaike kuli Maisilaele ne ba naa ni bulikani bo bu ipitezi ni Jehova Mulimu, Mulao ne u ba tokwa kuli ba pilisane hande ni batu bao be ne ba si Maisilaele mane hamohocwalo ni ku ba kuteka. Kona mo lu swanela ku ezeza ni luna kacenu. Bazwahule ba fumaneha mwa linaha kaufela. Bakreste ha ba swaneli ku ketululanga ba bañwi. Libaka? Muapositola Pitrosi naa ize: “Mulimu ha ketululi, kono mwa sicaba ni sicaba mutu kaufela ya mu saba ni ku eza se si lukile u lumelelwa ki yena.”—Lik. 10:34, 35.
3 Bazwahule be ne ba pila mwa Isilaele wa kwaikale ne ba fumani tuso bakeñisa ku pila mwa Isilaele. Libaka? Kakuli Jehova naa ba lumelelize. Hasamulaho muapositola Paulusi naa bulezi cwana ka za Jehova kuli: “Kana kikuli ki Mulimu wa Majuda feela? Kana haki wa batu ba macaba kaufela? Ku cwalo, ki wa bamacaba ni bona.”—Maro. 3:29; Joe. 2:32.
4. Ki kabakalañi ha ku si na muzwahule mwa “Isilaele wa Mulimu”?
4 Mulimu ha sa ezize buitamo ni puteho ya Bakreste ba ba tozizwe, bulikani bo bu ipitezi bwa naa na ni bona ni Isilaele wa kwaikale ne se bu felile. Puteho ya Bakreste ba ba tozizwe ne i tilo ba “Isilaele wa Mulimu.” (Magal 6:16) Paulusi naa talusize kuli mwa sicaba se sinca seo, “ha ku na Mugerike kamba Mujuda, ya keni mwa mupato kamba ya si ka kena mwa mupato, muzwahule, Mu-kwa-Sitia, mutanga, kamba ya lukuluhile, kono Kreste ki linto kamukana mi u mwa linto kamukana.” (Makolo. 3:11) Ku likana ni manzwi a naa bulezi Paulusi, ha ku na mutu ya naa ka ngiwa kuli ki muzwahule mwa puteho ya Sikreste.
5, 6. (a) Ki kabakalañi ba bañwi ha ba palelwa ku utwisisa manzwi a kwa Isaya 61:5, 6? (b) Ki bo mañi baprisita ba Jehova ni “bazwahule” ba ba bulezwi ki Isaya? (c) Baprisita ba Jehova ni “bazwahule” ba sebeza cwañi hamoho?
5 Ba bañwi ba kana ba palelwa ku utwisisa manzwi a kwa Isaya kauhanyo 61, ko ku fumaneha bupolofita bo bu talelezwa mwa puteho ya Sikreste. Timana 6 ya kauhanyo yeo i bulela za batu ba bañwi ba ba ka sebeza sina “baprisita ba Muñaa Bupilo.” Nihakulicwalo, timana 5 i talusa za bazwahule be ne ba ka tusa ni ku sebeza ni “baprisita.” Ki kabakalañi timana yeo ha i bulela za bazwahule?
6 “Baprisita” ba Jehova bao ki Bakreste ba ba tozizwe ba ba mwa “zuho ya pili” ili ba “ba ka ba baprisita ba Mulimu ni ba Kreste, mi ba ka busa sina malena hamoho ni yena ka lilimo ze 1,000.” (Sin. 20:6) Hape ku na ni Bakreste ba ba sepahala ba bañwi ba ba na ni sepo ya ku pila mwa Paradaisi fa lifasi. Bakreste bao ba sebeza ni ku swalisana ni Bakreste ba ba ka sebeleza mwa lihalimu. Kono bakeñisa kuli Bakreste ba ba na ni sepo ya ku pila fa lifasi ha ba yo mwa “Isilaele wa Mulimu,” ba swana sina bazwahule. Bakreste bao ba sebeza ni baprisita ba Jehova sina “balimi” ba likota za veine mwa musebezi wa ku kutula. Ba tusa ba ba tozizwe ka ku kutaza ni ku luta ba bañwi niti ka mulelo wa kuli Mulimu a kanyiswe. Bakreste ba ba tozizwe ni Bakreste ba ba li “lingu ze ñwi” ba luta batu niti ni ku tusa batu bao ka lilato kuli ba sebelise ze ba ituta mwa bupilo bwa bona.—Joa. 10:16.
“BAENYI MWA LIFASI” BA SWANA NI ABRAHAMA
7. Bakreste kacenu ba swana cwañi ni Abrahama ni batu ba bañwi be ne ba sepahala mwa linako za Bibele?
7 Sina mo ne lu itutezi mwa taba ye felile, Bakreste ba niti ba swana sina bazwahule kakuli ki “baenyi mwa lifasi” le li maswe la Satani. Ba swana ni Abrahama ni batu ba bañwi be ne ba sepahala ba mwa linako za Bibele be ne ba sa tabeli ku ba ba lifasi la Satani ili be ne ba pilile sina “bazwahule ni baenyi mwa naha.” (Maheb. 11:13) Ibe kuli sepo ya luna ki ya ku yo pila kwa lihalimu kamba fa lifasi, lwa kona ku ba ni bulikani bo bu ipitezi ni Jehova bwa naa bile ni bona Abrahama. Jakobo u talusa kuli “Abrahama naa beile tumelo ku Jehova, mi tumelo ya hae ne i balezwi ku yena kuli ki ku luka, mi a bizwa ‘mulikanaa Jehova.’”—Jak. 2:23.
8. Jehova naa sepisizeñi Abrahama, mi Abrahama naa ikutwile cwañi ka za sepiso yeo?
8 Mulimu naa sepisize kuli macaba kaufela a mwa lifasi naa ka fuyaulwa kabakala Abrahama ni baikulu ba hae. Sepiso yeo ne i sa talusi kuli ne ku ka fuyaulwa feela naha i liñwi. (Mu bale Genese 22:15-18.) Nihaike kuli sepiso yeo ne i ka talelezwa Abrahama ha sa shwile, Abrahama naa na ni buikolwiso bwa kuli sepiso yeo ne i ka talelezwa. Ibato ba mwa bupilo bwa hae kaufela, Abrahama ni lubasi lwa hae ne ba tutanga ku zwa mwa sibaka se siñwi ku ya kwa sibaka se siñwi, mi Abrahama naa si ka tuhela ku ba mulikanaa Jehova.
9, 10. (a) Lu kona ku likanyisa cwañi Abrahama? (b) Lu kona ku tusa batu ku ezañi kacenu?
9 Nihaike kuli Abrahama naa sa zibi fo ne i ka talelelezwa sepiso yeo, naa zwezipili ku lata ni ku lapela Jehova. Bakeñisa kuli kamita Abrahama naa hupulanga kuli naa li muenyi mwa lifasi, naa si ka pila bupilo bo ne ba nga batu kuli ki bona bwa swanela ku pila mutu ya li muyahi wa kamita wa naha. (Maheb. 11:14, 15) Lu swanela ku likanyisa Abrahama ni ku pila bupilo bo bu bunolo. Ha lu swaneli ku nahananga kuli ku ba ni lika ze ñata, ku zibahala hahulu mwa silalanda, kamba ku ndongwama likonkwani ze twi ki ze nde kona nto ya butokwa hahulu mwa bupilo. Kana lwa swanela ku pila bupilo bo ba nga ba bañwi kuli ki bo bunde mafelelezo a lifasi le ha nze a atumela? Kana lwa swanela ku lata lifasi le li tuha li fela? Kaufelaa luna lu libelela lika ze nde hahulu ili ze fita ze mwa lifasi le. Mi ka ku swana ni Abrahama, lwa tabela ku libelela ka pilu-telele ku fitela lisepiso za Mulimu li talelezwa.—Mu bale Maroma 8:25.
10 Limbuyoti za naa sepisize Mulimu kuli naa ka li fa ka Abrahama ni baikulu ba hae li sa fiwa kwa batu kaufela kacenu. Bakreste ba ba tozizwe ba ba li baprisita ba Jehova ni “bazwahule,” kamba lingu ze ñwi, ba bulelela batu mwa lifasi kaufela ili mwa lipuo ze fitelela 600 kuli Mulimu u bata kuli ba itute za limbuyoti zeo.
MU LATE BATU BA MACABA KAUFELA
11. Ki mubonelo mañi wa naa na ni ona Salumoni ili o no sa ami feela Maisilaele?
11 Salumoni ha naa kakuzi tempele ya Jehova ka silimo sa 1026 pili Kreste a si ka taha kale, naa lapezi tapelo ye lu tusa ku bona mo Jehova a ngela batu ba macaba kaufela. Salumoni naa lemuhile kuli batu ba macaba kaufela ne ba ka swalisana ni yena mwa ku lumbeka Jehova. Mwa tapelo ya hae ye ne zwelela kwa pilu, Salumoni naa bulezi kuli: “Hape, muzwahule ye si wa sicaba sa hao sa Isilaele, ya zwa kwa naha ye kwahule, kabakala Libizo la hao, (Kakuli mazwahule kuye-kuye ba ka utwa kuli Libizo la hao ki le lituna, ni kuli lizoho la hao li maata, lona lizoho la hao le li namile;) muzwahule haa ka taha a lapela mwa Ndu ye, U utwe, u li mwa lihalimu, mwa sibaka sa hao, mi u eze mwa kupela kaufela ku Wena, mutu yo nalikatukakule; kuli macaba kamukana a lifasi a zibe Libizo la hao, a ku sabe, sina mo si ku sabela sicaba sa hao sa Isilaele.”—1 Mal. 8:41-43.
12. Ki kabakalañi Lipaki za Jehova ha ba swana sina bazwahule mwa linaha ze ba pila ku zona?
12 Muzwahule ki mutu ya potela naha ye ñwi kamba ya pila mwa naha ya batu. Lipaki za Jehova ba swana ni bazwahule. Ba pila mwa linaha ze ñata za mwa lifasi, kono ba yemela feela Mubuso wa Mulimu wa kwa lihalimu ni Mulena wa ona yena Jesu Kreste. Kamukwaocwalo, Lipaki za Jehova ha ba ikenyangi mwa litaba za lipuso za naha nihaikaba kuli batu ba bañwi ba bata kuli Lipaki ba ikenye mwa litaba ze cwalo.
13. (a) Kiñi ze ka lu tusa ku sa bona ba bañwi sina bazwahule? (b) Ku zwa feela kwa makalelo, Jehova naa bata kuli batu kaufela ba be ni mubonelo mañi ka za ba bañwi?
13 Fokuñwi ku banga bunolo ku lemuha kuli batu ba bañwi ki bazwahule bakeñisa mo ba bulelela, lizo ze ba latelela, mo ba bonahalela, kamba nihaiba mutinelo wa bona. Kono lika ze tahisa kuli batu ba macaba kaufela ba swane ki za butokwa hahulu ku fita ze bulezwi zeo. Kamukwaocwalo, ha lu ituta ku sa nahananga miinelo ye tahisa kuli mutu yo muñwi a shutane ni luna, mwendi ha lu na ku mu bona sina muzwahule. Kambe mwa lifasi kaufela ne ku naa ni feela mubuso u li muñwi kamba kambe lifasi kaufela nee li naha i liñwi, ne ku si ke kwa ba ni muzwahule. Mulelo wa Jehova mane ki wa kuli batu kaufela ba be lubasi lu lu luñwi mwatasaa puso ya hae. Kana kacenu kwa konahala kuli batu ba macaba kaufela ba tuhele ku nga batu ba bañwi sina bazwahule?
14, 15. Lipaki za Jehova ba konile ku ezañi sina sikwata?
14 Lu pila mwa lifasi mo batu ba bañata ki baitati mi ba nahana kuli naha ya bona ki ye nde hahulu ku fita linaha ze ñwi. Kono kwa tabisa ku ziba kuli ku na ni batu ba bañwi ba ba lata batu ba macaba kaufela. Kaniti, lu tokwa ku eza buikatazo kuli lu cince mubonelo wa luna ka za batu ba bañwi. Musimululi wa siteshini se siñwi sa mazimumwangala se si tumile hahulu naa belekile ni batu ba ba cuukile hahulu be ne ba zwa mwa linaha za lifasi kaufela. Musimululi yo naa ize: “Nee ni ngile batu be ne ba zwa kwa linaha li sili sina batu be ni pila ni bona fa lifasi isiñi ku ba nga sina ‘bazwahule.’” Musimululi yo naa file mulao wa kuli babeleki ba hae ne ba sa swaneli ku itusisa linzwi la “muzwahule.”
15 Mwa lifasi kaufela, Lipaki za Jehova ki bona feela batu ba ba li sikwata se si likanyisa mubonelo wa Mulimu kwa batu ba macaba kaufela. Ba itutile ku nga batu sina mwa ba ngela Jehova, mi ku eza cwalo ku ba tusize ku cinca mo ba nahanela ni mo ba ikutwela ka za ba bañwi. Lipaki ha ba na sitoyo kwa batu ba ba zwanga mwa linaha li sili kamba ku nahana kuli bazwahule ha ba sepahali. Lipaki za Jehova ba ikola ku swalisana ni batu ba kaufela ili ba ba na ni buikoneli bo bu shutana-shutana. Kana mu nahanisisize ze konisize Lipaki ku swalisana ni batu ba macaba kaufela ni mo mu tuselizwe ka butu kuli mu swalisane hande ni ba bañwi?
LIFASI MO KU SI KE KWA BA NI MUZWAHULE
16, 17. Mu ka ikutwa cwañi ka nako ye bu ka talelezwa bupolofita bo bu kwa Sinulo 16:16 ni Daniele 2:44?
16 Hona cwale-cwale fa, macaba kaufela a ka lwanisa puso ya Mulimu fa ndwa ya Armagedoni. (Sin. 16:14, 16; 19:11-16) Lilimo ze fitelela 2,500 kwamulaho, mupolofita Daniele naa bulezi cimo ze ne ka ezahala kwa mibuso kaufela ya batu. Naa ñozi kuli: “Mi mwa mazazi a malena ao, Mulimu wa mwa lihalimu u ka tahisa mubuso o si na ku sinyeha ku ya ku ile; mi bulena bwa ona ha bu na ku shimbulukela kwa sicaba si sili. Mubuso wo, u ka ketula ni ku feza mibuso kaufela; kono ona u ka ba teñi kamita ni ku ya ku ile.”—Dan. 2:44.
17 Mu nahane feela mo mu ka tusezwa bupolofita bo ha bu ka talelezwa! Kono ka nako ya cwale, lu sa kona ku bulela kuli lu bazwahule bakeñisa kuli mwa lifasi ku na ni linaha ze shutana-shutana ze kauhanyizwe ka miseto. Hasamulaho wa Armagedoni, ha ku sa na ku ba ni miseto ye kauhanya linaha. Ku si na taba kuli nihaiba ka nako yeo batu ha ba na ku swana mwa mibonahalelo ya bona, muinelo wo u ka bonisa kuli Mulimu u bata kuli mwa pupo ya hae ku be ni batu ba ba shutana-shutana. Bakeñisa kuli lu ka ba ni nako ye nde kwapili, lu swanela ku zwelapili ku eza mo lu konela kaufela kuli lu lumbeke ni ku kuteka Mubupi wa luna.
18. Ki mitala mañi ye bonisa kuli Lipaki za Jehova ha ba ngi kuli mwahalaa bona ku na ni bazwahule?
18 Kana luli batu mwa lifasi ba kona ku sa nga ba bañwi sina bazwahule? Lu na ni buikolwiso bwa kuli muinelo wo u ka ezahala. Nihaiba ka nako ya cwale, Lipaki za Jehova ha ba ngi batu ba bañwi sina bazwahule. Ka mutala, musebezi o ne u eziwanga ki liofisi za mutai ze nyinyani, ne u tutiselizwe kwa liofisi za mutai za mwa linaha ze ñwi. Mulelo wa ku eza cwalo ne li wa kuli musebezi wa ku kutaza u ezwe ka bunolo. (Mat. 24:14) Likatulo zeo ne li si ka toma fa miseto ya linaha konji fo ne u tokwa mulao kuli ku eziwe cwalo. Jesu Kreste, Mulenaa Mubuso wa Mulimu u tusa Lipaki za Jehova kuli ba swalisane ku si na taba ni miseto ya linaha ze ba pila ku zona. Hona cwale-cwale fa, Jesu u ka zwisa miseto kaufela ye kauhanya linaha ka nako ya ka “feleleza tulo ya hae!”—Sin. 6:2.
19. Niti i tusize batu ba Jehova ku ezañi?
19 Lipaki za Jehova ba fumaneha mwa linaha ze ñata mi ba bulela lipuo ze shutana. Kono niti i ba tusa ku swalisana, mi ha ba na ku kauhanywa ni kamuta. (Mu bale Zefania 3:9.) Lipaki za Jehova ba mwa lubasi lu lu luñwi lwa mwa lifasi kaufela. Nihaike kuli ba na ni ku pila mwa lifasi le li maswe ka nako ya cwale, haki ba lifasi. Bakeñisa kuli Lipaki za Jehova ki lubasi lo lu swalisani ka nako ya cwale, ki bupaki bwa kuli mwa lifasi le linca ha ku na ya ka ba muzwahule. Batu kaufela fa lifasi ba ka ba ni tabo ya ku nga batu ba mibala ya litalo ye shutana ili ba ba zwa mwa linaha kaufela sina mizwale.
[Lipuzo za Tuto]
[Manzwi a fa likepe 28]
Kana mwa nyolelwa ku to pila mwa lifasi mo ku si ke kwa ba ni miseto ili mo ku si ke kwa ba ni muzwahule?
[Siswaniso se si fa likepe 25]
Kana mu ka zwelapili ku isa pilu kwa ku talelezwa kwa lisepiso za Mulimu sina mwa naa ezelize Abrahama?
[Siswaniso se si fa likepe 27]
Jehova ha ngi mutu ufi kamba ufi kuli ki muzwahule
