Kana Mwa Hupula?

Kana mu ikozi ku bala limagazini za cwanoñu fa za Tawala ya Mulibeleli? Ha mu bone nji mwa kona ku alaba lipuzo ze tatama:

Lu kona ku felisa cwañi butata bwa ku sa iswala mwa ku bulela?

Lu swanela ku tatuba pilu ya luna. Mwa sibaka sa ku nahanela muzwale wa luna bumaswe, lu swanela ku ipuza libaka ha lu nahana cwalo. Kana lu nyaza muzwale wa luna ka mulelo wa kuli batu ba bañwi ba mu nge kuli haki wa butokwa ni ku nga luna kuli ki luna ba butokwa? Mane ku nyaza muzwale wa luna ku kona ku tatafalisa feela muinelo.—8/15, likepe 21.

Mulimu u swalelanga cwañi ni ku libala libi za batu ba ba bakile?

Jehova u bulela cwana ka za batu ba shemuba: “Ha ni sa na ku hupula sibi sa bona.” (Jer. 31:34) Wa kona ku swalela libi ka ku itusisa tiululo. Mi lwa kona ku bulela kuli Mulimu ha swalela libi wa libala libi zeo bakeñisa kuli ha na ku li hupula mi ha na ku fa koto kwa batu bao.—10/1, likepe 32.

Ku ka ezahalañi pili mafelelezo a si ka taha kale?

Babusi ba lifasi ba ka bulela kuli “Kozo ni buiketo!” Macaba a ka lwanisa ni ku yundisa “Babilona yo Mutuna.” Batu ba Jehova ba ka lwaniswa. Ndwa ya Armagedoni i ka latelela, mi Kreste u ka nepela Satani ni madimona a hae mwa mukoti.—9/15, likepe 4.

Lu tuseha cwañi ka ku sa ziba fa ka tela mafelelezo a lifasi le?

Ku sa ziba fa ka tela mafelelezo a lifasi le ku lu fa kolo ya ku bonisa ze mwa pilu ya luna luli. Hape ku lu fa kolo ya ku tabisa pilu ya Mulimu. Ku lu tusa kuli ku be bunolo ku luna ku sa ba ni buitati, mi hape ku lu tusa kuli lu itusise bupilo bwa luna ku sebeleza Mulimu ni ku tusa ba bañwi, mane hape ku lu tusa kuli lu sepe Mulimu ka ku tala ni Linzwi la hae. Ku zwa fo, ku lu fa kolo ya ku ituta se siñwi kwa miliko ye lu kopana ni yona ni ku tiisa tumelo ya luna.—9/15, makepe 24-25.

Mulimu u ka felisa cwañi Manyando?

Mulimu a tuha a tisa lifasi le linca mo ku ka yaha ku luka ili mo ku ka pila feela batu ba ba itatela ku bonisa lilato ku ba bañwi ni ku Mulimu. (2 Pit. 3:13) Ka ku ba Mulena wa kwa lihalimu, Jesu u ka felisa manyando kaufela. (Isa. 33:24; Sin. 21:4)—10/1, likepe 7

Ki bo mañi ba ba yemelwa ki “linaleli ze 7” ze mwa lizoho la Jesu la bulyo ze bulezwi kwa Sinulo 1:16, 20?

“Linaleli” li yemela baana-bahulu ba ba tozizwe kono hape ze bulelwa ka za baana-bahulu bao li kona ku talusa baana-bahulu kaufela ba mwa puteho.—10/15, likepe 14.

Ki likuka lifi ze ñwi za mwa Bibele ze lu tusa ku ziba mubonelo wa Mulimu ka za ku zuba kwai?

Mulimu u bata kuli lu kuteke bupilo. (Deut. 5:17) Mulimu u bata kuli lu mu late ni kuli lu late ba bañwi. (Mare. 12:28-31) U tokwa kuli lu ambuke mikwa ye masila. (2 Makor. 7:1)—10/1, likepe 15.

Jesu naa bonisize cwañi buikokobezo ku likana ni mo li boniseza liñolo la Isaya 50:4, 5?

Litimana zeo li bulela kuli mutu ya ‘lutilwe za ka bulela,’ naa si ke a ‘fetuhela kamba ku fulalela’ Mulimu. Jesu naa ikokobelize ni ku teeleza ka tokomelo ku za naa mu luta Ndatahe. Jesu naa tabela hahulu ku lutiwa ki Jehova, mi naa boni mwa naa boniselize buikokobezo Mulimu ka ku shemuba batu ba baezalibi.—11/15, likepe 11.

Ku bonisa sishemo ku kona ku lu tusa cwañi?

Ha lu bonisa sishemo kwa batu ba bañwi, lu ka ziba hande Mulimu mi nto yeo i lu tahiseza tabo. (1 Joa. 4:7; Mat. 5:7, 8) Ku zwa fo, Jehova wa itebuha ku lu bona inze lu bonisa sishemo ku ba bañwi. (Liprov. 19:17)—10/1, likepe 20.