Lu Zweleñipili Ku Pila Sina “Baenyi Mwa Lifasi”

“Na mi eleza ka ku ba bazwahule ni baenyi mwa lifasi kuli mu zwelepili ku ikambusa kwa litakazo za nama.”—1 PIT. 2:11.

MU KONA KU ALABA CWAÑI?

Ki kabakalañi ha lu kona ku bulela kuli ba ba tozizwe ki baenyi mwa lifasi?

Ba “lingu ze ñwi” ki baenyi mwa lifasi kamukwaufi?

Ki lika mañi ze mu nyolelwa kwapili?

1, 2. Ki bo mañi ba naa bizize Pitrosi kuli “batoziwa,” mi ki kabakalañi ha naa ba bizize kuli ki “baenyi mwa lifasi”?

IBATO ba hamulaho wa lilimo ze 30 ku zwa fa naa yezi Jesu kwa lihalimu, muapositola Pitrosi naa ñolezi liñolo kwa sikwata sa batu ba naa biza kuli “baenyi mwa lifasi” ba ne “ba hasani mwa Ponto, Galatia, Kapadosia, Asia, ni Bitinia.” Hape naa ba bizize kuli “ba ba ketilwe.” (1 Pit. 1:1) Pitrosi naa ñolela ba ba tozizwe, ba ne ba ‘pepilwe sinca kuli ba be ni sepo ye pila’ kuli ba yo ba malena ni Kreste kwa lihalimu. (Mu bale 1 Pitrosi 1:3, 4.) Kono ki kabakalañi Pitrosi hasamulaho ha naa bizize ba ba ketilwe bao kuli ki “bazwahule ni baenyi mwa lifasi.” (1 Pit. 2:11) Mi ki kabakalañi kaufelaa luna ha lu swanela ku iyakatwa za taba yeo hailifo ki palonyana feela ya Lipaki mwa lifasi kaufela ba ba bulela kuli ba tozizwe, kamba ba ketilwe?

² Nee li nto ye swanela ku biza ba ba tozizwe ba mwa miteñi ya baapositola kuli ki “baenyi mwa lifasi.” Ba ba tozizwe ha ba na ku pila fa lifasi ku ya ku ile. Muapositola Paulusi ya naa li yo muñwi wa ba ba tozizwe, kamba ba “mutapinyana” naa talusize kuli ba ba tozizwe ki bayahi ba lihalimu. Naa bulezi kuli: “Munzi wa luna u kwa mahalimu, mi ka ku nyolelwa lu libelezi mupilisi ya zwa kwateñi, yena Mulena Jesu Kreste.” (Luka 12:32; Mafil. 3:20) Taba yeo i bonisa kuli mutu ya tozizwe ha shwa, u siya lifasi le li zamaiswa ki Satani, mi u fiwa bupilo bo bu sa shwi mwa lihalimu. (Mu bale Mafilipi 1:21-23.) Bakeñisa kuli ba ba tozizwe ba pila feela nako ye kuswani fa lifasi, ki “baenyi mwa lifasi.”

3. Ki puzo mañi ye ama “lingu ze ñwi” ye lu swanela ku buza?

³ Ku cwañi ka za “lingu ze ñwi”? (Joa. 10:16) Bibele i luta kuli batu ba ba li “lingu ze ñwi” ba ka ba bayahi ba kamita fa lifasi. Ba ka pila fa lifasi ku ya ku ile. Kono ki kabakalañi ha lu kona ku bulela kuli batu ba ba li “lingu ze ñwi” ni bona ba swana sina “baenyi mwa lifasi”?

 “ZE BUPILWE KAUFELA LI ZWELAPILI KU TONGA”

4. Batu ba palezwi ku felisañi?

⁴ Bakeñisa kuli Jehova u sa tuhelezi lifasi le, le li maswe la Satani, kaufelaa luna, ku kopanyeleza ni Bakreste, lu ka zwelapili ku nyanda kabakala kuli Satani naa kwenuhezi Jehova. Kwa Maroma 8:22, lu bala kuli: “Lwa ziba kuli ze bupilwe kaufela li zwelapili ku tonga hamoho ni ku utwa butuku hamoho ku fitela cwale.” Ku na ni batu ba ba lata ku itusisa litaba za lipuso za naha, litaba za sayansi, kamba masheleñi kuli ba like ku cimbula mupilelo wa batu. Kono ha ba koni ku felisa manyando a batu.

5. Ku zwa ka 1914, batu ba bañata ba ikatulezi ku ezañi, mi ki kabakalañi?

⁵ Ku zwa ka silimo sa 1914, batu ba bañata ba ikatulezi ku busiwa ki Jesu Kreste, yena Mulena ya ketilwe ki Mulimu. Batu bao ba ba busiwa ki Jesu ha ba tabeli ku ba kalulo ya lifasi la Satani. Ha ba tabeli ku swalisana ni lifasi la Satani. Kono ba itusisa bupilo bwa bona ni lika ze ba na ni kwa ku tusa kuli za Mubuso wa Mulimu li zwelepili.—Maro. 14:7, 8.

6. Ki kabakalañi ha lu kona ku bulela kuli Lipaki za Jehova kaufela ki bazwahule, kamba baenyi mwa lifasi?

⁶ Lipaki za Jehova ki bayahi ba bande mwa linaha ze fitelela 200. Kono ku si na taba ni ko ba pila, Lipaki za Jehova ba swana sina bazwahule kamba baenyi mwa lifasi. Ha ba ikenyangi mwa litaba za lipuso za naha kamba ku latelela hahulu litaba ze ezahala mwa naha ya bona. Nihaiba ka nako ya cwale, ba ikunga kuli ki bayahi ba mwa lifasi le linca la sepisize Mulimu. Ba tabile ku ziba kuli ba ka ba baenyi mwa lifasi le li maswe le ka nakonyana.

7. Batanga ba Mulimu ba ka ba cwañi bayahi ba kamita, mi ki kakai ko ba ka pila sina bayahi ba kamita?

⁷ Hona cwale-cwale fa, Jesu Kreste u ka sinya lifasi la Satani le li maswe. Mubuso wa Kreste o munde u ka felisa sibi ni ku zwisa manyando kaufela. Hape u ka yundisa batu kaufela ba ba kwenuhela puso ya Jehova. Batu ba ba sepahala ku Mulimu, ba ka ba bayahi ba kamita ba mwa lifasi le li li Paradaisi. (Mu bale Sinulo 21:1-5.) Ka nako yeo, ze bupilwe li ka lukuluha ka ku tala kwa lika kaufela ze tisa manyando,  mi mutu kaufela u ka “fumana tukuluho ye makaza ya bana ba Mulimu.”—Maro. 8:21.

KI MUZAMAO O CWAÑI O BA SWANELA KU BA NI ONA BAKRESTE BA NITI

8, 9. Pitrosi naa talusañi ha naa bulezi kuli lu ikambuse kwa “litakazo za nama”?

⁸ Pitrosi u talusa mo ba swanela ku pilela Bakreste. U talusa kuli: “Balatiwa, na mi eleza ka ku ba bazwahule ni baenyi mwa lifasi kuli mu zwelepili ku ikambusa kwa litakazo za nama ze lwanisa moyo.” (1 Pit. 2:11) Pitrosi naa bulelela Bakreste ba ba tozizwe manzwi ao, kono batu ba ba li lingu ze ñwi za Jesu ni bona ba swanela ku latelela kelezo yeo.

⁹ Litakazo ze ñwi, kamba litakazo ze lu na ni zona, ha li si ka fosahala haiba feela lu li taleleza ka nzila ya bata Mubupi. Ku taleleza litakazo zeo ka nzila ya tabela Mulimu ku tahisa kuli lu ikole hahulu bupilo. Ka mutala, ha ku si ka fosahala ku ca sico se sinde ni ku nwa sino se sinde. Lwa banga ni tabo ka nako ye lu itabisanga ni ku ba hamoho ni balikani ba bande. Hape ha ku si ka fosahala ku ba ni takazo ya ku eza somano ni mutu yo nyalani ni yena. (1 Makor. 7:3-5) Pitrosi naa bulela za “litakazo za nama ze lwanisa moyo.” Pitrosi naa talusa litakazo na nama ze fosahalile. Mwa libibele ze ñwi, litakazo zeo li tolokilwe kuli “litakazo ze maswe” (Bibele ye Kenile, Hatiso ya 1984) kamba “litakazo za sibi” (Bibele ya New International Version). Jehova u lu bulelezi mo lu swanela ku pilela ni mwa ku taleleleza litakazo ze lu bupilwe ni zona. Ha lu swaneli ku tuhelela litakazo za luna ku sinya bulikani bwa luna ni Mulimu. Haiba lu taleleza litakazo za luna ka nzila ye maswe, lu ka shwa.

10. Ki lifi linzila za itusisa Satani kuli a like Bakreste kuli ba be ba lifasi?

¹⁰ Mulelo wa Satani ki wa ku fokolisa mubonelo o ba na ni ona Bakreste wa kuli ki “baenyi mwa lifasi” le. Satani u bata kuli lu late sifumu, lu eze buhule, lu ikutwe ku ba ba butokwa, lu be ba pili mwa lika kaufela, ni kuli lu ikuhumuseze hahulu naha ya luna. Kono lu swanela ku hupulanga kuli Satani u itusisa litakazo zeo kaufela sina tutwa. Haiba lu ikatulela ku sa latelela litakazo ze fosahalile zeo, lu bonisa hande kuli ha lu tabeli ku ba ba lifasi le li maswe la Satani. Lu bonisa kuli lu pila mwa lifasi le sina “baenyi mwa lifasi.” Ze lu bata luli ki ku ba bayahi ba kamita mwa lifasi le linca le li lukile la Mulimu. Mi lu lika ka mo lu konela kaufela kuli lu to pila mwa lifasi leo.

MUZAMAO O MUNDE

11, 12. Batu ba bañwi ba nga cwañi bazwahule, mi batu ba bañwi ba nga cwañi Lipaki?

¹¹ Pitrosi u zwelapili ku talusa mo ba swanela ku pilela Bakreste ba ba li “baenyi mwa lifasi.” U bulela cwana mwa timana 12: “Mu zwelepili ku ba ni muzamao o munde mwahalaa macaba, kuli ha ba mi tameleza ku ba lifosi, ite ba be lipaki ze iponezi misebezi ya mina ye minde, mi kabakaleo, ba kanyise Mulimu mwa lizazi la ku tatuba kwa hae.” Baenyi mwa naha ki bazwahule, kamba batu ba ba pila mwa naha ye si ya bona. Bazwahule fokuñwi ha ba eziwangi hande bakeñisa kuli ba shutana ni bayahi ba naha, mi ba ngiwanga ki batu ba bañwi kuli ki batu ba ba maswe. Mo ba bulelela, mo ba ezeza lika, mo ba tinela, kamba mane ni mo ba bonahalela ku kona ku tahisa kuli ba shutane ni batu ba ba li bayahi ba naha yeo. Kono muzamao wa bona o munde u kona ku tahisa kuli ba bañwi ba lemuhe kuli ki batu ba bande.

¹² Kamukwaoswana, Bakreste ba niti ba kona ku shutana ni batu ba bañata be ba pila ni bona mwa silalanda. Ka mutala, Bakreste ba kona ku ambola lika ze shutana ni ze ba ambolanga batu ba mwa lifasi kamba ku itabisa ka nzila ye shutana ni  mo ba itabisezanga ba lifasi. Hañata batu ba zibanga Bakreste bakeñisa mutinelo wa bona. Bakeñisa muezezo wa bona wa lika, batu ba bañwi ba kona ku tameleza Bakreste bufosi. Kono ba bañwi ba kona ku bulela ze nde ka za Lipaki bakeñisa muzamao wa bona o munde.

13, 14. Kiñi ze bonisa kuli “butali bu pakwa kuli bu lukile ka misebezi ya bona”? Mu taluse.

¹³ Muzamao wa luna o munde u kona ku tahisa kuli batu ba lemuhe kuli ha ku na libaka la ku lu “tameleza ku ba lifosi.” Jesu nee li yena feela mutu ya naa utwile Mulimu ka ku petahala. Kono mane ni yena Jesu naa tamelelizwe kuli naa ezize lika ze maswe. Ba bañwi ne ba bulezi kuli naa ca hahulu, naa nwa maswe, ni kuli naa swalisana ni baezalibi. Kono ka muzamao wa hae o munde, Jesu naa bonisize kuli naa si mutu ya maswe. Jesu naa ize: “Butali bu pakwa kuli bu lukile ka misebezi ya bona.” (Mat. 11:19) Kona mo ku inezi ni kacenu. Ka mutala, batu ba bañwi ba ba pila bukaufi ni Betele ye kwa Selters, mwa Germany, ba nga kuli mo ba pilela mizwale ni likaizeli ba fa Betele yeo ha ku swaneli. Kono muzamaisi wa tolopo ya Selters naa yemezi lubasi lwa Betele ka ku bulela kuli: “Lipaki ba ba pila fa Betele ya kwa Selters ba pila bupilo bwa bona, mi mupilelo wa bona ha u filikanyi batu ba ba mwa silalanda.”

¹⁴ Mutala o muñwi hape ki wa Lipaki za Jehova ba ba pila kwa Moscow, ili mwa Russia. Lipaki bao ne ba tamelelizwe lika ze maswe ze ñata. Ba bañwi ne ba bulezi kuli Lipaki ne ba sinyize mabasi, ne ba kukuelize batu kuli ba ipulaye, ni kuli ne ba hanile ku alafiwa. Kono la June 10, 2010, Kuta ya Mwa Europe ye Talima Litaba ze Ama Liswanelo za Sicaba (European Court of Human Rights) ya mwa Strasbourg, kwa France, ne i atuzi kuli tolopo ya Moscow ne i fosize ku filikanya Lipaki za Jehova mwa tolopo yeo, mi ne i si na tukelo ya ku tuhelisa Lipaki ku banga ni mikopano ya bona. Kuta yeo ne i bulezi kuli likuta za mwa Russia ne li si na bupaki bo bu bonisa kuli Lipaki ne ba naa ni mulatu wa muzamao o maswe. Kuta yeo hape ne i bulezi kuli likuta zeo ne li itusisize milao ye taata ya mwa Moscow ka nzila ye ne si ka luka kwa Lipaki za Jehova.

LU SWANELA KU IPEYA KWATASAA MILONGA

15. Ki likuka mañi za mwa Bibele ze ba latelela Bakreste ba niti?

¹⁵ Lipaki za Jehova mwa lifasi kaufela ba eza ze ba swanela ku eza Bakreste za naa bulezi Pitrosi. Naa bulezi kuli lu swanela ku ‘ipeya kwatasaa zamaiso kaufela ya butu,’ ku kopanyeleza cwalo ni malena ni babusi ba milonga. (1 Pit. 2:13, 14) Ka ku ba Bakreste ba niti, ha lu ba lifasi le li maswe le. Kono sina mwa naa lu bulelezi Paulusi, lwa itatela ku utwa milonga ye li teñi mwa libaka za yona ka nakonyana mi lwa utwanga milonga yeo ibile feela kuli milao ya milonga yeo ha i lwanisi milao ya Mulimu.—Mu bale Maroma 13:1, 5-7.

16, 17. (a) Kiñi ze bonisa kuli ha lu tabeli ku kwenuhela milonga? (b) Babusi ba bañwi ba milonga ba itumeleziñi?

 ¹⁶ Lipaki za Jehova ba pila sina “baenyi mwa lifasi” le, kono ha ba ezi cwalo ka mulelo wa ku lwanisa mulonga mi hape ha ba ngi batu ba bañwi ka nzila ye maswe. Lipaki ba utwisisa kuli batu ba bañwi ba na ni mibonelo ya bona ka za kuli ki mañi ya swanela ku busa ni ka za kuli miinelo ye taata i konwa ku tatululwa cwañi. Bulapeli bo buñwi bwa ikenyanga mwa litaba za lipuso za naha, kono Lipaki za Jehova bona ha ba ezangi cwalo. Lipaki ni kamuta ha ba bulelelangi baeteleli ba lipuso za naha kuli ba cince mo ba buseza batu. Kaniti luli Lipaki za Jehova ha ba tabeli ku kwenuhela mulonga kamba ku kukueza batu ba bañwi kuli ba eze cwalo.

¹⁷ Pitrosi naa bulezi kuli lu “kuteke mulena.” Kamukwaocwalo, Bakreste ba utwa babusi ba milonga ilikuli ba ba kuteke. (1 Pit. 2:17) Ka linako ze ñwi, babusi ba milonga ba itumelezi kuli ha ku na libaka le li bonisa kuli Lipaki za Jehova ki batu ba ba maswe. Ka mutala, Steffen Reiche, ya naa banga mwa mubuso o no busa mwa sibaka sa Brandenburg, kwa Germany, ili yo hape naa tilo ba nduna mwa ndu ya milao ya kwa German, naa bulezi kuli Lipaki za Jehova be ne ba li mwa minganda ni mwa litolongo ne ba latelezi likuka ze nde ili za butokwa nihaiba kacenu. Lipaki za Jehova ne ba si ka cinca litumelo za bona ku si na taba kuli ne ba nyandisizwe, mi ne ba pilisana hande ni be ne ba li ni bona mwa tolongo. Steffen Reiche hape naa bulezi kuli ne ku li kwa butokwa kuli batu ba ba pila mwa Germany ba be ni tulemeno to ne ba bonisize Lipaki za Jehova, sihulu ka bakeñisa kuli batu ba bañwi ne ba sa ezangi hande batu ba ba zwa kwa linaha li sili kamba batu be ne ba naa ni litumelo ni mibonelo ya litaba za lipuso za naha ze shutana ni za bona.

LU BONISE LILATO

18. (a) Ki kabakalañi ha ku li ko ku bunolo ku luna ku lata mizwale ni likaizeli ba luna kaufela? (b) Batu ba bañwi ba buleziñi ka za Lipaki za Jehova?

¹⁸ Muapositola Pitrosi naa ñozi kuli: “Mu late kopano ya mizwale ba mina kaufela, mu sabe Mulimu.” (1 Pit. 2:17) Lipaki za Jehova ba saba Mulimu, ili nto ye ba tusa ku saba ku eza nto ifi kamba ifi ya sa tabeli Mulimu. Likute leo le ba na ni ku Mulimu li ba tahiseza kuli ba eze tato ya hae. Ba na ni tabo ya ku ba mwahalaa sikwata sa mizwale ni likaizeli ba mwa lifasi kaufela ba ba sebeleza Jehova hamoho. Ba lata ‘kopano ya mizwale ba bona kaufela.’ Mwa lifasi la kacenu, ki batu ba sikai ba ba bonisanga lilato ku ba bañwi. Kona libaka batu ba ba si Lipaki ha ba komokanga fokuñwi ku bona mo lu boniseza lilato mwahalaa luna. Ka mutala, mupotisi wa baenyi yo muñwi ya naa sebeza mwa kampani ya kwa America ye bona za misipili naa komokile hahulu ha naa boni lilato le ne ba bonisana Lipaki be ne ba ile kwa mukopano wa macaba wa kwa Germany ka silimo sa 2009. Lipaki ba mwa Germany ne ba bonisize lilato kwa mizwale ba bona be ne ba zwa kwa linaha li sili, mi ne ba ba tusize. Mupotisi yo naa bulezi ka mafulofulo kuli a li ku ba a bone sikwata se si swana ni sa Lipaki za Jehova. Kana mu kile mwa utwa batu ba ba bulela mwa naa bulelezi mupotisi yo hamulaho wa ku bona sikwata sa Lipaki?

19. Lu swanela ku ikatulela ku ezañi, mi ki kabakalañi?

¹⁹ Sina mo lu itutezi, Lipaki za Jehova ba bonisa mwa linzila ze ñata kuli ki “baenyi mwa lifasi” le la Satani. Ba eza cwalo ka tabo mi ba ikatulezi ku zwelapili ku ba “baenyi mwa lifasi.” Ba na ni mabaka a mande a ku ba ni sepo ye tiile ya kuli hona cwale-cwale fa, ba ka ba ba bayahi ba kamita mwa lifasi le linca la Mulimu. Kana mwa nyolelwa ku to pila mwa lifasi leo?

[Lipuzo za Tuto]

[Siswaniso se si fa likepe 20]

Ha lu tabeli ku swalisana ni lifasi la Satani

[Siswaniso se si fa likepe 20]

Lu yemela lifasi le linca la Mulimu

[Siswaniso se si fa likepe 22]

Niti ya mwa Bibele i tusize lubasi lo lwa mwa Russia ku swalisana