Mu Tokomele ku Itusisa Bibele ka Mafosisa

“LINZWI la Mulimu la pila mi li na ni maata” (Maheb. 4:12) Ka manzwi ao, muapositola Paulusi naa koñomekile kuli Linzwi la Mulimu li maata mi li fita kwa lipilu za batu mi la kona ku cinca bupilo bwa bona.

Mubonelo wa kuli lushango lwa mwa Bibele lu na ni maata se u ngilwe ka nzila i sili, mi bukwenuheli bo ne bu polofitilwe ne bu bonahezi hamulaho wa lifu la baapositola. (2 Pit. 2:1-3) Nako ha ne inze i ya, ba bahulu ba bulapeli ba kalisa ku itusisa Linzwi la Mulimu mwa ku eza mabibo. Muituti yo muñwi ya naa cuukile hahulu mwa litaba za bulapeli ya bizwa Professor Harry Y. Gamble naa ñozi ka za mo “mañolo a Sikreste naa itusisezwa ka mabibo.” Muituti yo naa lemuhile kuli mwa lilimo za ma 200 C.E., yo muhulu wa bulapeli bo buñwi naa bulezi kuli “ka nzila ye ñwi, batu ba kona ku tusiwa ki ku utwa feela manzwi a kenile inze a bulelwa.” A ekeza kuli “haiba manzwi a litaba za mabibo a maata, mu zibe manzwi a fumaneha mwa mañolo a maata hahulu ni ku fita.” John Chrysostom ya naa pilile kwa mafelelezo a lilimo za ma 300 C.E., naa ñozi kuli “Diabulosi ki mwa ka shwela ku kena mwa ndu mo ku na ni buka ya Evangeli.” Hape naa bihile kuli batu ba bañwi ba tamanga tupepa to tu kumuzwi mwa libuka za Evangeli mwa milala ya bona. Caziba ya bizwa Gamble ni yena naa lemuhile kuli mulapeli wa mukatolika ya bizwa Augustine “naa lumela kuli mutu ha kula toho, wa kona ku lobala inze a samile buka ya Evangeli ya Joani”! Ka ku eza cwalo, libuka za Bibele ne li itusiswa ka mabibo. Kana ne mu ka nga Bibele kuli ki muulu, kamba sina nto ye mi fa matohonolo, ili ye kona ku mi sileleza kwa bumaswe?

Mwendi muitusisezo o fosahezi ili o atile hahulu ki wa ku i tusisa Bibele ka ku nuha. Ki ufi ona wo? Ki mukwa wa ku apula Bibele mutu a sa zibi ni ku bala feela fa apuzi, mi u bala manzwi ao ka mulelo wa ku nahana kuli a ka mu tusa. Ka mutala, Caziba ya bizwa Gamble u talusa kuli Augustine ka nako ye ñwi ha naa utwile linzwi la mwanana wa mwa silalanda ya naa bulela kuli: “Inga u bale, inga u bale,” Augustine naa nahanile kuli manzwi ao naa talusa kuli naa swanela ku nga Bibele ni ku bala manzwi a pili a naa ka bona.

Kana mu kile mwa utwa batu ba ne ba lapezi ku Mulimu ha ne ba li mwa muinelo o taata mi kihona ba apula Bibele ka ku lumela kuli timana ya pili ye ne ba ka bona ne i ka ba tusa ku tiyela butata bwa bona? Nihaike kuli mwendi ba kana ba nahana kuli ku eza cwalo ku ka ba tusa, Bakreste ha ba swaneli ku bata tuso mwa mañolo ka ku itusisa muezezo wo.

Jesu naa sepisize balutiwa ba hae kuli naa ka lumela “mutusi, ona moya o kenile.” Mi naa zwezipili ku bulela kuli: “Ona u ka mi luta lika kaufela ni ku mi hupulisa lika kaufela ze ni mi bulelezi.” (Joa. 14:26) Kono ku itusisa Bibele ka mafosisa ha ku tokwi kuli mutu a be ni zibo ya mwa mañolo.

Ku itusisa Bibele ka mafosisa ku a tile hahulu. Kono Linzwi la Mulimu ha li lumelezi ku itusisa bulauli. (Liv. 19:26; Deut. 18:9-12; Lik. 19:19) Bakeñisa kuli “linzwi la Mulimu la pila mi li na ni maata,” lu swanela ku itusisa lona hande. Nto ye kona ku tusa batu ku cinca bupilo bwa bona ki zibo ye nepahezi ya mwa Bibele isiñi ku itusisa Bibele ka mafosisa. Ku ba ni zibo ye nepahezi ya Bibele ku tusize batu ba bañata ku ikola bupilo bo bunde, ku tuhela mupilelo wa bona o maswe, ku tiisa bupilo bwa mwa lubasi lwa bona, ni ku tiisa silikani sa bona ni Musimululi wa Bibele.