Tawala ya Mulibeleli ya Sikuwa se si Nolofalizwe Mulelo wa Yona ki Ufi?

KA LILIMO ze ñata, batu mwa lifasi kaufela ba tusizwe ki litaba ze ba balanga mwa magazini ya Tawala ya Mulibeleli. Mwa kweli ya July, ili ka silimo sa 2011, hatiso ya Tawala ya Mulibeleli ya ku ituta ya sikuwa se si nolofalizwe ne i kalile ku hatiswa. Mwa hatiso yeo ya pili ne ku talusizwe kuli: “Hatiso ye nca ye i ka hatiswa ka silimo si li siñwi mi haiba i bonahala kuli ya tusa, i ka zwelapili ku hatiswanga.”

Lu ba ba tabile ku mi zibisa kuli hatiso yeo i ka zwelapili ku hatiswanga. Tawala ya Mulibeleli yeo hape i ka hatiswanga mwa Sifura, Siputukisi, ni Spanish.

LIBAKA BATU HA BA TABELA HATISO YE

Batu bañwi ba ba pila kwa South Pacific ne ba ñozi kuli Tawala ya Mulibeleli ya sikuwa se si nolofalizwe i tusize mizwale ba ba pila kwa sibaka ko ku utwisisa hande litaba ze hatiswanga mwa Tawala ya Mulibeleli. Kaizeli ya pila kwa naha ye ñwi naa ñozi kuli pili hatiso yeo i si ka taha kale, yena ni lubasi lwa hae ne ba tandanga nako ye ñata ku bata litaluso za manzwi mwa dikishinari ni ku lika ku utwisisa lipulelo ze ne itusiswanga mwa litaba za ku ituta. Kono cwale se ba itusisanga nako yeo kwa ku utwisisa mañolo a bonisizwe ni libaka mañolo ao ha itusisizwe mwa litaba za ku ituta.

Kaizeli ya pila kwa United States ya naa itutile kwa Yunivesiti naa bulezi kuli ka lilimo ze 18, naa bulelanga ni ku ñola lika ze konwa ku utwisiswa feela ki batu ba ba itutile hahulu. Kaizeli yo naa bulezi kuli: “Ne ni bile ni mukwa wa ku bulelanga ni ku nahana ka nzila ye ne ba sa koni ku utwisisa ba bañwi. Ne ni lemuhile kuli ne ni tokwa ku eza cinceho ye tuna mwa munahanelo ni mubulelelo wa ka.” Tawala ya Mulibeleli ya sikuwa se si nolofalizwe ne i tusize kaizeli yo ku ba muluti yo munde wa Bibele. Kaizeli yo u talusa  kuli: “Tawala ya Mulibeleli ya sikuwa se si nolofalizwe i ni tusize hahulu. Ku nolofazwa kwa hatiso yeo ku ni tusize ku nolofazanga litaba ze ni luta ba bañwi.”

Kaizeli ya pila kwa England ya naa kolobelizwe ka silimo sa 1972, naa ñozi cwana ka za Tawala ya Mulibeleli ya sikuwa se si nolofalizwe: “Ha ne ni balile hatiso ya pili ya mwa Tawala ya Mulibeleli yeo, ne ni ikutwile inge kuli Jehova naa inzi kwatuko ni na inze a ni sweli fa maheta mi ne ni ikutwa inge kuli ne lu bala hatiso yeo hamoho. Ne ku swana feela inge ndate ya balela mwanaa hae likande pili a si ka pumula kale.”

Kaizeli ya sebeleza fa Betele ya mwa United States ili ya naa kolobelizwe lilimo ze fitelela 40 kwamulaho, naa bulezi kuli hatiso ya sikuwa se si nolofalizwe i mu tusize ku utwisisa hande Bibele. Ka mutala, mbokisi ye li “Taluso ya Lipulelo ze Ñwi” ye ne hatisizwe mwa Tawala ya Mulibeleli ya sikuwa ya September 15, 2011, ne i file taluso ya pulelo ya “lilu le lituna la lipaki” ye kwa Maheberu 12:1. Mbokisi yeo ne i talusize kuli: “Lipaki bao nee li ba bañata kuli mane ne ba sa koni ku baliwa.” Kaizeli yo naa bulezi kuli taluso yeo ne i mu tusize ku utwisisa hande timana yeo. Hape naa ñozi ka za Tawala ya Mulibeleli ye itutiwanga ka sunda ni sunda. Kaizeli yo hape naa bulezi kuli mwanana niha fa kalabo ka ku bala mwa hatiso ya sikuwa se si nolofalizwe, manzwi a mwa hatiso yeo a shutana ni manzwi a mwa Tawala ya Mulibeleli ya sikuwa se si si ka nolofazwa. Likalabo za fanga mwanana za tabisanga.

Kaizeli yo muñwi ya sebeleza fa Betele naa ñozi kuli ka nako ya cwale u ikolanga hahulu likalabo ze ba fanga banana mwa puteho. Tawala ya Mulibeleli ya sikuwa se si nolofalizwe i tusize banana ku fanga likalabo ze zwelela kwa lipilu za bona. Kaizeli yo u  ekeza kuli: “Likalabo ze ba fanga banana bao za ni susuezanga.”

Kaizeli ya naa kolobelizwe ka silimo sa 1984 naa ñozi cwana ka mwa itebuhela hatiso ya sikuwa se si nolofalizwe: “Ni ikutwa kuli hatiso ye, ne i ñolezwi feela na. Ku ni belanga hahulu bunolo ku utwisisa litaba ze ni balanga. Se ni ikutwa kuli na kona ku alaba ka nako ya tuto ya Tawala ya Mulibeleli.”

HATISO YE BA ITEBUHA BASHEMI

Me ya na ni mwanaa mushimani wa lilimo ze supile naa bulezi kuli: “Pili hatiso ya sikuwa se si nolofalizwe i si ka taha kale, ku itukiseza Tawala ya Mulibeleli ni mwanaka ne ku ni katalisanga kakuli ne ni tandanga nako ye ñata ku bulelela mwanaka litaluso za manzwi a mwa magazini ya Tawala ya Mulibeleli.” Hatiso ya sikuwa se si nolofalizwe ne i tusize cwañi me yo? Me yo u li: “Ni komokile kuli mwanaka ka nako ye wa kona ku bala maparagilafu ni ku utwisisa luli za bala. Mi bakeñisa kuli manzwi a nolofalizwe mi mibamba ki ye mikuswani, ku bunolo hahulu ku yena ku utwisisa litaba ze mwa hatiso yeo. U kalile ku itukisezanga a nosi likalabo za ka yo fa kwa mikopano, mi u isanga hahulu pilu kwa hatiso yeo mwa nako kaufela ya tuto ya Tawala ya Mulibeleli.”

Me ya na ni mwanaa musizana wa lilimo ze 9 naa ñozi kuli: “Kwa makalelo, ne lu tusanga mwanaa luna ku fumana likalabo za mwa Tawala ya Mulibeleli. Kono cwale sa itukisezanga a nosi.” Bashemi bao ha ba sa tokwanga ku tusa mwanaa bona ku utwisisa ze mwa hatiso yeo bakeñisa kuli sa kona ku li utwisisa a nosi. Mwanaa bona yo sa ikolanga hahulu tuto ya Tawala ya Mulibeleli.

MO BA IKUTWELA BANANA

Banana ba bañata ba ikutwa kuli Tawala ya Mulibeleli ya sikuwa se si nolofalizwe i lukiselizwe bona. Rebecca, ya na ni lilimo ze 12 naa ñozi kuli: “Ni kupa kuli mu zwelepili ku hatisanga hatiso ye nca ye! Ni tabela hahulu kalulo ye li ‘Taluso ya Lipulelo ze Ñwi.’ Banana ba i utwisisa hande.”

Nicolette, ya na ni lilimo ze supile u ikutwa mwa ikutwela Rebecca. Nicolette u li: “Ne ku ni belanga taata ku utwisisa Tawala ya Mulibeleli. Kono cwale se ni kona ku fa likalabo ni sa tusiwi ki yo muñwi.” Emma, ya na ni lilimo ze 9 naa ñozi kuli: “Hatiso ye i lu tusize hahulu ni munyanaa ka wa mushimani wa lilimo ze silezi. Se lu kona ku utwisisa hande litaba za mwa hatiso yeo. Lu itumezi!”

Kaniti, batu ba bañata ba tusiwa ki hatiso ya Tawala ya Mulibeleli ye ñozwi ka ku itusisa manzwi ni mibamba ye ba kona ku utwisisa ka bunolo. Hatiso ya sikuwa se si nolofalizwe i tusa batu ba bañata ku utwisisa hande Bibele mi i ka zwelapili ku hatiswanga hamoho ni hatiso ya sikuwa se si si ka nolofazwa ye se tusize batu ba bañata ku zwa feela ka silimo sa 1879.

[Manzwi a fa likepe 30]

“Nako ye ne lu tandanga ku bata litaluso za manzwi mwa dikishinari ni ku lika ku utwisisa lipulelo ze ne itusiswanga mwa litaba za ku ituta se i itusiswanga kwa ku utwisisa mañolo a bonisizwe ni libaka mañolo ao ha itusisizwe mwa litaba za ku ituta”

[Manzwi a fa likepe 31]

“Ni komokile kuli mwanaka ka nako ye wa kona ku bala maparagilafu ni ku utwisisa luli za bala”