Mu Ine Mwa Musindi Wa Jehova Kuli Mu Silelezwe

“Muñaa Bupilo u ka . . . lwanisa macaba ao, mwa lwanela ka lizazi la ndwa.”—ZAK. 14:3.

KANA MWA KONA KU TALUSA?

Ku pazuha kwa “lilundu la likota za olive” ku swanisezañi?

“Musindi o mutuna hahulu” u yemelañi, mi lu kona ku ina cwañi mwa musindi wo?

“Mezi aa welauka” ki nto mañi, mi ki bo mañi ba ba tusiwa ka ku nwa mezi ao?

1, 2. Ki ifi ndwa ya luli ye tuha i tumbuka, mi kiñi ze lu si ke lwa eza mwa ndwa ye?

LA OCTOBER 30, 1938, batu ba bañata mwa United States ne ba teeleza kwa progilamu ye ñwi ya fa wayalesi. Progilamu yeo ha ne inze i zwelapili, batu be ne ba bapala mwa progilamu yeo sina babihi ba makande ne ba bihile kuli ku na ni libupiwa ze zwa kwa pulaneti ya Mars ze bata ku to taseza lifasi ni ku li sinya. Nihaike kuli ne ku zibisizwe kuli progilamu yeo ya fa wayalesi ne li papali feela, bateelezi ba bañata ne ba nahanile kuli taba yeo ne li ya niti mi ne ba sabile hahulu. Ba bañwi mane ne ba ngile mihato ya ku isileleza kwa libupiwa zeo za ku ikupulela.

² Hona cwale-cwale fa, ndwa ya luli i tuha i tumbuka. Kono batu ba bañata ha ba itukisezi ndwa yeo. Ndwa yeo ki ndwa ya Armagedoni ili ndwa ya Mulimu ya ku lwanisa batu ba ba maswe. Mi ndwa yeo haki ya buhata. Lwa ziba kuli ndwa yeo i ka tumbuka kakuli Mulimu u lu bulelezi za yona mwa Linzwi la hae, yona Bibele. (Sin. 16:14-16) Luna ha lu na ku lwana mwa ndwa yeo, kono Jehova ki yena ya ka itusisa maata a hae kuli a lu puluse ka nzila ye makaza.

3. Ki bupolofita mañi bo lu ka nyakisisa, mi ki kabakalañi bupolofita bo ha bu li bwa butokwa kacenu?

³ Bupolofita bo lu bala kwa Zakaria kauhanyo 14, bu lu bulelela ze ñata ka za ndwa ya Armagedoni. Nihaike kuli se ku fitile lilimo ze 2,500 ku zwa fo ne bu ñolezwi bupolofita bo, litaba ze ñozwi mwateñi ki za butokwa hahulu. (Maro. 15:4) Bupolofita bo, bu talusa ze ezahezi kwa batu ba Mulimu ku zwa fa kalezi ku busa Kreste ka 1914 mwa lihalimu. Hape bu lu bulelela za lika ze tabisa ze tuha li  ezahala. Bupolofita bo, bu lu bulelela za “musindi o mutuna hahulu” ni za “mezi aa welauka.” (Zak. 14:4, 8) Mwa taba mo, lu ka ituta kuli musindi wo ki nto mañi, mi hape lu ka ituta mo ba kona ku silelezwa balapeli ba Jehova mwa musindi wo. Ku zwa fo, lu ka ituta kuli “mezi aa welauka” ki nto mañi, ni mo lu kona ku tusezwa ki mezi ao. Kwandaa ku lemuha kuli lu tokwa “mezi aa welauka” ao, ku ziba taluso ya mezi hape ku ka lu fa takazo ya ku nwa mezi ao. Ha lu nyakisiseñi bupolofita bo ka tokomelo.—2 Pit. 1:19, 20.

“LIZAZI LA MUÑAA BUPILO” LA KALISA

4. (a) “Lizazi la Muñaa Bupilo” ne li kalile lili? (b) Bakreste ba ba tozizwe ne ba kutalize lushango mañi ka lilimo ze ñata, mi baeteleli ba linaha ni ba bulapeli ne ba ikutwile cwañi?

⁴ Bupolofita bo bu mwa liñolo la Zakaria kauhanyo 14 bu kalisa ka manzwi a li: “Ki le, la ta lizazi la Muñaa Bupilo.” (Mu bale Zakaria 14:1, 2.) Ki lizazi lifi lona leo? Ki “lizazi la Mulena,” le ne li kalile ka silimo sa 1914 fa naa kalezi Jesu ku busa sina Mulena wa Mubuso wa Mulimu mwa lihalimu. (Sin. 1:10; 11:15) Ka lilimo-limo, Bakreste ba ba tozizwe ne ba kutalize kuli mafelelezo a “linako ze tomilwe za macaba” naa ka taha mwa silimo sa 1914. Hape ne ba kutalize kuli ku zwa ka silimo seo, ne ku ka ba ni miinelo ye taata mwa lifasi ye ne si ka bonwa kale. (Luka 21:24) Kana “macaba” naa mamezi temuso yeo? Kutokwa. Mane baeteleli ba linaha ni ba bahulu ba bulapeli ne ba nyandisize Bakreste bao. Ka ku nyandisa Bakreste bao, baeteleli bao ne ba sheununa Mulimu ya Maata Ote, bakeñisa kuli Bakreste ba ba tozizwe ba yemela Mubuso wa Mulimu.—Maheb. 12:22, 28.

5, 6. (a) Lila za batu ba Mulimu ne li ezizeñi? (b) Ki bo mañi be ne ba “siyezi” ili be ne ba hanile ku “zwisiwa mwa munzi”?

⁵ Zakaria naa polofitile ze ne li ka eza lila za batu ba Mulimu. Na ize: “Munzi u ka hapiwa.” “Munzi” wa Jerusalema u swaniseza Mubuso wa Mulimu. Bakreste ba ba tozizwe ba ba sa li fa lifasi ki kalulo ya Mubuso wa Mulimu. (Mafil. 3:20) Munzi ne u ‘hapilwe’ ka nako ya Ndwa ya Lifasi ya Pili ili fo mizwale be ne ba na ni buikalabelo bo butuna mwa kopano ya Jehova ne ba tamilwe ni ku beiwa mwa tolongo kwa Atlanta, Georgia, ili kwa U.S.A. Lila ne li ezize maswe Bakreste ba ba tozizwe ka ku ba kwalela ku hatisa ni ku abela lihatiso, mi lila zeo hape ne li likile ku tuhelisa Bakreste ba ba tozizwe ku kutaza. Ne ku swana feela inge kuli lila ne li taselize mandu a mwa muleneñi.

⁶ Nihaike kuli lila ze maata ne li nyandisize batu ba Mulimu ni ku ba tameleza litaba, lila zeo ne li palezwi ku sinya bulapeli bwa niti. Ku na ni Bakreste ba ba tozizwe be ne ba zwezipili ku sepahala. Sina mwa naa bulelezi Zakaria, Bakreste bao ki bona be ne “ba siyezi” ili be ne ba hanile ku “zwisiwa mwa munzi.”

7. Bakreste ba ba tozizwe ba lu tomezi mutala mañi kacenu?

⁷ Kana lila ne li tuhezi ku nyandisa batu ba Mulimu Ndwa ya Lifasi ya Pili ha ne i felile? Kutokwa. Nyandiso ya naa polofitile Zakaria ne i zwezipili. (Sin. 12:17) Ka mutala, mizwale ba luna ne ba nyandisizwe hahulu ka nako ya Ndwa ya Lifasi ya Bubeli. Ku sepahala kwa Bakreste ba ba tozizwe ku swanela ku lu susueza ku itiisa ha lu li mwa miinelo ye taata. Miinelo yeo i kopanyeleza ku lwaniswa ki batu be lu pila ni bona, be lu beleka ni bona, ni ku sheununwa ki  batu be lu kena ni bona sikolo bakeñisa tumelo ya luna. (1 Pit. 1:6, 7) Ku si na taba ni ko lu pila, lu ikatulezi ku zwelapili ku sepahala ni ku sa sabiswa ki batu ba ba lu lwanisa. (Mafil. 1:27, 28) Kono lu kona ku silelezwa cwañi mwa lifasi le li lu toile?—Joa. 15:17-19.

JEHOVA U EZA “MUSINDI O MUTUNA HAHULU”

8. (a) Mwa Bibele, malundu fokuñwi a yemelangañi? (b) “Lilundu la likota za olive” li yemelañi?

⁸ Mwa bupolofita bo, lu itutile kuli “munzi,” kamba Jerusalema, u swaniseza Mubuso wa Mulimu. “Lilundu la likota za Olive le li bapani ni Jerusalema” lona li swanisezañi? Lilundu leo li ka “pazuha” cwañi ni ku ba malundu a mabeli? Mi ki kabakalañi Jehova ha biza malundu ao kuli ki a hae? (Mu bale Zakaria 14:3-5.) Mwa Bibele, malundu fokuñwi a yemelanga mibuso, kamba milonga. Bibele hape i kuta-kutela ku bulela kuli limbuyoti ni silelezo li zwa kwa lilundu la Mulimu. (Samu 72:3; Isa. 25:6, 7) Kamukwaocwalo, lilundu la likota za olive li yemela bubusi bwa Jehova mwa pupo kaufela.

9. Ku “pazuha” fahali kwa lilundu la likota za olive ku talusañi?

⁹ Bupolofita bu bulela kuli Lilundu la likota za olive ne li ‘pazuhile’ fahali. Ku pazuha ko, ku talusañi? Ku talusa kuli Jehova u toma bubusi bo buñwi kuli a pete mulelo wa butokwa. Bubusi bo ni bona ki bwa Mulimu, mi Jesu Kreste ki yena Mulena wa Mubuso wo. Bakeñisa kuli mibuso yeo kaufela ki ya Jehova, kona libaka Jehova ha biza malundu ao kuli “malundu a ka.”—Zak. 14:4.

10. “Musindi o mutuna hahulu” o mwahalaa malundu a mabeli u swanisezañi?

¹⁰ Ka ku ya ka bupolofita, lilundu la likota za olive ha li pazuha, ili ku tahisa kuli neku le liñwi la lilundu li sutelele kwa Mutulo, le liñwi li sutelele kwa Mboela, mahutu a Jehova a hatile fa malundu a mabeli ao. Ku pazuha ko kwa malundu ku tahisa kuli ku be ni “musindi o mutuna hahulu” mwatasaa mahutu a Jehova. Musindi wo ki nto mañi? Musindi wo u swaniseza silelezo ya lu fa Mulimu. Sina feela batu mo ba kona ku silelezwa mwa musindi o mwahalaa malundu a mabeli, batu ba Jehova ba silelezwa ka ku busiwa ki Jehova ni mwanaa hae. Jehova ha na ku tuhelela kuli bulapeli bwa niti bu sinyiwe. Lilundu la likota za olive ne li pazuhile lili? Ne li pazuhile ka silimo sa 1914 ili fa naa kalezi Jesu ku busa mwa lihalimu. Bupolofita hape bu bonisa kuli batu ba Jehova ba ka sabela kwa “musindi o mutuna” wo. Balapeli ba Jehova ne ba kalile lili ku sabela kwa musindi wo?

BATU BA MULIMU BA KALISA KU SABELA KWA MUSINDI!

11, 12. (a) Batu ba Mulimu ne ba kalile lili ku sabela kwa musindi? (b) Ki nto mañi ye bonisa kuli Jehova u sileleza batu ba hae?

¹¹ Jesu naa lemusize balateleli ba hae kuli: “Mu ka toiwa ki macaba kaufela kabakala libizo la ka.” (Mat. 24:9) Sitoyo seo ne si bile se situna hahulu ku zwa feela ka silimo sa 1914, fa naa kalezi mazazi a maungulelo. Ka nako ya Ndwa ya Lifasi ya Pili, lila ne li nyandisize hahulu Bakreste ba ba tozizwe ba ba sepahala, kono lila zeo ne li palezwi ku felisa bulapeli bwa niti. Ka silimo sa 1919, batu ba Mulimu ne ba lukuluhile kwa bulapeli bwa buhata, ili ku talusa Babilona yo Mutuna. (Sin. 11:11, 12) * Ne li ka silimo seo fo batu ba Mulimu ne ba kalile ku sabela kwa musindi.

 ¹² Ku zwa ka silimo sa 1919, Jehova u zwezipili ku sileleza balapeli ba niti mwa lifasi kaufela. Ka lilimo-limo, mibuso ye miñata i likile ku tuhelisa Lipaki za Jehova ku kutaza kamba ku lika ku ba kwalela musebezi wa bona wa ku hatisa ni ku abela lihatiso. Miinelo yeo i sa zwelapili mwa linaha ze ñwi. Kono Jehova ha si ka tuhelela mibuso yeo ku felisa bulapeli bwa niti. Ku si na taba ni ze ba kona ku eza babusi ba lifasi, Jehova u ka zwelapili ku itusisa maata a hae a matuna ka ku fitisisa kuli a sileleze batu ba hae.—Deut. 11:2.

13. Ki nto mañi ye kona ku lu tusa ku silelezwa mwa musindi wa Jehova, mi ki kabakalañi ha ku li kwa butokwa cwale kuli lu be mwa musindi wo?

¹³ Haiba lu zwelapili ku sepahala ku Jehova, lu ka zwelapili ku silelezwa mwa musindi wa hae. Jehova ni Mwanaa hae Jesu Kreste ha ba na ku tuhelela nto ifi kamba ifi ku lu palelwisa ku silelezwa ki bona. (Joa. 10:28, 29) Jehova u lu tusa ku zwelapili ku yemela bubusi bwa hae ni bwa Mwanaa hae. Lu ka tokwa ku tusiwa ki Jehova sihulu ka nako ya ñalelwa ye tuna ye sutelezi. Kamukwaocwalo, ki kwa butokwa hahulu cwale kuli lu zwelepili ku silelezwa mwa musindi wa Jehova.

“LIZAZI LA NDWA” LI FITILE

14, 15. Fa lizazi la ka lwanisa lila za hae Jehova, ku ka ezahalañi kwa batu ba ba siyo mwa musindi wa hae wa silelezo?

¹⁴ Mafelelezo a lifasi le li maswe le ha nze a atumela, Satani u ka lwanisa hahulu batu ba Mulimu. Satani a tuha a lwanisa batu ba Mulimu lwa mafelelezo. Mwa lizazi leo, Jehova u ka lwanisa ni ku sinya lila za batu ba hae. Leo li ka ba lona “lizazi la ndwa” la naa polofitile Zakaria. Ka ku shutana ni lindwa ze ñwi, ndwa yeo i ka bonisa hande fo ku sweu kuli Jehova ki Ndume wa ndwa.—Zak. 14:3.

¹⁵ Fa lizazi la ka lwanisa lila za hae Jehova, ku ka ezahalañi kwa batu ba ba siyo mwa musindi wa hae wa silelezo? Bupolofita bu bonisa kuli batu bao ha ba na ku bona “liseli,” ili ku talusa kuli ha ba na ku shemubwa ki Mulimu. Bupolofita bu zwelapili kuli ‘lipizi, mambema, likamele, limbongolo, ni lifolofolo kaufela’ li ka kangela, ili ku talusa kuli lilwaniso kaufela ze itusiswa kwa ndwa li ka kangela, kamba ka mubulelelo o muñwi, ha li sa na ku sebeza. Zakaria u talusa kuli Jehova u ka ota lila za hae ka “ncwa” kamba butuku. Meeto ni malimi a bona “li ka bola.” Ha lu zibi kamba butuku bo i ka ba butuku luli. Kono se lu ziba kikuli batu bao ha ba na ku kona ku lu holofaza kamba ku lwanisa Mulimu. (Zak. 14:6, 7, 12, 15) “Malena ba lifasi ni limpi za bona” ba ka yemela Satani. Kono ku si na taba ni ko ba ka fumaneha ka nako yeo, malena bao ni limpi za bona ba ka yundiswa. (Sin. 19:19-21) “Kabakaleo, ba ba bulailwe ki Muñaa Bupilo mwa lizazi le, ba ka ba teñi ku zwa mwa neku le liñwi la lifasi ku isa mwa neku le liñwi la lifasi.”—Jer. 25:32, 33.

16. Ki lipuzo mañi ze lu swanela ku ipuza, mi lu ka tokwa ku ezañi ka nako ya ñalelwa?

¹⁶ Batu kaufela ba nyandanga ka nako ya ndwa, nihaiba ba ba tulanga mwa ndwa. Ni luna mwendi lu ka nyandiswa ka nako ya ñalelwa ye tuna. Mwendi ha lu na ku ba ni sa ku ca. Mwendi lu ka latehelwa ki lika ze lu na ni. Mwendi ha lu na ku ba ni litukelo ze lu na ni cwale. Lu ka eza cwañi haiba lu kopana ni miinelo ye cwalo? Kana lu ka kakamala? Kana lu ka zwafa ni ku felelwa ki sepo? Kana lu ka tuhela ku sebeleza Jehova? Ka nako ya ñalelwa ye tuna, lu  swanela ku zwelapili ku ina mwa musindi wa silelezo ka ku zwelapili ku sepahala ku Jehova ni ku sepa kuli u ka lu sileleza.—Mu bale Habakuki 3:17, 18.

“MEZI AA WELAUKA A KA ZWA”

17, 18. (a) “Mezi aa welauka” a yemelañi? (b) “Liwate la kwa upa” ni “liwate la kwa wiko” li yemelañi? (c) Lu ikatulezi ku ezañi?

¹⁷ Hamulaho wa Armagedoni, “mezi aa welauka a ka zwa” mwa Mubuso wa Kreste. “Mezi aa welauka” ao a swaniseza lika kaufela za file batu Mulimu kuli ba kone ku pila ku ya ku ile. Mwa bupolofita bwa Zakaria, ‘liwate la kwa upa’ ki liwate la Dead Sea le li yemela batu ba ba itobalezi mwa lifu ili ba ba li mwa libita. “Liwate la kwa wiko” ki Liwate la Mediteranea, ili mo ku na ni bupilo, mi liwate leo li yemela “buñata bo butuna bwa batu” ba ba ka punyuha Armagedoni. (Mu bale Zakaria 14:8, 9; Sin. 7:9-15) Likwata ze peli za batu zeo li ka nwa “mezi aa welauka” ku zwelela kwa “nuka ya mezi a bupilo.” Ka ku eza cwalo, likwata ze peli zeo kaufela li ka petahala ni ku pila ku ya ku ile.—Sin. 22:1, 2.

¹⁸ Jehova ha ka sinya lifasi le li maswe le, u ka lu sileleza ni ku lu kenya mwa lifasi la hae le linca. Nihaike kuli macaba kaufela mwa lifasi a lu toile, lu ikatulezi kuli lu ka sepahala kwa Mubuso wa Mulimu ni ku zwelapili ku silelezwa mwa musindi wa Jehova.

[Litaluso za kwatasi]

[Lipuzo za Tuto]

[Siswaniso se si fa likepe 21]

Mu ikatulele ku ina ni ku silelezwa mwa musindi wa Jehova