Mu si ke Mwa Zwafa!

Kana se mu bile yo muñwi wa Lipaki za Jehova ka lilimo ze ñata mi mu bata kuli mutu ye mu nyalani ni yena a swalisane ni mina mwa ku lapela Jehova?

Kamba kana mu zwafile kabakala kuli muituti wa mina wa Bibele, ya naa bonahala ku eza hande kwa makalelo, ha si ka zwelapili mwa niti?

 Mitala i sikai ya batu ba kwa naha ya Britain i ka mi tusa kuli mu si ke mwa zwafa. Mi hape i ka mi tusa ku bona ze mu swanela ku eza kuli mu kone ku tusa hande batu mwa musebezi wa mina ilikuli ba amuhele niti.—Muek. 11:1.

KU ITIISA KU KA MI TUSA KU SA ZWAFA

Nto ye ñwi ya butokwa ye kona ku mi tusa ku sa zwafa ki ku itiisa. Mu swanela ku zwelapili ku lapela Jehova ni ku mu kumalela. (Deut. 10:20) Kona mo ne ba ezelize bo Georgina. Ha ne ba kalile ku ituta Bibele ni Lipaki za Jehova ka silimo sa 1970, bo muunaa bona, bo Kyriacos, ne ba filikani. Bo Kyriacos ne ba likile ku tuhelisa bakubona bo Georgina kuli ba si ke ba ituta Bibele, mi ne ba yumbanga lihatiso za Lipaki za Jehova ze ne ba fumananga.

Bo Georgina ha ne ba kalile ku fumanehanga kwa mikopano ya puteho, bo Kyriacos ba filikana hahulu ni ku fita. Zazi le liñwi, bo Kyriacos ba ya kwa Ndu ya Mubuso ni ku yo kananisa mizwale. Kaizeli yo muñwi ha naa lemuhile kuli bo Kyriacos ba bulela hande Sigerike ku fita Sikuwa, a lizeza muzwale wa Mugerike wa mwa puteho i sili kuli a tahe a to tusa. Bakeñisa kuli muzwale wa Mugerike yo naa tusize bo Kyriacos ka musa, ba amuhela tuso yeo, mi mane ka likwelinyana ba ituta Bibele ni yena. Kono hamulaho, bo Kyriacos ba tuhela ku ituta Bibele.

Bo Georgina ne ba zwezipili ku lwaniswa ki bakubona ka lilimo ze taalu. Bo Kyriacos ne ba bulelezi bakubona kuli ne ba ka ba siya haiba ne ba ka kolobezwa. Fa lizazi le ne ba kolobezwa, bo Georgina ba lapela ku Jehova ku zwelela kwatasaa pilu ni ku mu kupa kuli bo Kyriacos ba si ke ba ba siya. Lipaki ha ne ba tile kuli ba to bitula bo Georgina ilikuli ba ye hamoho kwa mukopano, bo Kyriacos ba bulelela Lipaki bao kuli: “Mu itangete. Na ni musalaa ka lu ka mi fumana, lwa taha mwa mota ya luna.” Bo Kyriacos ne ba fumanehile kwa kalulo ya kakusasana ya mukopano wo mi ne ba iponezi bakubona ha ba kolobezwa!

Hamulaho wa nako, bo Kyriacos ba kala ku tuhela ku lwanisa bakubona mi ba eza licinceho ze tuna hanyinyani-hanyinyani. Ibato ba hamulaho wa lilimo ze 40 ku zwa fo ne ba kopanezi lwa pili ni Lipaki, bo Georgina ba iponela bakubona ha ba kolobezwa! Kiñi ze ne tusize bo Kyriacos kuli ba kolobezwe? Bo Kyriacos ba bulela kuli: “Ne ni tabisizwe ki taba ya kuli bo Georgina ne ba si ka tuhelela nto ifi kamba ifi ku ba tuhelisa ku lapela Jehova.” Bo Georgina ba li: “Ku si na taba kuli bakuluna ne ba ni lwanisanga, ne ni ikatulezi kuli ha ni na ku tuhela ku lapela Mulimu wa ka. Ne ni zwezipili ku lapelanga ku Jehova mi ne ni si ka zwafa.”

LIBAKA KU APALA BUTU BO BUNCA HA KULI KWA BUTOKWA

Nto ye ñwi ye kona ku tahisa kuli mu tuse bakumina ki ku bonisa butu bwa Sikreste. Muapositola Pitrosi naa elelize basali ba Sikreste kuli: “Mu ipeye kwatasaa baana ba mina, ilikuli haiba ba bañwi ku bona ha ba mameli linzwi, ite ba kolwiswe ku si na linzwi le li bulelwa kabakala muzamao wa basali ba bona.” (1 Pit. 3:1) Bo Christine ne ba sebelisize kelezo yeo nihaike kuli ne ku fitile lilimo ze ñata kuli ba kolwise bo muunaa bona. Bo Christine ha ne ba bile Lipaki lilimo ze 20 kwamulaho, bo muunaa bona bo John ne ba sa lumeli ku Mulimu. Bo John ne ba sa lati ku lapela, kono ne ba lemuhile kuli bakubona ne ba nga bulapeli bwa bona ku ba bwa butokwa hahulu. Bo John ba bulela kuli: “Ne ni lemuhile kuli bakuluna ne ba fumana tabo mwa bulapeli bwa bona. Bakuluna ne ba tiyelanga miinelo ye taata mi nto yeo ne i ni tusize ni na mwa miinelo ye taata.”

Bo Christine ne ba si ka hapeleza bakubona kuli ba kene mwa bulapeli bwa bona. Bo John ba li: “Ku zwa feela kwa makalelo, bo Christine ne ba lemuhile kuli ne ba sa tokwi ku ni bulelelanga ka za bulapeli bwa bona, mi ka pilu-telele ne ba ni tuhezi kuli ni itute hanyinyani-hanyinyani ku likana ni mo ne ni latela.” Bo Christine ha ne ba fumananga litaba za mwa limagazini za Tawala ya Mulibeleli kamba Mu Zuhe! ili litaba ze ne ba ziba kuli bakubona ne ba ka li tabela, ze cwale ka litaba za sayansi ni pupo, ne ba bulelelanga bakubona kuli, “Ni sepa kuli mu ka ikola ku bala litaba ze.”

Hamulaho wa nako, bo John ba tuhela musebezi mi ba kala ku itimelanga simu ya fa ndu ya bona. Bakeñisa kuli ne ba banga ni nako ye ñata, bo John ba kala ku ipuza lipuzo za butokwa mwa bupilo ze cwale ka za kuli, ‘Kana ne lu itahezi feela, kamba kana ne lu bupilwe kuli lu pete mulelo o muñwi?’ Zazi le liñwi, muzwale yo muñwi ya naa ambola ni bo John a ba buza kuli: “Kana ne mu ka tabela ku ituta?” Bo John ba li: “Bakeñisa kuli ne se ni kalisize ku lumela ku Mulimu, ne ni lumezi ku ituta.”

Bo Christine ne ba ezize hande ku sa zwafa! Hamulaho wa ku lapela ku Jehova ka lilimo ze 20 kuli a tuse bo John ku ziba niti, bo John ba kolobezwa. Ha lu bulela cwana, bo Christine ni bakubona ba sebeleza Jehova ka tukufalelo. Bo John ba li: “Ki lika ze peli ze ni tusize ku kolobezwa. Ki sishemo ni silikani se ne ba ni bonisize Lipaki. Bunde bwa ku nyalana ni yo muñwi wa Lipaki za Jehova ki kuli wa sepahala, wa itingwa, mi ha na buitati.” Bo Christine ne ba sebelisize kelezo ye kwa liñolo la 1 Pitrosi 3:1, mi ku eza cwalo ne ku tusize.

 LIPEU ZA KONA KU MELA HAMULAHO WA LILIMO

Ku cwañi ka za baituti ba Bibele ba ba tuhela ku bonisa cisehelo ye ne ba bonisize sapili ka mabaka a mañwi? Mulena Salumoni naa ñozi kuli: “Cala peu ya hao isali kakusasana, mi u si ke wa pumulisa mazoho a hao ka swalala; kakuli ha u zibi kuli ku ka mela peu ifi, kamba ye, kamba yani, kamba mwendi li ka mela hande ze peli.” (Muek. 11:6) Fokuñwi, lipeu za niti li nganga nako ye telele kuli li yo mela. Nihakulicwalo, mutu hamulaho wa nako wa kona ku yo lemuha kuli ku sutelela ku Mulimu ki kwa butokwa hahulu. (Jak. 4:8) Kaniti, mwa kona ku yo ba ni tabo kwapili ha mu ka yo bona lipeu za niti inze li mela.

Ha lu nyakisiseñi mutala wa bo Alice, be ne ba tutezi kwa India ku zwa kwa England. Ka silimo sa 1974, ne ba kalisize ku ituta Bibele. Bo Alice ne ba bulela puo ya Sihindi kono ne ba bata ku bolosola Sikuwa sa bona. Bo Alice ne ba zwezipili ku ituta Bibele ka lilimo ze ñata mi mane ne ba fumanehanga kwa mikopano ye miñwi mwa puteho ye ne itusisa puo ya Sikuwa. Bo Alice ne ba ziba kuli ze ne ba ituta ne li za niti kono ne ba sa isangi pilu kwa tuto ya bona. Kakuli mane ne ba isize hahulu pilu kwa ku bata masheleñi mi ne ba lata hahulu mikiti. Hamulaho wa nako, bo Alice ba tuhela ku ituta.

Ibato ba lilimo ze 30 ku zwa fo, bo Stella, be ne ba itutanga ni bo Alice, ba amuhela liñolo le ne li zwa ku bo Alice. Bo Alice ne ba ñolezi bo Stella kuli: “Ni sepa kuli mu ka taba hahulu ku ziba kuli mutu ye ne mu itutanga ni yena Bibele ku zwa ka silimo sa 1974 u kolobelizwe fa mukopano wa sikiliti o felile cwanoñu fa. Mu ni tusize hahulu mwa bupilo bwa ka. Ne mu cezi peu ya niti ku na, mi nihaike kuli ka nako yani ne ni si ka itukiseza ku ineela ku Mulimu, ne ni bulukile peu ya niti yani mwa pilu ya ka.”

Ki lika mañi ze ne ezahalezi bo Alice? Bo Alice ba talusa kuli ne ba lembwalile hahulu hamulaho wa lifu la bakubona ka silimo sa 1997. Bo Alice ne ba lapezi ku Mulimu. Mwa mizuzunyana feela ku zwa fo ne ba lapelezi, Lipaki ba babeli be ne ba bulela puo ya Sipunjabi ba to potela bo Alice ni ku ba siyela trakiti ye li, Ki Sepo Ifi ya Balatiwa Ba Ba Shwile? Bo Alice ne ba ikutwile kuli tapelo ya bona ne i alabilwe mi ba ikatulela ku swalisana ni Lipaki za Jehova. Kono bo Alice ne ba ka fumana kai Lipaki? Bo Alice ba fumana sibuka sa kale sa likeyala mo ne ku na ni keyala ya puteho ye ne itusisa puo ya Sipunjabi ili ye ne ba filwe ki bo Stella. Bo Alice ba yo kopana kwa Ndu ya Mubuso yeo mi ne ba amuhezwi hande ki mizwale ni likaizeli ba mwa puteho yeo ye ne itusisa puo ya Sipunjabi. Bo Alice ba li: “Nihaiba ha ne lu zwile kwa mikopano, ne ni sa ikutwa ku latiwa ki mizwale ni likaizeli mi ne ba ni imuluzi ka nako ye ne ni lembwalile.”

Bo Alice ba kalisa ku kopana kamita, mi ba zwelapili ku ituta Bibele, ni ku ituta ku bulela ni ku bala hande puo ya Sipunjabi. Ka silimo sa 2003, bo Alice ba kolobezwa. Mwa liñolo le ne ba ñolezi bo Stella, bo Alice ne ba felize ka ku ñola kuli: “Ni itumezi hahulu kwa musebezi o ne mu ezize wa ku cala lipeu za niti lilimo ze 29 kwamulaho ni ku ni tomela mutala o munde o ni swanela ku latelela.”

Lu kona ku itutañi kwa mitala yeo? Ku kana kwa nga nako ye telele ku fita mo lu libelela, kono haiba mutu u bata ku ziba Mulimu luli, mi mutu yo wa sepahala ni ku ikokobeza, Jehova u ka tusa mutu yo kuli a utwisise niti ni ku i amuhela. Mu hupule za naa bulezi Jesu mwa swanisezo ya hae. Naa ize: “Lipeu za mela ni ku hula ku ba ze telele—a sa zibi mo ku tezi. Mubu ka ili ona feela u beya muselo hanyinyani-hanyinyani, pili ki mutungo, kihona ku taha sikunka, mafelelezo mwa sikunka ku zwa lubeke lo lu kwanile.” (Mare. 4:27, 28) Mutu u kona ku eza zwelopili hanyinyani-hanyinyani ku likana ni cisehelo ya na ni yona. Ku bulela feela niti, mutu ni mutu kaufela ya shaela za Mubuso ha koni ku ziba haiba mutu ya kutalize u ka zwelapili. Kamukwaocwalo, mu zwelepili ku cala lipeu za niti ka buñata, mwendi mu ka kutula ka buñata.

Mu lapelange kamita. Bo Georgina ni bo Christine ne ba zwezipili ku lapelanga ku Jehova. Haiba mu ‘tundamena mwa ku lapela,’ mwendi mu ka tusa hande batu mwa musebezi wa mina ilikuli ba amuhele niti.—Maro. 12:12; Muek. 11:1.

[Maswaniso a fa likepe 30]

Ibato ba hamulaho wa lilimo ze 40 ku zwa fo ne ba kopanezi lwa pili ni Lipaki, bo Georgina ba iponela bakubona ha ba kolobezwa

[Maswaniso a fa likepe 30]

Bo Alice ne ba ñolezi bo Stella kuli: “Ni sepa kuli mu ka taba hahulu ku ziba kuli mutu ye ne mu itutanga ni yena Bibele ku zwa ka silimo sa 1974 u kolobelizwe fa mukopano wa sikiliti o felile cwanoñu fa”

[Manzwi a fa likepe 32]

“Ni itumezi hahulu kwa musebezi o ne mu ezize wa ku cala lipeu za niti lilimo ze 29 kwamulaho ni ku ni tomela mutala o munde o ni swanela ku latelela.”—Bo Alice