LIPUZO ZE ZWA KWA BABALI

Kana Maisilaele ne ba bulayanga likebenga ka ku li paheka fa likota?

▪ Mwa linaha ze ñata za kwa kale, likebenga ze ñwi ne li bulaiwanga ka ku kokotelwa fa kota kamba fa musumo. Maroma ne ba tamanga kamba ku kokotela sikebenga fa kota, ili fo ne si kona ku siiwa inze si utwa butuku, ni ku bulaiwa ki tala ni linyolwa, mane hamohocwalo ni ku ca kazazi kamba ku neliwa ki pula. Maroma ne ba nga kuli ku kokotela mutu ne li koto ye ne swanela ku fiwa feela kwa likebenga za mayemo a kwatasi.

Kana Maisilaele ne ba bulayanga likebenga ka ku li paheka fa likota? Mulao wa Mushe ne u bonisa kuli: “Mutu ha ezize sibi se si lukela lifu, mi a bulawa, wa mu paheka kwa kota; situpu sa hae si si ke sa siyala kwa kota busihu kaufela, kono u si pumbeke lona lizazi leo.” (Deut. 21:22, 23) Kabakalaleo, mwa nako ya naa ñolwa Mañolo a Siheberu, mutu ya naa lukelwa ki lifu naa bulaiwanga pili kihona a ka pahekwa fa kota.

Ka za taba yeo, liñolo la Livitike 20:2 li bulela kuli: “Niha ikaba mañi kwa bana ba Isilaele, ni kwa mazwahule ba ba yahile kwa Maisilaele, ya ka ezeza Muloke sitabelo ka mwanaa hae, u ka bulawa; ba ba yahile mwa naha, ba ka mu bulaya ka macwe.” Mi batu ba ne ba ka fumanwa inze ba “pumbula ba ba shwile kamba ku ikeza muloi” ne ba bulaiwanga. Kono ne ba bulaiwanga cwañi? Ne ba ba pobaulanga “ka macwe.”—Liv. 20:27.

Kwa liñolo la Deuteronoma 22:23, 24 lu bala kuli: “Musizana haa beelelizwe ki muuna, mi muuna yo muñwi a mu fumana mwa munzi, a fosa ni yena; mo, mu ka ba zwisa ba babeli, mu ba ise fa patelo ya Kuta, mi mu ba pobaule ka macwe, ba shwe; musizana, kakuli haa si ka huwa haa inzi mwa munzi; ni muuna, kakuli u sinyize musali wa wahabo. Zwisa bumaswe haenu cwalo.” Mwa linako za Maisilaele ba kwaikale, mukwa o ne u atile wa ku bulaya ka ona batu ba ne ba ezanga milatu ye mituna ne li wa ku pobaula. *

Liñolo la Deuteronoma 21:23 li bonisa kuli “ya bondilwe ki ya kutilwe ki Mulimu.” Ku tisa situpu fapilaa nyangela sa mutu ya maswe ili “ya kutilwe ki Mulimu” ni ku si paheka fa kota ne i banga tuto kwa Maisilaele kuli ba si ke ba eza bumaswe bo bu swana ni bwa naa ezize mutu yo.

[Litaluso za kwatasi]

[Manzwi a fa likepe 13]

Kabakalaleo, mwa nako ya naa ñolwa Mañolo a Siheberu, mutu ya naa lukelwa ki lifu naa bulaiwanga pili kihona a ka pahekwa fa kota