Mu Pete Musebezi Wa Mina Wa Ku Kutaza Evangeli
Mu Pete Musebezi Wa Mina Wa Ku Kutaza Evangeli
“U eze musebezi wa mukutazi wa evangeli, u pete bukombwa bwa hao ka ku tala.”—2 TIM. 4:5.
MU KONA KU ALABA CWAÑI?
Mushaeli wa evangeli ki mutu ya cwañi?
Ki kabakalañi batu ha ba tokwa ku utwa taba ye nde?
Lu kona ku ba cwañi bashaeli ba bande ba evangeli?
1. Ki kabakalañi ha lu kona ku bulela kuli Jehova ki Mushaeli yo mutuna wa evangeli?
MUKUTAZI wa evangeli ki mutu ya shaela taba ye nde. Jehova Mulimu ki yena wa pili ku shaela taba ye nde, mi ki yena Mushaeli yo mutuna ka ku fitisisa wa taba ye nde. Nakonyana feela ku zwa fo ne ba kwenuhezi bo Adama ni Eva, Jehova naa bulezi taba ye nde ya kuli Satani Diabulosi u ka yundiswa. (Gen. 3:15) Ka lilimo-limo, Jehova u talusize hande mwa ka keniseza libizo la hae, mwa ka feliseza miinelo ye taata ya tahisize Satani, ni mo ba ka kona ku pilela batu ku ya ku ile. Litaba zeo kaufela li fumaneha mwa Linzwi la Mulimu yona Bibele.
2. (a) Mangeloi a shaelanga evangeli ka mukwa ufi? (b) Ki mutala mañi o munde wo Jesu a tomezi bashaeli ba evangeli?
2 Mangeloi ni ona a shaelanga evangeli. A bulelanga taba ye nde, mi a tusanga ba bañwi ku shaela taba ye nde fa lifasi. (Luka 1:19; 2:10; Lik. 8:26, 27, 35; Sin. 14:6) Ku cwañi ka za Mikaele yena nduna wa mangeloi? Ni yena ki mushaeli wa evangeli. Ha naa li fa lifasi, nduna wa mangeloi yo ili ku talusa Jesu, naa nga musebezi wa ku kutaza taba ye nde ku ba wa butokwa hahulu ka ku fitisisa. Mutala wa Jesu u lu luta kuli ni luna lu swanela ku nga musebezi wa ku kutaza ku ba wa butokwa hahulu ka ku fitisisa.—Luka 4:16-21.
3. (a) Taba ye nde ye lu kutazanga ki nto mañi? (b) Ki lipuzo mañi ze lu tokwa ku alaba?
3 Jesu naa laezi balutiwa ba hae kuli ba shaele evangeli. (Mat. 28:19, 20; Lik. 1:8) Muapositola Paulusi naa bulelezi Timotea kuli: “U eze musebezi wa mukutazi wa evangeli, u pete bukombwa bwa hao ka ku tala.” (2 Tim. 4:5) Ki taba mañi ye nde ye lu kutaza? Lu sweli ku bulelela batu kuli Ndataa luna wa kwa lihalimu wa lu lata. (Joa. 3:16; 1 Pit. 5:7) Mulimu u bonisa lilato la hae kwa batu ka Mubuso wa hae. Kamukwaocwalo, lu bulelela batu ba bañwi kuli ha ba ba bayahi ba Mubuso wa Mulimu, ni ku mu utwa, hamoho cwalo ni ku eza ze lukile, ba kona ku ba balikani ba hae. (Samu 15:1, 2) Jehova u ka felisa manyando kaufela, mi u ka felisa maswabi kaufela a tahiswa ki ku hupula lika ze maswe ze nee lu ezahalezi kwamulaho. Yeo ki taba ye nde luli! (Isa. 65:17) Ka ku ba bashaeli ba evangeli, lu tokwa ku alaba lipuzo ze peli ze za butokwa: Ki kabakalañi batu ha ba tokwa ku utwa taba ye nde kacenu? Mi lu kona ku peta cwañi hande musebezi wa luna ka ku ba bashaeli ba evangeli?
LIBAKA BATU HA BA TOKWA KU UTWA TABA YE NDE
4. Batu ba bulelelwanga buhata mañi ka za Mulimu?
4 Lu ngeñi kuli mutu yo muñwi u mi puma kuli bo ndataa mina ba mi yubekile mina ni lubasi kaufela. Mutu yo u mi bulelela kuli bo ndataa mina ne ba sa lati ku mi ziba ni kuli ne ba mi patezi lika ze ñwi ze ne mu swanela ku ziba, mi ku zwa fo, mutu yo u mi bulelela kuli bo ndataa mina ne ba na ni pilu ye maswe. Mi mutu yo hape u mi bulelela kuli bo ndataa mina ba shwile, mi ka lona libaka leo, mutu yo u mi bulelela kuli ha mu swaneli ku ipulaisa ku bata bo ndataa mina. Batu ba bañwi ba bulelanga nto ye swana ka za Mulimu. Batu bao ba bulelanga kuli ha lu koni ku ziba Mulimu, ni kuli Mulimu u na ni pilu ye maswe. Baeteleli ba bañwi ba bulapeli ba bulelanga kuli Mulimu u ka ota batu ba ba maswe ka ku ba tukufaza mwa lihele ku ya ku ile. Ba bañwi ba bulelanga kuli Mulimu ki yena ya tahisanga mañungwa a matuna ni likozi ze ñwi ze nyandisa batu. Batu bao ba bulelanga kuli nihaike kuli likozi zeo li bulayanga batu ba ba lukile ni ba ba si ka luka, Mulimu u itusisanga likozi zeo kuli a ote batu.
5, 6. Tuto ya ku ipilaula ni lituto za bulapeli bwa buhata li amile cwañi batu?
5 Batu ba bañwi ba bulelanga kuli ha ku na Mulimu ni kuli batu ba simuluha kwa lifolofolo ili ka mukwa wa ku ipilaula. Batu ba ba lumela mwa tuto ya ku ipilaula ba bulelanga kuli ha ku na mubupi ni kuli lika ze pila li itahezi feela. Mane batu ba bañwi ba bulelanga kuli bakeñisa kuli batu ba simuluhile kwa lifolofolo ka ku ipilaula, ha ku komokisi kuli batu fokuñwi ba ezanga lika ka mifilifili kamba ka buitati. Ba bañwi bona ba bulelanga kuli batu ba ka zwelapili ku nyandiswa ki ba bañwi bakeñisa kuli ki nto ye zibahala feela kuli batu ba ba na ni maata ba swanela ku nyandisa kamba ku hatelela batu ba ba fokola. Ha ku komokisi kuli batu ba bañata ba lumela kuli ku sa luka ku ka zwelepili. Kamukwaocwalo, batu ba ba lumela mwa tuto ya ku ipilaula ha ba na sepo ya kwapili.
6 Tuto ya ku ipilaula ni lituto za bulapeli bwa buhata ki ze ñwi za lika ze tisa kuli batu ba nyande mwa mazazi a maungulelo a. (Maro. 1:28-31; 2 Tim. 3:1-5) Lituto zeo ha li balelwi kwa taba ye nde. Mane sina mwa naa boniselize muapositola Paulusi, lituto zeo li siile batu “mwa lififi, mi ba kwahule ni bupilo bwa Mulimu.” (Maef. 4:17-19) Mi hape tuto ya ku ipilaula ni lituto za buhata li tahisize kuli batu ba si ke ba amuhela taba ye nde ye zwa ku Mulimu.—Mu bale Maefese 2:11-13.
7, 8. Ki nzila ifi i nosi yeo batu ba kona ku ituta ka yona taba ye nde?
7 Kuli batu ba be balikani ba Mulimu, ba swanela pili ku lumela kuli Jehova u teñi ni ku lumela kuli ku na ni mabaka a kolwisa a kona ku lu tusa ku mu ziba hande. Lwa kona ku tusa batu ba ba cwalo ku ituta ka za Mulimu ka ku ba susueza ku ituta kwa lika za bupile. Haiba batu ba ituta ku zwelela kwa lika ze bupilwe ni ku nahanisisa lika zeo, ba ka ituta ka za butali ni maata a Mulimu. (Maro. 1:19, 20) Lu kona ku tusa cwañi batu ku utwisisa kuli lika za bupile Mulimu kaufela za komokisa? Lwa kona ku itusisa litaba ze mwa libuka ni limagazini za luna ze bulela ka za taba yeo. Ka mutala, lwa kona ku itusisa litaba ze fumaneha mwa buka ya Mu sutelele ku Jehova ni taba ye li, “Moya O Kenile ne U Itusisizwe Lika ha ne li Bupiwa!” ye mwa magazini ya Tawala ya Mulibeleli ya February 2011. Kono haki lipuzo kaufela ze ka alabiwa ka ku ituta feela za pupo. Ka mutala, ku ituta feela za pupo ha ku koni ku tusa mutu ku ituta libaka Mulimu ha tuhelezi manyando, ni kuli mulelo wa Mulimu ka za lifasi ki ufi, kamba ku ituta haiba Mulimu u iyakatwa mañi ni mañi wa luna.
8 Mu kona feela ku ituta taba ye nde ka za Mulimu ni mulelo wa hae ka ku ituta Bibele. Lu na ni tohonolo ye tuna ya ku tusa batu ba bañwi ku ituta taba ye nde! Kono haiba lu bata ku tusa mutu yo muñwi kuli a lumele luli ku Mulimu ni ku ba mulikanaa hae, lu tokwa ku eza ze ñata ku fita ku mu taluseza feela litaba za niti. Lu tokwa ku mu kolwisa, mi fo ku talusa ku mu tusa ku utwisisa libaka ha swanela ku lumela ku Mulimu. (2 Tim. 3:14) Kuli lu eze cwalo, lu tokwa ku ituta mwa ku kolwiseza batu sina mwa naa ezelize Jesu. Ki kabakalañi Jesu ha naa kolwisanga hande batu? Libaka le liñwi ki la kuli naa itusisanga hande lipuzo. Lu kona ku mu likanyisa cwañi?
BASHAELI BA BANDE BA EVANGELI BA ITUSISANGA HANDE LIPUZO
9. Lu swanela ku ezañi haiba lu bata ku tusa batu ku lumela taba ye nde?
9 Ki kabakalañi ha lu swanela ku itusisa lipuzo mwa bukombwa, sina mwa naa ezelize Jesu? Ne mu ka eza cwañi dokota wa mina ha na ka mi bulelela kuli mu tokwa ku pazulwa kuli mu alafiwe. Mwendi ne mu ka lumela taba yeo. Kono ne mu ka eza cwañi dokota yo ha na ka bata ku mi pazula ha si ka mi buza ze mu kula? Mwendi ne mu si ke mwa lumela. Nihaiba dokota ya cuukile u tokwa ku buza lipuzo ni ku teeleza ku za bulela mukuli pili a si ka alafa kale mukuli yo. Kamukwaoswana, haiba lu bata ku tusa batu ku lumela taba ye nde ya Mubuso, lu swanela ku buzanga lipuzo ze nde ilikuli lu zibe tuso ye ba tokwa.
10, 11. Ku likanyisa mulutelo wa Jesu ku ka lu tusa ku ezañi?
10 Jesu naa ziba kuli haiba muluti a itusisa hande lipuzo, wa kona ku ziba hande muituti wa hae, mi hape wa kona ku tusa muituti ku nahana ni ku bulela maikuto a hae. Ka mutala, Jesu ha naa bata ku luta balutiwa ba hae kuli ba be ni buikokobezo, naa kalile pili ka ku ba buza puzo ye ne ba ka tokwa ku nahanisisa. (Mare. 9:33) Nako ye ñwi Jesu naa buzize Pitrosi puzo, mi Jesu a mu fa likalabo ze peli ni ku kupa Pitrosi kuli a kete fateñi ye lukile. Nto yeo ne i tusize Pitrosi ku ituta tuto ya butokwa. (Mat. 17:24-26) Nako ye ñwi hape, Jesu naa bata ku ziba ze ne ba nahana balutiwa ba hae, kamukwaocwalo, a ba buza lipuzo ze nee ba tusize ku bulela mo ne ba ikutwela luli. (Mu bale Mateu 16:13-17.) Jesu naa sa bulelelangi feela batu za ku eza, kono mubuzezo wa hae wa lipuzo ne u susuezanga batu ku amuhela taba ye nde ni ku eza licinceho mwa bupilo bwa bona.
11 Haiba lu likanyisa mwa naa itusisezanga Jesu lipuzo, lwa kona ku ziba mwa ku tuseza hande batu kaufela be lu fumana mwa bukombwa. Hape lwa kona ku ituta mo lu kona ku tuseza batu ba ba sa lumelelani ni luna fa taba ye ñwi ha lu li mwa bukombwa. Ku zwa fo, lwa kona ku tusa batu kuli ba tusiwe ki litaba ze ba ituta. Ha lu nyakisiseñi mitala ye milaalu ye bonisa mo lu kona ku itusiseza hande lipuzo.
12-14. Mu kona ku tusa cwañi mwanaa mina kuli a be ni bundume ha kutaza? Mu fe mutala.
12 Mutala wa pili: Mu kona ku ezañi haiba mwanaa mina ya sa nonoboka a mi taluseza kuli u ikutwa kuli ha koni ku bulelela ba kena ni bona sikolo ka za pupo? Mu kona ku mu tusa cwañi kuli a be ni bundume bwa ku kutaza ku ba kena ni bona sikolo? Mwa sibaka sa ku mu nyaza kamba ku mu bulelela feela za swanela ku yo bulela, mwa kona ku mu buza lipuzo ze ka mu tusa ku talusa mwa ikutwela, sina feela mwa naa ezezanga Jesu. Mu kona ku eza cwañi cwalo?
13 Ha se mu balile ni mwanaa mina kauhanyo 17 ya mwa buka ya Mu Sutelele ku Jehova, mu buze mwanaa mina kuli ki lisupo lifi ze mu tabisize. Mu mu tuse ku nahana mabaka a mañwi a tahisa kuli a lumele kuli ku na ni mubupi ni libaka ha bata ku sebeleza Mulimu. (Maro. 12:2) Mu taluseze mwanaa mina kuli mabaka a hae a kona ku shutana ni mabaka a mina.
14 Ha se mu buisani ni mwanaa mina, mu mu bulelele kuli ni yena wa kona ku yo buisana ni ba kena ni bona sikolo sina mo ne mu buisanela ni yena. Wa kona ku bulelela ya kena ni yena litaba za niti ka za pupo mi kihona a ka mu kupa kuli a taluse mwa ikutwela. Ka mutala, mwanaa mina wa kona ku kupa mulikanaa hae yo kuli a bale paragilafu 12 ye mwatasaa toho ya taba ye li, “Mo ne U Itusiselizwe Moya O Kenile Kwa ku Bupa Libupiwa ze Pila” mwa taba ye li, “Moya O Kenile ne U Itusisizwe Lika ha ne li Bupiwa!” ye mwa magazini ya Tawala ya Mulibeleli ya February 2011. Hamulaho, mwanaa mina wa kona ku buza ya kena ni yena kuli, “Kana ki niti kuli DNA ya kona ku buluka litaba ze ñata hahulu ku fita kompyuta ifi kamba ifi?” Mwanaa sikolo yo mwendi u ka alaba kuli ya kona. Mwanaa mina cwale wa kona ku mu buza hape kuli, “Bakeñisa kuli wa lumela kuli DNA ya kona ku buluka litaba ze ñata, kana nto yeo ha i bonisi kuli DNA i na ni mubupi wa yona sina feela mo u lumelela kuli kompyuta i pangilwe ki mutu yo muñwi?” Kuli mu tuse mwanaa mina ku ba ni bundume ha ka yo ambola ni ba bañwi ka za tumelo ya hae, mu itukiseze ni yena ili ku mu bonisa mwa ka yo ezeza. Haiba mu luta mwanaa mina mwa ku itusiseza hande lipuzo, mu ka mu tusa ku ba mushaeli yo munde wa evangeli.
15. Lu kona ku itusisa cwañi lipuzo kuli lu tuse mutu ya sa lumeli kuli Mulimu u teñi?
15 Mutala wa bubeli: Ha lu nze lu kutaza, lwa kona ku fumana mutu ya kakanya ka za haiba Mulimu u teñi kamba ya sa lumeli luli kuli Mulimu u teñi. Lwa kona ku lika ku ikambota ni yena. Lwa kona ku mu buza kuli saa tandile nako ye kuma kai inze a lumela cwalo, ni libaka ha sa lumeli kuli Mulimu u teñi. Ha saa lu alabile, lwa kona ku mu bulelela kuli lwa utwisisa libaka ha lumela cwalo. Mi cwale lwa kona ku mu buza haiba wa tabela ku bala hatiso ye bonisa kuli lika ze pila ne li bupilwe. Haiba wa tabela, lwa kona ku mu kupa kuli ite lu kutele ku yena ni hatiso ye ñwi ye bonisa kuli lika ze pila ne li bupilwe. Haiba lu buza lipuzo ka maseme, lwa kona ku tusa batu kuli ba amuhele taba ye nde.
16. Ki kabakalañi ha lu swanela ku bona teñi kuli baituti ba luna ha ba bali feela likalabo ze mwa buka kamba broshuwa?
16 Mutala wa bulaalu: Ha lu zamaisa tuto ya Bibele, ku kona ku ezahalañi haiba lu tuhelela muituti wa luna ku alabanga ka ku bala feela likalabo ze ñozwi mwa buka kamba mwa broshuwa? Mwendi ha na ku zwelapili kwa moya. Libaka ki la kuli haiba muituti a bala feela likalabo a sa li nahanisisi, u kona ku swanisezwa kwa kota ye si ka toma hande mibisi. Ku ka ba taata hahulu ku muituti ya cwalo kuli a zwelepili ku ba mwa niti muta batu ba bañwi ba mu lwaniswa. (Mat. 13:20, 21) Kuli lu tuse muituti wa luna, lu tokwa ku mu buza mwa ikutwela ka za litaba za ituta. Mu like ku bona haiba kuli muituti wa mina wa lumela za ituta ni libaka ha li lumela. Mi mu tuse muituti wa mina ku itusisa mañolo ilikuli za lumela li lumelelane ni ze i bulela Bibele. (Maheb. 5:14) Haiba lu itusisa hande lipuzo, baituti ba luna mwendi ba ka tiya mwa tumelo mi ba ka zwelapili ku sepahala ha ba lwaniswa ki ba bañwi kamba batu ba bañwi ha ba lika ku ba yembulula. (Makolo. 2:6-8) Ki lika mañi ze ñwi ze lu kona ku eza kuli lu be bashaeli ba bande ba evangeli?
BASHAELI BA BANDE BA EVANGELI BA TUSANANGA
17, 18. Ha mu li mwa bukombwa ni muhasanyi yo muñwi, mu kona ku mu tusa cwañi ha nze a kutaza ku mutu yo muñwi?
17 Jesu naa lumile balutiwa ba hae mwa musebezi wa ku kutaza ba babeli ka ba babeli. (Mare. 6:7; Luka 10:1) Hamulaho, muapositola Paulusi naa bulezi za batu ba naa “beleka ni bona” ili ba ne ba “belekile” ni yena mwa musebezi wa ku kutaza taba ye nde. (Mafil. 4:3) Ka silimo sa 1953, kopano ya Jehova ne i kalisize tukiso ye ipitezi ya kuli bahasanyi ba lute ba bañwi mwa ku petela hande bukombwa bwa bona.
18 Ha mu li mwa bukombwa ni muhasanyi yo muñwi, mu kona ku mu tusa cwañi ha nze a kutaza ku mutu yo muñwi? (Mu bale 1 Makorinte 3:6-9.) Mu apule liñolo la bala mutu ye mu sebeza ni yena. Mu teeleze ka tokomelo muhasanyi yo ha nze a bulela, mwendi u ka tokwa kuli mu tuse muñaa ndu ku utwisisa taba ye ñwi ye ba buisana. (Muek. 4:12) Kono mu tokomele ku sa kauleza muhasanyi ye mu sebeza ni yena kamba ku kauleza muñaa ndu. Haiba mu kauleza puisano yeo, mu ka zwafisa mutu ye mu sebeza ni yena kamba ku lyanganisa muñaa ndu. Ha ku si ka fosahala ku bulela sisupo si li siñwi kamba ze peli, kono ha se mu ezize cwalo, mu tuhelele muhasanyi kuli a zwelepili ku ikambota ni mutu yo.
19. Lu swanela ku hupulangañi, mi ki kabakalañi?
19 Mu kona ku tusana cwañi ni muhasanyi ye mu sebeza ni yena kuli mu be bashaeli ba bande ba evangeli ha mu nze mu zamaya ku zwa fa ndu ye ñwi ku ya ku ye ñwi? Mu ambole mo mu kona ku itusiseza hande mitahisezo ya mina. Mu tokomele kuli ha mu amboli litaba ze kona ku zwafisa batu ba ba mwa sibaka se mu kutaleza ku sona. Mi mu si ke mwa bulela maswe mizwale ni likaizeli za mina. (Liprov. 18:24) Lu swanela ku hupula kuli kaufelaa luna ha lu si ka petahala. Jehova ka sishemo sa hae se situna u lu file musebezi wa butokwa wa ku kutaza taba ye nde. (Mu bale 2 Makorinte 4:1, 7.) Haike kaufelaa luna lu bonise buitebuho kwa taba ye nde ka ku sebeza ka taata kuli lu be bashaeli ba bande ba evangeli.
[Lipuzo za Tuto]
[Manzwi a fa likepe 5]
Kuli lu tuse baituti ba luna, lu swanela ku ba kolwisa
[Siswaniso se si fa likepe 6]
Lipuzo ze nde . . . 1 mu tuse batu ku nahanisisa libaka ha ba lumela lika ze ba lumela
[Siswaniso se si fa likepe 6]
. . . 2 mu tuse batu ku nahanisisa ze ba ituta ni ku amuhela niti
[Siswaniso se si fa likepe 6]
. . . 3 mu tuse muituti wa mina ku itusisa mañolo ilikuli za lumela li lumelelane ni ze i bulela Bibele
