ZE EZAHEZI MWA BUPILO

Libaka Bupilo Bwa Luna ha bu Tabisa

TABA YE KANDEKILWE KI BO PATRICIA SMITH

MWANAKA wa mushimani Gary a mano pepwa ka silimo sa 1958, honafo na lemuha kuli mwanaka naa si na buiketo bo bunde. Ne ku ngile likweli ze lishumi kuli baalafi ba zibe butuku bwa naa kula mwanaka mi ne ku ngile lilimo ze ketalizoho hape kuli baalafi ba ba cuukile ba kwa London ba fe bupaki bo ne bu bonisa kuli mwanaka naa kula butuku bo luli. Ne ni tomohile hahulu pilu muta mwanaka wa musizana wa libizo la Louise, ya naa pepilwe lilimo ze 9 ku zwa fa naa pepezwi Gary, naa kalile ku ba ni lisupo za butuku bo bu swana ni bwa Gary kono bwa Louise bona mane ne bu fita bwa Gary.

Dokota naa ni bulelezi kuli: “Bana ba mina kaufela ba na ni butuku bwa LMBB, * mi butuku bo ha bu na kalafo. Ka nako yeo, batu ne ba sa zibi ze ñata ka za butuku bo. Lisupo ze bonisa kuli mutu u na ni butuku bo ki bubofu, ku nuna hahulu, ku mela minwana ye miñata kwa mazoho kamba kwa mahutu, ku liyeha ku hula, buhole, ku kula butuku bwa mufuta wa shuka, butuku bwa masapo, ni ku luluha lipio. Kamukwaocwalo, ku babalela bana ba ka ne ku ka ni bela taata. Lipatisiso ze ne ezizwe cwanoñu fa li bonisa kuli mutu a li muñwi kwa batu ba 125,000 ba ba pila mwa Britain, u na ni butuku bo, nihaike kuli batu ba bañata ba kana ba ba ni butuku bo ka ku sa lemuseha.

JEHOVA U BA “SISABELO” SA LUNA

Ne ni ambozi ni yo muñwi wa Lipaki za Jehova ha se ni nyezwi, mi ne ni itutile litaba za niti za mwa Bibele. Kono bakuluna ne ba sa tabeli ku ituta niti. Bakeñisa musebezi wa bakuluna, ne lu tuta-tutanga, kamukwaocwalo, ne ku li taata ku swalisana ni puteho. Nihakulicwalo, ne ni zwezipili ku balanga Bibele ni ku lapela ku Jehova. Ne ni omba-ombilwe hahulu ha ne ni balile manzwi a bulela kuli “Muñaa Bupilo ki sisabelo sa ba ba nyandile, sisabelo sa mwa linako za butata” ni manzwi a kuli “Muñaa Bupilo ha hani ba ba mu bata”!—Samu 9:9, 10.

Gary naa sa boni hande, kamukwaocwalo, ha naa na ni lilimo ze 6, naa isizwe kwa sikolo se si ipitezi se si kwa mboela wa likamba la liwate la kwa England. Gary naa ni lizezanga luwaile ka nako ni nako ni ku ni bulelela litaba ze ne mu bilaezanga, mi ka ku itusisa luwaile, ne ni mu tusanga kuli a utwisise likuka za mwa Bibele. Lilimonyana ku zwa fa naa pepezwi Louise, na kalisa ku kula butuku bwa ku omelela lilama ze ñwi za mubili ni ku opa mwa masapo hamohocwalo ni ku anda misifa. Gary a kuta ku zwa kwa sikolo inze a na ni lilimo ze 16. Nihakulicwalo, ku sa bona hande kwa hae ne ku zwelapili, mi ka silimo sa 1975, a ba sibofu. Ka silimo sa 1977, bakuluna ba lu yubeka.

Nakonyana feela ku zwa fa naa kutezi Gary ku zwa kwa sikolo, ne lu kalile ku patehanga ku eza misebezi ya mwa puteho mo ne ku na ni mizwale ni likaizeli ba bande, mi ka silimo sa 1974, na kolobezwa. Ne ni tabile hahulu muta muuna-muhulu yo muñwi naa tusize Gary ku tiyela licinceho za naa kopana ni zona mwa lilimo za ku hula. Lipaki ba bañwi ne ba ni tusanga ku eza misebezi ya fa lapa, mi hamulaho, baketalizoho kwa Lipaki bao ba kala ku holiswanga ki muuso kuli ba ni tusange. Yeo luli ibile mbuyoti ye tuna!

Gary naa zwezipili ku eza hande kwa moya mi naa kolobelizwe ka silimo sa 1982. Gary naa bata luli ku eza bupaina bwa ku tusa, kamukwaocwalo, na ikatulela kuli ni swalisane ni yena mwa musebezi wo mi lwa zwelapili ku eza bupaina ka lilimo ze ñata. Mwanaka naa tabile hahulu muta muokameli wa luna wa mupotoloho naa mu buzize kuli, “Gary, ki kabakalañi ha u  sa bi paina wa kamita?” Puzo yeo ne i susuelize hahulu Gary kuli mane ka silimo sa 1990, a ketiwa ku ba paina wa kamita.

Gary sa alafilwe noka habeli ka ku zwisa masapo a hae mwa noka ni ku mu kwesa lisipi, lwa pili ne li ka silimo sa 1999 mi lwa bubeli ne li ka silimo sa 2008, kono butuku bwa Louise ne bu totobezi hahulu ku fita bwa Gary. Louise naa pepilwe inze a li sibofu, mi ha ne ni boni kuli Louise u mela munwana o muñwi kwa lihutu, na lemuha kuli ni yena naa na ni butuku bwa LMBB. Litatubo ze ne ezizwe ku yena ne li patuluzi kuli naa na ni butata bo butuna mwa mubili wa hae. Ka lilimo-limo, Louise u pazuzwi hañata-ñata mwa sipatela, ku kopanyeleza cwalo ni ku pazulwa kuli a alafiwe lipio za hae. Ka ku swana ni Gary, Louise ni yena naa na ni butuku bwa shuka.

Bakeñisa kuli wa ziba miinelo ye taata ye kona ku ba teñi mutu ha pazulwa, Louise u ambolanga ni bazamaisi ba sipatela, mi u ba talusezanga libaka ha ikatulezi ku sa pompelwa mali. Kamukwaocwalo, Louise u ikola swalisano ye nde ni batu ba ba sweli ku mu babalela.

KU PILA BUPILO BO BUNDE

Mwa lubasi lwa luna lu ezanga lika ze ñata kuli lu lapele Jehova. Ka nako ye ne ku si na lipangaliko ze li teñi cwale, ne ni tandanga lihora ze ñata inze ni balela Gary ni Louise litaba ka za Jehova. Ka nako ya cwale se ku na ni ma CD, ma DVD, ni litaba ze ñwi za ku teeleza za fa webusaiti ya www.pr418.com ze lu tusa ku ikola tuto ya Bibele ka ku latelela mukoloko wa ka sunda ni sunda ili tuto ye eziwanga ka linako ze shutana-shutana, mi lwa fanga likalabo ze nde kwa mikopano ya Sikreste.

Gary fokuñwi wa petanga likalabo za ka yo alaba mi haiba u na ni ngambolo mwa Sikolo sa Bukombwa sa Teokratiki, u i fanga inge ya ambola feela. Naa ketilwe sina sikombwa sa puteho ka silimo sa 1995, mi u petanga misebezi ye shutana-shutana kwa Ndu ya Mubuso, inge cwalo ku amuhela mizwale ni likaizeli ba mwa puteho ni ku tusa kwa liluko la mulumo.

Mizwale ni likaizeli ba bañwi ba yanga ni Gary mwa bukombwa, mi hañata ba kashanga sipula sa mawili sa itusisanga Gary bakeñisa butuku bwa hae bwa mwa masapo. Muzwale yo muñwi naa tusize Gary ku zamaisa tuto ya Bibele ku mutu ya naa tabela. Gary hape u konile ku tusa kaizeli yo muñwi ya naa fokozi ka lilimo ze 25. Muituti yo wa Gary hamohocwalo ni musali ya naa fokozi yo se ba fumanehanga kwa mikopano ya Sikreste.

Ha naa na ni lilimo ze 9, Louise naa itutile musebezi wa ku luka ku bo kukwaa hae ba basali, mi na, ni yo muñwi ya naa babalelanga Louise ne lu mu lutile mwa ku kabiseza libyana. Bakeñisa kuli Louise u tabela hahulu musebezi wa ku luka, u lukelanga banana likubo ze nde mi hape u lukelanga basupali ba mwa puteho ya habo likubo ze nde. Ku zwa fo, Louise u panganga makadi ka ku lamatiseza fateñi maswaniso. Batu ba ba amuhelanga makadi ao ba itebuhanga ona luli. Ha na saa li mwanana, Louise naa itutile ku taipa. Ka ku itusisa kompyuta ye ipitezi ili ye kona bulela za ñola mutu, Louise sa kona ku lumelanga ni ku amuhela mashango ka ku itusisa Intaneti. Louise naa kolobelizwe inze a na ni lilimo ze 17. Ka nako ya mungendenge o ipitezi wa ku kutaza, lu ezanga bupaina bwa ku tusa hamoho. Ka ku swana ni Gary, Louise wa petanga mañolo kuli a bonise tumelo ya hae mwa lisepiso za Mulimu ka za lifasi ili mo ‘meeto a libofu a ka tutubuluha,’ “mi ha ku na mutu . . . ya ka ipulela kuli: ‘Na kula.’”—Isa. 33:24; 35:5.

Lu itebuha hahulu kwa lituto za butokwa ze lu ituta mwa Linzwi la Jehova le li ñozwi ka susumezo ya moya wa hae! Lipilu za luna li tabile bakeñisa lilato le ba lu bonisa mizwale ni likaizeli ba mwa puteho ya luna, kakuli kambesi bona kambe ne lu si ke lwa kona ku peta hande misebezi ya luna. Mi lu pila bupilo bo bunde kakuli Jehova wa lu tusa.

[Litaluso za kwatasi]