KANA MWA HUPULA?

Kana mu balile ka tokomelo limagazini za cwanoñu fa za Tawala ya Mulibeleli? Ha mu bone nji mwa kona ku alaba lipuzo ze tatama:

Ku itusisa Bibele ka mafosisa ku talusañi, mi Bakreste ba swanela ku nga cwañi mukwa wo?

Ku itusisa Bibele ka mafosisa ki mukwa wa ku apula feela Bibele ni ku bala feela fa apuzi mutu ka ku nahana kuli timana ya bala i ka mu tusa. Bakreste ba niti ha ba laulangi. Kono ba itutanga Bibele kuli ba fumane zibo ye nepahezi ni ketelelo ye zwa ku Mulimu.—12/15, likepe 3.

Ki “lifasi” lifi le li ka fela?

“Lifasi” le li ka fela ki batu kaufela mwa lifasi ba ba sa pili ka ku lumelelana ni tato ya Mulimu. (1 Joa. 2:17) Lifasi ni batu ba ba sepahala ba ka punyuha.—1/1, makepe 5-7.

Nihaike kuli Abele u shwile, ki mwa nzila mañi mo a bulela ku luna? (Maheb. 11:4)

Abele u bulela ku luna ka tumelo ya hae. Lwa kona ku ituta ku yena ni ku ba ni tumelo ye swana ni ya hae. Tumelo ya Abele ne li ye tuna luli.—1/1, likepe 12.

Ki mwa miinelo ifi mo lu swanela ku tokomela kuli ha lu ikauhanyi ku Mulimu?

Ki mwa miinelo ye swana sina ye: Musebezi wa luna kamba ze lu itabisa ka zona, swalisano ya luna ni banabahabo luna ba ba zwisizwe mwa puteho, mo lu itusiseza lipangaliko za mazazi a, ku bilaela ka za makulanu a luna, mubonelo o fosahalile wa masheleñi, ni ku bona kuli mibonelo ya luna kamba buikalabelo bwa luna ki za butokwa hahulu.—1/15, makepe 12-21.

Lu kona ku itutañi ku Mushe ya naa na ni buikokobezo?

Mwa sibaka sa ku ikuhumusa bakeñisa buikalabelo bwa naa filwe, Mushe naa itingile ku Mulimu, isiñi ku yena muñi. Ha lu lati ku ba ni buikuhumuso kabakala maata e lu filwe kamba kabakala buikoneli bo lu na ni bona, lu bata ku sepa Jehova. (Liprov. 3:5, 6)—2/1, likepe 5.

Batu ba ba ka zusiwa ba ka pila kai?

Palonyana ya batu ba 144,000 ba ka pila kwa lihalimu. Buñata bwa batu ba ba ka zusiwa ba ka pila fa lifasi, ni ku libelela ku pila ku ya ku ile.—3/1, likepe 6.

Taba ya kuli Maisilaele ne ba ‘si ka kenya lipilu za bona mwa mupato’ ne i talusañi? (Jer. 9:26)

Maisilaele ne ba kwenuhezi Mulimu mi ne ba hanile ku cinca mikwa ya bona, ku zwa fo, ne ba tokwa ku zwisa lika ze ne tahisa kuli lipilu za bona li si ke za utwa Mulimu inge cwalo mihupulo, maikuto, ni milelo ya bona ili lika ze ne lwanisana ni za naa tokwa Mulimu. (Jer. 5:23, 24)—3/15, makepe 9-10.

Jesu naa lu tomezi cwañi mutala wa mwa ku pilela ka tabo?

Jesu naa na ni mulelo wa ku eza tato ya Mulimu mwa bupilo bwa hae. Naa lata hahulu Ndatahe ni batu. Jesu naa ziba kuli Ndatahe naa mu lata ni ku mu katelwa. Ku eza cwalo ku kona ku lu tusa ku ba ni tabo mwa bupilo.—4/1, makepe 4-5.

Kalulo ya fa lifasi ya kopano ya Mulimu i kopanyelezañi?

I kopanyeleza Sitopa se si Etelela, tutengo twa mitai, baokameli ba maeto, litopa za baana-bahulu, liputeho, ni muhasanyi ni muhasanyi.—4/15, likepe 29.

Ki kabakalañi ha lu kona ku bulela kuli likatulo za Mulimu ne si ze situhu?

Jehova ha tabeli lifu la ya maswe. (Ezek. 33:11) Za naa ezize Mulimu kwamulaho li bonisa kuli Mulimu u lemusanga batu pili a si ka tisa kale katulo. Taba yeo ya kona ku lu tusa ku ba ni sepo ya ku to punyuha likatulo za kwapili.—5/1, makepe 5-6.

Kana Maisilaele ne ba bulayanga likebenga ka ku li paheka fa likota?

Batili. Macaba a mañwi naa ezanga cwalo, kono Maisilaele bona ne ba sa ezangi cwalo. Ka nako ye ne li ezahala litaba ze ñozwi mwa Mañolo A Siheberu, batu ba ne ba ezanga sibi se si lukela lifu ne ba bulaiwanga pili, inge cwalo ka ku ba pobaula ka macwe. (Liv. 20:2, 27) Mi situpu sa mutu yo ne si pahekiwanga fa kota kuli i be tuto ku ba bañwi.—5/15, likepe 13.

Ki kabakalañi batu ha ba sa koni ku tisa kozo mwa lifasi?

Nihaike kuli batu ba petile lika ze ñata, ha ba na buikoneli bwa ku izamaisa ili bona. (Jer. 10:23) Satani ki yena ya zamaisa lifasi le, kabakaleo, batu ha ba na ku kona ku tisa kozo. (1 Joa.5:19)—6/1, likepe 16.