Muzwale ya Ketilwe ku ba Mwa Sitopa se si Etelela

La bulaalu kakusasana, la September 5, 2012, fa mutai wa kwa United States ni wa kwa Canada, ne ku zibisizwe kuli ku ketilwe muzwale yo muñwi kuli a be mwa Sitopa se si Etelela sa Lipaki za Jehova. Muzwale Mark Sanderson, naa kalile ku sebeza mwa Sitopa se si Etelela la September 1, 2012.

Muzwale Sanderson naa hulezi mwa sibaka se si bizwa San Diego, kwa California, ili mwa U.S.A., mi naa utiwa ki bashemi ba hae ba Lipaki mi naa kolobelizwe la 9 February, 1975. Naa kalile ku sebeza sina paina mwa sibaka se si bizwa Saskatchewan, ili mwa Canada la 1 September, 1983. Mwa kweli ya December, ili ka silimo sa 1990, muzwale Sanderson naa kwazize Sikolo sa Tuto ya Bukombwa (ili se si bizwa cwale kuli Sikolo sa Bibele sa Mizwale ba Makwasha) kwa United States. Muzwale Sanderson naa ketilwe ku sebeza sina paina ya ipitezi ka silimo sa 1991 ili mwa kweli ya April, mi naa sebeleza kwa sioli sa Newfoundland, se si fumaneha kwa Canada. Hamulaho wa ku sebeza sina mutusi wa muokameli wa mupotoloho, muzwale Sanderson naa memilwe ku yo sebeleza fa Betele ya mwa Canada ka silimo sa 1997, ili mwa kweli ya February. Ka silimo sa 2000 mwa kweli ya February, muzwale yo naa kupilwe ku yo sebeleza fa Betele ya kwa United States, teñi ko naa yo sebeleza mwa liluko le li bona za Litaba za kwa Sipatela mi hasamulaho a sebeza mwa Liluko la Sebelezo.

Mwa silimo sa 2008, muzwale Sanderson a fumaneha kwa Sikolo sa Mizwale ba Mwa Tutengo Twa Mitai mi hasamulaho a ketiwa ku ba mwa Katengo ka Mutai wa kwa naha ya Philippines. Mwa kweli ya September, ili ka silimo sa 2010, muzwale Sanderson naa kupilwe kuli a kutele kwa mutai wa kwa United States, ili kwa naa yo sebeza sina mutusi mwa Liluko la Sebelezo la Sitopa se si Etelela.

[Caption on page 26]

Mizwale ba ba Mwa Sitopa se si Etelela Kacenu

Ba ba yemi kwamulaho, ku zwa kwa nzohoto ku ya kwa bulyo: D. H. Splane, A. Morris III, D. M. Sanderson, G. W. Jackson, M. S. Lett. Ba ba inzi, ku zwa kwa nzohoto ku ya kwa bulyo: S. F. Herd, G. Lösch, G. H. Pierce. Mizwale kaufela ba ba mwa Sitopa se si Etelela ki Bakreste ba ba tozizwe