Mu Itekule Kuli Mu Lukela Ku Ba Batu Ba Ba Cwañi

“Mu itekule kuli mu lukela ku ba batu ba ba cwañi mwa likezo ze kenile za muzamao ni mwa likezo za busepahali ku Mulimu!”—2 PIT. 3:11.

MU KONA KU ALABA CWAÑI?

Kuli mu tabelwe ki Mulimu, mu swanela ku ba batu ba ba cwañi?

Satani u pumanga cwañi batu?

Mu kona ku ezañi kuli mu sileleze bulikani bwa mina ni Jehova?

1, 2. Lu swanela ku ba batu ba ba cwañi kuli lu lumelelwe ki Mulimu?

BATU ba bañata ba tabela hahulu ku ziba mo ba ngelwa ki batu ba bañwi. Kono ka ku ba Bakreste, nto ya butokwa hahulu ku luna ki ku ziba mwa lu ngela Jehova. Jehova ki yena yo Mutuna ka ku fitisisa mwa pupo kaufela, mi hape ki yena “liwelu-welu la bupilo.”—Samu 36:9.

² Muapositola Pitrosi naa talusize ze lu swanela ku eza kuli lu lumelelwe ki Jehova. Naa bulezi kuli lu tokwa ku ba ni ‘likezo ze kenile za muzamao ni likezo za busepahali ku Mulimu.’ (Mu bale 2 Pitrosi 3:11.) Lu kona feela ku ba ni “likezo ze kenile za muzamao” haiba lu pila bupilo bwa tabela Mulimu. Ku pila bupilo bwa tabela Mulimu ku kopanyeleza mo lu nahanela, mo lu ezeza lika, ni mo lu lapelela Mulimu. Hape lu swanela ku ba ni “likezo za busepahali ku Mulimu” ili ze tahiswa ki lilato le lituna ni likute le lu na ni lona ku Mulimu. Kamukwaocwalo, Jehova hape wa kona ku lu shemuba ku likana ni ze lu eza mwa bupilo mane ni mo lu ikutwela ka za hae. Jehova “u tatuba lipilu,” kabakaleo, Jehova wa ziba haiba likezo za luna li kenile nihaiba lu lapela feela yena.—1 Makol. 29:17.

3. Lu swanela ku ipuza lipuzo mañi?

³ Satani Diabulosi ha lati kuli lu lumelelwe ki Mulimu. Satani u sweli ku lika mwa konela kaufela kuli a felise bulikani bwa luna ni Jehova. U lika ka taata ku lu puma ilikuli lu tuhele ku lapela Jehova. (Joa. 8:44; 2 Makor. 11:13-15) Kamukwaocwalo, lu swanela ku ipuza kuli, ‘Satani u pumanga cwañi batu? Ni kona ku ezañi kuli ni sileleze bulikani bwa ka ni Jehova?’

 SATANI U PUMANGA CWAÑI BATU?

4. Satani u likanga ku ezañi kuli a felise bulikani bwa luna ni Mulimu, mi ki kabakalañi?

⁴ Mulutiwa Jakobo naa ñozi kuli: “Mutu ni mutu u likiwa ka ku hohiwa ni ku hapiwa ki takazo ya hae yena muñi. Cwale takazo ha se i hulile, i zwala sibi; mi sibi, ha se si ezizwe, si tahisa lifu.” (Jak. 1:14, 15) Kuli a felise bulikani bwa luna ni Mulimu, Satani u likanga ku puma pilu ya luna, ili kona ko ku simuluha litakazo za luna.

5, 6. (a) Satani u lika cwañi ku puma pilu ya luna? (b) Ki lika mañi ze taalu za itusisa Satani kuli a lu tahiseze ku ba ni litakazo ze maswe mwa lipilu za luna, mi u itusisa hande cwañi lika zeo?

⁵ Satani u lika cwañi ku puma pilu ya luna? Bibele i bulela kuli: “Lifasi kamukana li mwa maata a ya maswe.” (1 Joa. 5:19) Malaba a Satani a kopanyeleza “lika ze mwa lifasi.” (Mu bale 1 Joani 2:15, 16.) Ka lilimo-limo, Diabulosi u itusisize lika ze shutana-shutana ze mwa lifasi kuli a pume batu. Bakeñisa kuli lu pila mwa lifasi le, lu swanela ku isileleza kwa malaba a Satani.—Joa. 17:15.

⁶ Satani u likanga ku lu kukueza kuli lu be ni litakazo ze maswe mwa lipilu za luna. Kuli a eze cwalo, u itusisanga “lika ze mwa lifasi” ze taalu ze ne bulezwi ki muapositola Joani: Lika zeo ki (1) “takazo ya nama,” (2) “takazo ya meeto,” ni (3) “moya wa ku iponahaliseza za na ni zona mutu mwa bupilo.” Satani naa itusisize lika zeo kaufela ha naa likile Jesu mwa lihalaupa. Bakeñisa kuli Satani saa itusisize malaba ao ka lilimo ze ñata, wa ziba hande mwa ku itusiseza ona mi mane wa ziba mufuta wa lilaba la kona ku itusisa ku mañi ni mañi wa luna. Pili lu si ka kala kale ku nyakisisa mo lu kona ku isileleleza kwa malaba a Satani, ha lu nyakisiseñi mo Diabulosi naa pumezi Eva ni mwa naa palelezwi ku puma Mwanaa Mulimu.

“TAKAZO YA NAMA”

7. Satani naa itusisize cwañi “takazo ya nama” kwa ku lika Eva?

⁷ Batu kaufela ba tokwa lico kuli ba zwelepili ku pila. Mulimu, yena Mubupi wa lika kaufela, naa lukisize lifasi kuli li tahisange lico ze ñata. Satani u kona ku lu lika kuli lu eze lika ze sa tabisi Mulimu ka ku itusisa takazo ye lu na ni yona kwa lico. Ha lu nyakisiseñi mwa naa ezelize cwalo ku Eva. (Mu bale Genese 3:1-6.) Satani naa bulelezi Eva kuli naa si ke a shwa ha naa ka ca kwa muselo wa “kota ya ku ziba bunde ni bumaswe.” Satani naa bulelezi Eva kuli ha naa ka ca kwa kota yeo, naa ka swana sina Mulimu. (Gen. 2:9) Diabulosi naa talusa kuli Eva naa ka kona ku zwelapili ku pila ni kwa naa si ke a utwa Mulimu. Bo ne li buhata bo butuna luli! Diabulosi ha saa bulelezi Eva taba yeo, Eva naa tokwa ku keta za naa ka eza fa lika ze peli, ku hanyeza Satani kamba ku zwelapili ku nahana  za naa mu bulelezi Satani ni ku tuhelela takazo ya ku ca muselo ku zwelapili ku hula mwa pilu ya hae. Nihaike kuli Eva naa kona ku ca muselo kwa likota li sili, naa iketezi ku zwelapili ku nahana za kota yeo ye ne li fahalaa simu. Mi bakeñisa ku eza cwalo, Eva a ca muselo wa kota yeo. Satani naa tahisize kuli Eva a be ni takazo ye maswe ya ku ca muselo wa naa mu hanisize mubupi wa hae.

8. Satani naa itusisize cwañi “takazo ya nama” kwa ku lika Jesu, mi ki kabakalañi Satani ha naa palezwi ku puma Jesu?

⁸ Satani naa likile ku puma Jesu ka nzila ye swana. Jesu ha naa li mwa lihalaupa inzaa itimile lico ka mazazi a 40 ni masihu a 40, Satani a mu lika ka ku itusisa takazo ya lico. Satani naa bulezi kuli: “Haiba u mwanaa Mulimu, bulelela licwe le, kuli li fetuhe buhobe.” (Luka 4:1-3) Jesu naa tokwa ku iketela za naa ka eza fa lika ze peli, ku itusisa maata a hae ka mulelo wa kuli a fumane sa ku ca, kamba ku sa itusisa maata a hae ka nzila yeo. Jesu naa ziba kuli naa sa swaneli ku itusisa maata a hae ka buitati. Nihaike kuli naa lapile, Jesu naa ngile bulikani bwa hae ni Mulimu ku ba bwa butokwa hahulu ku fita lico. Jesu naa alabile Satani kuli: “Ku ñozwi kuli: ‘Mutu ha na ku pila buhobe feela, kono u ka pila ni ka linzwi kaufela le li zwa mwa mulomo wa Jehova.’”—Mat. 4:4, 5.

“TAKAZO YA MEETO”

9. “Takazo ya meeto” ki nto mañi, mi Satani naa itusisize cwañi lilaba leo ku Eva?

⁹ Lilaba le liñwi la Satani le li bulezwi ki Joani ki “takazo ya meeto.” Mutu wa kona ku kalisa ku lakaza nto ye ñwi ka ku talima feela nto yeo. Satani naa itusisize takazo yeo ha naa puma Eva ka ku bulela kuli: “Meeto a mina a ka tona.” Bakeñisa kuli Eva naa zwezipili ku talima muselo, takazo ya hae ya ku ca muselo wo ya hula hahulu. Eva naa boni kuli kota yeo ne “i katelisa meeto.”

10. Satani naa itusisize cwañi “takazo ya meeto” kuli a like Jesu, mi Jesu naa alabile cwañi?

¹⁰ Satani naa itusisize cwañi “takazo ya meeto” kuli a like Jesu? Satani “a mu bonisa [Jesu] mibuso kaufela ya lifasi. Diabulosi kihaa li ku yena: ‘Ni ka ku fa maata fahalimwaa mibuso ye kaufela ni kanya ya yona.’” (Luka 4:5, 6) Za naa boni Jesu ne si luli mibuso ya lifasi, kono ne li pono ya kanya ya mibuso yeo. Ku bonahala kuli Satani naa nahana kuli Jesu naa ka hapiwa ki lika za naa boni. Satani naa bulelezi Jesu kuli: “Haiba u wa feela ka mañwele ni ku ni lapela, maata ao kaufela a ka ba a hao.” (Luka 4:7) Jesu naa sa tabeli ni hanyinyani kuli a latelele za naa bata Satani. Naa alabile Satani kuli: “Ku ñozwi kuli: ‘Ki Jehova Mulimu wa hao ye u lukela ku lapela, mi ki yena feela a nosi ye u lukela ku sebeleza.’”—Luka 4:8.

 “MOYA WA KU IPONAHALISEZA ZA NA NI ZONA MUTU MWA BUPILO”

11. Eva naa pumilwe cwañi ki Satani?

¹¹ Kwa mafelelezo, Joani u bulela za “moya wa ku iponahaliseza za na ni zona mutu mwa bupilo.” Adama ni Eva ha ne ba li feela bona batu ba nosi fa lifasi, ne ba sa koni ku iponahaliseza lika ze ne ba na ni zona. Kono ne ba ikuhumusize. Satani naa kukuelize Eva ku lumela kuli ku na ni nto ye nde ya naa swanela ku ba ni yona, kono kuti Mulimu naa sa tabeli ku mu fa nto yeo. Diabulosi naa bulelezi Eva kuli ha naa ka ca kwa “kota ya ku ziba bunde ni bumaswe,” naa ka ‘ba sina Mulimu,’ ili ku ziba “bunde ni bumaswe.” (Gen. 2:17; 3:5) Satani naa bata kuli Eva a nahane kuli naa ka kona ku pila ni kwa naa si ke a etelelwa ki Jehova. Ku bonahala kuli Eva naa lumezi taba yeo bakeñisa buikuhumuso bwa hae. Eva naa cile kwa muselo wa naa hanisizwe mi naa nahanile kuli naa si ke a shwa. Eva naa ipumile isali yena!

12. Ki nzila ifi ye ñwi ya naa itusisize Satani kuli a like Jesu, mi Jesu naa alabile cwañi?

¹² Ka ku shutana ni Eva, Jesu naa tomile mutala o munde wa buikokobezo! Satani naa likile Jesu kuli a eze nto ye ne ka tabisa batu ba bañwi ni ye ne ka tahisa kuli a like Mulimu. Kono Jesu naa hanile ku eza za naa bata Satani kakuli ku eza cwalo ne ku ka bonisa kuli wa ikuhumusa! Jesu naa alabile Satani ka ku utwahala ha naa ize: “Ku izwe: ‘U si ke wa lika Jehova Mulimu wa hao.’”—Mu bale Luka 4:9-12.

LU KONA KU SILELEZA CWAÑI SILIKANI SA LUNA NI JEHOVA?

13, 14. Satani u sweli ku lika cwañi ku lu puma kacenu?

¹³ Kacenu, Satani u itusisa malaba a swana ili a naa itusisize ku Eva ni Jesu. U itusisa “takazo ya nama” kuli a kukueze batu ku eza buhule kamba kuli ba ce maswe ni ku nwa maswe. Satani u itusisa “takazo ya meeto” kuli a kukueze batu ku buha maswaniso a mapunu, sihulu fa Intaneti. Mi hape Satani u itusisa “moya wa ku iponahaliseza za na ni zona mutu mwa bupilo” kuli a kukueze batu ku ikuhumusa ni ku bata ku ba ni maata, libubo, ni ku bata ku ipumanela lika ze ñata mwa bupilo.

¹⁴ Satani u itusisa “lika za lifasi” sina feela ndui mwa itusisezanga bulo kwa kashuto. Tapi i kona ku tabela hahulu ha i bona bulo, kono mwahalaa bulo bo, ku na ni mwateñi kashuto. Ka nzila ye swana, Satani u kona ku itusisa lika ze lu kona nga kuli  ki ze nde ni kuli lwa li tokwa, kono hailifo mulelo wa hae ki wa ku lu kukueza kuli lu si ke lwa latelela milao ya Mulimu. Satani u bata kuli lu nahane kuli sa butokwa ku luna ki ku ipumanela lika ze lu bata ni ku pila hande ku fita ku eza tato ya Mulimu. Kana mu ka pumiwa ki Satani?

15. Lu kona ku likanyisa cwañi Jesu ka ku sa pumiwa ki Satani?

¹⁵ Eva naa pumilwe ki Satani, kono Jesu yena naa si ka pumwa. Nako kaufela Satani ha naa mu likanga, Jesu naa alabanga ka ku itusisa Mañolo mi naa bulelanga kuli: “Ku ñozwi kuli” kamba, “Ku izwe.” Haiba lu baituti ba bande ba Bibele, lu ka ziba hande Mañolo mi lu ka hupulanga litimana ze kona ku lu tusa ha lu likiwa. (Samu 1:1, 2) Ku hupulanga mitala ya batanga ba Mulimu ba ne ba sepahala kwa kona ku lu tusa ku sepahala inge bona. (Maro. 15:4) Haiba lu kuteka hahulu Jehova, ili ku lata za lata ni ku toya za toile, lu ka silelezwa.—Samu 97:10.

16, 17. ‘Maata a luna a ku nahana’ a kona ku tahisa kuli lu be batu ba ba cwañi?

¹⁶ Muapositola Paulusi u lu susueza ku itusisa ‘maata a luna a ku nahana’ kuli lu be batu ba ba nga lika sina mwa li ngela Jehova, ku fita ku nga lika mo ba li ngela batu ba lifasi. (Maro. 12:1, 2) Paulusi u lu hupulisa kuli lu swanela ku tokomela hahulu lika ze lu nahana. Naa ize: “Lu wisa mihupulo ye fosahezi ni nto kaufela ye lumbile ye pahamezi ku lwanisa zibo ya Mulimu; mi lu hapa muhupulo kaufela kuli u ipeye ku utwa Kreste.” (2 Makor. 10:5) Ze lu nahana za kona ku bonisa kuli lu batu ba ba cwañi, kamukwaocwalo, lu swanela ku nahananga lika ze tabisa Mulimu.—Mafil. 4:8.

¹⁷ Haiba lu bata ku ba batu ba ba kenile, lu swanela ku tokolomoha minahano ni litakazo ze maswe. Lu swanela ku lata Jehova ka “pilu ye kenile.” (1 Tim. 1:5) Pilu ya puma, mi mane ku taata hahulu kuli lu lemuhe mo lu kona ku kukuelezwa ki “lika ze mwa lifasi.” (Jer. 17:9) Kabakaleo, ki kwa butokwa kuli lu latelele kelezo ya Paulusi ye li: “Mu zwelepili ku itekula kuli mu bone nji mu sa li mwa tumelo, mu zwelepili ku bonisa se mu li sona luli.” Ha lu nze lu ituta Bibele, lu swanela ku ipuza kuli, ‘Kana mihupulo ni litakazo za ka za tabisa Mulimu?’—2 Makor. 13:5.

18, 19. Ki kabakalañi ha lu swanela ku sebeza ka taata kuli lu be batu ba ba tabelwa ki Jehova?

¹⁸ Nto ye ñwi ye kona ku lu tusa ku hana “lika za mwa lifasi” ki ku hupulanga manzwi a Joani a li: “Lifasi la fela ni takazo ya lona, kono yena ya eza tato ya Mulimu u ina ku ya ku ile.” (1 Joa. 2:17) Lifasi la Satani li bonahala inge kuli li ka ina ku ya ku ile. Kono zazi le liñwi, lifasi la Satani li ka fela. Ku hupulanga kuli lika kaufela ze mwa lifasi li tuha li fela ku ka lu tusa ku sa pumiwa ki Satani.

¹⁹ Muapositola Pitrosi naa ñozi kuli lu swanela ku ba batu ba ba tabelwa ki Mulimu ha lu nze lu “libelela ni ku hupula ku ba teñi kwa lizazi la Jehova, leo ku lona mahalimu a ka sinyiwa mwa malimi a mulilo, mi lika li ka shengunuka kabakala ku cisa ko kutuna!” (2 Pit. 3:12) Honacwale-cwale fa, lizazi la Jehova li ka taha, mi Jehova u ka sinya lika kaufela ze mwa lifasi la Satani. Pili nako yeo i si ka taha kale, Satani u ka zwelapili ku itusisa “lika za mwa lifasi” kwa ku lu lika, sina mwa naa likezi Eva ni Jesu. Ha lu swaneli ku ba sina Eva ka ku lika ku latelela litakazo za luna. Ku eza cwalo ku ka bonisa kuli lu nga Satani ku ba mulimu wa luna. Lu swanela ku ba sina Jesu ni ku tiyela miliko ye lu kopana ni yona, ku si na taba kuli Satani u kona ku bonahalisa miliko yeo ku ba ye minde mwa meeto a luna. Haike mañi ni mañi wa luna a sebeze ka taata kuli a be mutu ya tabelwa ki Jehova.

[Lipuzo za Tuto]

[Siswaniso se si fa likepe 24]

Satani naa itusisize “takazo ya nama” kuli a pume Eva (Mu bone paragilafu 7)

[Siswaniso se si fa likepe 25]

Jesu naa si ka tuhelela nto ifi kamba ifi ku mu lyanganisa (Mu bone paragilafu 8)

[Maswaniso a fa likepe 26]

Ki likuka lifi za mwa Bibele ze kona ku mi tusa mwa miinelo ye? (Mu bone maparagilafu 13 ni 14)