Likupuliso Za Jehova Za Sepahala

“Likupuliso za Jehova za sepahala, li talifisa ya si na kutwisiso.”—SAMU 19:7, NW.

MU KONA KU ALABA CWAÑI?

Jehova u lu fa likupuliso mañi mwa Bibele?

Likupuliso za Jehova li kona ku tusa cwañi Bakreste kacenu?

Ki kabakalañi ha lu kona ku sepa kuli ku latelela likupuliso za Jehova ku ka lu tusa kamita?

1. Ki litaba mañi ze lu itutanga hañata kwa mikopano ya luna, mi ku itutanga litaba zeo kamita ku lu tusa cwañi?

HA MU itukisezanga tuto ya Tawala ya Mulibeleli, kana fokuñwi mwa nahananga kuli, ‘Bati ni hupula inge kuli ne lu itutile taba ye!’ Haiba se mu fumanehile kwa mikopano ya Lipaki za Jehova, mwendi ne mu lemuhile kuli litaba ze ñwi li itutiwanga ka ku kuta-kutelwa. Ha lu li kwa mikopano, lu itutanga za Mubuso wa Mulimu, za sitabelo sa Jesu, za musebezi wa ku kutaza, ni za tulemeno to tu cwale ka lilato ni tumelo. Ku itutanga litaba zeo ku tiisa tumelo ya luna mi hape ku lu tusa ku ba “baezi ba linzwi, isi bautwi feela.”—Jak. 1:22.

2. (a) Mwa Bibele linzwi la “likupuliso” hañata li talusañi? (b) Milao ya Jehova i shutana cwañi ni milao ya batu?

² Mwa Bibele, linzwi la “likupuliso” hañata li talusa milao ni litaelo za fa batu ba hae Mulimu. Milao ya Jehova i shutana hahulu ni milao ya batu, kakuli milao ya batu ha i si ka petahala mi hañata ya cinciwanga. Milao ya Mulimu i petehile, mi lwa kona ku kolwa kuli haiba lu mamela milao yeo, lu ka tuseha hahulu. Ki niti kuli kwamulaho, ku na ni milao ye miñwi ya naa file Mulimu kwa batu ba hae ili ye ba sa tokwi ku latelela batu ba hae kacenu. Kono fo ha ku talusi kuli milao yeo i fosahalile. Walisamu naa bulezi kuli: “Likelezo [kamba likupuliso] za hao ki za niti ku ya ku ile.”—Samu 119:144.

3, 4. (a) Likupuliso za Jehova fokuñwi li kopanyelezangañi? (b) Maisilaele ne ba ka tusiwa cwañi ha ne ba ka utwa milao ya Mulimu?

³ Likupuliso za Jehova fokuñwi li kopanyeleza litemuso. Sicaba sa Isilaele kamita ne si amuhelanga litemuso ze ne ba fanga bapolofita ba Mulimu. Ka mutala, nakonyana pili Maisilaele ba si ka kena kale mwa Naha ya Sepiso, Mushe naa ba lemusize kuli: “Mu itemuhele, lipilu za mina li si ke za pumiwa, mi mu si ke mwa keluha, mwa yo sebeleza milimu i sili, mwa i kubamela;  buhali bwa Muñaa Bupilo bu ka suhana bu mi tukela.” (Deut. 11:16, 17) Mwa Bibele, lu bala likupuliso ze ñwi ze ñata ze tusa ili za naa file Mulimu kwa batu ba hae.

⁴ Jehova hañata naa hupulisanga batu ba hae kuli ba mu sabe, ba mu utwe, ni ku kuteka libizo la hae. (Deut. 4:29-31; 5:28, 29) Mulimu naa ba sepisize kuli ha ne ba ka utwa milao ya hae, naa ka ba fa limbuyoti ze ñata.—Liv. 26:3-6; Deut. 28:1-4.

MO NE BA NGEZI LITAELO ZA MULIMU MAISILAELE

5. Ki kabakalañi Mulimu ha naa tusize Mulena Ezekiasi?

⁵ Mwa nako kaufela ye ne ba pilile Maisilaele, Mulimu naa talelezanga lisepiso za hae kamita. Ka mutala, Senakeribi, Mulena wa Asirya ha naa taselize Juda ni ku bemba Mulena Ezekiasi, Jehova a luma lingeloi kuli li to tusa batu ba hae. Mwa busihu bu li buñwi feela, lingeloi la Mulimu ne li bulaile masole ba Asirya ba ba eza 185,000. Senakeribi naa kutezi kwa naha ya habo yena inze a shubuzwi. (2 Makol. 32:21; 2 Mal. 19:35) Ki kabakalañi Mulimu ha naa tusize Mulena Ezekiasi? Libaka ki la kuli Ezekiasi naa sepahala ku Mulimu mi naa ‘nza ya ka milao ya Muñaa Bupilo.’—2 Mal. 18:1, 5, 6.

6. Mulena Josiasi naa bonisize cwañi kuli naa sepile Jehova?

⁶ Mutu yo muñwi ya naa utwile milao ya Jehova ki Mulena Josiasi. Ku zwelela feela kwa bwanana, naa ezize “ze lukile fapilaa Muñaa Bupilo.” (2 Makol. 34:1, 2) Josiasi naa bonisize kuli naa sepile Jehova ka ku sinya milimu kaufela ya maswaniso ye ne fumaneha mwa naha, mi naa tusize batu ku lapela Jehova hape. Bakeñisa kuli Josiasi naa ezize cwalo, Jehova naa mu fuyauzi mi hape naa fuyauzi ni sicaba kaufela.—Mu bale 2 Makolonika 34:31-33.

7. Ne ku ezaheziñi kwa Maisilaele ha ne ba si ka utwa Jehova?

⁷ Kono ka bumai, batu ba Mulimu fokuñwi ne ba sa latelelangi likupuliso za Jehova. Ne ba zwezipili ku sa utwa Jehova ka ku kuta-kutela. Tumelo ya batu ba Mulimu bao ha ne i fokozi, ne ba kukuelizwe ki ba bañwi ku lapela milimu ya buhata. (Maef. 4:13, 14) Mi sina mwa naa ba lemuselize Mulimu, batu bao ne ba nyandile kabakala ku sa latelela litaelo za Mulimu.—Liv. 26:23-25; Jer. 5:23-25.

8. Muinelo wa luna u swana cwañi ni o ne ba li ku ona Maisilaele?

⁸ Muinelo wa luna u swana cwañi ni o ne ba li ku ona Maisilaele? Batu ba Mulimu kacenu ni bona ba fiwanga likelezo, sina mo ne ba felwanga Maisilaele. (2 Pit. 1:12) Nako kaufela ha lu bala Bibele, lwa hupuliswanga  litaelo za Mulimu. Mi Jehova u lu file kolo ya ku iketela ku utwa milao ya hae kamba ku eza feela lika ze lu nga luna beñi kuli li lukile. (Liprov. 14:12) Ha lu nyakisiseñi libaka ha lu tokwa ku latelela likupuliso za Jehova ni mo lu tusezwa ka ku eza cwalo.

MU UTWE MULIMU KULI MU PILE

9. Maisilaele ha ne ba li mwa lihalaupa, Jehova naa ba kolwisize cwañi kuli naa ba tusa?

⁹ Maisilaele ha ne ba kalile musipili wa bona wa mwa lihalaupa o no tandile lilimo ze 40, Jehova naa si ka ba taluseza mwa naa ka ba etelelela, ku ba sileleza, ni ku ba babalela. Kono Jehova naa bonisize Maisilaele mwa linzila ze ñata kuli ne ba ka tusiwa hahulu ha ne ba ka mu utwa ni ku latelela litaelo za hae. Bakeñisa kuli Mulimu naa etelelanga Maisilaele ka ku itusisa lilu le li yemi nonga musihali, ni ku itusisa lilu la mulilo busihu, nto yeo ne i hupulisanga Maisilaele kuli Jehova naa ba tusa mwa musipili wa bona o taata wo. (Deut. 1:19; Ex. 40:36-38) Jehova naa fanga batu ba hae ze ne ba tokwa kaufela. Ne ‘ba sa tokwi se siñwi; liapalo za bona ne li si ka supala, mi ni mautu a bona naa si ka luluha.’—Neh. 9:19-21.

10. Jehova u etelela cwañi batu ba hae kacenu?

¹⁰ Batanga ba Mulimu kacenu ba tuha ba kena mwa lifasi le linca. Kana lu sepile kuli Jehova u lu fa ze lu tokwa kaufela kuli lu to punyuha “ñalelwa ye tuna”? (Mat. 24:21, 22; Samu 119:40, 41) Ki niti kuli Jehova ha itusisi lilu le li yemi nonga kamba lilu la mulilo kwa ku lu etelela ku liba mwa lifasi le linca. Kono u itusisa kopano ya hae ku lu fa likupuliso. Ka mutala, lu susuezwanga ku tiisa bulikani bwa luna ni Jehova ka ku bala Bibele, ku ba ni Nako ya ku Lapela Sina Lubasi, ku fumaneha kamita kwa mikopano, ni ka ku yanga mwa sebelezo ya mwa simu. Kana lu ezize licinceho ze ñwi mwa bupilo bwa luna ilikuli lu latelele litaelo zeo? Ku eza cwalo ku ka lu tusa ku ba ni tumelo ye tiile, ye lu tokwa ku ba ni yona kuli lu to kena mwa lifasi le linca.

11. Mulimu u bonisa cwañi kuli wa lu tokomela ilikuli lu be ni tabo ni buiketo?

¹¹ Kopano ya Jehova hape i lu fa ketelelo ye lu tusa ku eza likatulo ze nde mwa bupilo bwa luna. Ka mutala, lu susuezwanga ku ba ni mubonelo o swanela wa lika za kwa mubili mi hape lu susuezwanga ku pila bupilo bo bu bunolo ilikuli lu si ke lwa ba ni lipilaelo ze ñata. Hape lu tusizwe ki ketelelo ye lu fiwanga ka za muapalelo ni ponahalo ya luna, ka za lika ze lu keta ku itabisa ka zona, ni ka za mo lu swanela ku ngela tuto ye pahami. Mi hape lwa hupuliswanga lika ze ñwi ze lu tusa ku isileleza ha lu li mwa mandu a luna, mwa limota za luna, kamba mwa Mandu A Mubuso, ni ku itukiseza miinelo ya ka sipundumukela. Likelezo zeo kaufela li bonisa kuli Mulimu wa lu tokomela ilikuli lu be ni tabo ni buiketo.

LIKUPULISO NE LI TUSIZE BAKRESTE BA KWA MAKALELO KU ZWELAPILI KU SEPAHALA

12. (a) Jesu naa bulelelanga balutiwa ba hae taba mañi ka nako kaufela? (b) Ki nto mañi ya naa ezize Jesu ye bonisa buikokobezo ili ya naa si ka libala Pitrosi, mi lu swanela ku itutañi kwa mutala wa Jesu?

¹² Mwa linako za baapositola, batu ba Mulimu ne ba fiwanga likupuliso kamita. Jesu kamita naa bulelelanga balutiwa ba hae libaka ha ne ba swanela ku ba ni buikokobezo. Jesu naa bonisize balutiwa ba hae mutala wa buikokobezo. Fa busihu bo ne bu latelezwi ki lizazi la naa shwile, Jesu ni baapositola ba hae ne ba kopani hamoho fa Paseka. Balutiwa ba hae ha ne ba nze ba ca, Jesu a yema mi a kala ku tapisa mautu a bona. Musebezi wo hañata ne u eziwanga ki mutanga. (Joa. 13:1-17) Za naa ezize Jesu fa busihu bo, ne li lutile baapositola ba hae  tuto ya butokwa ye ne ba si ke ba libala. Hamulaho wa lilimo ze 30, muapositola Pitrosi ya naa li teñi fa sico seo, a tusa Bakreste ka yena kuli ba be ni moya wa buikokobezo. (1 Pit. 5:5) Za naa ezize Jesu za lu susueza kaufelaa luna kuli lu be ni buikokobezo ha lu nze lu sebelisana ni batu ba bañwi.—Mafil. 2:5-8.

13. Jesu naa lutile balutiwa ba hae kuli ba be ni kalemeno kafi ka butokwa?

¹³ Jesu hape naa bulelelanga balutiwa ba hae ka nako kaufela kuli ba be ni tumelo ye tiile. Nako ye ñwi, balutiwa ne ba palezwi ku folisa mushimani ya naa kenwi ki mudimona. Mi ba buza Jesu kuli: “Ki kabakalañi luna ha lu palezwi ku u leleka?” Jesu a ba alaba a li: “Ki kabakala tumelo ya mina ye nyinyani.” Mi hamulaho a ba bulelela kuli kambe ne ba na ni tumelo ye likana ni “peu ya masitete,” ne ba ka kona ku eza lika kaufela. (Mat. 17:14-20) Ka nako kaufela ya naa peta bukombwa bwa hae fa lifasi, Jesu naa lutile balutiwa ba hae kuli ki kwa butokwa ku ba ni tumelo. (Mu bale Mateu 21:18-22.) Kana lwa fumanehanga kwa mikopano ya sikiliti, mikopano ya mupotoloho, mikopano ye ipitezi, ni mikopano ya puteho ilikuli lu tiise tumelo ya luna? Lu ikolanga ze ñata hahulu kwa mikopano yeo. Mikopano yeo i lu fanga kolo ya ku bonisa haiba lu sepile Jehova.

14. Ki kabakalañi ha lu tokwa ku bonisa lilato le li swana ni la Kreste kacenu?

¹⁴ Mwa Mañolo A Sigerike A Sikreste, ku na ni likupuliso ze ñata ze lu tusa ku lata ba bañwi. Jesu naa bulezi kuli mulao wa bubeli wa butokwa ki wa ku “lata wahenu mo u itatela.” (Mat. 22:39) Jakobo munyanaa Jesu naa bizize lilato kuli ki “mulao wa mulena.” (Jak. 2:8) Mi muapositola Joani naa ñozi kuli: “Balatiwa, se ni mi ñolela, haki mulao o munca, kono ki mulao o mu bile ni ona ku zwa kwa makalelo. Mulao wa kale wo ki linzwi le mu utwile.” (1 Joa. 2:7, 8) Joani naa talusañi ha naa bulezi za “mulao wa kale”? Milao yeo kaufela ne i ama kwa taelo ya ku bonisa lilato. Mulao wo ne li wa “kale” kakuli Jesu naa file kale mulao wo ‘ku zwa feela kwa makalelo.’ Kono mulao wo hape ne li “o munca” kakuli balutiwa ne ba tokwa ku bonisa lilato le li swana ni la naa bonisize Kreste mwa miinelo ye miñwi ye ne ba ka kopana ni yona. Kacenu, lu itebuha hahulu kwa litemuso ze lu fiwanga ze lu tusa ku sa ba ni moya wa buitati o atile mwa lifasi la kacenu. Ku fita ku ba ni buitati, lu bonisa lilato ku ba bañwi.

15. Ki lifi libaka le lituna la naa tezi Jesu fa lifasi?

¹⁵ Jesu naa iyakatwanga batu ba bañwi. Naa ezize cwalo ka ku folisa bakuli ni ku zusa bafu. Ku folisa batu ne si lona libaka le lituna la naa tezi Jesu fa lifasi. Musebezi wa hae wa ku kutaza ni ku luta ki ona o  ne u tusize hahulu batu. Kamukwaufi? Ka mutala, batu ba naa folisize Jesu ni batu ba naa zusize kwa bafu, ne ba tilo supala ni ku shwa hasamulaho, kono batu ba ne ba amuhezi lushango lwa naa kutalize Jesu, ne ba bile ni kolo ya ku to amuhela bupilo bo bu sa feli.—Joa. 11:25, 26.

16. Lipaki za Jehova kacenu ba latelela cwañi taelo ya Jesu ya ku tusa batu ku ba balutiwa?

¹⁶ Jesu naa laezi balutiwa ba hae kuli: “Hakulicwalo, ha mu ye, mi mu lute batu ba macaba kaufela ku ba balutiwa.” (Mat. 28:19) Bakreste ba mwa linako za baapositola ne ba zwezipili ku eza musebezi wa naa kalile Jesu, mi ni luna kacenu lu zwezipili ku kutaza kwa batu ba bañata ba ba fumaneha mwa libaka ze ñata. Lipaki za Jehova ba ba fitelela 7 milioni ba tukufalezwi ku luta ba bañwi za Mubuso wa Mulimu mwa linaha ze fitelela 230, mi Lipaki ba zamaisa lituto za Bibele kwa batu ba bañata-ñata. Musebezi wo wa ku kutaza u fa bupaki bwa kuli lu pila mwa mazazi a maungulelo.

MU SEPE JEHOVA KACENU

17. Paulusi ni Pitrosi ne ba file kelezo mañi kwa Bakreste ba mwa linako za baapositola?

¹⁷ Likupuliso za Jehova ne li tusize Bakreste ba mwa linako za baapositola ku tiisa tumelo ya bona. Ka mutala, Paulusi ha naa li mwa tolongo mwa Roma, naa bulelezi Timotea kuli: “U zwelepili ku swala mutala wa manzwi a mande a ne u utwile ku na.” (2 Tim. 1:13) Ku bonahala kuli Timotea naa susuelizwe ki manzwi a Paulusi ao. Pitrosi ni yena hape naa susuelize Bakreste kuli ba beleke ka taata kuli ba bonise tulemeno to tu cwale ka buitiiso, lilato la ku lata mizwale, ni buiswalo. Mi hape Pitrosi naa ekelize ku bulela kuli: “Ni ka na ni mi hupulisanga lika zeo kamita, nihaike mwa li ziba mi mu tiile luli mwa niti.”—2 Pit. 1:5-8, 12.

18. Bakreste mwa linako za baapositola ne ba ikutwanga cwañi ka za ketelelo ye ne ba fiwanga?

¹⁸ Ki niti kuli litaba za naa ñolezi liputeho Paulusi ni Pitrosi ne li swana ni ze ne “bulezwi kwamulaho ki bapolofita ba ba kenile.” (2 Pit. 3:2) Kono kana mizwale ba luna mwa linako za baapositola ne ba nyemanga ha ne ba fiwanga ketelelo? Batili. Ne ba ziba kuli Mulimu naa ba fa ketelelo yeo bakeñisa kuli naa ba lata mi naa bata ku ba tusa kuli ba zwelepili ku sepahala.—2 Pit. 3:18.

19, 20. Ki kabakalañi ha lu kona ku sepa kuli ku latelela ketelelo ya Jehova ku ka lu tusa hahulu, mi lu kona ku tusiwa cwañi ki likupuliso za lu fa Jehova?

¹⁹ Kacenu lu na ni mabaka a mañata a lu tusa ku sepa kuli haiba lu latelela ketelelo ya Jehova ya lu fa ka Linzwi la hae, yona Bibele, lu ka tuseha hahulu. Kelezo ye fumaneha mwa Linzwi la Mulimu i lukile. (Mu bale Joshua 23:14.) Bibele i lu bulelela mwa naa sebelisanezi Mulimu ni batu ka lilimo ze ñata. Litaba ze cwalo ne li ñolezwi kuli li lu tuse. (Maro. 15:4; 1 Makor. 10:11) Hape lu iponezi bupolofita bwa mwa Bibele ha bu talelezwa mwa linako za luna. Bupolofita bu swana sina likupuliso ze ne filwe lilimo ze ñata kwamulaho. Ka mutala, batu ba bañata ba kalile ku lapela Jehova, sina mo ne ku polofitezwi kuli ne ku ka ba cwalo mwa “mazazi a kwapili.” (Isa. 2:2, 3) Miinelo ya mwa lifasi le i sweli ya totobela hahulu. Ku totobela kwa miinelo yeo ku taleleza bupolofita bwa Bibele. Mi sina mo se lu itutezi, musebezi wa ku kutaza o sweli ku eziwa mwa lifasi kaufela u taleleza manzwi a naa bulezi Jesu.—Mat. 24:14.

²⁰ Ka lilimo-limo, Mubupi wa luna u bonisize hande fo ku sweu kuli lwa kona ku mu sepa. Kana lwa tusiwa ki likupuliso za lu fa Jehova? Kaizeli ya bizwa Rosellen u bulela kuli: “Ha ne ni kalile ku sepa hahulu Jehova, ne ni lemuhile hande fo ku sweu kuli wa ni lata mi u ni fa maata a ku itiisa.” Ni luna lwa kona ku tusiwa hahulu haiba lu latelela likupuliso za Jehova.

[Lipuzo za Tuto]

[Siswaniso se si fa likepe 8]

Josiasi naa latelezi likupuliso za Jehova mi naa tusize batu ku kala ku lapela Jehova hape (Mu bone paragilafu 6)

[Siswaniso se si fa likepe 10]

Ku latelela likupuliso za Jehova ku lu tusa ku babalela hande Ndu ya Mubuso ya luna (Mu bone paragilafu 11)