Mu Tabele Likupuliso Za Jehova

“[Likupuliso, NW] za hao ki buswa bwa ka, ku ya ku ile.”—SAMU 119:111.

MU KONA KU ALABA CWAÑI?

Ki kabakalañi ha lu swanela ku tabela ku mamela milao ya Jehova?

Lu kona ku ezañi kuli lu sepe hahulu Jehova?

Ki kabakalañi ha lu swanela ku zwelapili ku pateha mwa sebelezo ya luna ku Mulimu?

1. (a) Batu ba nganga cwañi likupuliso ze ba fiwa, mi ki kabakalañi? (b) Mutu ya ikuhumusa u nganga cwañi kelezo?

BATU ba banga ni mubonelo o shutana ha ba fiwa litaelo. Ka mutala, ba bañwi ba amuhelanga kupuliso haiba i zwa ku mutu ya na ni situlo se situna ku ba fita, kono ba hananga kelezo ye ba fiwa ki mutu ye ba likana ni yena kamba mutu ya mwatasaa bona kwa situlo. Batu ba bañwi ha ba fiwa kelezo, ba ikutwanga bumaswe, ku zwafa, kamba ku swaba. Kono ba bañwi bona ha ba fiwa kelezo, ba ikutwanga ku susuezwa ni ku ba ni mubonelo o munde wa kuli ba sebelise kelezo ye ba filwe. Ki kabakalañi batu ha ba banga ni mibonelo ye shutana ha ba fiwa kelezo? Nto ye ñwi ye tahisanga cwalo ki buikuhumuso. Mutu ya ikuhumusa ha fiwa kelezo, u nahananga kuli kelezo yeo ha i koni ku mu tusa, kamukwaocwalo, u hananga kelezo yeo mi ha tusiwi ki yona.—Liprov. 16:18.

2. Ki kabakalañi Bakreste ha ba itebuhanga kelezo ye ba fiwa ku zwelela mwa Linzwi la Mulimu?

² Bakreste ba niti bona ba itumelanga kelezo ye ba fiwanga sihulu haiba i zwa mwa Linzwi la Mulimu. Likupuliso za lu fa Jehova li lu tusa ku lemuha bumaswe bo bu tahiswa ki likezo ze maswe. Ka mutala, likupuliso za Mulimu li lu tusa ku ambuka lika ze kona ku sinya bulikani bwa luna ni Jehova, ze cwale ka ku lata hahulu sifumu, buhule, ku itusisa milyani ye kola, ni bucakolwa. (Liprov. 20:1; 2 Makor. 7:1; 1 Mates. 4:3-5; 1 Tim. 6:6-11) Hape lu na ni “lipilu ze tabile” bakeñisa ku latelela litaelo za Mulimu.—Isa. 65:14.

3. Ki mubonelo mañi wa naa na ni ona walisamu o lu swanela ku likanyisa.

³ Kuli lu zwelepili ku ba ni bulikani bo bu tiile ni Ndataa luna wa kwa lihalimu, lu swanela ku zwelapili ku latelela litaelo za lu fa Jehova mwa bupilo bwa luna. Lu swanela ku ba ni mubonelo wa naa na ni ona walisamu  ya naa ñozi kuli: “[Likupuliso, NW] za hao ki buswa bwa ka, ku ya ku ile.” (Samu 119:111) Ka ku swana ni walisamu, kana ni mina mwa tabela ku latelela litaelo za Jehova? Kamba kana fokuñwi mu ikutwanga kuli litaelo za Jehova li taata hahulu ku li latelela? Nihaike kuli fokuñwi ku mi belanga taata ku amuhela kelezo, mu si ke mwa zwafa. Mwa kona ku ba ni sepo ye tiile ya kuli ku latelela litaelo za Mulimu ku ka mi tusa kamita. Ha lu nyakisiseñi linzila ze taalu za mo lu kona ku ezeza cwalo.

MU TIISE SEPO YA MINA KU JEHOVA KA KU LAPELANGA

4. Ki nto mañi ye ne li ya butokwa mwa bupilo bwa Davida?

⁴ Mulena Davida naa talimani ni miinelo ye minde ni ye maswe mwa bupilo bwa hae, kono ku na ni nto i liñwi ye ne li ya butokwa mwa bupilo bwa hae. Davida naa sepile hahulu Mubupi wa hae. Naa bulezi kuli: “Ku Wena Muñaa Bupilo ni kambamiseza moya wa ka. Mulimu wa ka, ki wena ye ni sepile.” (Samu 25:1, 2) Ki nto mañi ye ne tusize Davida kuli a sepe hahulu Ndatahe wa kwa lihalimu?

5, 6. Litapelo za naa lapelanga Davida li bonisañi ka za bulikani bwa hae ni Jehova?

⁵ Batu ba bañata ba lapelanga feela ku Mulimu ka nako ye ba li mwa miinelo ye taata. Batu bao ba swana sina mulikani kamba mutu wahabo mina ya ambolanga feela ni mina ka nako ya bata masheleñi kamba ha bata kuli mu mu ezeze nto ye ñwi. Nako ha inze i ya, mwendi mu ka ipuza kuli, ‘Kana mulikani yo wa ni lata luli?’ Kono bulikani bwa Davida ni Jehova ne bu si cwalo. Mwa bupilo bwa Davida kaufela, ibe mwa miinelo ye minde kamba ye maswe, Davida naa bonisanga mwa litapelo za hae kuli naa lata hahulu Jehova mi naa mu sepile.—Samu 40:8.

⁶ Davida naa lumbekile Jehova ka ku itumela ku yena kuli: “Muñaa Bupilo Mulenaa luna, libizo la hao ki le lituna cwañi mwa lifasi kaufela! Wena ya beile bulena bwa hao kwahalimu, ku siya lihalimu.” (Samu 8:1) Manzwi a Davida ao a bonisa kuli naa na ni bulikani bo butuna ni Ndatahe wa kwa lihalimu. Davida naa tabisizwe ki butuna ni kanya ya Jehova kuli mane naa susumelizwe ku lumba Jehova ka “mazazi kaufela.”—Samu 35:28.

7. Ku lapelanga ku Jehova kamita ku lu tusa cwañi?

⁷ Sina Davida, lu swanela ku lapelanga ku Jehova kamita ilikuli lu mu sepe hahulu. Bibele i li: “Mu sutelele ku Mulimu, mi u ka sutelela ku mina.” (Jak. 4:8) Ku lapela ku Jehova ku lu suteleza hahulu ku yena mi hape ki nzila ye ñwi ya butokwa ye lu amuhela ka yona moya o kenile.—Mu bale 1 Joani 3:22.

8. Ki kabakalañi ha lu sa swaneli ku kuta-kutelanga ku bulela manzwi kamba lipulelo ze swana nako kaufela ha lu lapela?

⁸ Ha mu lapela, kana mu kuta-kutelanga ku bulela manzwi a swana kamba lipulelo ze swana? Haiba ki mona mo mu ezezanga cwalo, mu nahanisisange ze mu bata ku bulela mwa tapelo ya mina pili mu si ka lapela kale. Lu nge kuli mu bulelelanga mulikanaa mina lika ze swana ka nako kaufela ha mu kopana ni yena, mulikanaa mina yo u ka ikutwa cwañi? Haiba ki mona mo mu ezezanga, mwendi mulikanaa mina ha na ku tabela ku teelezanga ku ze mu bulela. Ki niti kuli Jehova haa na ku palelwa ku teeleza kwa tapelo ye zwelela kwa pilu ya mutangaa hae ya sepahala. Kono ha lu swaneli ku kuta-kutelanga ku bulela manzwi a swana nako kaufela ha lu lapela.

9, 10. (a) Ki lika mañi ze lu swanela ku kupanga ku Jehova? (b) Ki lika mañi ze kona ku lu tusa ku lapelanga litapelo ze zwelela kwa pilu?

⁹ Haiba lu bata ku sutelela bukaufi ni Jehova, lu swanela ku kupanga Jehova lika ze lu tokwa luli. Ha lu nze lu bulelela Jehova mo lu ikutwela luli, lu ka mu sepa hahulu ni ku fita. Ki lika mañi ze lu swanela ku kupanga ku Jehova? Linzwi la Mulimu li alaba kuli: “Mwa lika kaufela mu zibise Mulimu ze mu kupa ka tapelo ni ka kupo hamoho ni buitumelo.” (Mafil. 4:6) Lwa kona ku lapela ka za nto ifi kamba ifi ya mwa bupilo bwa luna kamba ye ama bulikani bwa luna ni Mulimu.

 ¹⁰ Lwa kona ku ituta ze ñata kwa litapelo ze ne ba lapelanga baana ni basali ba ne ba sepahala ba mwa linako za kwaikale. (1 Sam. 1:10, 11; Lik. 4:24-31) Ka mutala, mwa buka ya Lisamu, ku na ni litapelo ni lipina ze ñata ze ne fiwa ku Jehova. Ha mu bala litaba ze mwa litapelo ni lipina zeo, mu ka lemuha maikuto a shutana-shutana a ne ba li ku ona batanga ba Jehova ba kwamulaho, a cwale ka tabo kamba butuku bo ne ba utwa. Ku ituta litaba za mwa litapelo zeo kwa kona ku lu tusa ku lapelanga litapelo ze zwelela kwa pilu.

MU NAHANISISANGE LIKUPULISO ZA MULIMU

11. Ki kabakalañi ha lu swanela ku nahanisisanga kelezo ya mwa Bibele?

¹¹ Davida naa bulezi kuli: “Likupuliso za Jehova za sepahala, li talifisa ya si na kutwisiso.” (Samu 19:7, NW) Kamukwaocwalo, nihaikaba kuli ha lu na hande yeloseli, lwa kona ku ba ni butali ka ku mamela milao ya Mulimu. Mwa Bibele, lu fumana kelezo ye lu swanela ku nahanisisa haiba lu bata ku zwelapili ku sepahala mwa miinelo kaufela ya mwa bupilo bwa luna. Ka mutala, ku nahanisisa likuka za mwa Bibele kwa kona ku lu tusa ku zwelapili ku sepahala ha lu likiwa ku eza nto ye maswe kwa sikolo kamba kwa mubeleko. Hape ku nahanisisa likuka za mwa Bibele kwa kona ku lu tusa ku utwa milao ya Mulimu ye ama mali, ku ikambusa kwa lifasi, ni ku sebelisa hande likuka za mwa Bibele ha lu keta litino. Ku nahanisisa kelezo ya lu fa Mulimu ku ka lu tusa ku itukiseza cimo mo lu kona ku ezeza haiba lu ipumana mwa miinelo ye swana sina yeo. Ku itukiseza ko ku cwalo kwa kona ku lu tusa ku sa eza mafosisa a ka lu kenya mwa butata.—Liprov. 15:28.

12. Ki lipuzo lifi ze lu tokwa ku nahanisisa ze ka lu tusa ku mamela likupuliso za Mulimu?

¹² Ha lu nze lu libelela ku talelezwa kwa lisepiso za Mulimu, kana lwa bonisa kuli lu sa na ni tumelo ye tiile mwa lisepiso zeo ni kuli tato ya Mulimu i sa li ya butokwa hahulu mwa bupilo bwa luna? Ka mutala, kana lwa lumela luli kuli Babilona yo Mutuna u tuha a sinyiwa? Kana lu sa nga limbuyoti za kwapili ze cwale ka bupilo bo bu sa feli mwa paradaisi fa lifasi ni zuho ya bafu ku ba za luli ku luna inge mo ne lu li ngela ha ne lu itutile zona lwa pili? Kana lu zwezipili ku ba ni tukufalelo ye tuna mwa bukombwa, kamba lu nga litakazo za luna ku ba za butokwa hahulu mwa bupilo? Kana ku keniswa kwa libizo la Jehova ni ku bonisa kuli bubusi bwa hae ki bona bo bu swanela ku sa li kwa butokwa hahulu ku luna? Ku nahanisisa lipuzo ze swana sina zeo kwa kona ku lu tusa ku zwelapili ku nga ‘likupuliso za Mulimu kuli ki buswa bwa luna ku ya ku ile.’—Samu 119:111, NW.

13. Ki kabakalañi Bakreste mwa linako za baapositola ha ne ba palezwi ku utwisisa lika ze ñwi? Mu fe mutala.

¹³ Mwa Bibele, ku na ni lika ze ñwi ze lu sa koni ku utwisisa hande bakeñisa kuli Jehova ha si ka lu patululela kale zona. Jesu naa kuta-kutezi ku bulelela baapositola ba hae kuli naa ka nyandiswa ni ku bulaiwa. (Mu bale Mateu 12:40; 16:21.) Kono baapositola ba hae ne ba si ka utwisisa za naa talusa. Ne ba tilo utwisisa feela manzwi a Jesu ha saa zusizwe kwa bafu, ha saa bonahezi kwa balutiwa hamulaho wa zuho ya hae, ni ha saa ba tusize ku utwisisa bupolofita bo ne bu supa ku Kreste. (Luka 24:44-46; Lik. 1:3) Balateleli ba Kreste ha se ba amuhezi moya o kenile fa Pentekota ya 33 C.E, baapositola ba Jesu ne ba utwisisize kuli Mubuso wa Mulimu ne u ka buseza kwa lihalimu.—Lik. 1:6-8.

14. Ki mutala mañi o munde o ne ba lu tomezi mizwale ba luna kwa makalelo a lilimo za ma 1900?

¹⁴ Kamukwaoswana, Bakreste ba niti mwa miteñi ya luna ne ba na ni litibelelo ze si ka nepahala ka za lika ze ne ka ezahala mwa “mazazi a maungulelo.” (2 Tim. 3:1) Ka mutala, mwa silimo sa 1914, ba bañwi kwa Bakreste bao ne ba nahanile kuli ne ba ka ngelwa kwa lihalimu, kono nto yeo ne i si ka ezahala. Bakreste bao ne ba zwezipili ku ituta mañolo mi ne ba lemuhile kuli musebezi o mutuna wa ku kutaza ne u sa  tokwa ku eziwa pili. (Mare. 13:10) Kamukwaocwalo, ka silimo sa 1922, J. F. Rutherford ya naa etelela mwa musebezi wa ku kutaza ka nako yeo, naa bulelezi batu ba ne ba putehani fa mukopano wa macaba o no ezelizwe kwa Cedar Point, Ohio, U.S.A. kuli: “Ha mu bone, Mulena wa busa! Ki mina bazibahazi ba mubuso wa hae. Kamukwaocwalo, mu zibahaze, mu zibahaze, mu zibahaze Mulena ni mubuso wa hae.” Ku zwa feela ka nako yeo, batanga ba Jehova ba zibahalile ka “ku kutaza taba ye nde ya Mubuso.”—Mat. 4: 23; 24:14.

15. Ki kabakalañi ha lu tokwa ku nahanisisanga za ezelize batu ba hae Jehova?

¹⁵ Ki ko kunde ku nahanisisa nzila ye nde yeo Jehova a talelelize ka yona lisepiso za hae kwa batu ba hae ba mwa linako za kwamulaho ni ba mwa linako za luna. Ku eza cwalo ku lu tusa ku ba ni sepo ye tuna ya kuli Jehova u ka taleleza mulelo wa hae kwapili. Ku nahanisisa lisepiso za Mulimu ku lu tusa ku zwelapili ku tabela lisepiso zeo mi ku tiisa sepo ya luna ya kuli lisepiso za Mulimu li ka talelezwa.

MU SEPE JEHOVA HA MU NZE MU MU LAPELA

16. Ki limbuyoti mañi ze lu ka fumana haiba lu sebeleza Mulimu mo lu konela kaufela?

¹⁶ Jehova Mulimu wa luna ki Mulimu ya na ni maata a matuna, ili ku talusa kuli ki Mulimu ya sebeza ka taata. Walisamu naa bulezi kuli: “Ki mañi ya na ni mataa a likana ni a hao Muñaa Bupilo?” Mi hape naa ekelize kuli: “Lizoho la hao li tiile, la hao la bulyo li pahami.” (Samu 89:8, 13) Bakeñisa kuli ki Mulimu ya sebeza ka taata, Jehova wa tabelanga ha lu mu sebeleza mo lu konela kaufela mi wa lu fuyaulanga bakeñisa buikatazo bwa luna. Jehova wa ziba kuli batanga ba hae kaufela, baana ni basali, banana ni ba bahulu, ha ba ci “buhobe bwa buzwa,” kono ba sebeza ka taata. (Liprov. 31:27)  Ka ku likanyisa Mubupi wa luna, lu patehile ku eza misebezi ya Sikreste. Ha lu sebeleza Mulimu mo lu konela kaufela, lu ka ba ni tabo mi lu ka tabisa Jehova.—Mu bale Samu 62:12.

17, 18. Sepo ya luna ku Jehova i kona ku tiiswa cwañi ha lu latelela litaelo za hae? Mu fe mutala.

¹⁷ Misebezi ya luna ya tumelo i lu tusa cwañi ku sepa hahulu Jehova? Mu hupule ze ne ezahezi nako ya kuli Maisilaele ba kene mwa Naha ya Sepiso ha ne i fitile. Jehova naa laezi baprisita ba ne ba lwezi aleka ya bulikani kuli ba caule ku liba mwa Nuka ya Jordani. Batu ha ne ba nze ba sutelela kwa nuka, ba lemuha kuli mezi naa li a mañata mi naa buba ka lubilo lo lutuna hahulu bakeñisa pula ye ne nela ka nako yeo. Maisilaele ne ba ka ezañi mwa muinelo wo? Kana ne ba ka bapula litende fa munanga ni ku libelela ka lisunda li sikai kamba ku fitelela ilikuli mezi a kale? Batili, ne ba sepile Jehova ka ku tala mi ne ba latelezi litaelo za hae. Ne ku ezaheziñi Maisilaele ha ne ba sepile Jehova ni ku latelela litaelo za hae? Bibele i bulela kuli: ‘Mahutu a baprisita ha naa hatile feela mwa mezi, nuka ya tuhela ku buba.’ Mi hamulaho, baprisita “ba yema inze ba tiile fa mubu o omile, mwahalaa nuka ya Jordani; mi Maisilaele kaufela ba sila.” (Josh. 3:12-17) Ku bonahala kuli Maisilaele ne ba tabile hahulu ha ne ba iponezi mezi a naa buba ka lubilo lo lutuna ha kala! Tumelo ya bona ku Jehova ne i tiisizwe bakeñisa kuli ne ba latelezi litaelo za hae.

¹⁸ Ki niti kuli Jehova ha ezangi limakazo ze cwalo kwa batu ba hae kacenu. Kono wa lu fuyaulanga ha lu bonisa tumelo ni ku latelela litaelo za hae. Moya o kenile wa Mulimu u lu fa bundume bo lu tokwa kuli lu kutaze lushango lwa Mubuso mwa lifasi kaufela. Mi Jesu Kreste, yena Paki yo mutuna wa Jehova, naa sepisize balutiwa ba hae kuli naa ka ba tusa mwa musebezi wa butokwa wo. Jesu naa ba bulelezi kuli: “Hakulicwalo, ha mu ye, mi mu lute batu ba macaba kaufela ku ba balutiwa.” Mi naa ba sepisize kuli: “Ni inzi ni mina mazazi kaufela ku isa kwa maungulelo a muinelo wa lifasi.” (Mat. 28:19, 20) Lipaki ba bañata ba ba na ni maswabi a ku ambola ku ba bañwi ba bulela kuli moya wa Mulimu u ba tusanga ku ba ni bundume bwa ku bulela ha ba li mwa bukombwa.—Mu bale Samu 119:46; 2 Makorinte 4:7.

19. Nihaike kuli ha lu koni ku eza ze ñata sina mo ne lu ka batela ku ezeza mwa sebelezo ya luna ku Mulimu, ki buikolwiso mañi bo lu kona ku ba ni bona?

¹⁹ Bakeñisa makulanu kamba busupali, mizwale ni likaizeli ba bañwi ha ba koni ku eza ze ñata sina mo ne ba ka batela ku ezeza mwa sebelezo ya bona ku Mulimu. Kono ba ikolwise kuli Jehova “yena Ndate sishemo ni Mulimu ya omba-omba mwa miinelo kaufela,” wa utwisisa miinelo ye ba kopana ni yona. (2 Makor. 1:3) Jehova wa itebuha lika kaufela ze lu kona ku eza ha lu nze lu mu sebeleza. Kaufelaa luna lu swanela ku hupulanga kuli ku piliswa kwa luna ku itingile fa tumelo ye lu bonisa mwa sitabelo sa Kreste se si liulula batu kwa libi za bona.—Maheb. 10:39.

20, 21. Ki mwa linzila lifi mo lu bonisa kuli lu sepile Jehova?

²⁰ Ku lapela Jehova ku ama ku itusisa nako ya luna, maata a luna, ni lika za kwa mubili ka mo lu konela kaufela mwa sebelezo ya luna ku Mulimu. Lu bata ku eza ka mo lu konela kaufela mwa musebezi wa ku kutaza. (2 Tim. 4:5) Lu tabile kabakala kuli lu tusa ba bañwi ku ba ni “zibo ye nepahezi ya ku ziba niti.” (1 Tim. 2:4) Kaniti, ku kuteka ni ku lumbeka Jehova kwa lu fumisa kwa moya. (Liprov. 10:22) Mi hape ku lu tusa ku sepa hahulu Mubupi wa luna ku si na taba ni ze ka ezahala.—Maro. 8:35-39.

²¹ Sina mo lu itutezi, ku sepa litaelo ze nde za lu fa Jehova ku tokwa kuli lu sebeze ka taata. Kamukwaocwalo, mu tiise sepo ya mina ku Jehova ka ku lapelanga. Mu nahanisisange ka mo Jehova naa talelelize lisepiso za hae mwa linako za kwamulaho ni mwa ka taleleleza lisepiso za hae kwapili. Mi mu sepe hahulu Jehova ha mu nze mu mu lapela. Mu hupule kuli likupuliso za Jehova li ka ina nako ye telele. Mi haiba mu mamela likupuliso zeo, mu ka kona ku pila ku ya ku ile!

[Lipuzo za Tuto]

[Siswaniso se si fa likepe 15]

Kana mu ka bonisa kuli mu sepile Jehova sina mo ne ba ezelize batu mwa linako za Joshua? (Mu bone maparagilafu 17 ni 18)