Lwakona Kusepa Zeibulela Bibele ka za Lika Zelukile ni Zesika Luka
Halukoni kusepa kuli likatulo zelueza ka za muzamao zakona kuba zende haiba lueza likatulo zeo kulikana ni moluikutwela kamba mobaikutwela batu babañwi. Bibele ilutaluseza libaka likatulo zeo halisa koni kuba zende. Mi mane ilutaluseza zeñata ka za teñi. Ilutusa kuziba lika zelukile ni zesika luka ili nto yelutusa kuba ni tabo mwa bupilo.
LUTOKWA KUETELELWA KI MULIMU
Mwa Bibele, Jehova a Mulimu ulutaluseza kuli batu batokwa kuetelelwa ki yena isiñi kuzamaisa batu babañwi kamba kuizamaisa bona beñi. (Jeremia. 10:23) Ki lona libaka halufile likuka za muzamao ili zefumaneha mwa Bibele. Walulata mi halati kuli lueze likatulo zemaswe ili zeka luutwisa butuku ni kuli lupalelwe kuba ni tabo mwa bupilo. (Deuteronoma 5:29; 1 Joani 4:8) Kwanda zeo, ka kuba Mubupi waluna, unani butali ni zibo mi wakona kulufa kelezo yende ka kufitisisa ka za muzamao. (Samu 100:3; 104:24) Nihakulicwalo, Mulimu ahapelezi batu kupila ka kuya ka likuka zahae.
Jehova naafile batu bapili bona bo Adama ni Eva lika zene batokwa kuli bakone kuba ni tabo sakata. (Genese 1:28, 29; 2:8, 15) Hape naabafile litaelo zebunolo mi naatokwa kuli bamuutwe. Nihakulicwalo, naafile keto ya kuiketela kumuutwa kamba kutokwa. (Genese 2:9, 16, 17) Ka bumai, Adama ni Eva nebaketile kupila ka kulatelela likuka zabona kufita kulatelela likuka za Mulimu. (Genese 3:6) Ki lika mañi zezwile mwateñi? Kana batu bakonile kuba ni tabo kabakala kuiketela likuka zebaswanela kulatelela? Batili. Mwa lilimo zefelile, luitutile kuli kusalatelela likuka za Mulimu haku tahisezi batu kuba ni kozo ni tabo mwa bupilo.—Muekelesia 8:9.
Bibele inani ketelelo yelutokwa kuli lueze likatulo zelukile ka za muzamao kusina taba ni simuluho yaluna. (2 Timotea 3:16, 17; mubone mbokisi yeli, “ Buka ya Batu Kaufela.”) Munyakisise mo Bibele ituseza batu kueza likatulo zende.
Muitute libaka Bibele haibizwa kuli ki “linzwi la Mulimu.”—1 Matesalonika 2:13. Mubuhe Vidio yeli, Ki Mañi Musimululi wa Bibele? yefa jw.org.
BIBELE ILUTALUSEZA ZABATA MULIMU KULI LUEZE
Bibele ilutaluseza za mo Mulimu a sebelisanezi ni batu kuzwa kwa makalelo. Hape ilutusa kulemuha mubonelo wa Mulimu ka za lika zelukile ni zesika luka, zetusa ni zekona kulukenya mwa butata. (Samu 19:7, 11) Luituta lituto zende ili zelutusa kueza likatulo zende mwa bupilo bwa luna bwa ka zazi.
Ka mutala, munyakisise kelezo yefumaneha kwa Liproverbia 13:20: “Yazamaya ni bababutali ukaba yabutali, kono yaswalisana ni litoto ukakena mwa butata.” Sikuka seo ki sa butokwa kacenu sina feela mone kubezi mwa linako za kwamulaho. Bibele inani likuka zetusa.—Mubone mbokisi yeli “ Butali Bobunde Bwa Mwa Bibele.”
Kono mukana mwaipuza kuli, ‘Nikona kuikolwisa cwañi kuli kelezo ya mwa bibele yebulela ka za muzamao isakona kunitusa ni kacenu?’ Taba yetatama ikanyakisisa mitala ya zeezahezi luli mwa bupilo.
a Jehova ki lona libizo la Mulimu.—Samu 83:18.
