Ze Ba Buza Babali

Kana Mubuso wa Mulimu U Mwa Lipilu za Mina?

Batu ba bañata kacenu ba lumela kuli Mubuso wa Mulimu u mwa lipilu za bona. Ka mutala, hatiso ye ñwi (The Catholic Encyclopedia) i li: “Mubuso wa Mulimu ki ku talusa kuli . . . Mulimu u busa mwa lipilu za luna.” Ba bahulu ba bulapeli ba lutanga tuto ye. Kono kana Bibele luli i luta kuli Mubuso wa Mulimu u mwa lipilu za batu?

Batu ba bañwi ba nahana kuli Jesu ki yena ya na kalisize tuto ya kuli Mubuso wa Mulimu u mwa lipilu za batu. Jesu na ize: “A mu bone . . . mubuso wa Mulimu u [mwahal’a, NW] mina.” (Luka 17:21) Libibele ze ñwi li li: “Mubuso wa Mulimu u ku mina” kamba “Mwahali ku mina.” Kana litoloko zeo li nepahalile? Kana Jesu na talusa luli kuli Mubuso wa Mulimu u mwa lipilu za batu?

Sa pili mu nyakisise mo i inezi pilu ya mutu. Mwa Bibele, pilu i swaniseza mutu wa mwahali, ili mihupulo, mibonelo, ni maikuto a hae. Tuto ya kuli Mubuso wa Mulimu o pahami u mwa lipilu za batu i kana ya utwahala hande, kono kana tuto ye cwalo ki ya niti?

Bibele i li: “Pilu ya puma ku fita linto kaufela, i sinyehile ku feleleza.” (Jeremia 17:9) Jesu yena ka sibili na bulezi kuli: “Ki mwa lipilu za batu fo ku zwa mihupulo ye maswe, ni bubuki, ni ze si na likute, ni lipulao, ni busholi, ni takazo ya ku luwa, ni lunya.” (Mareka 7:20-22) Mu nyakisise taba ye: Kana haki niti kuli manyando e lu iponela mwa lifasi kacenu a tiswa ki batu ba ba na ni litakazo ze maswe mwa lipilu? Mi kana Mubuso wa Mulimu o petehile wa kona ku zwa mwa pilu ye cwalo? Kaniti pilu ya mutu ha i koni ku tahisa Mubuso wa Mulimu sina mikona ha i sa koni ku beya lifeiga.—Mateu 7:16.

Sa bubeli, mu nahane batu ba na ambola ku bona Jesu ha na bulezi manzwi a kwa Luka 17:21. Mwa timana 20 lu bala kuli: “Bafalisi ba buza Jesu, ba li: Mubuso wa Mulimu u ka taha lili? A ba alaba.” (Luka 17:20) Bafalisi ne li lila za Jesu. Jesu na bulezi kuli baipi bao ne ba si ke ba kena mwa Mubuso wa Mulimu. (Mateu 23:13) Cwale haiba bafalisi ne ba si ke ba kena mwa Mubuso wa Mulimu, kana Mubuso wo ne u ka ba mwa lipilu za bona? Kwahule! Kacwalo he ki sika mañi sa na talusa Jesu?

Mwa Libibele ze ñwi, manzwi a Jesu a tolokilwe hande ka ku nepahala sina fela mo a tolokezwi mwa Bibele ya New World Translation. Libibele ze ñwi li bulela kuli Mubuso u “ku mina” kamba u “mwahal’a mina.” Mubuso wa Mulimu ne u li cwañi mwahal’a batu ka nako yale, ku kopanyeleza cwalo ni Bafalisi? Jesu ki yena ya na ketilwe ki Jehova kuli a be Mulena wa Mubuso. Jesu, yena ya na ka busa mwa Mubuso wo, na li mwahal’a batu bao. Na lutile za Mubuso wa Mulimu mane ni ku eza limakazo, ku ba bonisa ze ne u ka peta Mubuso wo kwapili. Kacwalo Mubuso ne u li mwahal’a bona ka nzila yeo.

Kaniti luli ha ku na Mañolo a bonisa kuli Mubuso wa Mulimu u mwa lipilu za batu. Kono ki mulonga luli, o ka tisa licinceho fa lifasi, sina fela mo ne ku polofitezwi.—Isaya 9:6, 7; Daniele 2:44.