Kana Mwa Ziba?

Banna ba ba butali ne ba potezi lili Jesu?

Buka ya Evangeli ya Mateu i bonisa kuli banna ba “babutali ba ba kwa Upa” ne ba potezi Jesu mi ne ba mu tiselize limpo. (Mateu 2:1-12) Kono palo ya bona ha i zibahali mi ha ku na bupaki bo bu bonisa kuli banna bao ne li ba balalu, mane nihaiba mabizo a bona ha si ka boniswa mwa Bibele.

Bibele ye ñwi (New International Version Study Bible) i talusa cwana Mateu 2:11 kuli: “Ka ku fapahana ni mo ba lumelela ba bañata, banuhi ba linaleli ne ba si ka fumana Jesu mwa sicelo sa lifolofolo sina mo ne ku bezi kwa balisana. Ne ba tilo mu potela hamulaho wa nako, mi ba fumana mwana inze a li mwa ndu.” Taba yeo i lumelelana ni kezo ya Heroda, bakeñisa kuli Heroda ha na bata ku bulaya Jesu, na laezi kuli bana kaufela ba mwa Betelehema, ni ba silalo kaufela sa ona, ba lilimo ze peli ku kuta mwatasi ba bulaiwe. Na ketile bana ba lilimo zeo “ku likanya nako y’a n’a buzisize babutali.”—Mateu 2:16.

Kambe ba babutali bao ne ba potezi Jesu fa busihu bwa pepiwa ni ku tisa gauda ni limpo ze ñwi za butokwa, Maria na si ke a be a file fela tunyunywani to tubeli ha na isa Jesu kwa tempele mwa Jerusalema, hamulaho wa mazazi a 40 ku zwa fa pepelwa. (Luka 2:22-24) Mulao wa Mushe ne u lumeleza kuli batu ba ba shebile ba ne ba sa koni ku fa matabelo a lingu ba fe tunyunywani to tubeli. (Livitike 12:6-8) Nihakulicwalo, limpo ze nde zeo ne li tisizwe ka nako ye swanela kabakala kuli ne li ka tusa lubasi lwa Jesu ku pila mwa Egepita.—Mateu 2:13-15.

Ki kabakalañi Jesu ha na ile kwa libita la Lazaro hamulaho wa mazazi a mane?

Ku bonahala kuli Jesu kona mwa na lukeliselize cwalo. Ki kabakalañi ha lu bulela cwalo? Mu nyakisise taba ye kwa Joani Kauhanyo 11.

Lazaro wa kwa Betania, mulikan’a Jesu, ha na kulile hahulu, likaizeli za hae za lumela liñusa ku Jesu. (Timana 1-3) Ka nako yeo, Jesu na siyo hahulu kwahule ni fo mi na tokwa fela ku zamaya ibata iba mazazi a mabeli kuli a fite kwa Betania. (Joani 10:40) Ku bonahala kuli liñusa ha li yo fitanga ku Jesu, Lazaro na sa shwile kale. Jesu na ezize cwañi ha utwa cwalo? A “ina hape mazazi a mabeli mw’a n’a inzi,” kihona a ya kwa Betania. (Litimana 6 ni 7) Kacwalo, bakeñisa kuli na tandile mazazi a mabeli kwa na inzi mi kihona a zamaya mazazi a mabeli hape, Jesu na izo fita kwa libita hamulaho wa mazazi a mane ku zwa fa na shwezi Lazaro.—Timana 17.

Jesu na sa zusize kale batu ba babeli, yo muñwi na mu zusize a sa shwa fela mi yo muñwi mwendi na mu zusize ha se ku fitile nakonyana ku zwa fa shwela. (Luka 7:11-17; 8:49-55) Kono kana na kona ku zusa mutu ya na sa shwile ka mazazi a mane mi mubili wa hae ne se u kalile ku bola? (Timana 39) Buka ye ñwi ya za Bibele mane i bulela kuli Majuda ba bañwi ne ba lumela kuli “mutu ya sa shwile ka mazazi a mane ha koni ku zusiwa; kakuli mubili wa hae ka nako yeo ne se u kalile ku bola, mi moyo, o ne ba nga kuli ne u sweli ku fuka fahalimwa mubili ka mazazi a malalu, ne se u ile.”

Batu kaufela ba ne ba li kwa libita ba ne ba honona za zuho ne ba tuha ba iponela kuli Jesu u na ni m’ata fahalimwa lifu. Jesu ya na yemi fapil’a libita le li kwaluzwi, a biza ka linzwi le lituna a li: “Lazaro, zwa mo.” Mi “mufu a zwa.” (Timana 43, 44) Likande leo li bonisa kuli batu ba ba shwile ba ka zusiwa luli ni kuli tuto ya kuli moyo ha u shwangi ka nako ye u shwa mutu ki ya buhata.—Ezekiele 18:4; Joani 11:25.