Mubuso wa Mulimu Ki Nto Mañi?

KI TABA mañi ya na koñomekanga Jesu? Yena ka sibili na ize ne li Mubuso wa Mulimu. (Luka 4:43) Jesu na ambolanga za Mubuso wo ha na luta batu. Kana batu ne ba makalile kamba ku lyanganiswa ki taba yeo? Kana ne ba mu buzize kuli Mubuso wo ki nto mañi? Kutokwa. Libuka za Evangeli ha li bonisi cwalo. Kacwalo, kana kikuli batu ba na luta Jesu ne ba ziba kuli Mubuso wa Mulimu ki nto mañi?

Niti kikuli Mañolo e ne ba itusisa Majuda miteñi yani ili e ne ba nga kuli a kenile na talusa ona Mubuso wo ka ku utwahala hande ni ze u ka eza kwapili. Luna kacenu lwa kona ku ituta ze ñata ni ku fita ka za Mubuso wo ha lu bala Bibele. Ha lu nyakisiseñi litaba ze 7 ze i luta Bibele ka za Mubuso. Litaba ze talu za pili ne li zibahala ni kwa majuda ba mwa miteñi ya Jesu mane ni ba ne ba pilile pili Jesu a si ka taha kale. Litaba ze ñwi ku kala ka ya bune ku isa ku ya bu 6 ne li lutilwe ki Kreste kamba ki baapositola mwa linako za bona. Taba ya mafelelezo yona i fitile fa ku utwisiseha hande mwa miteñi ya luna.

1. Mubuso wa Mulimu ki mulonga luli o ka ina ku ya ku ile. Bupolofita bwa pili bwa Bibele ne bu bonisize kuli Mulimu na ka luma mutu ya na ka to liulula batu kaufela ba ba sepahala. Muliuli yo, yena “peu” ye ne sepisizwe, na ka to feza matata kaufela a na tisizwe ki buipanguli bwa bo Adama, Eva ni Satani. (Genese 3:15) Hasamulaho wa nako Mulena Davida na taluselizwe bupolofita bo buñwi bo ne bu supa kwa “peu,” kamba ku Mesiya yo. Na ka ba Mulena. Mi mubuso wa hae ne u ka shutana ni mibuso ye miñwi kaufela. Ne u ka ina ku ya ku ile.—2 Samuele 7:12-14.

2. Mubuso wa Mulimu u ka felisa mibuso kaufela ya batu. Mupolofita Daniele na boni pono ye ne bonisa mo ne i ka tatamanela mibuso ye m’ata ya lifasi mane ku to fita mwa nako ya luna. Mu lemuhe fela mo i ungulela tolo yeo: “Mwa mazazi a malena ao, Mulimu wa mwa lihalimu u ka tahisa mubuso o si na ku sinyeha ku ya ku ile; mi bulena bwa ona ha bu na ku shimbulukela kwa sicaba si sili. Mubuso wo, u ka ketula ni ku feza mibuso kaufela; kono ona u ka ba teñi kamita ni ku ya ku ile.” Kacwalo mibuso, kamba milonga kaufela ya lifasi le, ye busa ka buhateleli ni buputeleli, yona mibuso ya lindwa, i ka yundiswa. Sina mo bu boniseza bupolofita bwa Daniele, Mubuso wa Mulimu ona cwale-cwale fa u ka busa lifasi kaufela. (Daniele 2:44, 45)  Mubuso wo ki mulonga luli mi ki ona fela o ka busa. *

3. Mubuso wa Mulimu u ka felisa lindwa, makulanu, tala, mane ni lifu. Bupolofita bwa Bibele bu bonisa lika ze nde ze u ka peta Mubuso wa Mulimu fa lifasi. Mubuso wo u ka peta lika ze tuna ze i palezwi ku eza milonga ya batu. Mu nahane fela lifasi mo li ka bela muta lilwaniso za ndwa kaufela li ka sinyiwa! “Ki Yena ya yemisize lindwa mane ni kwa mafelelezo a lifasi.” (Samu 46:9) Ha ku sa na ku ba ni madokota, lipatela, ni matuku kaufela. “Ha ku na mutu ya . . . ka ipulela kuli: Na kula.” (Isaya 33:24) Matala kaufela ni matuku a tiswa ki tala a ka fela. “Buloto bu ka ba bo buñata mwa naha.” (Samu 72:16) Ha ku sa na ku ba ni mafu, mabita, kamba miyaho kwa ku bulukela ba ba shwile ni manyando kaufela a tahiswa ki lika zeo. Mi sila sa luna sa kamita, lona lifu li ka feliswa. Mulimu u ka “[miza] lifu ku ya ku ile; Mulena [Muñ’a] Bupilo u ka takula mioko kwa lipata kamukana.”—Isaya 25:8.

4. Mulena wa Mubuso wa Mulimu u ketilwe ki Mulimu. Mesiya haki yena ya iketile ku ba Mulena mi ha si ka ketiwa ki batu ba ba si ka petahala. U ketilwe ki Jehova Mulimu ka sibili. Mane mabizo a ‘Mesiya’ ni ‘Kreste’ a bonisa honacwalo. Sibeli sa mabizo ao a talusa “Ya Tozizwe.” Kacwalo Mulena yo u tozizwe mi u ketilwe ki Jehova. Mulimu u mu talusa cwana, u li: “A mu bone mutanga wa ka ye ni tiisa, Muketiwa wa ka, y’o katelwa moya wa ka; ni beile Moya wa ka fahalimu a hae; u ka tiseza macaba zamaiso ya ku luka.” (Isaya 42:1; Mateu 12:17, 18) Kaniti Mubupi wa luna ki yena fela ya kona ku lu fa Mulena ya swanela.

5. Mulena wa Mubuso wa Mulimu sa bonisize batu kaufela kuli ki Mubusi ya Swanela. Jesu wa Nazareta na bonisize kuli na li yena Mesiya ya na bulezwi mwa bupolofita. Na pepezwi mwa lusika lwa na ketile Mulimu. (Genese 22:18; 1 Makolonika 17:11; Mateu 1:1) Ha na li fa lifasi, na talelelize bupolofita bo buñata bwa za Mesiya bo ne bu bulezwi lilimo-limo kwamulaho. Hape na zibahalizwe ku zwelela kwahalimu kuli na li yena Mesiya. Kamukwaufi? Mulimu na bulezi ku zwelela kwa lihalimu kuli Jesu na li Mwan’a hae luli, mangeloi ni ona na bonisize hande fo ku sweu kuli Jesu na li yena Mesiya ya na sepisizwe, mi Jesu na ezize limakazo fapil’a batu ba bañata-ñata ili nto ye ne bonisize kuli na na ni mata a Mulimu. * Jesu na bonisize batu hañata-ñata kuli na ka ba Mubusi ya cwañi. Na si na fela m’ata a ku tusa batu kono mane na tabela ku ba tusa. (Mateu 8:1-3) Na na ni sishemo, bundume ni buikokobezo, mi na si muitati. Za na ezize ha na li fa lifasi li ñozwi mwa Bibele kuli mañi ni mañi a kone ku ipalela zona.

6. Batu ba 144,000 ba ka busa hamoho ni Kreste mwa Mubuso wa Mulimu. Jesu na bulezi kuli batu ba bañwi ku kopanyeleza cwalo ni baapositola ba hae ne ba ka busa hamoho ni yena kwa lihalimu. Na bizize sikwata sa batu ba kuli ki “mutapinyana.” (Luka 12:32) Hasamulaho muapositola Joani na taluselizwe kuli mutapinyana wo ne u ka ba wa batu ba 144,000. Ne ba ka busa hamoho ni Kreste kwa lihalimu sina malena ni baprisita.—Sinulo 5:9, 10; 14:1, 3.

7. Mubuso wa Mulimu wa busa kwa lihalimu cwale, mi u tuha u kalisa ku busa ni lifasi kaufela. Taba ya bu 7 ye ki ye ñwi ya litaba ze lu tabisa hahulu. Bibele i lu fa bupaki bo buñata bo bu bonisa kuli Jesu u filwe m’ata a bulena mwa lihalimu. Ka nako ya cwale wa busa kwa lihalimu, mi ona cwale-cwale fa u tuha a kalisa ku busa ni lifasi kaufela ni ku taleleza bupolofita kaufela bo se lu bulezi. Kono lu kona ku ziba cwañi kuli Mubuso wa Mulimu wa busa cwale? Mi ki lili fo u ka kaliseza ku busa lifasi?

[Litaluso za kwatasi]