Mubuso wa Mulimu U Taha Lili?

BAAPOSITOLA ne ba bata ku ziba nako yeo Jesu na ka toma Mubuso wa hae. Kona libaka ha ne ba mu buzize kuli: “Mulena, kikuli se li cwale u ka zusa mubuso wa Isilaele?” (Likezo 1:6) Ni la kacenu le, hamulaho wa lilimo ze 2,000, batu ba sa bata ku ziba kuli Mubuso wa Mulimu u taha lili.

Bakeñisa kuli Mubuso wa Mulimu ki yona taba ya na koñomekile hahulu Jesu, mwendi mwa kona ku libelela kuli na amile kwa taba yeo. Mi ki cwalo luli! Na bulezi hahulu za nako ya ku ba teñi kwa Mwan’a mutu. (Mateu 24:37, NW) Nako yeo ne i ka bonisa kuli Mubuso wa Mesiya ki kale u tomiwa. Ku ba teñi ko ku talusañi? Ha lu nyakisiseñi lisupo ze ne ze i patulula Bibele za nako ya ku ba teñi kwa Kreste.

1. Nako ya ku ba teñi kwa Kreste ne i ka kalisa lilimo-limo hamulaho wa lifu la hae. Jesu na kandekile nguli ya mutu ya na tamile “musipili, ku ya kwa naha ye kwahule ku y’o yoliswa bulena.” (Luka 19:12) Nguli yeo ye ne polofita ze ne ka ezahala kwapili ne i talelelizwe cwañi? Jesu na shwile mi hasamulaho na zusizwe ni ku ya kwa “naha ye kwahule,” kona kwa lihalimu. Sina mwa na polofitezi Jesu mwa nguli ye, na ka kuta a li mulena hamulaho wa “mazazi a mañata.”—Mateu 25:19.

Lilimo-limo ku zwa fa kambamela Jesu kwa lihalimu, muapositola Paulusi na ñozi kuli: “Jesu Kreste a man’o tahisa sitabelo si li siñwi kabakala libi, a y’o ina ku la bulyo la Mulimu; ku zwa fo, u talimezi lila za hae, fo li ka ezezwa sipula sa f’a ka hatela mautu a hae.” (Maheberu 10:12, 13) Kacwalo Jesu ha sa kutile kwa lihalimu, na na ni ku litela ka nako ye telele. Mi hasamulaho Jehova Mulimu na file Mwan’a hae situlo sa ku ba Mulena wa Mubuso wa Mesiya o no sepisizwe kale-kale. Ku zwa ka yona nako yeo Kreste a  kalisa ku ba teñi. Kana batu fa lifasi ne ba ka bona taba ye tuna yeo ha i ezahala?

2. Batu ha ba koni ku bona kuli Kreste u teñi. Mu hupule kuli Jesu na bulezi za sisupo se ne si ka bonisa ku ba teñi kwa hae. (Mateu 24:3, NW) Haiba batu ne ba ka kona ku iponela ku ba teñi kwa hae, sisupo ne si ka tokwahalelañi hape? Ka mutala: Mu nge kuli mu mwa musipili wa ku yo bona liwate. Mwa nzila mu kana mwa fumana lisupo ze mi bonisa ko mu libile, kono ha se mu fitile kwa likamba ni ku iponela liwate le li bayuzi hande fapil’a mina, kana hape mu sa tokwa sisupo sa ku mi supeza ko ku inzi liwate? Kutokwa! Sisupo ki sañi hape, haiba liwate mwa iponela lona ka meto a mina?

Jesu ha na file sisupo se ne si ka bonisa ku ba teñi kwa hae, na sa talusi kuli batu ne ba ka iponela kezahalo yeo, kono na ba taluseza lika ze ne ka ba tusa ku lemuha se ne si ka ezahala kwa lihalimu. Kona libaka ha na i ze: “Mubuso wa Mulimu ha u tahi ka mukwa o lemuhiwa.” (Luka 17:20) Cwale sisupo seo ne si ka bonisa cwañi batu fa lifasi kuli Kreste na kalisize ku ba teñi?

3. Ka nako ya ku ba teñi kwa Jesu, ne ku ka ba ni matata a mañata fa lifasi. Jesu na bulezi kuli ka nako ya na ka kalisa ku busa sina Mulena kwa lihalimu, ne ku ka ba ni lindwa, matala, lizikinyeho, matuku, ni kutokwa mulao fa lifasi. (Mateu 24:7-12; Luka 21:10, 11) Ki sika mañi se ne si ka tahisa matata ao kaufela? Bibele i talusa kuli Satani, yena “mulena wa lifasi le,” u bifile maswe kakuli wa ziba kuli nako ya hae se li ye nyinyani ha u bona Kreste ki kale a kalisa ku busa sina Mulena. (Joani 12:31; Sinulo 12:9, 12) Mwa miteñi ya luna lu iponezi bupaki bo buñata bo bu bonisa kuli Satani u bifile ni kuli Kreste wa busa. Bupaki bo sihulu bu bonahezi mwa lifasi kaufela ku kala fela ka silimo sa 1914, ili silimo se ba bulela licaziba kuli ne si ipitezi hahulu.

Litaba zeo kaufela li kana za sa tabisi, kono hasi cwalo. Litaba zeo li bonisa kuli Mubuso wa Mesiya wa busa kwa lihalimu cwale. Ona cwale-cwale fa, Mubuso wo u ka busa ni fa lifasi kaufela. Kono batu ba kona ku ziba cwañi Mubuso wo ilikuli ba amuhele puso ya ona?

4. Ku ba teñi kwa Jesu ku lemuhiwa ka musebezi wa ku kutaza o eziwa mwa lifasi kaufela. Jesu na talusize kuli ku ba teñi kwa hae ne ku ka swana sina mo ne ku inezi “mwa mazazi a Nuwe.” * (Mateu 24:37-39) Nuwe na si ka yaha fela aleka kono hape na li “mubuleli wa Ku Luka.” (2 Pitrosi 2:5) Na lemusize  batu kuli katulo ya Mulimu ne i li fakaufi. Jesu na bulezi kuli balateleli ba hae fa lifasi ne ba ka eza nto ye swana ku zwa fela fa na ka kaliseza ku busa. Na polofitile kuli: “Evangeli ye ya mubuso i ka bulelwa mwa lifasi kaufela, ibe bupaki mwa macaba kamukana; kihona ku ka taha mafelelezo.”—Mateu 24:14.

Sina mo ku taluselizwe mwa taba ye felile, Mubuso wa Mulimu u ka sinya mibuso kaufela ya lifasi le. Musebezi wa ku kutaza u lemusa batu kuli Mubuso wa lihalimu wo u tuha u nga muhato, mi batu ba fiwa kolo ya ku banduka sinyeho ye taha yeo ilikuli ba be mwa Mubuso wo. Kacwalo kaufela luna lu swanela ku ipuza kuli, lu ka nga cwañi lushango lo?

Kana ku Taha kwa Mubuso wa Mulimu Ki Taba Ye Mi Tabisa?

Lushango lwa na kutaza Jesu ne li lo lu fa sepo luli. Adama a mano ipangula ku Mulimu lilimo-limo kwamulaho, Jehova Mulimu a lela ku toma mulonga o no ka tahisa kuli mulelo wa Mulimu wa kwa makalelo u petahale—ili wa kuli batu ba pile ku ya ku ile mwa paradaisi fa lifasi. Kacwalo ki nto ye tabisa luli ku ziba kuli Mubuso wo o kile wa sepiswanga kwamulaho se u busa cwale kwa lihalimu. Mubuso wo hasi tolo fela, kono ki mulonga o li teñi luli!

Ka nako ya cwale, Mulena ya ketilwe ki Mulimu u sweli wa busa mwahal’a lila za hae. (Samu 110:2) Mwa lifasi le li maswe le, Mesiya u sweli wa keta batu ba ba bata ku ziba Mulimu ni kuli ba mu lapele “ka Moya ni ka niti,” sina mwa batela Ndat’ahe. (Joani 4:24) Mulimu u bata kuli batu ba mishobo kaufela, ba bahulu ni banana, ni ba lisimuluho ze shutana-shutana ba pile ku ya ku ile mwa Mubuso wa hae. (Likezo 10:34, 35) Lu mi susueza ku itusisa hande kolo ye mu filwe yeo. Mu itute za Mubuso wa Mulimu cwale ilikuli mu kone ku pila ku ya ku ile mwa puso ye lukile yeo!—1 Joani 2:17.

[Litaluso za kwatasi]

[Maswaniso a fa likepe 8]

Litaba ze maswe ze lu utwanga zazi ni zazi li tuha li feliswa

[Manzwi a bañi ba siswaniso]

Antiaircraft gun: U.S. Army photo