Batu Ba Tokwa ku Piliswa!

BUKAUFI ni Pittsburgh, Pennsylvania, kwa America, ku na ni mukoti o muñwi wa malasha o ne u tibile. Ka nako ye u tiba mukoti o tungile wo, wa limita ze 73, ne ku na ni babeleki ba 9 ba ne ba swasehezi mwateñi. Kono hamulaho wa mazazi a malalu, ba yangwelwa mwa mukoti mo ba si ka holofala ni hanyinyani. Ne ba pilisizwe cwañi?

Batu ba ne ba pilisize babeleki bao ne ba itusisize limapa za mukoti wo ni mishini ye itusiswanga ha ku batiwa lika mwa sibaka. Ba yepa musima o eza lisentimita ze 65 mwa bupala, mi mwateñi ba kenya kandu ka mawaya ni ku ka shetumukiseza kwa sibaka ko ne ba kubukani babeleki bao ba ne ba swasizwe. Babeleki bao ba longolwa a li muñwi ka a li muñwi, ku ba zwisa mwa sibaka seo se ne si ka ba libita la bona. Kaufela bona ba nyakalala, ba ikutwa ku imululwa, mi ba itumela hahulu kwa batu ba ne ba ba yangwezi.

Mwendi buñata bwa luna ha lu na ku swasiwa mwa mubu sina mo ne ku bezi kwa babeleki ba mwa mukoti bao ba 9 kamba ku ba mwa kozi ye tuna. Niteñi, kaufela luna lu tokwa ku piliswa, kakuli ha lu koni ku pima lika ze tiswa ki makulano ni ku supala, mane cwalo ni lifu. Munna ya sepahala Jobo n’a ize: “Mutu ya pepilwe ki musali, bupilo bwa hae ki bo bukuswani, mi bu tezi maziyezi; wa taha sina palisa, mi wa pumwa; wa fela sina muluti, h’a ini sibaka.” (Jobo 14:1, 2) Se ku fitile lilimo ze bat’o ba 3,500 ku zwa fa ñolelwa manzwi ao, mi a sa zwelapili ku talelezwa, kakuli ha ku na nihaiba a li muñwi ku luna ya kona ku banda lifu. Ku si na taba ni ko lu pila kamba mo lu ipabalelela hande, lu tokwa mutu ya ka lu yangwela kwa manyando, busupali, mane ni lifu.

Basayansi ni ba bañwi ba sweli ba lika ka t’ata kuli mwendi ba ka ekeza kwa lilimo za bupilo bwa batu. Kopano ye ñwi i talusa kuli mulelo wa yona ki wa ku “tibela lifu” ni “ku tusa batu ba ba iñolisize mwa kopano yeo kuli haiba ku konahala ba si ke ba shwa.” Kono ze ezahezi li bonisa kuli basayansi ni batu ba bañwi ba palezwi ku ekeza kwa butelele bwa bupilo bwa batu kuli bu fitelele lilimo ze 70 kamba ze 80 za na talusize Mushe lilimo ze 3,500 kwamulaho.—Samu 90:10.

Ibe kuli lwa lumelelana ni za na bulezi Jobo ka za bupilo ni lifu kamba kutokwa, niti kikuli lilimo ha li nze li cibilika, ni luna lu ka fita fa ku “fela sina muluti,” ku siya balikani ba luna, lubasi lwa luna, ndu ya luna, ni lika kaufela ze lu petile mwa bupilo, mi lu ka shwa. Mulena ya butali Salumoni wa Isilaele wa ikale na ñozi kuli: “Ba ba pila ba ziba kuli ba ka shwa; kono ba ba shwile ha ba na se ba ziba, mi ha ba sa na ku fumana se siñwi mwa lifasi, kakuli mane ni libizo la bona li libezwi.”—Muekelesia 9:5.

Bibele i bonisa kuli lifu li “busize” batu sina mulena ya situhu. Kaniti luli lifu kona sila sa mafelelezo se ba tokwa ku yangwelwa ku sona batu. (Maroma 5:14; 1 Makorinte 15:26) Batu ba ba lutilwe hande ni ku fiwa liitusiso za ku pilisa ka zona batu mwa lifasi ha ba koni ku felisa lifu. Kono Mubupi wa luna, yena Jehova Mulimu, u lukisize nzila ya ku felisa ka yona lifu.

[Manzwi a bañi ba siswaniso fa likepe 3]

Photo by Gene J. Puskar-Pool/Getty Images