Mu Lute Bana Ba Mina

Mareka Na si ka Zwafa

MAREKA na ñozi ye ñwi ya libuka ze ne ze bulela za bupilo bwa Jesu. Buka ya Mareka ki yona buka ye kuswani hahulu mi hape i bunolo ku i bala. Mareka ne li mañi? Kana u nahana kuli Mareka na ziba Jesu?— * Ha lu boneñi miliko ye t’ata ya na talimani ni yona Mareka mi lu itute libaka ha na si ka zwafa.

Libizo la Mareka li bulezwi pili mwa Bibele Mulena Heroda Agripa ha sa kenyize muapositola Pitrosi mwa tolongo. Zazi le liñwi busihu lingeloi la lukulula Pitrosi, mi ha sa lukuluhile a ya kapili-pili kwa ndu ya bom’ahe Mareka, bo Maria, ba ne ba pila mwa Jerusalema. Pitrosi ha lukululwa mwa tolongo, ne se ku fitile lilimo ze lishumi ku zwa fa bulaelwa Jesu fa Paseka ya 33 C.E.—Likezo 12:1-5, 11-17.

Kana wa ziba libaka Pitrosi ha na ile kwa ndu ya Maria?—Mwendi ne li ka libaka la kuli na ziba lubasi lwa Maria mi hape na ziba kuli balutiwa ba Jesu ne ba kopanelanga mwa ndu ya Maria. Barnabasi muhabo Mareka na sa bile kale mulutiwa, ku zwa fa Mukiti wa Pentekonta ya 33 C.E. Sishemo sa na bonisize Barnabasi kwa baapositola ba banca miteñi yani si bulezwi mwa Bibele. Kacwalo mwendi Jesu na ziba Barnabasi ni bo ndat’ahe ba basali bo Maria ni mwan’a bona Mareka.—Likezo 4:36, 37; Makolose 4:10.

Mareka mwa litaba za hae za Evangeli, na ñozi kuli busihu bwa na tamilwe Jesu, ne ku na ni mucaha ya na apezi “shiti fela fa mubili wa hae.” Mareka na ñozi kuli lila ha ne li sweli Jesu, mucaha yo a baleha. U nahana kuli mucaha yo ne li mañi?— Ne li Mareka! Kacwalo Jesu ni baapositola ba hae ha ba funduka busihu bwani, ku bonahala kuli Mareka a apala shiti ni ku ba latelela.—Mareka 14:51, 52.

Kaniti Mareka na swalisani hahulu ni batanga ba Mulimu mi na iponezi likezahalo ze ñata ka za mulelo wa Mulimu mwa bupilo. Mwendi na li teñi Moya o Kenile ha ne u sululezwi batu ka Pentekonta ya 33 C.E., mi na swalisana hahulu ni batanga ba Mulimu ba ba sepahala, ba ba cwale ka Pitrosi. Kono hape na sindeketile Barnabasi muhabo ya na zibahalize Saule ku Pitrosi lilimo ze talu Jesu ha sa bonahezi mwa pono ku Saule. Ha se ku fitile lilimo, Barnabasi a lumiwa kwa Tarese kuli a yo bata Saule.—Likezo 9:1-15, 27; 11:22-26; 12:25; Magalata 1:18, 19.

 Ka 47 C.E., Barnabasi ni Saule ne ba ketilwe ku ba balumiwa. Ba ya ni Mareka, kono ka libaka le liñwi le li si ka bulelwa mwa Bibele, Mareka a ba siya ni ku kutela habo yena kwa Jerusalema. Saule, ya na tilo zibwa ka libizo la Siroma la Paulusi, na nyemile. Mi na nga kuli Mareka na palezwi ku peta buikalabelo bwa hae.—Likezo 13:1-3, 9, 13.

Bo Paulusi ni Barnabasi ha se ba kutile mwa musipili wa bona wa bulumiwa, ba tisa lipiho ka za lika ze nde ze ne ba petile. (Likezo 14:24-28) Hamulaho wa likwelinyana, sibeli sa bona ba lukisa musipili wa ku kuta ku yo potela balutiwa ba banca mwa libaka ze ne ba kutalize. Barnabasi na bata ku ya ni Mareka, kono kana wa ziba za na nahanile Paulusi?— A “hupula kuli, hasi tukelo” kakuli Mareka sapili na ba siile ku kutela habo yena. Taba yeo ye ne ezahezi hasamulaho ne i si ka tabisa Mareka!

Paulusi ni Barnabasi ba omana hahulu, mi hamulaho wa “fapano ye tuna,” ba kauhana. Barnabasi a ya ni Mareka ku yo kutaza kwa Sipera, mi Paulusi a ya ni Silasi mi ba kuta ku yo potela balutiwa ba banca, sina mo ne ku lukiselizwe pili. Mareka u lukela ku ba ya na ikutwile maswe bakeñisa ku tahisa fapano mwahal’a Paulusi ni Barnabasi!—Likezo 15:36-41.

Ha lu zibi libaka Mareka ha na kutile habo yena pili. Ku bonahala kuli yena na boni libaka ha na swanela ku kuta. Ibe kuli ne ku na ni nto ye ñwi ya na kutezi kamba kutokwa, Barnabasi na ikolwisize kuli Mareka na si ke a kutela ku eza cwalo hape. Mi luli na si ka kutela habo yena. Mareka na si ka zwafa! Hamulaho a yo  eza musebezi wa bulumiwa ni Pitrosi kwahule kwa Babilona. Kona kwa na izo lumela litumeliso ku Pitrosi ha na bulezi kuli: ‘Ni Mareka mwan’a ka, wa mi lumelisa.’—1 Pitrosi 5:13.

Pitrosi ni Mareka ne li balikani ba batuna luli ba ne ba sebelelize Mulimu hamoho! Mi lu kona ku lemuha cwalo ha lu bala buka ya Evangeli ya Mareka. Mwa buka yeo, Mareka u ñozi lika za na iponezi Pitrosi. Ka mutala, mu bapanye taba ya liñungwa le ne li bile teñi mwa Liwate la Galilea. Mareka u ekeza ku bulela za sibaka kwa na lobalezi Jesu mwa mukolo ni fa na lobezi, ili lika zeo ndui ya cwale ka Pitrosi a kona ku izibela zona. Lwa kona ku iponela zona ka ku bala hamoho ni ku li bapanya kwa litaba za Bibele ze kwa Mateu 8:24; Mareka 4:37, 38; ni Luka 8:23.

Hamulaho, Paulusi ha na li mwa tolongo kwa Roma, na lumbile Mareka bakeñisa kuli na mu tusize ka busepahali. (Makolose 4:10, 11) Mi Paulusi ha na tamilwe kwa Roma hape, na ñolezi Timotea ni ku mu kupa kuli a tahe ni Mareka, ka ku bulela kuli: “U ni tusa hahulu mwa musebezi.” (2 Timotea 4:11) Kaniti Mareka na ikozi matohonolo a ku sebeleza Mulimu kakuli na si ka zwafa!

[Litaluso za kwatasi]

Lipuzo:

○ Mareka na pila kai, mi kiñi ha u bulela kuli na ziba Jesu?

○ Ki mañi luli ya na tusize Mareka ni ku beleka ni yena?

○ Ki lika mañi ze ne ka tahisa kuli Mareka a zwafe?

○ Lu ziba cwañi kuli kwa nalulelule Mareka na tabezwi ki Paulusi?

[Siswaniso se si fa likepe 31]

Mutangana yo u kona ku ba mañi? Ku ezahalañi ku yena, mi ki kabakalañi?

[Siswaniso se si fa likepe 32]

Ki limbuyoti mañi za na bile ni zona Mareka bakeñisa ku sa tuhela musebezi wa Sikreste?