“Musizana wa Muisilaele” Wa mwa Miteñi Ye

LISUNDA ze peli pili Kupuzo ya lifu la Jesu i si ka eziwa kale, mañi ni mañi mwa lubasi lwa bo Sales ba kwa Praia Grande, mwa Brazil, na ñozi mukoloko wa batu ba na bata ku mema kwa Kupuzo. Abigayl, wa lilimo ze 6 na filwe pampili i liñwi ya kuli a fe mutu ya na tabela ku mema.

Na bulezi kuli: “Ni ka mema banna ba ba ni menyezanga nako kaufela.”

Bashemi ba hae ba mu buza kuli: “Ki bomañi?”

A alaba kuli: “Ba ba inanga mwa sipula sa mawili.”

Hamulaho a mazazi a mane, Abigayl a bonisa bashemi ba hae, banna bao. Ne li bo Walter, ba ne ba pila mwa miyaho ye ne li bukaufi ni Ndu ya Mubuso. Lilimo ze 15 kwamulaho, bo Walter inge ba na ni lilimo ze 28, ne ba bile mwa kozi ya mwa mota ye ne i ba omelelisize luñañali ku kalela mwa teka ku isa kwa mahutu. Bakeñisa kuli ne li baipumaneli, bo Walter ne ba na ni banna ba babeli ba ne ba li basilelezi ba bona. Bashemi ba Abigayl ha se ba filwe sibaka sa kuli ba ambole ni bo Walter, ba taluseza bo Walter kuli mwan’a bona na bata ku ba fa pampili ya ku ba mema.

Mwa manzwi a hae a mafelelezo, Abigayl na ize: “Batu kaufela mwa Ndu ya Mubuso ya hesu ba na ni mapampili a mañata a ku memisa batu, kono na, ni na ni fela i liñwi. Kacwalo ki mina fela bo ni mema. Haiba mu sa tahi, ha ni na ku ba ni mutu ye ni memile. Kono haiba mu taha, ni ka ba ya tabile, mi Jehova yena u ka ba ya tabile hahulu.”

Fa lizazi la Kupuzo, Lipaki, ku kopanyeleza cwalo ni Abigayl, ne ba kenisa Ndu ya Mubuso ili ku itukiseza tukiso ya manzibwana ya Kupuzo. Zazi leo musihali, bo Walter ne ba fita bukaufi ni Ndu ya Mubuso, mi ha se ba bona Abigayl, ba taluseza ndilaiba ku yemisa mota. Ba kwalula lihaulo la mota, mi ba buza Abigayl za na sweli ku eza. A ba taluseza kuli ne ba sweli ku keniseza bo Walter sibaka kuli si bonahale hande.

Zazi leo manzibwana, Abigayl na bilaela hahulu. Ngambolo ya kalisa, mi na nze a talima-talima kuli a bone nji bo Walter ba fitile. Ku yo kumbuluka, bo Walter ni basilelezi ba bona ba to esha. A menya ka tabo ye tuna. Hamulaho wa ngambolo, bo Walter ba itumelela kuli ne ba li mwa musipili wa ku liba kwa tolopo ye ñwi, kono se ba cinca ni ku taha kwa Kupuzo bakeñisa Abigayl. Mi ba ekeza kuli: “Ni tabisizwe hahulu ki ngambolo.” Ba ikupela Bibele mi ba kala ku ituta ni ku fumanehanga kwa mikopano.

Hamulahonyana, bo kaizel’a bo Walter ne ba bulezi kuli ne ba tokwa ku bonana ni Abigayl ye ba bulelanga hañata bo Walter. Ha ne ba bonani ni yena, ne ba tabile hahulu ku ziba kuli Abigayl ne li musizana yo munde. Ba bulela kuli: “Cwale na utwisisa libaka kaizel’a ka ha tabile hahulu.”

Bo Walter ba zwelapili ku ituta ni ku fumanehanga kwa mikopano. Mane ba alabanga fa mikopano ni ku taluseza ba bañwi ze ba sweli ku ituta. Kaniti luli, Abigayl u lu hupulisa musizana wa kwa naha ya Isilaele ya na tusize Naamani ku ziba Mulimu wa niti, Jehova.—2 Malena 5:2-14.