Nuwe ni Munda wa Mwa Nako ya Hae—Haki Litangu, Ki Niti

KANA mwa nyolelwa ku pila mwa lifasi le li nde, mo batu ba pila ka kozo, mo ku si na lindwa, bukebenga ni buhateleli? Haiba ki cwalo, mwa kona ku susuezwa ki likande la kale mwendi le mu ziba hande. Likande leo ki la Nuwe, munna yo munde ya kile a yaha aleka ye ne mu punyusize hamoho ni lubasi lwa hae kwa munda o no yundisize batu ba ba maswe.

Buñata bwa makande ha zibahali hahulu. Likande la Nuwe li fumaneha mwa buka ya Bibele ya Genese, likauhanyo 6 ku isa 9, mi hape li talusizwe mwa Koran mi li fumaneha ni mwa matangu a batu ba bañata mwa lifasi kaufela. Kana munda wa ku Nuwe u kile wa ba teñi luli, kamba ki litangu fela le li susueza batu ku eza ze lukile? Baituti ba bulapeli ni bocaziba ba sayansi ba nyakisisize puzo yeo ka lilimo ze ñata. Kono Bibele, Linzwi la Mulimu li talusa hande kuli munda wa ku Nuwe haki litangu kono u kile wa ba teñi luli. Ha mu nyakisise mitala ye latelela:

Likande la kwa Genese li lu taluseza silimo tenyene, kweli ni lizazi fo ne u kaliselize munda, nako ye ne i fuami aleka ni sibaka ko ne i yo fuamela, ni nako ya na kalile mezi fa lifasi. Litaba ka butungi za mo ne i ka yahelwa aleka ni litikanyezo za yona ni liyahiso li bulezwi ka ku nepahala. Kono matangu ona hañata ha talusangi lika ka butungi.

Litaba ze peli za masika ze bulezwi mwa Bibele li paka buniti bwa kuli Nuwe ne li mutu luli. (1 Makolonika 1:4; Luka 3:36) Ezira ni Luka ba ne ba ñozi litaba zeo, ne li ba batisisi ba bande ba litaba. Luka na batisisize lusika lwa Jesu Kreste ku yo fita ni ku Nuwe.

Mupolofita Isaya ni mupolofita Ezekiele ni baapositola ba Sikreste bo Paulusi ni Pitrosi, ne ba bulezi za Nuwe kamba Munda.—Isaya 54:9; Ezekiele 14:14, 20; Maheberu 11:7; 1 Pitrosi 3:19, 20; 2 Pitrosi 2:5.

Jesu Kreste na amile kwa Munda ka ku bulela kuli: “Mo ne ku inezi mwa linako za Nuwe, ku ka ba cwalo ni mwa linako za Mwan’a mutu. Ku ne ku ciwa, ku nwiwa, ku nyalwa ni ku nyaliswa, mane la fita lizazi l’a kena Nuwe mwa [aleka]; mane kwa taha munda o mutuna, mi wa ba bulaya kaufela.” (Luka 17:26, 27) Kambe kuli munda wa ku Nuwe ne u si ka ba teñi, u zibe manzwi a Jesu a kuli “linako za Mwan’a mutu” na si ke a ba ni taluso.

Muapositola Pitrosi na polofitile kuli ku ka ba ni “basheununi” ba ba ka nyaziseza ze i bulela Bibele. Pitrosi na ñozi kuli: “Batu ba, ba libala ka mabomu kuli . . . lifasi [la mwa nako ya Nuwe] la shwa, kabakala Munda ku li kwahela.” Kana ni luna lwa swanela ku libala “ka mabomu” ze ne ezahezi mwa nako ya Nuwe? Kutokwa ni hanyinyani! Pitrosi na zwezipili kuli: “Lihalimu la cwale, ni lifasi la cwale, li bulukezwi mulilo ki linzwi lona leo; li bulukezwi lizazi la katulo ni ku yunda kwa banyefuli.”—2 Pitrosi 3:3-7.

Mulimu hape u ka timeza batu ba ba maswe, mi hape ku ka ba ni bapunyuhi. Haiba mupilelo wa luna u swana ni wa Nuwe, ni luna lwa kona ku ba mwahal’a batu ba ba lukile ba ba ka punyuswa ni ku kena mwa lifasi le linde.