Ze Ba Buza Babali

Lu Itusisezañi Libizo la Mulimu Haiba ha lu Zibi Mubizezo wa Lona wa Kwaikale?

Kacenu ha ku na mutu ya ziba mo ne li balelwanga libizo la Mulimu mwa puo ya Siheberu ya kwaikale. Niteñi, kwa zibahala kuli libizo la Mulimu li fumaneha ibat’o ba ha 7,000 mwa mañolo a Bibele. Jesu ha na li fa lifasi na zibahalize libizo la Mulimu mi na laezi balutiwa ba hae ku lapelela libizo leo kuli li keniswe. (Mateu 6:9; Joani 17:6) Taba yeo i bonisa kuli, ku itusisa libizo la Mulimu ki kwa butokwa hahulu mwa tumelo ya Bakreste. Kono cwale ki kabakalañi kacenu ha lu sa zibi mubizezo wa lona wa kwaikale? Ku na ni mabaka a mabeli a matuna a bonisa libaka ha lu sa zibi.

Libaka la pili kikuli, lilimo ze 2000 kwamulaho ko, Majuda ne ba bile ni tumelo ya kuli ku biza fa libizo la Mulimu ki ku fosa. Mutu kaufela ha na bala mañolo a Bibele ha na fitanga fo ku ñozwi libizo leo, na li tulanga ni ku li yolisa ka linzwi la kuli “Mulena.” Kacwalo bakeñisa kuli se ku fitile lilimo ze ñata-ñata libizo la Mulimu li sa itusiswi, batu ha ba sa hupula mo ne li bizezwa.

Libaka la bubeli kikuli, puo ya kwaikale ya Siheberu ne i ñolwa ku si na litaku za bana, inge fela manzwi a mañwi mwa ñolelwanga ka bukuswani mwa puo ya Sikuwa. Mutu ya na bala taba ye ñozwi n’a na ni ku ipeela litaku za bana ze ne tondahala mwa litaba za na bala. Hamulaho wa nako, kwa ezwa nto ye ñwi ye ne tusize batu kuli ba si ke ba libalelela mwa ku balela manzwi a Siheberu. Litaku za bana ne li beilwe kwa linzwi ni linzwi la mwa Bibele ya Siheberu. Kono kuli ba tuse batu ku ziba mwa ku balela linzwi le ne li ñolwa mwa sibaka sa libizo la Mulimu, ne ba ekezanga litaku za bana kwa linzwi la kuli “Mulena,” mi fokuñwi nihaiba taku iliñwi ya mwana ne i sa beiwangi.

Litaku fela ze ne siyezi mwa mañolo ne li litaku za mushemi z’e ne, ili ze talusizwe mwa dikishinari ye ñwi kuli “litaku z’e ne za Siheberu ze ñolwa sina YHWH kamba JHVH ze li libizo la Mulimu luli la mwa Bibele.” Haiba kwa litaku za mushemi za JHVH ku beiwa kwateñi litaku za bana, ku bunolo ku utwisisa mo ku tahela kuli litaku zeo li balwe kuli “Jehova,” ili mubizezo o zibahala hahulu mwa Silozi.

Niteñi, bocaziba ba bañwi ba tabela ku li biza kuli “Yahweh.” Kana mubizezo wo u bat’o swana ni wa kwa makalelo? Ha ku na ya ziba hande kalabo. Mane bocaziba ba bañwi ba talusize mabaka libizo leo ha li sa swanelwi ku ba ni mubizezo wo cwalo. Niteñi, mabizo a mwa Bibele ha bulelwa mwa lipuo za kacenu, a shutana ni Siheberu sa kwa makalelo, mi ki ba sikai ba ba kona ku lwanisa mwa bizezwa. Libaka kikuli mabizo ao sa li kalulo ya lipuo za luna mi a zibahala hande. Ku cwalo ni kwa libizo la Jehova.

Bakreste ba mwa miteñi ya baapositola ne ba bizwa kuli ki sicaba se si sumekelwa libizo la Mulimu. Ne ba kutalize za libizo la Mulimu ku ba bañwi ni ku ba susueza ku biza fa libizo leo. (Likezo 2:21; 15:14; Maroma 10:13-15) Seo si bonisa kuli Mulimu u bata kuli lu itusise libizo la hae mwa puo ifi kamba ifi ye lu kona ku bulela, lu zibe taluso ya lona, ni kuli lu pile ka ku ya ka taluso ya lona.

[Manzwi a fa likepe 32]

Kwa zibahala kuli libizo la Mulimu li fumaneha ibat’o ba ha 7,000 mwa mañolo a Bibele