Ki Sika Mañi Luli se si Ezahalanga ka Nako ya Lifu?

“Mioyo kaufela ha i shwangi, mane nihaiba ya batu ba ba maswe . . . Bakeñisa kuli ba sweli ba cisiwa mwa mulilo o sa timi, mi ni kuli ha ba shwi, ha ku konahali kuli matomola a bona a kone [ku fela.]”—Clement wa kwa Alexandria, muñoli wa mwa lilimo za ma-100 ni ma-200 C.E.

KA KU swana ni Clement, batu ba ba yemela tuto ya kuli lihele ki sibaka sa tukufazo ba akaleza kuli batu ba na ni moyo o sa shwi. Kana Bibele ya luta tuto ye? Ha mu nyakisise ze li bulela Linzwi la Mulimu ha li alaba lipuzo ze latelela.

Kana mutu wa pili Adama, na na ni moyo o sa shwi? Ha i bulela ka za ku bupiwa kwa Adama, Bibele i li: “[Muñ’a] Bupilo Mulimu a bupa mutu ka liluli la lifasi, mi a bululela mwa lingo za hae moya wa ku pila, mi mutu a ba moyo o pila.” (Genese 2:7) Mu lemuhe kuli liñolo le ha li buleli kuli Adama na filwe moyo.

Kiñi se ne si ezahezi ku Adama ha sa ezize sibi? Koto ya na mu otile Mulimu ne si ya ku mu tukufaza ku ya ku ile mwa lihele. Kono Bibele i talusa katulo ya Mulimu kuli: ‘U ka ca buhobe ka mifufuzo ya pata ya hao, mane u kutele mwa mubu wo u zwisizwe ku ona; kakuli u liluli, mi u ka kutela mwa liluli.’ (Genese 3:19) Mubulelelo wa Mulimu fa ha u bonisi kuli kalulo ye ñwi ya Adama ne i bandukile ka nako ya na shwile. Adama ha na shwile, moyo, ili yena Adama ne u shwile.

Kana ku na ni mutu ya na ni moyo o sa shwi? Mulimu na bulelezi mupolofita Ezekiele kuli: “[Moyo, NW] o eza sibi, ki ona o ka shwa.” (Ezekiele 18:4) Muapositola Paulusi na ñozi kuli: “Sibi sina ha si keni mwa lifasi ka mutu a li muñwi [Adama], mi ka sibi ku keni lifu, kamukwaocwalo lifu li tile kwa batu kaufela kakuli ba ezize sibi kaufela.” (Maroma 5:12) Haiba batu kaufela ki baezalibi, u zibe taba ya niti ki ya kuli mioyo kaufela ya shwa.

Kana moyo o shwile u na ni ze u ziba kamba ze u utwa? Linzwi la Mulimu li li: “Ba ba pila ba ziba kuli ba ka shwa; kono ba ba shwile ha ba na se ba ziba.” (Muekelesia 9:5) Ha i talusa se si ezahalanga kwa batu ha ba shwa, Bibele i li: “Ba kutela mwa liluli; isali ka lizazi lona leo, milelo ya bona ya fela.” (Samu 146:4) Haiba bafu “ha ba na se ba ziba” mi “milelo ya bona ya fela,” ba kona cwañi ku utwa butuku bwa ku tukufazwa mwa lihele?

Jesu Kreste na bapanyize lifu kwa buloko, isiñi kwa muinelo wa ku sa ziba ze ezahala. (Joani 11:11-14) Kono ba bañwi ba hana, mi ba bulela kuli Jesu na lutile kuli lihele ki sibaka se si cisa ni kuli baezalibi ba ka nepelwa mwa mulilo wa lihele. Ha lu nyakisiseñi za na bulezi luli Jesu ka za lihele.