Mu Sutelele ku Mulimu

Mubupi ye lu Lukela ku Lumbeka Sinulo 4:11

KANA mu kile mwa ipuza kuli: ‘Ki ufi mulelo wa bupilo?’ Batu ba ba lumela kuli bupilo ne bu itahezi fela ka ku ipilaula, ha ba koni ku fumana kalabo kwa puzo ye. Kono ba ba lumela taba ya niti ya kuli Jehova Mulimu ki yena Musimululi wa bupilo, bona ba fumani kalabo. (Samu 36:9) Ba ziba kuli na na ni mulelo wa lu bupezi. Mulelo wo u talusizwe kwa Sinulo 4:11. Ha lu nyakisiseni ka m’o manzwi ao a na ñozwi ki muapositola Joani, a taluseza libaka le lu pilela.

Joani u ñola za pina ya kwa lihalimu ye lumbaeta Mulimu, ye li: “Mulena ni Mulimu wa luna, ki Wena ya lukela ku fiwa kanya, ni likute, ni mata; kakuli ki Wena ya ezize linto kamukana, mi ha li li teñi, niha ne li bupilwe, ki ka ku lata kwa hao.” Ki Jehova fela a nosi ya lukela ku fiwa tompo ye cwalo. Kabakalañi? Kakuli ki yena ya “ezize linto kamukana.” Kono cwalehe libupiwa za hae ze butali li swanela ku susuezwa ku ezañi?

Jehova u taluswa kuli wa lukela “ku fiwa” kanya, likute, ni m’ata. Ku si na ku kakanya, Mulimu ki yena mutu ya kanya hahulu, ya kutekeha hahulu, ni ya m’ata hahulu mwa pupo kaufela. Kono buñata bwa batu, ha ba lumeli kuli ki yena Mubupi luli wa lika kaufela. Nihakulicwalo, ku na ni batu ba ba iponela hande “za Mulimu ze sa bonwi” ka ku lemuha lika za ezize. (Maroma 1:20) Ka ku bonisa buitebuho bwa bona, ba susuezwa ku fa Jehova kanya ni likute. Ba shaela kwa batu kaufela ba ba utwa bupaki bo bu tabisa bwa kuli Jehova ki yena ya ezize lika kaufela ka ku komokisa mi ni kuli lwa swanela ku mu kuteka hahulu.—Samu 19:1, 2; 139:14.

Kono Jehova u fiwa cwañi m’ata ki balapeli ba hae? Ki niti kuli, ha ku na sibupiwa se si kona ku fa m’ata ku Mubupi ya m’ata ote. (Isaya 40:25, 26) Niteñi, bakeñisa kuli lu bupilwe ka siswaniso sa Mulimu, lu bupilwe ni tulemeno to tuñwi twa Mulimu, mi ka kañwi ka tona ki m’ata. (Genese 1:27) Haiba lwa itumela luli lika za lu ezelize Mubupi wa luna, lu ka susuezwa ku itusisa m’ata a luna kwa ku mu kuteka ni ku mu kanyisa. Ku fita ku itusisa m’ata a luna kwa ku ndongwama fela lika za ka butu, lu ikutwa kuli Jehova Mulimu wa lukela ku fiwa m’ata a luna kaufela ha lu nze lu mu sebeleza.—Mareka 12:30.

Kono cwale, lu pilelañi? Kalulo ya mafelelezo ya Sinulo 4:11 i alaba kuli: “[Lika kaufela ze bupilwe] ha li li teñi, niha ne li bupilwe, ki ka ku lata kwa hao.” Ha lu si ka ibupa isali luna beñi. Lu bupilwe ka ku lata kwa Mulimu. Kabakaleo, bupilo bwa ku ndongwama fela lika za buitati ha bu tusi se siñwi mi ha bu na mulelo. Kuli lu be ni mwangalwa ni tabo, mi ni kuli lu ikutwe kuli ku na ni ze lu petile, lu tokwa ku ziba tato ya Mulimu mi kihona lu ka pila ka ku lumelelana ni yona. Mi ha lu ka eza cwalo, lu ka ziba mulelo o ne lu bupezwi ni o lu pilela.—Samu 40:8.

[Manzwi a bañi ba siswaniso fa likepe 27]

NASA, ESA, and A. Nota (STScI)