Batu ba Mwa Myanmar ba ne ba Tahezwi ki Kozi ya Moya ni Ñundupula ne ba Tusizwe

LA May 2, 2008, moya o mutuna ni ñundupula ne li sinyize maswe lika mwa sibaka sa Myanmar mi mwa nako feela ye kuswani taba yeo ne i bile ye ñwi ya litoho za makande a mwa linaha. Ne ku bihilwe kuli batu ba ba batoo eza 140,000 ne ba shwile mwa kozi yeo kamba ne ba tondahalile hamulaho wa moya-tuna wo ni ñundupula, ili ze ne kwahezi sibaka sa Irrawaddy Delta.

Nto ye komokisa kikuli, mwahalaa Lipaki za Jehova ba bañata ba ne ba pila mwa sibaka seo, ha ku na ni yo mukana ya naa holofezi. Libaka le li lituna le ne li ba pilisize ne li la kuli ne ba sabezi mwa Mandu a Mubuso a bona aa yahilwe hande. Mwa sibaka se siñwi, Lipaki ba 20 ni batu ba bañwi ba mwa munzi ba 80 ne ba inzi fa situwa sa Ndu ya Mubuso ka lihora ze 9 mezi a munda ha naa nza ekezeha. Kaufela bona ne ba bandukile. Ka bumai, batu ba bañwi ba 300 mwa munzi wo ne ba shwile. Mwa minzi ye miñata, miyaho ye ne siyezi feela ne li Mandu a Mubuso.

Mazazi a mabeli hamulaho wa moya ni ñundupula yeo, ofisi ya mutai ya Lipaki za Jehova mwa Yangon ya luma sikwata kwa puteho ya mwa Bothingone ye fa sibaka fo i kauhanela nuka ku panga linuka ze ñata ze suluhela mwa liwate, kuli si yo tusa. Sikwata ha ne si nze si fita mwa sibaka se si sinyehile, si nze si lika ku isileleza kwa masholi mi inze si fita bukaufi ni litupu ze ne bola, sa yo esha mwa Bothingone inze si lwezi laisi, lico ze ñwi ze omile, mezi, ni likandela. Sikwata seo ne li sona sa pili ku yo punya mwa sibaka seo kwa likwata ze ne ile ku yo tusa. Hamulaho wa ku fa lituso kwa Lipaki ba ba pila mwa sibaka seo, batu ba mwa sikwata seo ba susueza sicaba ka lingambolo za Bibele ni ku ba siyela Libibele ni libuka ze ambola za Bibele, bakeñisa kuli maluo a batu bao kaufela naa kukisizwe ki pula yeo.

Moya o ne ba bonisize Lipaki ba ne ba tahezwi ki butata bo, ne u ipitezi luli. Paki yo muñwi wa mwa puteho ya mwa sibaka  sa Irrawaddy se ne si sinyehile hahulu naa ize: “Lika kaufela ze ne lu na ni zona ha li sa li yo. Mandu a luna kaufela a sinyehile. Licalo za luna kaufela li yundile. Mezi kaufela a ku nwa a silafalizwe ki munda. Niteñi, mizwale ni likaizeli ha ba bilaeli hahulu inge mo ba bilaelela batu ba bañwi. Ba sepile Jehova ni kopano ya hae. Lu ka latelela ketelelo ifi kamba ifi ye lu ka fiwa, ibe kuli lu ka siyala mwa munzi kamba lu ka ya ko kuñwi.”

Sikwata sa Lipaki ba 30, ili ba ne ba sinyehezwi ki lika kaufela, ne ba opezi lipina za Mubuso ka tabo mwa musipili wa bona wa lihora ze 10 wa ku liba kwa sibaka ko ne ku fumaneha sikwata se ne si tisize lituso za lico, liapalo, ni makundamo a bona. Lipaki bao ba si ka fita kale kwa sibaka seo, ba utwa kuli ku eziwa mukopano wa mupotoloho wa Lipaki za Jehova mwa tolopo ye li bukaufi. Ba atula ku yo fumaneha kwa mukopano wo pili ilikuli ba fepiwe ki linzwi la Mulimu ni ku ikola swalisano ni Bakreste.

Mwa sibaka kaufela se ne si sinyizwe ki moya ni ñundupula yeo, mandu a 35 a Lipaki za Jehova naa sinyehile, a 125 naa sinyehile hanyinyani, mi Mandu a Mubuso a 8 naa sinyehile hanyinyani. Ka litohonolo, miyaho ya fa mutai ne i si ka amiwa hahulu ki sinyeho yeo.

Kwa makalelo, moya ni ñundupula yeo ne li tahisize kuli linzila kaufela ze fakaufi ni ofisi ya mutai li kwalehe, bakeñisa kuli likota ze tuna ne li wezi mwa mikwakwa. Lihoranyana hamulaho wa ku fela kwa liñungwa leo, batu ba ba fitelela 30 ba fa mutai ba swalisana ni ba bañwi mwa musebezi wa ku hoholola likota zeo ka mazoho. Ha ne ba nze ba beleka cwalo, batu ne ba tilo ba yema bukaufi inze ba ikomokezi. Mwa nakonyana feela, sikwata sa Lipaki ba basali ba punya ni lino ze bata ni miselo za ku to fa ba ne ba sweli ku beleka hamohocwalo ni batu ba ne ba pila bukaufi, ili ba ne ba imbwetukezi feela. Mubihi yo muñwi wa makande ha naa buha ze ne sweli ku ezahala, naa buzize kuli, “batu ba ba beleka hande cwana ba, ki bomañi?” Hamulaho wa ku talusezwa, a bulela kuli, “Neikaba hande kambe kuli batu ba bañata ne ba bonisa moya o munde wa swalisano inge Lipaki za Jehova mo ba ezeza!”

Kapilipili Lipaki ba toma tutengo to tubeli mwa libaka ze shutana za naha ilikuli tu eze misebezi ya ku tusa mizwale ba mwa libaka ze ne ambekilwe ki butata. Baitateli ba bañata-ñata ne ba belekile mwa likwata ze ne tusa batu. Mwa mazazinyana feela Lipaki ba ne ba sinyehezwi ki mandu a bona, ba yahelwa a manca. Sikwata se siñwi se ne si tusa batu ha ne si tile ku to yahela Paki yo muñwi ndu ye nca, batu ba ne ba pila mabapa ni yena ne ba lubukile feela inze ba ikomokezi. Yo muñwi ya naa pila mabapa, naa ize: “Paki yo wa musali u yahelwa sinca ndu ya hae ki ba keleke ya hae. Kwa balikani ba ka mwa keleke ya ka ya si-Buddha ha ku na nihaiba a li muñwi ya tilo ni tusa. Kambe ne ni bile Paki ha ne ni kutalizwe ki musali yo!”

Bayahi ba mandu ni ba katengo ka ka bona za lituso ha ne ba tatubile ndu ye ne i sinyehile mwa sibaka sa Thanlyn, ne ba susuelizwe hahulu ki lubasi lo luñwi lwa Lipaki ha ne lu ba bulelezi kuli: “Ha ku na se si ezahalile. Ndu ya luna i iketile. Lwa kona ku pila mwateñi—ha ku na butata! Lipaki ba bañwi mane ha ba na nihaiba ndu. Ha mu ye mu yo ba tusa!”

Mwa sibaka se siñwi sa mwa Yangon, batu ba bañwi ne ba likile ku yo bata makundamo mwa keleke ye ñwi ya kwateñi. Kono sikwalo sa keleke ne si pakilwe mi ha ku na ya naa kona ku kena mwahali. Batu ba nyema maswe mi ba bata ku loba sikwalo sa keleke. Kono ka ku fapahana, Lipaki za Jehova bona ne ba tusize batu ba bañata ku sabela mwa Mandu a Mubuso ka nako ya moya ni ñundupula yeo. Ka mutala, kwa Ndu ya Mubuso ya mwa Dala, Paki yo muñwi ni musalaa hae ya li Paki, ne ba amuhezi batu ba 20 ba ne ba sabezi ku bona. Habusa, mabasi ao naa si na mandu kwa ku kutela, mi naa lapile. Muuna ya li Paki yo a fumana mutu yo muñwi ya lekisa laisi mi a leka ye ñata kuli a yo fepa batu bao kaufela.

Mwa lubasi lo luñwi lwa kwa Yangon, ba bañwi mwateñi ki Lipaki za Jehova, mi ba bañwi bona ba kena likeleke ze shutana-shutana. Hamulaho wa ñundupula yeo, lubasi lo kaufela ne lu tile kwa mukopano o ne u ezezwa kwa Ndu ya  Mubuso. Kabakalañi? Yo muñwi mwa lubasi naa talusize libaka, ka ku bulela kuli: “Ba mwa keleke ya luna ne ba ize ba ka taha ku to lu potela hamulaho wa moya ni ñundupula yeo, kono ne ba si ka taha. Konji feela Lipaki ki bona ba ne ba tile. Ne mu lu file laisi ni mezi. Ha mu swani ni likeleke ze ñwi!” Batu ba mwa lubasi lo ba ne ba si Lipaki, ne ba ikozi tuto ya mwa Tawala ya Mulibeleli ye li, “Jehova Wa Utwa Mihuwo Ya Luna” mi hape ne ba file likalabo ze ñata.

Musali yo muñwi ya naa ituta Bibele ni Lipaki naa tile kwa mukopano wa puteho o no bile teñi hamulaho wa sunda iliñwi ku zwa fo ku bela ni moya ni ñundupula. Ka nako ya mukopano, ne ku balilwe liñolo le li zwa kwa ofisi ya mutai, le ne li talusa ze ne ezizwe kuli batu ba tusiwe ni miinelo ye ne ba ipumani ku yona batu ba ne ba bandukile moya ni ñundupula yeo. Liñolo leo ha ne li nze li baliwa, musali yo a kala ku lila. Naa tabile hahulu ku utwa kuli Lipaki kaufela ne ba fumanwi mi kaufela bona ne ba iketile. Hamulaho, naa tusizwe ka ku fiwa lika mi kwatuko a ndu ya hae a beelwa tende ya ku pila ku yona. Naa ize na ikutwile kuli Lipaki ne ba mu babalezi hande luli.

Jesu naa ize: “Se ba ka ziba batu kaufela kuli mu balutiwa ba ka ka sona, ki ha mu latana.” (Joani 13:35) Mi mulutiwa Jakobo naa koñomekile kuli tumelo ya niti i zamaelela ni misebezi ye minde. (Jakobo 2:14-17) Lipaki za Jehova ba nga manzwi ao ku ba a butokwa hahulu mi ba lika ka mo ba konela kaufela ku bonisa lilato le li cwalo ka ku tusa ni ka ku babalela ba ba tokwa tuso.

[Manzwi a fa likepe 11]

Bibele i bulela kuli tumelo ya niti i zamaelela ni misebezi ye minde