Mwa Memiwa ku Taha Kwa Ndu ya Mubuso

MWENDI mu kile mwa fita bukaufi ni Ndu ya Mubuso ya Lipaki za Jehova ye mwa silalanda sa mina ni ku komoka lika ze ezezwanga mwateñi. Kana mwa ziba kuli mañi ni mañi ya tabela wa kona ku fumaneha kwa mikopano ya bona ye ba ezanga ka sunda ni sunda? Bapoti kaufela ba lukuluhile ku fumaneha teñi.

Kono mwendi mu na ni lipuzo. Ki kabakalañi Lipaki za Jehova ha ba kopananga hamoho? Ki lika mañi ze ezahalanga kwa mikopano ya bona yeo? Mi bapoti ba baa si Lipaki za Jehova ba bulelangañi ka za mikopano yeo?

“Puta Sicaba”

Ku zwa feela mwa miteñi ya kwaikale, batu ba kopananga hamoho kuli ba lapele Mulimu ni ku ituta za hae. Ibata iba lilimo ze 3,500 kwamulaho ko, Maisilaele ne ba taluselizwe kuli: “U ka puta sicaba, banna ni basali ni bana, ni mukozi ya mwa minzi ya hao, kuli ba utwe, mi ba itute ku saba [Muñ’a] Bupilo Mulimu wa mina, mi ba tokomele ku eza litaba kaufela za milao yeo.” (Deuteronoma 31:12) Kacwalo, mwa Isilaele mwanana ni yo muhulu kaufela naa lutiwa ku lapela Jehova Mulimu ni ku mu utwa.

Lilimo-limo hamulaho, puteho ya Sikreste ha ne i tomilwe, mikopano ne i zwezipili ku ba kalulo ya butokwa hahulu ya bulapeli bwa niti. Muapositola Paulusi naa ñozi kuli: “A lu babalelane, kuli lu susumezane mwa lilato ni mwa misebezi ye minde. Lu si ke lwa tuhela liputeho za luna, mo ba ezeza ba bañwi; kono lu kutazane.” (Maheberu 10:24, 25) Sina feela lubasi ha lu tiya haiba ba ba mwa lubasi ba ba ni nako ya ku inanga hamoho, kacwalo lilato le li mwahalaa batu ba ba sebeleza Mulimu li ka ekezeha haiba Bakreste ba kopananga hamoho ku lapela.

Ka ku lumelelana ni Mañolo a talusizwe fahalimu, Lipaki za Jehova ba kopananga habeli ka sunda kwa Mandu a Mubuso a bona. Mikopano yeo i tusanga ba ba fumanehanga teñi ku bona butokwa bwa likuka za Bibele, ku utwisisa likuka zeo, ni ku li sebelisa. Hañata, mikopano yeo ya swananga mwa lifasi kaufela, mi mukopano ni mukopano u ba nga ni mulelo o u petanga ka za Mulimu. Pili ni hamulaho wa mikopano yeo, batu ba ba fumanehanga teñi ba ‘kutazananga ka tumelo’ ka ku ikambota litaba ze tiisa. (Maroma 1:12) Ku ezahalangañi ku o muñwi ni o muñwi wa mikopano ye?

Ngambolo ya Bibele

Mukopano wa pili o ba fumanehanga ku ona batu ba bañata ki ngambolo ya Bibele ye lukiselizwe nyangela, mi mukopano wo u ezwanga la Sunda. Hañata Jesu Kreste naa fanga lingambolo za nyangela—mi kwa lingambolo zeo ku na ni Ngambolo ya fa Lilundu ye zibahala hahulu. (Mateu 5:1; 7:28, 29) Muapositola Paulusi naa ambozi kwa baana ba mwa Atene. (Likezo 17:22-34) Ka ku latelela mutala wa Jesu ni Paulusi, kwa mikopano ya Lipaki za Jehova ku banga ni lingambolo sihulu ze lukiselizwe nyangela, mi ba bañwi i banga lwa pili ku fumaneha teñi.

Mukopano wo u kalisanga ka pina ye mwa buka ya Mu Opelele Jehova Milumbeko. * Batu kaufela ba ba tabela ku yema ni ku opela pina, ba kona ku eza cwalo. Hamulaho wa tapelo ye kuswani, mubuleli ya swanela u fanga ngambolo ya mizuzu ye 30. (Mu bone taba ye li: “Lingambolo ze Swanela Nyangela.”) Ngambolo ye, i tomile feela fa Bibele. Mubuleli hañata u memanga baputehi kuli ba bone mañolo a swanela ni ku mu latelela ha nze a bala litimana. Kacwalo mwa kona ku taha ni Bibele ya mina, kamba pili mukopano u si ka kalisa kale mwa kona ku kupa Bibele ku yo muñwi wa Lipaki za Jehova.

 Tuto ya Tawala ya Mulibeleli

Mwa liputeho ze ñata za Lipaki Jehova, ngambolo ya nyangela i latelelwanga ki Tuto ya Tawala ya Mulibeleli. Tuto ye ki puhisano ya lipuzo ni likalabo ye nganga hora iliñwi. Mukopano wo u susuezanga baputehi ku latelela mutala wa ba kwa Berea ba mwa miteñi ya Paulusi, ba ne ‘ba amuhezi Linzwi ka ku li tukufalelwa, mi ba batisisa mwa Mañolo.’—Likezo 17:11.

Tuto ya Tawala ya Mulibeleli i kalisanga ka pina. Litaba ze nyakisiswanga ni lipuzo ze buziwanga ki muzamaisi li banga mwa hatiso ya Lipaki ya magazini ye. Mwa kona ku ipumanela magazini ya hatiso ya Lipaki yeo, ka ku ikupa ku yo muñwi wa Lipaki za Jehova. Litaba ze sa zo nyakisiswa li kopanyeleza ze cwale ka ze: “Bashemi—mu Lute Bana Ba Mina Ka Lilato,” “Mu Si Ke Mwa Kutisa Bumaswe Ka Bumaswe,” ni “Libaka Manyando Kaufela Ha Tuha A Fela.” Nihaike kuli mukopano wo u eziwanga ka mukwa wa lipuzo ni likalabo, baputehi ba ba alabanga ki ba ba itatelanga feela ku eza cwalo, mi hañata ba ba alabanga ki ba ba itukiselize cimo ka ku bala taba kaufela ni mañolo a i yemela. Mukopano wo u felanga ka pina ni tapelo.—Mateu 26:30; Maefese 5:19.

Tuto ya Bibele ya Puteho

Lizazi li li liñwi manzibwana mwa sunda, Lipaki za Jehova ba kopananga kwa Ndu ya Mubuso kwa mukopano wa likalulo ze talu o tandanga hora ni mizuzu ye 45. Kalulo ya pili ya mukopano wo ki Tuto ya Bibele ya Puteho, ye ezwanga ka mizuzu ye 25. Mukopano wo u tusanga batu ba ba fumaneha teñi kuli ba zibe hande Bibele, ba cince munahanelo ni mubonelo wa bona, mi ba eze zwelopili sina balutiwa ba Kreste. (2 Timotea 3:16, 17) Ka ku swana ni tuto ya Tawala ya Mulibeleli, mukopano wo u ezwa ka mukwa wa lipuzo ni likalabo ze nyakisisa taba ya mwa Bibele. Ba ba alabanga ba ezanga cwalo ka ku itatela.  Buka ya lituto za Bibele hañata i banga buka kamba broshuwa ye hatisizwe ki Lipaki za Jehova.

Ki kabakalañi ha ku itusiswanga lihatiso ze tomile fa Bibele kwa mukopano wo? Mwa miteñi ya nako ye ne ku ñolwa Bibele, ku bala feela Linzwi la Mulimu ne ku si ka likana. “Ne ba bala mwa buka ya mulao wa Mulimu ka tokomelo; mi ne ba taluseza batu, kuli ba utwisise se si balwa.” (Nehemia 8:8) Mwa lilimo za cwanoñu fa, lihatiso ze nyakisisa libuka za Isaya, Daniele, ni Sinulo li tusize batu ba ba fumanehanga kwa mukopano wo, ku utwisisa zona likalulo zeo za Bibele.

Sikolo sa Bukombwa sa Teokratiki

Tuto ya Bibele ya Puteho i latelelwanga ki Sikolo sa Bukombwa sa Teokratiki. Mukopano wo wa mizuzu ye 30 u lukiselizwe ku tusa Bakreste kuli ba zibe ku luta hande. (2 Timotea 4:2) Ka mutala, kana mwanaa mina kamba mulikanaa mina a kile a mi buza puzo ka za Mulimu kamba ka za Bibele mi se ku mi bela taata ku mu alaba hande? Sikolo sa Bukombwa sa Teokratiki sa kona ku mi luta mo mu kona ku alabela lipuzo ze zinga ka ku fa likalabo ze susueza ze tomile fa Bibele. Kacwalo, lwa kona ku ikutwa sina mwa naa ikutwezi mupolofita Isaya ya naa bulezi kuli: “Mulena [Muñ’a] Bupilo u ni file lilimi le li talifile, kuli ka manzwi a ka ni kone ku tiisa mutu ya katezi.”—Isaya 50:4.

Sikolo sa Bukombwa sa Teokratiki si kalanga ka ngambolo ye tomile fa kalulo ya mwa Bibele ye ne ba taluselizwe ku bala mwahalaa sunda ba ba fumananga kwa mukopano wo. Hamulaho wa ngambolo yeo, mubuleli u kupanga baputehi kuli ba bulele ka bukuswani lisupo ze ba tusize mwa kalulo ye ne baliwa sunda yeo. Hamulaho wa puhisano ye, baituti ba ba iñolisize mwa sikolo ba fanga lingambolo ze ne ba abezwi.

Baituti ba fiwanga kalulo ya mwa Bibele ye ba lukela ku balela fa libulelelo kamba ku eza poniso ya mwa ku lutela taba ya mwa Mañolo ku mutu yo muñwi. Hamulaho wa ngambolo ni ngambolo, muelezi ya na ni yeloseli u babazanga muituti fa kalulo ya ezize hande, u fanga pabazo ye tomile fa buka ya tuto ya Mu Fumane Tuso kwa Lituto za Sikolo sa Bukombwa sa Teokratiki. Mi hamulaho kwa mukunda, muelezi yo a kana a fa liakalezo ku muituti kuli muituti a kone ku eza zwelopili.

 Lingambolo za baituti ze, li lukiselizwe ku tusa batu kaufela isiñi feela baituti kono hape ni batu ba ba fumaneha teñi ili ba ba tabela ku bolosola mubalelo wa bona, mubulelelo wa bona, ni mulutelo wa bona. Hamulaho wa Sikolo sa Bukombwa sa Teokratiki, ku opelwanga pina ye tomile fa kalulo ya mwa Bibele mi pina yeo ki yona ye kwalulanga Mukopano wa Sebelezo.

Mukopano wa Sebelezo

Kalulo ya mafelelezo ya mukopano wo, ki Mukopano wa Sebelezo. Ka ku teeleza kwa lingambolo, liponiso, lipuhisano ni likalulo ze tokwa likalabo kwa baputehi, ba ba fumanehanga kwa mukopano wo ba lutiwanga niti ya mwa Bibele ka nzila ye buanyu. Pili a si ka luma kale balutiwa ba hae kuli ba yo kutaza, Jesu naa ba kopanyize mi a ba fa litaelo ka ku ba taluseza ze ne ba tokwa ku ziba kaufela. (Luka 10:1-16) Bakeñisa kuli cwale ne se ba itukiselize hande musebezi wa ku kutaza, ne ba ikozi ze bonwi ze ñata ze tabisa. Hamulaho, balateleli ba Jesu ba kuta ku yena ni ku to mu bihela ze ne ezahezi. (Luka 10:17) Hañata balutiwa ne ba abananga ze bonwi ni ba bañwi.—Likezo 4:23; 15:4.

Tomahanyo ya tukiso ya mizuzu ye 35, yona ya Mukopano wa Sebelezo, i boniswanga mwa hatiso ya lizibiso ya ka kweli ye bizwa Bukombwa bwa Luna bwa Mubuso. Litaba ze sa zo nyakisiswa li kopanyeleza, litaba ze li: “Ku Lapela Jehova Hamoho Sina Lubasi,” “Libaka Ha Lu Kuta-Kutelanga ku Kutaza kwa Batu,” ni “Mu Likanyise Mutala wa Kreste Ha Mu Kutaza.” Mukopano wo u felanga ka pina, mi yo muñwi wa mizwale ba mwa puteho wa ketiwanga ku fa tapelo ya mafelelezo.

Ze ba Bulezi Bapoti

Liputeho li ezanga ka mo li konela kaufela ku amuhela mañi ni mañi. Ka mutala, bo Andrew ne ba utwile litaba ze ñata ze maswe ka za Lipaki za Jehova. Kono ha ne ba tile kwa mukopano lwa pili, ne ba komokile hahulu ka za kamuhelo ye ne ba filwe. Bo Andrew ba kandeka kuli: “Ne li sibaka se sinde ku fumaneha teñi. Ne ni komokile hahulu ka za silikani sa batu ba ne ba li teñi mi ne ba tabezi ku ikambota ni na.” Ashel wa lilimo ze 17 ya pila kwa Canada, ni yena wa lumelelana ni taba yeo. U li: “Mukopano wa teñi ne u tabisa hahulu! Ne ku li bunolo ku latelela ze ne bulelwa.”

Bo José ba ba pila kwa Brazil, ne ba zibahala mwa silalanda ka ku ba batu ba lindwa. Nihakulicwalo, ne ba memilwe ku yo fumaneha kwa mukopano kwa Ndu ya Mubuso ya mwa silalanda sa bona. Ba bulela kuli: “Batu ba ne ba li kwa Ndu ya Mubuso ne ba ni amuhezi hande ka silikani, nihaike kuli ne ba ziba hande za mikwa ya ka ya kwamulaho.” Bo Atsushi ba ba pila kwa Japan, ha ba iheta, ba li: “Ni swanela ku itumelela kuli ha ne ni fumanehile lwa pili kwa mukopano wa Lipaki za Jehova, ne ni ikutwile ku sa lukuluha. Nihakulicwalo, ne ni fitile fa ku lemuha kuli batu ba kwateñi ki batu ba ba iketile. Ne ba likile ka taata luli ku ni tusa kuli ni ikutwe ku lukuluha.”

Mwa Amuhelwa

Sina mo li boniseza litaba ze fahalimu, ku fumaneha kwa mikopano kwa Ndu ya Mubuso kwa kona ku mi tabisa hahulu. Mu ka ituta ka za Mulimu, mi ka ku itusisa lihatiso ze tomile fa Bibele ze mu fiwa kwateñi, Jehova Mulimu u ka mi luta ‘se si mi swanela.’—Isaya 48:17.

Mikopano ya Lipaki za Jehova ki ya mahala, mi ha ku ngiwangi likoleko. Kana mwa tabela ku fumaneha kwa mukopano kwa Ndu ya Mubuso ye mwa silalanda sa mina? Lwa mi susueza ku eza cwalo.

[Litaluso za kwatasi]

[Mbokisi fa likepe 30]

Lingambolo ze Swanela Nyangela

Lingambolo za Bibele li ketiwanga kwa litoho za litaba za mwa Mañolo ze fitelela 170, ili ze kopanyeleza litoho za litaba ze latelela:

▪ Simuluho ya Batu—Kana ku na ni Taba ni Kuli se mu Lumela ki Sifi?

▪ Mubonelo wa Bumulimu fa Tobali ni Linyalo

▪ Ku Shandaula Lifasi-Mubu ku Tisa Silomboti sa Bumulimu

▪ Ku Talimana ni Lipilaelo za mwa Bupilo

▪ Kana Bupilo bo ki Bona Fela bo bu li Teñi?

[Siswaniso se si fa likepe 30]

Ngambolo ya Bibele

[Siswaniso se si fa likepe 30]

Tuto ya Tawala ya Mulibeleli

[Maswaniso a fa likepe 31]

Tuto ya Bibele ya Puteho

[Siswaniso se si fa likepe 31]

Sikolo sa Bukombwa sa Teokratiki

[Siswaniso se si fa likepe 32]

Mukopano wa Sebelezo