Batu ba Sikai ba ka Busa, Kono Batu ba Bañata ba ka Tusiwa

KU ZWA mwa mazazi a baapositola, Mulimu u zwezipili ku keta palonyana ya Bakreste ba ba sepahala mwahalaa batu, ni ku ba añula sina bana ba hae. Bana ba Mulimu ba, ba cincanga ka ku tala kuli mane Linzwi la Mulimu li talusa cinceho yeo kuli ki ku pepwa sinca. Mulelo wa ku pepwa sinca ki wa ku lukiseza batanga ba Mulimu ba ba pepilwe sinca bao kuli ba yo ba babusi kwa lihalimu. (2 Timotea 2:12) Kuli ba yo ba babusi, ba zusiwa kwa bafu ni ku yo pila kwa lihalimu. (Maroma 6:3-5) “Ba ka busa lifasi” hamoho ni Kreste kwa lihalimu.—Sinulo 5:10; 11:15.

Kono Linzwi la Mulimu hape li talusa kuli kwandaa batu ba ba pepilwe sinca bao, ku na ni ba bañwi ba ba ka puluswa ku ya ku ile. Bibele (mwa Mañolo a Siheberu ni a Sigerike), i talusa kuli Mulimu u ka pulusa likwata ze peli  za batu—sikwatanyana sa babusi ba ba ka pila kwa lihalimu ni likwanamunu la babusiwa ba Mubuso wo ba ba ka pila fa lifasi. Ka mutala, mu lemuhe zeo muapositola Joani naa ñolezi balumeli ka yena ba ne ba pepilwe sinca. Ha naa talusa ka za Jesu, naa ize: “Yena ki sitabelo se si lifa libi za luna; mi isi za luna feela, [sikwatanyana] kono ni za lifasi kamukana [likwanamunu].”—1 Joani 2:2.

Ka ku swana, muapositola Paulusi naa ñozi kuli: “Ze bupilwe [likwanamunu] li libelezi ka ku shukelwa hahulu ku patululwa kwa bana ba Mulimu [sikwatanyana].” (Maroma 8:19-21) Manzwi a muapositola Joani ni muapositola Paulusi a kona ku utwisiswa cwañi? A kona ku utwisiswa ka nzila ye: Batu ba ba pepilwe sinca bao ba ka yo ba babusi mwa mulonga wa kwa lihalimu. Ba ka yo petañi kwa lihalimu? Ba ka tisa limbuyoti za ku ya ku ile kwa batu ba bañata, ili babusiwa ba mulonga wa Mulimu ba ba ka pila fa lifasi. Kacwalo, Jesu naa lutile balutiwa ba hae ku lapela kuli: ‘Ku tahe mubuso wa hao. Se si latwa ki Wena si ezwe mwa lifasi, mo si ezezwa kwa lihalimu.’—Mateu 6:10.

Taba ye swana ye ya niti ya ku puluswa kwa likwata ze peli hape ya fumaneha mwa Mañolo a Siheberu. Ka mutala, mu lemuhe seo Jehova naa bulelezi Abrahama kukululu wa Jesu: “Macaba kamukana a lifasi [likwanamunu] a ka fiwa mbuyoti ka lusika lwa hao [sikwatanyana].” (Genese 22:18) Kaniti, macaba kamukana naa ka fiwa mbuyoti ka “lusika” lwa Abrahama.

“Lusika” lo ki bomañi? Ki Jesu Kreste, hamohocwalo ni batu ba ba pepilwe sinca, bona bana ba Mulimu ba ba añuzwi. Muapositola Paulusi u talusa kuli: “Ha mu li ba Kreste, fohe mu ba lusika lwa Abrahama.” (Magalata 3:16, 29) Mi ki limbuyoti mañi ze ka fiwa macaba kamukana ka “lusika” lo? Ki tohonolo ya ku shemubiwa ki Mulimu ni ku ikola bupilo bo bu sa feli mwa paradaisi fa lifasi. Walisamu Davida naa polofitile kuli: “Ba ba na ni niti ba ka yola sanda sa naha, ni ku yaha mwateñi ku ya ku ile.”—Samu 37:29; Isaya 45:18; Sinulo 21:1-5.

Kaniti, puso ya kwa lihalimu i bulukezwi feela batu ba sikai, kono limbuyoti za puso ya lihalimu, ili bupilo bo bu sa feli fa lifasi ni limbuyoti ze ñwi kaufela, li ka fiwa batu ba bañata. Haike mina ni lubasi lwa mina mu be ba bañwi ba batu ba ba ka fumana limbuyoti za ku ya ku ile ze ka tiswa ki Mubuso wa Mulimu.

[Siswaniso se si fa likepe 12]

Batu ba bañata ba ka fiwa bupilo bwa ku ya ku ile fa lifasi. Kana mu ka ba ba bañwi ba batu bao?