Ku Pepwa Sinca—Ku Ezahalanga ka Mukwa Ufi?

JESU naa si ka bulela feela ni Nekudema ka za butokwa bwa ku pepwa sinca, se si tahisa ku pepwa sinca, ni mulelo wa ku pepwa sinca, kono naa bulezi hape ni ka za se si tahisanga kuli mutu a pepwe sinca. Jesu naa bulezi kuli: “Mutu haa sa pepwi ka mezi ni ka Moya, haa koni ku kena mwa mubuso wa Mulimu.” (Joani 3:5) Kacwalo, mutu u pepwa sinca ka mezi ni ka moya. Kono pulelo ya kuli “mezi ni moya” i talusañi?

“Mezi ni Moya”—Li Talusañi?

Ka ku ba caziba wa bulapeli bwa Sijuda, Nekudema naa ziba hande mañolo a Siheberu mwa itusisezanga linzwi la kuli “moya wa Mulimu”—maata a Mulimu a itusisa kwa ku peta misebezi, ili a kona ku tahisa kuli mutu a eze misebezi ye komokisa. (Genese 41:38; Exoda 31:3; 1 Samuele 10:6) Kacwalo Jesu ha naa itusisize linzwi la kuli “moya,” Nekudema naa lukela ku utwisisa kuli ki moya o kenile, ona maata a Mulimu a itusisa kwa ku peta misebezi.

Kono cwale mezi a naa bulezi Jesu ona a talusañi? Ha lu nyakisiseñi litaba ze nee ñozwi pili Jesu a si ka ambola kale ni Nekudema, ni ze nee ñozwi hasamulaho. Litaba zeo li bonisa kuli Joani Mukolobezi ni balutiwa ba Jesu ne ba kolobezanga batu mwa mezi. (Joani 1:19, 31; 3:22; 4:1-3) Ku kolobeza batu mwa mezi ne ku zibahalile hahulu mwa Jerusalema. Kacwalo, Jesu ha naa bulezi za mezi, Nekudema naa lukela ku lemuha kuli Jesu naa sa buleli za mezi feela, kono naa bulela za mezi a kolobezo. *

Ku Kolobezwa “ka Moya O Kenile”

Haiba ku ‘pepwa ka mezi’ ku talusa ku kolobezwa ka mezi, ku ‘pepwa ka moya’ kona ku talusañi? Pili Nekudema a si ka ambola kale ni Jesu, Joani Mukolobezi naa zibahalize kuli, kolobezo i ka eziwa isi ka mezi feela kono ni ka moya. Naa bulezi kuli: “Na, ni mi kolobeza ka mezi; kono yena [Jesu] u ka mi kolobeza ka Moya o Kenile.” (Mareka 1:7, 8) Mareka, muñoli wa buka ya Evangeli u talusa fo ne ku bezi ni kolobezo ye cwalo lwa pili. U ñola kuli: “Ka nako yeo, Jesu a zwa mwa Nazareta, munzi wa mwa Galilea, mi a kolobezwa ki Joani mwa Jordani. Mi, nako yaa omboka, a bona lihalimu li  atama, mi Moya o swana inge liiba u shulumukela ku yena.” (Mareka 1:9, 10) Jesu ha naa nwelisizwe mwa Jordani, naa kolobelizwe ka mezi. Mi ka nako ya naa amuhezi moya ku zwa kwa lihalimu, naa kolobelizwe ka moya o kenile.

Hamulaho wa lilimo ze taalu ku zwa fa kolobezo ya hae, Jesu naa sepisize balutiwa ba hae kuli: “Mu ka kolobezwa ka Moya o Kenile, ha ku se ku fitile mazazi a manyinyani.” (Likezo 1:5) Ki lili fo ne ku bezi cwalo?

Fa lizazi la Pentekonta mwa silimo sa 33 C.E., balutiwa ba Jesu ba ba batoo ba 120 ne ba kubukani mwa ndu ya mwa Jerusalema. “Ka nako i liñwi feela, kwa utwiwa mulumo o zwa kwa lihalimu, inge wa moya wa liñungwa, mi wa too tala ndu kaufela ye ne ba inzi ku yona. Malimi a kauhana, aa swana sina malimi a mulilo a ba tahela . . . , mi kamukanaa bona ba tala Moya o Kenile.” (Likezo 2:1-4) Ka lona lizazi leo, ba bañwi mwa Jerusalema ne ba susuelizwe ku kolobezwa ka mezi. Muapositola Pitrosi naa taluselize sikwata sa batu kuli: “Mu bake, mi mutu ni mutu wa mina a kolobezwe ka Libizo la Jesu Kreste, kuli a fiwe swalelo ya libi; mi mu ka amuhela mpo ya Moya o Kenile.” Batu bao ne ba ezizeñi? “Ba ba amuhezi linzwi la hae, ba kolobezwa; mi mwa lizazi leo, balutiwa ba ekelezwa batu ba ba batiloo eza 3,000.”—Likezo 2:38, 41.

Ku Kolobezwa Habeli

Likolobezo ze, li patululañi ka za ku pepwa sinca? Li bonisa kuli ku pepwa sinca ku ezahalanga ka likolobezo ze peli. Mu lemuhe kuli Jesu naa kolobelizwe pili ka mezi. Mi kihona cwale a amuhela moya o kenile. Balutiwa ba kwa makalelo ni bona ne ba kolobelizwe pili ka mezi (ba bañwi ne ba kolobelizwe ki Joani Mukolobezi), mi cwale kihona ba amuhela moya o kenile. (Joani 1:26-36) Ka ku swana, balutiwa ba banca ba 3,000, ne ba kolobelizwe pili ka mezi, mi kihona cwale ba amuhela moya o kenile.

Ka ku hupula likolobezo ze nee ezahezi fa Pentekonta ya 33 C.E., lu swanela ku libelela kuli ku pepwa sinca ku ezahalanga ka mukwa ufi kacenu? Ku ezahalanga ka mukwa o swana ni mo ne ku ezahalezi kwa baapositola ba Jesu ni balutiwa ba kwa makalelo. Sapili, mutu u bakelanga libi za hae, u tuhelanga muzamao o maswe, u neelanga bupilo bwa hae ku Jehova kuli u ka mu lapela ni ku mu sebeleza, mi u bonisanga buineelo bwa hae fa nyangela ka ku kolobezwa mwa mezi. Cwale haiba Mulimu a mu keta kuli a be mubusi mwa Mubuso wa Hae, wa toziwa ka moya o kenile. Kolobezo ya pili (kolobezo ya mezi) i eziwa ki mutu ka butu; kolobezo ya bubeli (kolobezo ya moya) i eziwa ki Mulimu. Mutu ha kolobezwa ka likolobezo ze peli ze, kona kuli u pepilwe sinca.

Kono ki kabakalañi Jesu ha naa itusisize pulelo ya kuli ku ‘pepwa ka mezi ni ka moya,’ ha naa ambola ni Nekudema? Naa koñomeka kuli ba ba kolobelizwe ka mezi ni ka moya ba banga ni cinceho ye tuna. Taba ye tatama, i ka nyakisisa kalulo yeo ya ku pepwa sinca.

[Litaluso za kwatasi]

[Siswaniso se si fa likepe 9]

Joani naa kolobelize ka mezi Maisilaele ba ne ba bakile