Ku ba ni Buitumelo Ku si na Taba ni Likozi—Mo ne ni Tuselizwe ki Bibele ku Tiyela Likozi

Ka mo li Kandekezwi ki bo Enrique Caravaca Acosta

Neeli la April 15, 1971. Ne ni yo potela lubasi lwa hesu kwa simu ya lubasi lwa luna. Bakeñisa kuli ne se ni bile siyo fa lapa ka nako ye telele, ne ni nyolelwa hahulu ku yo bona mañi ni mañi. Ne ni nahana ka za haiba ne ni ka ba fumana kaufelaa bona fa ndu ni ye ne ni ka kala ku bona. Ha ni to esha, ne ni sabile hahulu ha ni too bona batu ba baa ne ba ne ba bulailwe, mi fa batu bao ni bo ma ne ba li teñi fateñi!

NE NI omile mati mwahanu. Ne ku ezaheziñi? Ne ni ka ezañi? Ne ku si na mutu fakaufi, mi ne ni lyangani hahulu ni ku ziyeleha. Pili ni si ka zwelapili mwa likande le, kashe ni mi taluseze hanyinyani za bupilo bwa ka. Mi cwale mu ka utwisisa hande mo ne ni ikutwezi ka za kozi ye, ni likozi ze ñwi ze nee ezahezi mwa bupilo bwa ka.

Ne lu Fumani Niti

Ne ni pepezwi mwa Quirimán, bukaufi ni Nicoya, mwa Costa Rica. Ka 1953, ha ne ni li wa lilimo ze 37, ne ni pila ni bashemi ba ka fa simu ya lubasi lwa hesu. Nihaike kuli ne lu huliselizwe mwa keleke ya Katolika, ne lu sa tabiswi ki lituto ze ñwi mi ne lu na ni lipuzo ze ñata ze ne si ka alabiwa.

Zazi le li ñwi kakusasana, muuna ya bizwa Anatolio Alfaro a taha fa ndu ya luna ni ku to lu susueza ku ituta Bibele. Ne ba tiloo lu luta mañolo a mañata ni lituto za Bibele ze ñata. Bo ndate, bo ma, yo muñwi wa banyani ba ka, kaizelaa ka, mulikanaa hae ye ne lu pila ni yena, ni na kaufela lwa ina mi lwa teeleza. Puhisano ye, ne i tandile musihali kaufela mane ku yo fita ni busihu. Ne lu ba buzize lipuzo ze ñata.

Bo Anatolio ne ba lobezi mwa ndu ya luna mi ni ha bu sa ba tola ni luna. Ne lu nyakalalisizwe hahulu ki ze ne lu utwile mi ne lu tabile ni ku fita, lipuzo za luna ha ne li alabilwe ku zwelela mwa Bibele. Puhisano yani ne i cincize hahulu bupilo bwa luna. Ne lu nahanisize ze ne lu itutile, mi lwa lemuha kuli ne lu fumani niti. Bo Anatolio ne ba lu siyezi limagazini ni libuka ze tomile fa Bibele. Ka linako za manzibwana, ne lu balanga ni ku ituta hamoho lihatiso zeo sina lubasi. Ku eza cwalo ne ku li taata bakeñisa kuli ne lu si na malaiti. Pili lu si ka ina kale ku ituta, mañi ni mañi wa luna naa nganga saka ni ku ikapesa yona kwa mahutu ilikuli lu si ke lwa lumiwa ki minañi.

Hamulaho wa likweli ze silezi, batu ba ketalizoho mwa lubasi lwa luna ba kolobezwa, ku kopanyeleza bashemi ba ka ni na. Kabakala tabo, lwa kala ku ya fa ndu ni ndu ku yo abana ni ba bañwi ze ne lu itutile. Ne lu zamayanga lihora ze  batoo ba ze peli ka mahutu mi ka linako ze ñwi ne lu zulamanga fa limbongolo ku liba kwa tolopo ye bizwa Carrillo ko ne lu yo kopanelanga ni sikwata sa Lipaki za Jehova sa kwateñi. Bo Anatolio ne ba zwezipili ku tahanga kwa ndu ya luna ku to lu luta Bibele. Ku tuha fo, kwa lukiswa kuli lu ezeze mukopano mwa ndu ya luna, mi batu ba 8 ne ba fumanehile fa mukopano wo. Hamulaho wa nako, kaufelaa bona ba 8 ba kolobezwa. Sikwata seo sa hula ni ku ba puteho ye nyinyani ya batu ba ba batoo ba 20.

Ku Eza Musebezi wa Mulimu ka Nako Kaufela

Hamulaho wa nako, ofisi ya mutai ya Lipaki za Jehova mwa Costa Rica ya mema batu ba ne ba tabela ku kalisa ku kutaza ka nako kaufela. Ka 1957, na amuhela memo ye, mi na kalisa bukombwa bwa nako kaufela. Musebezi wo nee li wo tabisa hahulu. Hañata ne ni zamayanga ni nosi ka lihora ze ñata kuli ni yo kutaza kwa batu ba ne ba pila mwa mahae. Fokuñwi batu ne ba sa ni amuhelangi. Ni hupula linako ze bata iba ze taalu ha ne ni bembilwe ki baana ba ne ba sweli lisabule, ba ne ba bata ku ziba kuli ki na mañi ni kuli ne ni ezañi.

Mwa lilimo za ma 1950, buñata bwa mikwakwa nee li feela tunzila to ne tu pululeza mwa lihalaupa, mi ne ku lu belanga hahulu taata ku yo fita kwa batu. Kuli lu kone ku yo fita kwa libaka ze ñwi, ne lu tokwa ku zulamanga limbongolo. Ne lu puwanga mwa linuka mi fokuñwi ne lu lobalanga fande ka nako ya busihu. Ne lu katazwanga maswe ki minañi. Hape ne lu na ni ku tokomela linoha ni likwena. Ku si na taba ni matata ao kaufela, ne ni ikolanga hahulu ku tusa batu ku ituta za Jehova Mulimu. Ha ne ni yo fitanga kwa ndu, ne ni tabanga ni ku ikutwa kuli ku na ni se ni petile kabakala ku kona ku ikambota niti ya Bibele ni ba bañwi. Ha ne ni kutazanga ni ku ituta Bibele zazi ni zazi, lilato la ka la ku lata Jehova Mulimu ne li zwelapili ku hula, mi ne ni ikutwanga ku ba bukaufi hahulu ni yena.

Hamulaho wa nako, ne ni filwe buikalabelo bo buñata. Ne ni sebelize sina muokameli wa maeto ka lilimo ze fitelela ze lishumi, inze ni potela ni ku tiisa liputeho, mi sunda ni sunda ne ni potela puteho isili mwa sibaka se siñwi. Nihaike kuli matuku naa tahisize kuli ni tuhele sebelezo ye nde ye, ni sa zwelapili ku sebeleza Mulimu ka nako kaufela.

Ha ni Tahelwa ki Kozi

Ku tuha fo, ha ne ni li kwa Nicoya ka 1971, na kuta ku to potela lubasi lwa hesu. Ha ni to kena mwa ndu, na to fumana bo ma ba ne ba li ba lilimo ze 80 inze ba lapami fa bulilo. Ne ba kunupilwe ni ku tabiwa. Ha ni inama ku ba swala, ne ba sa buyela. Hamulaho wa nakonyana, ba shwela mwa mazoho a ka. Na talima-talima mwa ndu, mi na bona fa bulilo bwa mwa litatehelo inze ku lapami mutatehi, ili ya naa na ni mulwalo wa likweli ze 8. Ni yena naa shwile. Kwandaa zeo feela, hape na fumana kaizeli wa mwa puteho i nze a lapami mwa likozwana a shwile kale, ni mwanaa mutatehi inze a lapami mwa litapelo mwa naa shwezi. Kaufelaa bona ne ba tabakilwe ni ku kunupiwa maswe. Ki mañi ya naa ezize kezo ye maswe ye, mi ki kabakalañi?

Ha ne ni zwezi kwande, na yo fumana bo ndate. Ne ba kunupilwe mwa toho kono ne ba sa pila! Na matela kwa ndu ya munyanaa ka ye ne  fumaneha kwa sibaka se ne si zamaiwa mizuzu ye 15 ku zwa fa ndu ya bo ndate, ni ku yo fumana kuli musali yo muñwi ni mwanaa hae ni bona ne ba bulailwe. Ne ni komokile maswe ha ne ni zibile kuli sibulai wa batu bao kaufela neeli mwanaa kaizelaa ka ya naa li wa lilimo ze 17, ya naa si yo muñwi wa Lipaki za Jehova ili ya naa takani! Naa balehile mwa sibaka. Mapokola ba kalisa ku zuma sibulai yo, ili mungendenge o mutuna ka ku fitisisa wa ku bata sikebenga wo kile wa eziwa mwa litaba za naha ya Costa Rica.

Taba ye, ne i zibahalile mwa naha kaufela. Hamulaho wa mazazi a 7, mapokola ba fumana sibulai yo, inze a na ni tipa ye tuna, ni tobolo ya naa lekisizwe ki mutu yo muñwi niha naa ziba kuli mutangana yo naa takani. Mwanaa kaizelaa ka yo, naa kunupilwe ni ku bulaiwa ka nako ye ne ba lika ku mu tama.

Ka nako ye ne ba sa zuma sibulai yo, batu ba bañata ne ba ni elelize ku saba mwa sibaka ka ku nahana kuli mwanaa kaizelaa ka yo naa ka kuta ni ku to ni bulaya. Na lapela ku Mulimu ka za teñi kakuli ne ni ikutwa kuli ne ni tokwa ku ba hamoho ni bana bahesu ba ne ba si ka bulaiwa hamohocwalo ni ba mwa puteho. Kacwalo naa ina.

Ni Tasezwa ki Kozi ye Ñwi ku Zwa ku ye Ñwi

Ka bumai, bo ndate ne ba pilile feela silimo si li siñwi. Silimo se ne si tatami, kaizelaa ka ya naa li mutangaa Jehova Mulimu ili ya naa sepahala, ni yena na bulailwe ka nzila isili. Hape bahaboo na kaufela ne ba swabile maswe ka ku latehelwa ki yo muñwi mwa lubasi. Ha ni koni ku talusa ka manzwi mo ne lu ikutwezi ni maswabi ao luna ni balikani ba luna ne lu bile ni ona a ku latehelwa ki batu ba bañwi mwa lubasi. Mwahalaa matata ao kaufela, ne ni itingile hahulu ku Jehova mi ne ni zwelapili ku mu kupa kuli a ni fe maata a ku itiisa.

Ka 1985, ne ni fumanehile kwa sikolo sa maeluda ba Sikreste se ne si tandile mazazi a malaalu mwa tolopo-tuna ya San José. Sikolo seo ha ne si felile, ne ni ikutwile kuli silikani sa ka ni Jehova si tiisizwe. Habusa la mubulo kakusasana, ne ni fundukile kuli ni yo kwela mbasi ku kuta kwa hae. Ha ne ni zamaya ku liba kwa siteshini sa limbasi, na tasezwa ki libangoki ze nee ni kamile ni ku ni uzweza. Libangoki zeo ne li konile ku ni taseza kapili-pili kuli mane ne ni palezwi ku bona lifateho za zona. Seo sa tahisa kuli ni palelwe ku bulelanga ka mubulelelo wa ka sizo wa si-Costa Rica. Mwa provinsi ye ya Guanacaste, baana ba kangaukanga kamba ku huwa ha ba katana ni ku itumelisa kamba ku lemusa ba bañwi kuli ni bona ba teñi mwa sikwata. Ne ni kona hahulu ku huwa, kono hamulaho wa tasezo ye ha ni sa kona ku huwa.

Ka 1979, na nyala Celia, ili Paki ka na ya naa zwa mwa puteho ye ne ili mabapa. Celia naa lata hahulu Bibele. Ne lu balanga ni ku ituta Bibele hamoho ka zazi. Ka bumai naa bulailwe ki butuku bwa kansa ka July 2001. Ka linako ze ñwi ni ikutwanga bulutu, kono sepo ya kuli ku ka ba ni zuho ya ni tiisanga.—Joani 5:28, 29.

Tabo ku si na Taba ni Miliko

Nihaike kuli mwendi ni kopani ni likezahalo ze sabisa mwa bupilo bwa ka ku fita batu ba bañwi ba bañata, ni nga litiko zeo kuli ki kolo feela ya ku bonisa tumelo ni busepahali bwa ka ku Jehova. (Jakobo 1:13) Nto ye ni tusanga kuli ni bange ni mubonelo o munde ka za ze ni kopani ni zona, kikuli ni ikupulisanga kuli ‘linako ze lu pila ku zona, ni bushiko kamba bumai’ li lu tahela kaufelaa luna. (Muekelesia 9:11) Hape ni hupulanga kuli, a ki ona “mazazi a maungulelo” kakuli batu se ba sabisa, se li ba mifilifili, mi ha ba sa na buiswalo. (2 Timotea 3:1-5) Hape  ni hupulanga mutala wa Jobo. Ku si na taba ni manyando a hae kaufela a ku latehelwa ki lubasi, ku tahelwa ki matuku, ni ku latehelwa ki liluwo, Jobo naa bulezi ka ku tiya kuli: “Ku lumbekwe Libizo la Muñaa Bupilo.” Mi Jehova naa fuyauzi Jobo kabakala busepahali bwa hae. (Jobo 1:13-22; 42:12-15) Litaba ze kaufela za mwa Bibele li ni tusa ku ba ni tabo ku si na taba ni miliko ye miñata yee ni tahezi.

Jehova u zwelapili ku ni tusa kuli ni mu beye mwa sibaka sa pili mwa bupilo bwa ka. Ni konile ku omba-ombiwa hahulu ki ku bala Bibele ka zazi, mi ku eza cwalo ku konile ku ni fa maata a ku itiisa. Ka ku atumela Jehova mwa tapelo, se ni kona ku ikola “kozo ya Mulimu ye fita kutwisiso kaufela.” (Mafilipi 4:6, 7) Kozo ya Mulimu i ni tahisezanga ku ba ni mwangalwa. Ku fumanehanga kwa mikopano ya Sikreste ni ku abananga ku yona ku tiisize tumelo ya ka.—Maheberu 10:24, 25.

Nihaike se ni supezi, ni itumela ku Jehova kuli ni sa na ni maata a ku sebeza ni Bakreste sina na, a ku ituta Bibele ni ba bañwi, ni a ku abana mwa bukombwa. Ku sebeleza ba bañwi ka linzila ze, ku ni fanga maata a ku tiyela ku zwafa. Ni itumela hahulu ku Jehova ku si na taba ni likozi ze ñata ze ni kopani ni zona mwa bupilo. *

[Litaluso za kwatasi]

[Manzwi a fa likepe 18]

Ni konile ku omba-ombiwa hahulu ki ku bala Bibele ka zazi, mi ku eza cwalo ku konile ku ni fa maata a ku itiisa

[Siswaniso se si fa likepe 17]

Ha ni kalisa ku fa ngambolo ya Bibele

[Siswaniso se si fa likepe 18]

Mwa bukombwa bwa mwa simu inge ni sa li mutangana