2. Mu Bale ka Mulelo wa ku Amuhela ze mu Ituta
Mo mu Kona ku Utwisiseza Bibele
2. Mu Bale ka Mulelo wa ku Amuhela ze mu Ituta
Kana mulikanaa mina a kile a mi bulelela litaba ze maswe ka za mutu ye ne mu si ka kopana kale ni yena? Mi cwale ha ne mu kopani ni yena mutu yoo, kana litaba za naa mi bulelezi mulikanaa mina ne li mi palelwisize ku lemuha mikwa ye minde ya mutu yoo? Nto ye swana ya kona ku ezahala ha mu bala Bibele.
MUAPOSITOLA PAULUSI naa lemusize ka za se si kona ku ezahala haiba lu palelwa ku amuhela ze lu bala mwa Bibele. Paulusi naa ñozi ka za Majuda ba bañwi ba mwa miteñi ya hae kuli: “Na ba paka, ni li, ba tukufalezwi za Mulimu, kono isi ka ku utwiseza.”—Maroma 10:2.
Ba bañwi ba Majuda bao ba mwa miteñi ya baapositola ne ba sa lati ku lumela kuli Jesu nee li yena Mesia, sina mwa naa patululezi Mañolo A Siheberu. Jesu wa kwa Nazareta naa talelelize bupolofita kaufela bo ne bu ñozwi mwa Mañolo A Siheberu ka za Mesia ni za naa ka eza. Nihakulicwalo, Majuda ba bañata ba mwa miteñi ya hae ne ba palezwi ku utwisisa Linzwi la Mulimu kabakala mihupulo ye ne ba na ni yona, ye nee sa cinci.
Lu kona ku itutañi kwa taba yeo? Lu ituta kuli ki kwa butokwa ku bala Bibele ka mulelo wa ku amuhela litaba ze ku yona. Mutu u kona ku palelwa ku utwisisa niti ye mwa Bibele haiba u na ni mihupulo ye si ka luka ka za yona.
Ka mutala, caziba yo muñwi wa lituto za bulapeli ya pila kwa North Carolina, mwa U.S.A., u talusa kuli Bibele ki “buka ye nee ñozwi ki batu, ye na ni mihupulo ya butu ye shutana-shutana, ili ye sa koni ku lu tusa ku ziba hande mo lu swanela ku pilela.” Haiba mutu a nga Bibele sina buka ye ñozwi ki batu isi Mulimu, u kona ku hana litaelo kamba likuka za sa tabeli.
Kono Bibele yona i lu susueza kuli lu itute yona ka tukufalelo. Mañolo a bulela cwana ka za ba batu ba kwa Berea ba mwa miteñi ya Paulusi: “Ba amuhela Linzwi ka ku li tukufalelwa, mi ba batisisa mwa Mañolo, ka mazazi kaufela, ba lemuhe litaba ze ba bulelelwa kana ki mo li inezi.” (Likezo 17:11) Ka ku swana ni batu bao ba kwa Berea, ni mina mu tokwa ku tuhela mihupulo ye si ka luka ka za Bibele. Mu bale Linzwi la Mulimu ka mulelo wa ku amuhela litaba ze ku lona, mi mu shukelwe ku fumana taluso ye tabisa ya manzwi aa zwa ku Mulimu.