Kana Mwa Ziba?

Ki kabakalañi Josefa ha naa bata ku fa Maria liñolo la ku mu leleka hailifo naa mu beelelize feela?

Ka ku ya ka Evangeli ya Mateu, Josefa naa zibile kuli Maria naa itwezi ha naa “beelelizwe” ki yena kono pili ba si ka nyalana kale. Josefa naa sa zibi kuli Maria naa itwezi ka “Moya o Kenile,” mi kacwalo naa nahana kuli Maria naa si ka sepahala ku yena mi naa bata ku mu leleka.—Mateu 1:18-20.

Majuda ne ba nga batu ba ba beelezani sina batu ba ba nyalani kale. Nihakulicwalo, batu bao ne ba sa kalisangi ku pila hamoho sina muuna ni musali ba ba nyalani konji hasamulaho wa sinawenga. Ku beelezana ne ku ngiwa sina buitamo, mi haiba linyalo li pala ku ba teñi kabakala kuli muuna u cincize munahano kamba ku na ni libaka le liñwi le li utwahala linyalo ha li si ka ba teñi, musali naa si ka lukuluha ku nyalwa konji haa filwe liñolo la telekano. Haiba muuna ya beelelize musali a shwa, musali naa ngiwa kuli ki mbelwa. Kono haiba musali a eza buhule inze a beelelizwe, naa ngiwa kuli u bukile mi naa atulelwanga lifu.—Deuteronoma 22:23, 24.

Ku bonahala kuli Josefa naa nahanisisize ze nee ka ezahala ku Maria ha naa ka sinyeha libizo kabakala mulwalo wa hae. Josefa niha naa ikutwa kuli naa swanela ku isa taba yeo kwa baatuli, naa bata ku sileleza Maria mi naa sa bati ku mu swabisisa kwa nyangela. Kacwalo a ikatulela ku mu lelekela kwa mukunda. Mane ku ba ni liñolo la ku lelekwa kwa musali ya si ka nyalwa ili ya na ni mwana, ne ku bonisa kuli naa nyalwanga.