“Nako” ye Tomilwe I Sutelezi

MUBAPALE

“Nako” ye Tomilwe I Sutelezi

SINA mupolofita Habakuki, balutiwa ba Jesu ne ba nyolelwa ku bona manyando haa fela. Bakeñisa kuli ne ba itutile ze u ka eza Mubuso wa Mulimu kuli u lukise lika fa lifasi, ne ba kupile Jesu kuli: “U lu bulelele zeo fo li ka bonahalela, ni se si ka supa ku taha kwa hao [inzoo li Mulena], ni ku fela kwa lifasi.” (Mateu 24:3) Jesu a ba bulelela kuli ki Jehova Mulimu feela ya ziba nako luli yeo Mubuso u ka zamaisa lika kaufela fa lifasi. (Mateu 24:36; Mareka 13:32) Kono Jesu ni ba bañwi ne ba polofitile ka za lika ze nee ka ezahala ili ze nee ka bonisa kuli nako yeo i fakaufi.—Mu bone kambokisi ku la bulyo.

Kana mwa lumela kuli lika ze za iponahalela kai ni kai kacenu? Jesu hape naa polofitile kuli musebezi wa ku luta batu u ka eziwa mwa lifasi kaufela. Naa ize: “Evangeli ye ya mubuso i ka bulelwa mwa lifasi kaufela, ibe bupaki mwa macaba kamukana; kihona ku ka taha mafelelezo.”—Mateu 24:14.

Wo ki ona musebezi o eziwa kacenu. Lipaki za Jehova ki bona ba ba sweli ku u eza. Mwa linaha ze bato ba 236, Lipaki ba ba fitelela 7,000,000 ba bulelela batu ze u ka eza Mubuso, mi ba ba tusa ku pila ka ku latelela lika ze lukile za tokwa Mulimu, ili ya bata ku felisa manyando ni maswenyeho. Mu zwelepili ku ituta ka za Mubuso wa Mulimu mi mu ka ba ni sepo ya ku pila ku ya ku ile fa lifasi ku si na manyando.

[Mbokisi fa likepe 15]

Mañolo aa Bulela ka za Mazazi A Maungulelo

MATEU 24:6, 7; SINULO 6:4

• Lindwa ze si ka bonwa kale

MATEU 24:7; MAREKA 13:8

• Lizikinyeho ze tuna za lifasi

• Lukupwe

LUKA 21:11; SINULO 6:8

• Mafu a maswe

MATEU 24:12

• Ku ekezeha kwa bumaswe

• Ku fola kwa lilato la batu