Taba Ye Nde Mwa Lipuo Ze 500

NDWA ya mukowa ha ne i nze i kolota mwa Rwanda, sikwatanyana sa batoloki ba baleha ku zwa fa liofisi za Watch Tower Society mi ba siya lika za bona. Kono ba shimba likompyuta za bona ze nyinyani (laptop) kwa minganda ya babalehi. Ki kabakalañi? Kuli ba yoo zwelapili ku toloka lihatiso ze tomile fa Bibele mwa puo ya Si-Kinyarwanda.

Kalibe yo muñwi wa kwa mboela-upa wa Asia u tolokelanga fa kompyuta ya hae busihu ku si na taba ni mukatala, ku cisa, ni malaiti aa yanga nako ni nako ili a kaulezanga musebezi wa hae. Ki kabakalañi ha belekanga cwalo? Kuli a fezange musebezi wa hae ka bunako.

Batoloki bao ki ba bañwi ba sikwata sa baitateli ba ba bato eza 2,300 ba ba belekela mwa libaka ze fitelela 190 mwa lifasi. Ba na ni lilimo za ku pepwa ze kalela fa 20 ni ku sutelela ku ze 90 mi ba sebeza ka taata kuli batu ba kone ku utwa lushango lo lu omba-omba lwa mwa Bibele mwa lipuo ze 500.—Sinulo 7:9.

Ku Toloka Mwa Lipuo ze Ñata

Mwa lilimonyana ze felile, musebezi wa Lipaki za Jehova wa ku toloka u ekezehile hahulu. Ka mutala, mwa silimo sa 1985 Tawala ya Mulibeleli ne i hatiswanga mwa lipuo ze 23 ka nako ye swana, mi wo nee li musebezi o mutuna ka nako yeo. Kono kacenu, Tawala ya Mulibeleli i fumaneha mwa lipuo ze 176, mi i hatiswanga mwa lipuo zeo ka nako ye swana ilikuli babali mwa lifasi kaufela ba kone ku ituta litaba ze swana ka nako ye swana.

Tawala ya Mulibeleli ki yona feela ye hatiswanga ka nako kaufela mwa lipuo ze bato eza 50. Ki kabakalañi? Likampani ze hatisanga libuka ha li na ba ba li sulela pene kuli li hatisange libuka mwa lipuo ze itusiswa mwa libaka mo li fumaneha likampani zeo. Kono Lipaki za Jehova mwa lifasi kaufela ba ezanga linubu ka ku itatela ni ku li kopanya hamoho ilikuli ba kone ku hatisa Linzwi la Mulimu ni lihatiso ze tomile fa Bibele kuli li kone ku fumaneha ko li tokwahala.—2 Makorinte 8:14.

Batu ba nganga litaba za mwa Bibele ku ba za butokwa hahulu ha li li mwa puo ya bona. Ka mutala, lihatiso ze tomile fa Bibele se li kalile ku hatiswa hona cwanoñu fa mwa puo ya Si-Miskito, ili puo ye bulelwa ki batu ba ba bato eza 200,000 mwa Nicaragua. Musali yo muñwi naa kupile hatiso ya Buka Ya Ka ya Makande a Bibele * mwa Si-Miskito, mi ka nako ye ne ba mu tiseza buka yeo pasita wa mwa sibaka seo naa li teñi. Pasita yo ha saa boni buka ye nde yeo, a bata kuli i be ya hae. Musali yo a hana ku fa pasita buka yeo, nihaike kuli pasita yo naa bata ku mu fa 20 kg ya kofi ye halikilwe kuli yena a mu fe buka.

 Mwa lilimo ze lishumi ze felile, lihatiso ze tomile fa Bibele li tolokilwe mwa lipuo ze fitelela 12 za mwa naha ya Mexico, mi ze ñwi za lipuo zeo ki Si-Maya, Si-Nahuatl, ni Si-Tzotzil. Mwa lilimo ze sa fiti ku ze lishumi, liputeho ze itusisa lipuo ze bulelwa mwa naha yeo ni liputeho ze itusisa puo ya bosusu za Lipaki za Jehova ne li ekezehile ku zwa fa palo ya 72 ku ya fa 1,200. Lipaki za Jehova ba kona ku cala lushango lwa Bibele mwa lipilu za batu, kono ba tuhelelanga Mulimu kuli a melise lipeu zeo za niti.—1 Makorinte 3:5-7.

Toloko ye Nca ya Bibele Mwa Lipuo ze 80

Mwa lilimonyana ze felile, Lipaki za Jehova ba sebelize ka taata ku toloka Bibele mukatumbi ya New World Translation of the Holy Scriptures kamba kalulo ya yona feela mwa lipuo ze 80. Bibele yeo i tusize cwañi batu? Paki yo muñwi wa kwa South Africa naa bulezi ka za Bibele ya Si-Tswana kuli: “Bibele ye ki siitusiso se sinde luli. I ka ni tusa ku utwisisa hande Linzwi la Mulimu ni ku li katelwa hahulu. I ñozwi ka muñolelo wo bunolo mi i utwahala hande ku i bala.” Muuna yo muñwi wa puo ya Si-Tsonga ya pila kwa Mozambique naa ñozi kuli: “Niha ne ni na ni lihatiso ze ñwi ze tomile fa Bibele, ku tokwa Bibele ne ku swana sina mishika ni mamonyi kono inge ku si na pula! Kono pula nee i nelile ka nako ye ne i zwisizwe Bibele ya New World Translation mwa puo ya Si-Tsonga.”

Batu ba ba toloka ni ba ba hasanya taba ye nde ye mwa Bibele ba taleleza ka nzila ye ipitezi bupolofita bo ne bu bulezwi kwaikale. Bupolofita boo ne bu bulezwi ki Jesu Kreste ha naa ize: “Evangeli ye ya mubuso i ka bulelwa mwa lifasi kaufela, ibe bupaki mwa macaba kamukana; kihona ku ka taha mafelelezo.”—Mateu 24:14.

[Litaluso za kwatasi]

[Grafu fa likepe 25]

(Kuli mu bone mo i hatiselizwe luli, mu bone hatiso)

NEW WORLD LIHATISO

TRANSLATION ZE ÑWI

Bibele mutumbi kamba

kalulo ya yona

80 2010 500 2010

36 2000

13 1990 200 1990

190 1980

7 1970 165 1970

125 1960

1 1950 88 1950

PALO YA LIPUO

[Maswaniso a fa likepe 30, 31]

Baitateli ba ba bato eza 2,300 ba toloka lihatiso ze tomile fa Bibele mwa lipuo ze 500

BENIN

SLOVENIA

ETHIOPIA

BRITAIN