Ze ba Buza Babali . . .

Kana Jesu ki Yena Mikaele Nduna ya Mangeloi?

▪ Kalabo ka bukuswani kikuli, eni. Mukwa wa ku biziswa ka mabizo a mañata u atile mwa lizo ze ñata. Ki nto ye swana ni kwa mabizo a mwa Bibele. Ka mutala, toho ya lusika Jakobo hape u bizwa Isilaele. (Genese 35:10) Mwa Mañolo a kwa makalelo, muapositola Pitrosi u na ni mabizo a shutana-shutana a ketalizoho—Simioni, Simoni, Kefasi, Pitrosi, ni Simoni Pitrosi. (Mateu 10:2; 16:16; Joani 1:42; Likezo 15:7, 14) Lu kona ku kolwa cwañi kuli Mikaele ki libizo le liñwi la Jesu? Mu nyakisise bupaki bwa mwa Mañolo bo bu latelela.

Bibele i bulela ka za sibupiwa sa moya se si maata se si bizwa Mikaele haketalizoho. Mwa buka ya Daniele li fumaneha halalu. Kwa Daniele 10:13, 21, lu bala kuli lingeloi le ne li lumilwe ku yo eza musebezi o muñwi li lamulezwi ki Mikaele, ya bizwa “nduna yo mutuna” ni “nduna wa mina.” Ku tuha fo, kwa Daniele 12:1, lu ituta kuli mwa nako ya maungulo, “ku ka yema Mikaele, nduna yo mutuna, ya yemela sicaba sa henu.”

Kwa Sinulo 12:7, ni kona ku bulezwi za Mikaele, ili liñolo le li bulela za kuli “Mikaele ni mangeloi a hae” ba lwana ndwa ye tuna ye ne tahisize kuli Satani Diabulosi ni mangeloi a hae a maswe ba lundulwe kwa lihalimu.

Mu lemuhe kuli mwa taba ni taba ye bulezwi fahalimu, Mikaele u taluswa sina lingeloi la ndwa le li lwanela batu ba Mulimu ni ku ba sileleza, mane ni ku lwanisa Satani, yena sila se situna sa Jehova.

Juda timana 9 i biza Mikaele kuli ki “nduna ya mangeloi.” Pulelo ya “nduna ya mangeloi,” mwa Bibele ha i si ka itusiswa ku talusa mangeloi a mañata. Timana feela ye ñwi ko i fumaneha pulelo ya nduna ya mangeloi ki kwa 1 Matesalonika 4:16, ili ko Paulusi a talusa za zuho ya Jesu, ka ku bulela kuli: “Mulena [Jesu], Yena luli, u ka shetumuka kwa lihalimu ka muhuwo wa linzwi la nduna ya mangeloi, ka mulumo wa tolombita ya Mulimu.” Kacwalo, mwa litimana ze, Jesu Kreste yena ka sibili u taluswa kuli ki nduna ya mangeloi, kamba yo muhulu wa mangeloi.

Ku likana ni ze se lu ambozi, lu kona ku bulelañi cwale? Lu kona ku bulela kuli Jesu Kreste ki Mikaele nduna ya mangeloi. Mabizo a mabeli ao—la Mikaele (le li talusa “Ki Mañi ya Swana ni Mulimu?”) ni la Jesu (le li talusa “Jehova ki Mupulusi”)—a ama hahulu kwa buikalabelo bwa hae sina muyemeli yo mutuna wa bubusi bwa Mulimu. Liñolo la Mafilipi 2:9 li bulela kuli: “Mulimu u mu pahamisize hahulu [Jesu ya filwe kanya] ni ku fita, mi u mu file Libizo le li fahalimwaa mabizo kamukana.”

Ki kwa butokwa ku lemuha kuli Jesu ha na tilo pepwa fa lifasi sina mutu ne si ona makalelo a bupilo bwa hae. Jesu a si ka pepwa kale, Maria na potezwi ki lingeloi le ne li mu taluselize kuli na ka itwala mwana ka moya o kenile ni kuli a beye mwana yo libizo la Jesu. (Luka 1:31) Ka nako ya bukombwa bwa hae, Jesu hañata na bulelanga za bupilo bwa hae pili a si ka ba kale mutu wa fa lifasi.—Joani 3:13; 8:23, 58.

Kacwalo, Mikaele nduna ya mangeloi ki Jesu pili a si ka ba kale mutu wa fa lifasi. Jesu ha sa zuhile ni ku kutela kwa lihalimu, na izo kalisa sinca misebezi ya hae sina Mikaele, yena yo muhulu wa mangeloi, kuli “ibe kanya ku Mulimu Ndate.”—Mafilipi 2:11.