Bupilo ni Linako za Bakreste ba Mwa Miteñi ya Baapositola

 ‘Ba Sebeza Mwa Mahae A Bona’

“Ha ba nze ba zamaya, ba yo kena mwa munzinyana o muñwi. Ne ku na ni musali ya bizwa Mareta, mi a mu amuhela mwa ndu ya hae. Na na ni munyanaa hae ya bizwa Maria; yena a ina fa mautu a Mulena, a teeleza manzwi a hae. Kono Mareta na patehile ka misebezi ye miñata. A taha ku Jesu, a li: Mulena kikuli ha u tokomeli munyanaa ka haa ni siyela misebezi ni li nosi? U mu bulelele kuli a to ni tusa. Kono Mulena a mu alaba, a li: Mareta, Mareta, u bilaela mi u ikataza ka ze ñata; kanti se si tokwahala ki nto i liñwi feela. Mi Maria u ketile kabelo ye nde, ye a si ke a i amuhiwa.”—LUKA 10:38-42.

MARETA ne li musali wa miswalo luli. Ku si na ku kakanya, na kutekiwa hahulu ki ba bañwi. Ka ku ya ka sizo sa Majuda ba mwa miteñi ya baapositola, musali na fiwa likute ka ku ya ka buikoneli bwa hae bwa ku eza misebezi ya fa lapa ni ku babalela lubasi lwa hae.

Basali ba Sikreste ba ne ba pila mwa miteñi ya baapositola ni bona ne ba susuelizwe ku ‘sebeza mwa mahae a bona.’ (Tite 2:5) Kono ne ba na ni tohonolo ni buikalabelo bo buñwi bwa ku luta ba bañwi ka za tumelo ya bona ya Sikreste. (Mateu 28: 19, 20; Likezo 2:18) Ki ifi ye miñwi kwa “misebezi ye miñata” ya na ezanga musali wa Mujuda wa mwa miteñi ya baapositola? Mi ki tuto mañi ye lu kona ku ituta kwa manzwi a Jesu ka za Maria?

‘Ku Pateha ka Misebezi ye Miñata’ Musali wa Mujuda na zuhanga ka mapakela, mwendi lizazi li si ka pazula kale. (Liproverbia 31:15) A mano lukiseza lubasi lwa hae palica, mwendi na isanga bana ba hae ba bashimani kwa sikolo sa kwa sinagoge. Bana ba hae ba basizana ne ba inanga fa lapa kuli ba lutiwe misebezi ye ne ba tokwa ku ziba kuli ba to ba basali ba miswalo ha ba ka nyaliwa.

Me hamoho ni bana ba hae ba basizana ne ba kalanga ku eza misebezi ye bunolo ya fa lapa, ye cwale ka ku sela mafula mwa lilambi (1), ku fiyela (2), ni ku hama puli ya lubasi (3). Hasamulaho, ne ba besanga sinkwa sa lizazi leo. Basizana ne ba ulusanga bubeke pili ku zwisa kwateñi muuku (4) ni ku bu sila ka sibeliso kuli ba eze fulaulo (5). Me na nganga fulaulo ni ku i kopanya ni mezi ni mumela. Kihona a i luba (6) ni ku i siya kuli i huhumuhe ha nze a eza misebezi ye miñwi. Ha nze a eza cwalo, basizana ne ba patehanga ku temisa mabisi a puli kuli ba pange mafi (7).

Lizazi ha se li tutumukile, me ni bana ba hae ba basizana mwendi ne ba yanga kwa musika. Teñi ko, na utwanga miunko ye miñata, na utwanga lilata la limunanu, ni mihuwo ya baleki ni balekisi ka za liteko, na kona ku leka za na tokwa lizazi leo (8). Mwendi fa mukoloko wa lika za naa leka ne ku na miloho ni litapi ze omile. Haiba naa li Mukreste, naa kona ku itusisa kolo yeo kwa ku ambola ni ba bañwi kwa musika ka za tumelo ya hae.—Likezo 17:17.

Me ya na latelela litaelo za Mulimu naa kona ku itusisa kolo ye cwale ka ya ku ya ni ku zwa kwa musika kwa ku tusa bana ba hae ku ituta ni ku itebuha likuka za mwa Mañolo. (Deuteronoma 6:6, 7) Hape na kona ku ambola ni bana ba hae ba basizana ka za likuka ze kona ku ba tusa mwa ku itusiseza hande mali ha ba leka lika.—Liproverbia 31:14, 18.

Musebezi o muñwi o ne ba ezanga basali ka zazi ne li wa ku yanga kwa siliba (9). Teñi ko, ne ba yo kanga mezi a ku itusisa mwa lubasi, mwendi inze ba ambola ni basali ba bañwi ba ba ka mezi. Ha se ba kutile kwa hae, me ni bana ba hae ba basizana ne ba kalanga ku besa linkwa. Pili ne ba bupanga fulaulo ka ku i eza linkwa za bupapalala, mi kihona ba li beya mwa sitofu se si cisa (10) se ne si banga kwande. Ha ba nze ba ikola munko o munati ni ku ikambota, ne ba yo nangelanga sinkwa ku bona mo si buzweza.

Ha se ba felize ku besa sinkwa, ne ba yanga ku yo tapisa litino kwa nuka ye ne li bukaufi (11). Pili basali ne ba tapisanga litino za bona ka mukele o no pangilwe fa mulola wa fa liiso  wa likota za mufuta o muñwi. Ha se ba zukulize ni ku hamula libyana, basali ne ba yanehanga libyana fa macacani ni fa macwe a na li bukaufi.

Ha se ba tile ni libyana kwa ndu, me ni bana ba hae ba basizana mwendi ne ba yanga ni zona fahalimu a situwa sa ndu ya bona se si patami ni ku yo luka (12) ze pazauhile ba si ka li kutisa kale mwa sibulukelo. Hasamulaho, basizana mwendi ne ba lutiwanga ku luka libyana (13). Cwale nako ya kuli basali ba kale ku apeha lico za mulalelo ne se i sutelezi (14). Bakeñisa kuli ne ba tabela ku amuhela baenyi, lubasi ne lu itukisezanga ku abana lico ni baenyi kaufela, ze cwale ka linkwa, miloho, mafi, litapi ze omile, ni mezi a bata.

Manzibwana banana ha ba nze ba itukiseza ku yo lobala, ba ne ba na ni litombo fa mañwele ne ba lambiwanga oli kuli litombo za bona li si ke za opa. Hasamulaho mwa liseli la lambi, bashemi mwendi ne ba kandekanga likande la mwa Liñolo ni ku lapela ni bana ba bona. Mwa ndu ha se ku kuzize, muuna na kona ku taluseza musalaa hae manzwi a zibahala hande a li: “Musali ya sepahala ya ka mu fumana ki mañi? Ki wa butokwa hahulu ku fita lipelela.”—Liproverbia 31:10.

Ku Keta “Kabelo ye Nde” Kaniti luli, basali be ne ba latelela litaelo za Mulimu ba mwa miteñi ya baapositola ne ba patehanga ka “misebezi ye miñata.” (Luka 10:40) Ka mukwa o swana, basali kacenu, sihulu bo me ba pila bupilo bwa mipateho. Lipangaliko za mwa miteñi ya cwale li nolofalize misebezi ye miñwi ya fa lapa. Kono miinelo i hapelezanga bo me ba bañata ku beleka ko kuñwi ku fita feela ku babalela mabasi a bona.

Ku si na taba ni matata e ba talimana ni ona, basali ba Sikreste ba bañata kacenu ba latelela mutala wa Maria, ya bulezwi kwa makalelo a taba ye. Ba nga lika za Mulimu ku ba za butokwa hahulu. (Mateu 5:3) Ba babalela hande mabasi a bona, sina mwa ba susueleza Mañolo. (Liproverbia 31:11-31) Kono hape ba latelela sikuka sa na bulezi Jesu ku Mareta. Ka ku ba musali ya na nga silikani sa hae ni Mulimu ku ba sa butokwa, kaniti Mareta na utwile kupuliso ye sishemo yeo. Basali ba Sikreste ha ba lumelezi misebezi ya bona ya fa lapa ku ba palelwisa ku ituta za Mulimu (15) kamba ku taluseza ba bañwi ka za tumelo ya bona. ( Mateu 24:14; Maheberu 10:24, 25) Kacwalo ba keta “kabelo ye nde.” (Luka 10:42) Kona libaka, Mulimu, Kreste, ni mabasi a bona ba ba nga ku ba ba butokwa hahulu.—Liproverbia 18:22.