“U Talima Pilu”
Mu Sutelele ku Mulimu
“U Talima Pilu”
PONAHALO ya kona ku puma. Ponahalo ya mutu ha i koni ku talusa luli mwa inezi mutu mwahali, mwa pilu ya hae. Batu hañata ba atulanga mutu ka ku ya ka ponahalo ya hae. Kwa tabisa ku ziba kuli Jehova Mulimu yena ha talimangi ponahalo ya mutu ya kwande. Taba ye i patuluzwi hande mwa manzwi a kwa 1 Samuele 16:1-12.
Mu nahane ze ne ezahezi, ka mo ku taluselizwe mwa likande le li latelela. Jehova u bata ku keta mulena yo munca ya ka busa sicaba sa Isilaele. Mulimu u bulelela mupolofita Samuele kuli: “Na ku luma ku Jese wa mwa Betelehema; kakuli ni iketezi mulena kwa bana ba hae.” (Timana 1) Jehova ha pundi libizo la mutu yo, kono u bulela feela kuli ye ni ketile ki yo muñwi wa bana ba Jese. Samuele ha nzaa liba kwa Betelehema, mwendi u ipuza kuli, ‘Ni ka ziba cwañi kuli yo ki yena ya ketile Jehova kwa bana ba Jese?’
Samuele ha fita mwa Betelehema, u lukisa kuli yena, Jese ni bana ba hae ba eze sitabelo. Eliabi mwana yo muhulu ka ku fitisisa wa Jese, ha kena, Samuele kapili-pili u lemuha kuli Eliabi wa buheha. Samuele u nahana kuli Eliabi luli wa swanela ku ba mulena kabakala siyemo sa hae mi u ipulelela mwa pilu kuli: “Luli mutoziwa wa Muñaa Bupilo ki yo, u fapilaa hae.”—Timana 6.
Kono mubonelo wa Jehova wa shutana ni wa Samuele. U bulelela Samuele kuli: “U si ke wa talima bunde bwa hae kamba butelele bwa fa kuma, kakuli Na ni mu hanile.” ((Timana 7) Jehova ha si ka tabiswa ki butelele ni bunde bwa Eliabi. Meeto a Jehova ona ha talimi feela ponahalo ya mutu, kono a bona ko ku fumaneha bunde bwa niti.
Jehova u taluseza Samuele kuli: “Muñaa Bupilo haa talimi sina mutu mwaa talimela; kakuli mutu u talima bunde, Muñaa Bupilo, Yena, u talima pilu.” ((Timana 7) Kaniti, Jehova u talima pilu—yena mutu wa mwahali ili ko i simuluha mihupulo ya mutu, mayemo a mutu, ni maikuto—kona za butokwa hahulu ku Jehova. Yena “ya lika lipilu” u hana Eliabi—hamohocwalo ni bana ba Jese ba 6 ba ba latelela ba ba taha fapilaa Samuele.—Liproverbia 17:3.
Ku sa siyezi mwanaa Jese a li muñwi, Davida, yena yo munyinyani ka ku fitisisa, ya sweli ku “lisa lingu.” (Timana 11) Kacwalo, Davida u yo biziwa mwa naheñi mi u taha fapilaa Samuele. Mi cwale Jehova u li ku Samuele: “Yema, u mu toze; kakuli ki yena yo.” (Timana 12) Ki niti kuli Davida u na ni “meto a mande, ni wa sibupeho se sinde.” Kono ki pilu ya hae ye kolisa pilu ya Mulimu.—1 Samuele 13:14.
Mwa lifasi le mo ku ngiwa hahulu kuli bunde bwa liyemo ki bwa butokwa, lwa kona ku omba-ombiwa ki ku ziba kuli Jehova ha talimangi bunde bwa liyemo. Mulimu ha na taba kuli mu ba ba telele kamba kuli ba bañwi ba mi bona kuli mwa buheha. Sa butokwa ni ku fita ku Jehova ki pilu ya mina. Kana ku ziba taba yeo kwa mi susueza ku ba ni tulemeno to tu ka mi bisa ba batu bande mwa meeto a Mulimu?