Mu Itute Linzwi La Mulimu

Ki Kabakalañi ha mu Swanela ku Lutiwa ki Mulimu?

Taba ye i nyakisisa lipuzo ze ne mu kana mu ipuzize mi i bonisa ko mu kona ku fumana likalabo mwa Bibele ya mina. Lipaki za Jehova ba ka tabela ku nyakisisa ni mina likalabo ze.

1. Ki kabakalañi ha mu swanela ku lutiwa ki Mulimu?

Mulimu u bulelela batu litaba ze nde. U lu bulelela litaba ze nde zeo ka ku itusisa Bibele. Bibele i swana sina liñolo le lu ñolezwi ki Ndataa luna ya lilato wa kwa lihalimu.—Mu bale Jeremia 29:11.

2. Litaba ze nde ze ki lika mañi?

Batu ba tokwa puso ye nde. Ha ku na mubusi wa butu ya kona ku felisa mifilifili, ketululo, matuku, kamba lifu. Kono ku na ni taba ye nde. Mulimu u ka tahiseza batu puso ye nde. Puso ye i ka felisa lika kaufela ze tahisa manyando.—Mu bale Daniele 2:44.

3. Ki kabakalañi ha ku li kwa butokwa ku lutiwa ki Mulimu?

Ona cwale-cwale fa, Mulimu u ka yundisa batu ba ba tahisa manyando fa lifasi. Kono ka nako ya cwale, Mulimu u sweli ku luta batu ba bañata ba ba ishuwa kuli ba ikole bupilo bo bunde ni kuli ba late Mulimu ni batu. Batu ba sweli ku ituta ku zwelela mwa Linzwi la Mulimu mo ba kona ku tiyela matata a mwa bupilo, mo ba kona ku fumanela tabo sakata, ni mo ba kona ku tabiseza Mulimu.—Mu bale Zefania 2:3.

4. Ki mañi Musimululi wa Bibele?

Mwa Bibele ku na ni libuka ze nyinyani ze 66. Libuka zeo ne li ñozwi ki batu ba 40. Libuka za mwa Bibele za pili ze keta-lizoho ne li ñozwi ki Mushe i batoo ba lilimo ze 3,500 kwamulaho. Buka ya mafelelezo mwa Bibele ne i ñozwi ki muapositola Joani lilimo ze fitelela 1,900 kwamulaho. Kono bañoli ba Bibele ne ba ñozi mihupulo ya Mulimu isiñi ya bona. Kacwalo Mulimu ki yena Musimululi wa Bibele.—Mu bale 2 Timotea 3:16; 2 Pitrosi 1:21.

Lwa ziba kuli Bibele i zwa ku Mulimu bakeñisa kuli i bulela ka butungi ni ka ku nepahala ze ka ezahala kwapili. Ha ku na mutu ya kona ku eza cwalo. (Isaya 46:9, 10) Hape, Bibele i patulula tulemeno to tunde twa Mulimu. Bibele i na ni maata a ku cinca mipilelo ya batu kuli i be ye minde. Litaba za niti ze, li kolwisa batu ba bañata kuli Bibele ki Linzwi la Mulimu.—Mu bale Joshua 23:14; 1 Matesalonika 2:13.

5. Mu kona ku utwisisa cwañi Bibele?

Jesu na zibahalile hahulu sina muluti wa Linzwi la Mulimu. Nihaike kuli buñata bwa batu ba na ambolanga ni bona Jesu ne ba ziba Mañolo, ne ba tokwa ku tusiwa kuli ba kone ku a utwisisa. Kuli a ba tuse ku utwisisa, Jesu na amanga kwa litaba za mwa Mañolo ni ku talusa hande litaba “kuli ba utwiseze Mañolo.” Taba ye ya, “Mu Itute Linzwi la Mulimu,” i ka amanga kwa Bibele ni ku talusa hande litaba kuli mu tusiwe.—Mu bale Luka 24:27, 45.

Ku na ni lika li sikai feela ze tabisa sina mo ku tabiseza ku lutiwa ki Mulimu ka za mulelo wa bupilo. Kono batu ba bañwi mwendi ha ba na ku tabela kabakala kuli mwa ituta Bibele. Mu si ke mwa zwafa. Sepo ya mina ya ku to ikola bupilo bo bu sa feli i itingile fa ku ziba Mulimu.—Mu bale Mateu 5:10-12; Joani 17:3.

Kuli mu bale litaba ze ñata ka za taba ye, mu bone kauhanyo 2 ya buka ye, Bibele I Lutañi Luli? ye hatisizwe ki Lipaki za Jehova.