Ze Lu Ituta Ku Jesu

Mo li lu Tuseza Libupiwa za Moya

Jesu na pilile mwa lihalimu ni Ndatahe “lifasi li si ka ezwa kale.” (Joani 17:5) Kacwalo, ki yena luli ya swanela ku alaba lipuzo ze latelela.

Kana mangeloi a iyakatwa luna?

▪ Jesu u lu luta kuli mangeloi a iyakatwa hahulu batu. Na bulezi kuli: “Ku na ni tabo fapilaa mangeloi a Mulimu, ka muezalibi a li muñwi ya baka.”—Luka 15:10.

Jesu na patuluzi kuli mangeloi a filwe musebezi wa ku tusa batanga ba Mulimu ku zwelapili ku tiisa silikani sa bona ni Mulimu. Kacwalo, Jesu ha na lemusize balutiwa ba hae kuli ba si ke ba sitatalisa ba bañwi, na bulezi kuli: “Mu tokomele, mu si ke mwa nyenya a li muñwi wa ba banyinyani bao; kakuli ni li ku mina, kwa lihalimu mangeloi a bona, a buha kamita pata ya Ndate ya kwa lihalimu.” (Mateu 18:10) Ka ku bulela cwalo, Jesu na sa talusi luli kuli mañi ni mañi u na ni lingeloi le li mu silelezanga. Kono Jesu na bonisize kuli mangeloi a sebelisana hahulu ni Mulimu, a isanga hahulu pilu kwa batu ba mwa puteho ya Sikreste.

 Diabulosi u kona ku lu holofaza cwañi?

▪ Jesu na lemusize balateleli ba hae kuli Satani u likanga ku tuhelisa batu ku ituta niti ka za Mulimu. Jesu na bulezi kuli: “Mutu kaufela ya utwa Linzwi la mubuso, mi a sa li utwisezi, ya maswe u taha ku yena, u mu amuha se si calilwe mwa pilu ya hae.”—Mateu 13:19.

Jesu na patuluzi nzila ye ñwi yeo Satani a pumanga batu ka yona ha na bulelezi batu swanisezo ya mutu ya na cezi peu ya buloto mwa simu ya hae. Mutu yo na swaniseza Jesu, mi buloto ne bu swaniseza Bakreste ba niti ba ba ka busa ni Jesu mwa lihalimu. Nihakulicwalo, Jesu na bulezi kuli mutu ya mu toile a taha mi a “cala mufuka fahali a buloto.” Mufuka u yemela Bakreste ba buhata. “Wa sitoyo ya u calile, ki Diabulosi.” (Mateu 13:25, 39) Sina feela mufuka ha u bonahalanga inge buloto ha u melile, batu ba ba ipapata ku ba Bakreste ba kana ba bonahala ku ba balapeli ba niti ba Mulimu. Bulapeli bo bu luta lituto za buhata bu kwasheka batu ku sa kuteka Mulimu. Satani u itusisa bulapeli bwa buhata ku sinya silikani se ba na ni sona batu ni Jehova.

Lu kona ku palelwisa cwañi Satani ku lu holofaza?

▪ Jesu na bizize Satani kuli ki “mulena wa lifasi.” (Joani 14:30) Jesu na bonisize mo lu kona ku silelelezwa ku Satani ha na lapezi ku Mulimu. Jesu na lapelezi balutiwa ba hae ku Ndatahe wa kwa lihalimu kuli: “U ba sileleze kwa bumaswe. Hasi ba lifasi, sina na ha ni si wa lifasi. U ba fe ku ikenisa ka niti ya hao; kakuli Linzwi la hao ki yona niti.” (Joani 17:15-17) Ku ziba Linzwi la Mulimu kwa kona lu sileleza kuli lu si ke lwa kukuezwa ki batu baa sweli ku busa Satani.

Mangeloi a lu tusa cwañi kacenu?

▪ Jesu na bulezi kuli ka “nako ya ku fela kwa lifasi; mangeloi a ka zwa, a kete ba ba maswe ku ba ba lukile.” (Mateu 13:49) Se lu pila mwa nako ya “ku fela kwa lifasi,” mi buñata bwa batu ba sweli ku amuhela taba ye nde ya Mubuso wa Mulimu.—Mateu 24:3, 14.

Kono haki batu kaufela ba ba kalisanga ku ituta Linzwi la Mulimu ba ba tabelwanga ki Mulimu. Mangeloi a etelela musebezi wa batanga ba Jehova, mi a kauhanya batu ba ba lata Mulimu luli kwa batu ba ba sa lati ku sebelisa ze ba ituta. Ha na talusa za batu baa tabela Mulimu, Jesu na bulezi kuli: “Ki ba ba utwile Linzwi ka lipilu ze sepahala, ze nde; ba tiyela ku lona, mi ba beya lico ka ku tundamena.”—Luka 8:15.

Kuli mu bale litaba ze ñata ka za taba ye, mu bone kauhanyo 10 ya buka ye, Bibele I Lutañi Luli? ye hatisizwe ki Lipaki za Jehova.

[Siswaniso se si fa likepe 16]

Mangeloi a tusa mwa musebezi wa ku kubukanyeza batu ba lipilu ze nde mwa puteho ya Sikreste