4. Ku Tokwa Lilato la Taho

“Ikaba batu ba ba si na lilato la taho.”—2 TIMOTEA 3:1-3.

● Bo Chris ba beleka ni sikwata se si talima za mifilifili ya mwa mabasi mwa North Wales ili kwa naha ya Britain. Bo Chris ba bulela kuli: “Nako ye ñwi, musali yo muñwi naa natilwe maswe ki muunaa hae kuli mane na mu timelelwa. Basali ba bañwi ba zwafiswanga hahulu ki mifilifili ya mwa mabasi kuli mane ba palelwanga nihaiba ku talima mutu.”

ZE EZAHEZI LI BONISAÑI? Mwa naha ye ñwi ya mwa Africa, lipatisiso li bonisa kuli ibatoo ba musali a li muñwi mwahalaa basali ba balalu naa swelwi likalala inze a sa li mwanana. Mwa patisiso ye ñwi ye ne ezizwe mwa naha yeo, ne ku fumanwi kuli muuna a li muñwi kwa baana ba balalu naa ikutwa kuli ku lukile baana ku natanga basali ba bona. Nihakulicwalo, basali haki bona feela ba ba ipumananga mwa mifilifili ya mwa lubasi. Ka mutala, mwa naha ya Canada baana ba balalu mwahalaa baana ba ba lishumi, ba kile ba natiwa kamba mane ku belekiswa maswe ki basali ba bona.

BATU BA HANYEZANGAÑI? Mifilifili ya mwa lubasi i bile teñi kamita. Kacenu i lemuhiwa feela hahulu ku fita kwa kale.

KANA KU HANYEZA KO KWA UTWAHALA? Mazazi a, mifilifili ya mwa lubasi se i lemuhiwa hahulu ku fita kwa kale. Kono kana ku ba ni temuho yeo ku tahisize kuli mifilifili ya mwa lubasi i fukuzehe? Batili, ha ku si ka ba cwalo. Ku tokwa lilato la taho mane se ku atile hahulu ni ku fita.

MINA MU BONA CWAÑI? Kana liñolo la 2 Timotea 3:1-3 li sweli la talelezwa? Kana batu ba bañata ha ba na lilato la taho kwa mabasi a bona?

Bupolofita bwa buketalizoho bo bu sweli ku talelezwa kacenu bu ama lifasi mo lu pila. Ha mu bone ze i bulela Bibele ka za taba ye.

[Manzwi a fa likepe 7]

“Mifilifili ya mwa lubasi ki ye ñwi ya likezo ze ñata za bukebenga bo bu sa bihiwangi ku ba mulao mwa lifasi. Ka avareji, musali u ka yo biha kwa mapokola ha sa natakilwe ki muunaa hae ha 35.”—MUSALI YA YEMELA KATENGO KA WALES DOMESTIC ABUSE HELPLINE.