6. Musebezi wa ku Kutaza Mwa Lifasi Kaufela
6. Musebezi wa ku Kutaza Mwa Lifasi Kaufela
“Evangeli ye ya mubuso i ka bulelwa mwa lifasi kaufela.”—MATEU 24:14.
● Bo Vaiatea ba pila mwa matakanyani a sioli sa Pacific mwa sibaka sa Tuamotu. Nihaike kuli sibaka sa Tuamotu si na ni tuoli to tu batoo eza 80 to tu yambile sibaka kaufela ili se si batoo likana kalulo feela ye nyinyani i liñwi ya naha ya India, mwa sibaka seo ku pila feela batu ba ba batoo ba 16,000. Niteñi, bo Vaiatea ni ba ba yahile ni bona ba potelwanga ki Lipaki za Jehova. Kabakalañi? Kabakala kuli Lipaki ba tabela ku ikambota taba ye nde ya Mubuso wa Mulimu ni batu kaufela ku si na taba ni ko ba pila.
ZE EZAHEZI LI BONISAÑI? Lushango lwa Mubuso lu sweli lwa bulelwa mwa lifasi kaufela. Mwa silimo sa 2010 feela, Lipaki za Jehova ne ba tandile lihora ze fitelela 1.6 bilioni inze ba shaela taba ye nde ye, mwa linaha ze 236. Fo ki ku talusa kuli Paki ni Paki naa tandile mizuzu ye 30 zazi ni zazi mwa musebezi wa ku kutaza. Mwa lilimo ze lishumi ze felile, Lipaki za Jehova ba hatisize ni ku abela libuka ze tusa ku ituta Bibele ze fitelela 20 bilioni.
BATU BA HANYEZANGAÑI? Lushango lwa Bibele lu kutalizwe ka lilimo ze ñata-ñata.
KANA KU HANYEZA KO KWA UTWAHALA? Ki niti kuli batu ba bañata ba kutalize lushango lwa Bibele. Niteñi, buñata bwa batu ba kutalize ka nako ye kuswani feela ni mwa sibaka se sinyinyani. Ka ku shutana ni buñata bwa batu, Lipaki za Jehova ba swalisani mwa mungendenge wa ku kutaza mwa lifasi kaufela ili kwa batu ba bañata-ñata. Lipaki ba tundamezi ku kutaza ku si na taba ni ku lwaniswa hahulu ki likopano ze ñwi ze maata ni ze situhu ze bile teñi mwa litaba ze ezahezi. * (Mareka 13:13) Ku tuha fo, Lipaki za Jehova ha ba lifiwi ha ba eza musebezi wa ku kutaza. Kono ba itombola nako ya bona, mi ba abela lihatiso za bona ku si na tifo. Musebezi wa bona kaufela u lifelwa ka linubu za ka ku itatela.
MINA MU BONA CWAÑI? Kana “evangeli ye ya mubuso” i sweli ya kutazwa mwa lifasi kaufela? Kana ku talelezwa kwa bupolofita bo, ku bonisa kuli kwapilinyana ku ka ezahala lika ze nde?
[Litaluso za kwatasi]
^ para. 6 Kuli mu zibe litaba ze ñata, mu buhe mavidio a malalu a li, “Faithful Under Trials—Jehovah’s Witnesses in the Soviet Union,” “Purple Triangles,” ni “Jehovah’s Witnesses Stand Firm Against Nazi Assault” ili a hasanywa ki Lipaki za Jehova.
[Manzwi a fa likepe 9]
“Ibile feela kuli Jehova wa lumeleza, lu ka zwelapili ku kutaza taba ye nde ya Mubuso ka tukufalelo, ili ku itusisa mikutalezo kaufela ye konahala kuli lu kutaze kwa batu ba ba mwa kalulo ya luna ya simu.”—2010 YEARBOOK OF JEHOVAH’S WITNESSES.
