Mu Sutelele Ku Mulimu

Litaba ze Omba-omba ba ba Lobehile Lipilu

MUSALI yo muñwi wa Sikreste ya lembwalile ibatoo ba mwa bupilo bwa hae kaufela u bulela kuli, “Jehova ha koni ku ni lata.” Naa ikolwisize kuli Jehova u kwahule ni yena. Kana Jehova luli u kwahule ni balapeli ba hae ba ba lembwalile? Kalabo ye omba-omba i fumaneha mwa manzwi a buyelezwi a walisamu Davida, ili a ñozwi kwa Samu 34:18.

Davida naa ziba bumaswe bo bu kona ku tahela mulapeli wa Jehova ya sepahala haiba na ka lembwala hahulu. Ha na li mutangana, Davida naa pilile bupilo bwa ku yambaela ha na zumiwa nako ni nako ki Saule, mulena ya naa na ni muna ili ya na bata luli ku bulaya Davida. Davida naa ipatile mwa sibaka sa naa nahana kuli Saule na si ke a mu fumana, ili mwa munzi wa lila wa Gati, mwa silalanda sa Mafilisita. Hamulaho wa ku lemuha kuli ne ba mu zibile, Davida a picuka ka ku ipumisa kuli ki sipulumuki. Davida naa file Mulimu tumbo ka ku mu punyusa, mi ka ku itusisa litaba ze ne ezahezi mwa bupilo bwa hae, a ñola Samu 34.

Kana Davida naa lumela kuli Mulimu na li kwahule ni batu ba ba lembwalile? Davida naa ñozi kuli: “Muñaa Bupilo u fakaufi ni ba ba na ni pilu ye lobehile, mi u pilisa ba ba ikutwa ku swaba mwa moya wa bona.” (Timana 18) Ha lu nyakisiseñi mwa lu omba-ombela ni mwa lu fela sepo manzwi ao.

‘Jehova u fakaufi.’ Buka ye ñwi i bulela kuli taba ya kuli Jehova u fakaufi ki “mubulelelo wo muñwi wo kona ku talusa kuli Mulena wa isa pilu ni ku tokomela ni kuli nako kaufela u itukiselize kuli a tuse ni ku punyusa batu ba hae.” Kwa omba-omba ku ziba kuli Jehova wa tokomela batu ba hae. Mulimu wa bona butata bo ba kopana ni bona mwa “linako ze taata,” mi wa ziba mo ba ikutwela.—2 Timotea 3:1; Likezo 17:27.

“Ba ba na ni pilu ye lobehile.” Mwa lizo ze ñwi, “pilu ye lobehile” i kona ku talusa ku lata mutu ya sa ku lati. Caziba yo muñwi u bulela kuli manzwi a walisamu a talusa “masitapilu ni maswabi.” Kaniti, nihaiba balapeli ba Mulimu ba ba sepahala ba kopananga ni butata bo bu shutana-shutana ka linako ze ñwi ili ku tahisa kuli ba lobehe pilu.

“Ba ba ikutwa ku swaba mwa moya wa bona.” Batu ba ba zwafile ba kona ku ikutwa kuli haki ba butokwa ili nto ye kona ku ba tahiseza kuli ba latehelwe ki sepo ka nakonyana. Buka ye ba itusisanga batoloki ba Bibele i bulela kuli taba ye, i konwa ku tolokwa kuli “batu ba ba si na ze nde ze ba kona ku libelela.”

Jehova u nga cwañi batu “ba ba na ni pilu ye lobehile” ni “ba ba ikutwa ku swaba mwa moya wa bona”? Kana u kwahule ni bona, ni ku ikutwa kuli ha ba swaneli ku latiwa ni ku tokomelwa ki yena? Kutokwa. Sina mushemi ya lilato ya babalela ni ku omba-omba mwanaa hae ya mwa butata, Jehova u fakaufi ni balapeli ba hae ba ba kupa tuso ku yena. Jehova u nyolelwa ku omba-omba ni ku folisa lipilu za bona ze lobehile ni moya wa bona wo mwa maswabi. Wa kona ku ba fa butali ni maata a tokwahala kuli ba tiyele butata kaufela bo ba kona ku kopana ni bona.—2 Makorinte 4:7; Jakobo 1:5.

Haike mu batisise mo mu kona ku sutelela ku Jehova. Mulimu yo wa mufelañeke u lu sepisa kuli: “Ni yahile ni mutu ya lobehile pilu, ya ishuwa; kuli ni wetuluse moya wa ya ishuwa, mi ni pilise ya lobehile pilu.”—Isaya 57:15.