Liñolo le li zwa kwa Madagascar

Ne ni Utwa Puo ya Si-Malagasy Inge Pina ye Munati

NA NI bo muunaa ka, ne lu li mwa musipili ku liba kwa sioli sa Madagascar ili ko ne lu ya ku yo kala musebezi wa bulumiwa. Lwa itaeza-taeza ni balikani ni mabasi a luna inze lu na ni sepo ya kuli Jehova u ka lu tusa ku peta musebezi wa lu file.

Lu ka yo shwa cwalo ku libala mukopano wa pili kwa puteho ko ne lu yo sebeleza. Muzwale ya naa zamaisa Tuto ya Tawala ya Mulibeleli naa utwahala inge muopelisi. Ne lu sa utwi puo ya Si-Malagasy, kuli mane batu ha ba bulela ne ba utwahala feela inge ba ba opela lipina ze munati hahulu. Ne ku ka nga nako ye telele kuli lu kone ku fita fa ku utwisisa puo ya Si-Malagasy.

Ha ne ni utwisisize lwa pili puzo ye ne buziwa kwa mikopano, na alaba ka ku huwa ni si ka kupiwa. Ba ne ba inzi bukaufi ni na ne ba utwile ha ni alaba, mi na i kwahela kwa mulomo kuli batu ba si ke ba utwa ku seha kwa ka. Ne ni swabile hahulu, kono ka nako ye swana ne ni ikutwile tabo bakeñisa ku utwisisa ze ne bulezwi!

Mwa sibaka sa ku tomela ba bañwi mutala wo munde mwa simu, ne ni ikutwile kuli ki na ya na tusiwa. Mizwale ni likaizeli ne ba ni lutile ka lilato mwa ku fela mutahisezo wo utwisiseha mwa simu, mi ba ni luta litaba za ku bulela ni mañolo a ku itusisa.

Ni hupula lizazi le liñwi ha ne lu li mwa simu, kanana ka kañwi ka kala ku huweleza kuli, “Vazaha! Vazaha!” Le ki linzwi le li zibahala hahulu mwa puo ya Si-Malagasy le li talusa “muzwahule.” Lwa akufa kuli banana ba bañwi ba si ke ba taha ni ku to likanyisa mwanana yo ka ku huweleza nto ye swana. Mushimani yo muñwi a halifela mwanana yo, ya na ni huweleza. A bulelela mwanana yo kuli “basali ba ha ki mazwahule, ba ziba puo ya luna!” Kaizeli ye ne ni kutaza ni yena a ni tolokela ze ne ba ambola banana bao kakuli ne ni si ka li utwisisa, ne ba bulela ka bubebe. Nihakulicwalo, ne ni ikutwile tabo ye tuna, mi na kala ku ikutwa ku lukuluha hahulu mwa naha ya Madagascar.

Hañata ha ne ni ikutwanga bulutu, ne ni susuezwanga ki banana ba ne ba ni tabela nihaike kuli ne ni sa buleli hande puo ya bona. Ne ni ziba kuli ba ni tabela kabakala kuli fokuñwi ne ba ni  swalelelanga kwa lizoho. Banana mwa puteho ki mpo ye zwa ku Jehova. Kaizeli yo muñwi wa mukulwani wa libizo la Hasina wa ni tolokelanga puo yeo nako kaufela. Batu kaufela ha ba palelwanga ku utwisisa ze ni bulela, kaizeli yo yena wa ni utwisisanga. Mi hañata wa ni tusanga haiba mwendi ne ni lika ku ambola ni balikani mwa puteho ka ku ba taluseza ze ni talusa luli.

Na ni bo muuna ka ne lu banga mwa puteho ye ne li fakaufi ni ku pumeha. Ku pumeha kwa puteho ne ku ka tahisa kuli baituti ba bañwi ba Bibele ba itutange ni bahasanyi ba sili ba ne ba pila mwa silalanda sa puteho ye nca yeo. Kaizeli yo muñwi naa ni susuelize ku ituta ni yo muñwi wa baituti ba hae. Ne ni ikutwa boi, kacwalo na pihelela ku bulela kuli ne ni si ka itukiseza ku eza cwalo, kono kaizeli yo a ni kolwisa. Kaizeli yo a ni kolwisa kuli ka tuso ya Jehova, ne ni ka kona ku luta muituti yo. Ka sishemo ni ka ku itusisa manzwi a bunolo, kaizeli yo a ni bulelela kuli mwa nako ye nyinyani feela, ne ni ka kona ku luta ba bañwi ka mo ne ni ka tabelela. Manzwi ao naa ni susuelize hahulu.

Ku zwa honafo, muituti wa ka u zwezipili ku eza hande. Zazi le li ñwi ha ne ni inzi fande, na utwa muituti yo inze a ni biza. Muituti yo ni bo muuna hae ne ba libile kwa ku yo ngisa mucato wa linyalo la bona. Bo muuna muituti yo, ne ba kalile ku ituta Bibele mi bubeli bwa bona ne ba itomezi likonkwani ze ñata ze ama bulapeli bwa bona ku Mulimu ili ze ba lika ku kwanisa ze cwale ka ku kolobezwa. Kolobezo ya bona ne i ni tahiselize tabo, nihaike kuli Jehova ki yena ya hohelanga batu ku yena.

Lu itutile ze ñata mwa musebezi wa luna wo munca wo. Nihaike kuli lwa tonda balikani ni mabasi e lu siile kwandu, lu ikutwa inge kuli ba teñi ni luna kwanu. Hañata lwa kandekelanga mizwale ni likaizeli ba se lu pila ni bona ka za balikani ni mabasi a luna, mi mane ki kale ba twaela ku utwa za bona kuli se ba lu buzanga ka za bona ni mo ba zuhela. Lu nyolezwi nako yeo mabasi e lu pepwa ni ona ha ka zibana ni ku swalisana ni mizwale ni likaizeli ba mwa Madagascar ili ba se ba swana feela sina mabasi a luna.

Batu ha ba bulela, ni sa utwanga inge kuli ba “opela.” Shutano feela ki ya kuli cwale se ni utwisisa puo. Ni nyolelwa nako ye ni ka kona ku bulela hande puo sina feela mo ni utwelanga batu ba bañwi ha ba bulela puo ka bukwala sina pina ye nde. Jesu naa bulezi kuli: “Mu si ke mwa bilaelela za kamuso; kakuli la kamuso li ka ipatela za lona.” (Mateu 6:34) Kacwalo, lu ka zwelapili ku ituta manzwi a puo ya Si-Malagasy hanyinyani-hanyinyani. Hape ni ka zwelapili ku cinca-cinca mubulelelo ni munahanelo wa ka kuli ni kone ku sebelisana hande ni mizwale ni likaizeli ba ka ba ba na ni pilu telele ni lilato kwanu kwa Madagascar.

[Siswaniso se si fa likepe 25]

Inze lu kutaza ni Hasina