Mu Sutelele ku Mulimu

“Muñaa Bupilo, . . . U ni Zibile”

MUÑOLI ya bizwa Arthur H. Stainback naa ñozi kuli: “Nto ye taata ka ku fitisisa ki ya ku ziba kuli ha ku na mutu ya iyakatwa luna kamba ku lu utwisisa.” Kana ni mina kona mo mu ikutwela? Kana mu kile mwa ikutwa kuli ha ku na mutu ya iyakatwa mina kamba ku utwisisa butata bo mu li ku bona? Haiba ki cwalo, mwa kona ku omba-ombiwa ki manzwi a: Jehova u iyakatwa hahulu balapeli ba hae kuli mane wa ziba lika kaufela ze ezahalanga mwa bupilo bwa bona ka zazi ni zazi. Manzwi a Davida a kwa Samu 139 a lu kolwisa buniti bwa taba yeo.

Bakeñisa kuli Davida naa ikolwisize kuli Mulimu na iyakatwa yena, naa bulezi kuli: “Muñaa Bupilo, u ni tatubile, mi wa ni ziba.” (Timana 1, Bibele ye Kenile, hatiso ya 1984) Mwa timana ye, Davida u itusisa swanisezo ye nde. Linzwi la Siheberu le li tolokilwe kuli ‘ku tatuba’ li kona ku talusa ku kata macwe a patilwe (Jobo 28:3), ku bata naha (Baatuli 18:2), kamba ku batisisa niti ya taba ha ku na ni muzeko (Deuteronoma 13:14). Kaniti, Jehova wa lu ziba hande hahulu kuli mane ku swana feela inge kuli u tatubile bupilo bwa luna kaufela. Ka ku itusisa pulelo ye li “u ni,” Davida u lu luta kuli Mulimu u iyakatwa yo muñwi ni yo muñwi wa batanga ba hae. Wa ba tatuba ni ku ziba yo muñwi ni yo muñwi wa bona.

Davida u ekeza ku bulela mwa tatubela batu Mulimu ka ku tala ha bulela kuli: “U ziba niha ni ina, niha ni zuha, U ziba muhupulo wa ka u sa li kwahule.” (Timana 2) Ka mubulelelo o muñwi, Jehova u “kwahule” kakuli u pila kwa lihalimu. Nihakulicwalo, Jehova wa ziba ha lu ina, mwendi hamulaho wa ku beleka lizazi mukatumbi, ni ha lu zuha kakusasana ku eza misebezi ya luna ya ka zazi. Hape wa ziba mihupulo, litakazo, ni milelo ya luna. Kana Davida u ikutwa ku bembeha kabakala kuli Jehova wa mu tatuba ka ku tala? Batili, mane u bata kuli a tatubiwe ka ku tala. (Litimana 23, 24) Ki kabakalañi ha ikutwa cwalo?

Davida wa ziba kuli Jehova u na ni mulelo wo munde wa tatubela balapeli ba Hae. Davida u bulela ka za mulelo wo ha ñola kuli: “Wa ni lekula niha ni zamaya, niha ni lobala, U zibelela linzila za ka kaufela.” (Timana 3) Zazi ni zazi, Jehova wa bona ‘linzila za luna kaufela,’ ili mafosisa a luna ni misebezi ya luna ye minde. Kana u talimanga fa mafosisa a luna kamba fa misebezi ya luna ye minde? Linzwi la Siheberu le li tolokilwe kuli “ku lekula” li kona ku talusa ku “sefa,” kamba ku “ulusa,” ili ku bonisa mulimi mwa ulusezanga muuku kuli a fumane bubeke bo bunde. Pulelo ya ku “zibelela” i toloka linzwi la Siheberu le li kona ku talusa “ku itebuha.” Ha tatubanga ze ba bulela ni ku eza balapeli ba hae ka zazi, Jehova u isanga pilu ku ze nde. Ki kabakalañi? Bakeñisa kuli wa itebuha buikatazo bo ba eza kuli ba mu tabise.

Samu 139 i lu luta kuli Jehova u iyakatwa hahulu balapeli ba hae. Wa ba tatuba ni ku ba babalela ha ba nze ba eza misebezi ya bona ya ka zazi. Kacwalo wa ziba butata bo bu shutana-shutana bo ba talimana ni bona, mi wa utwisisa mo ba ikutwela kabakala butata bo. Kana mwa ikutwa ku susuezwa ku lapela Mulimu yo ya iyakatwa luna? Haiba mwa ikutwa cwalo, mwa kona ku kolwa kuli: Jehova ni kamuta ha na ku ‘libala misebezi ya mina, ni lilato le mu bonisize kwa libizo la hae.’—Maheberu 6:10.