Bibele Ya Cincanga Bupilo Bwa Batu

Kiñi ze ne tahisize kuli musali yo muñwi a amuhele hape likuka za bulapeli ha mano keluha? Ha mu bale likande la hae.

“Cwale se ni ziba ze ni pilela.”—LISA ANDRÉ

SILIMO SE NE BA PEPILWE: 1986

NAHA KO BA SIMULUHA: LUXEMBOURG

LITABA ZE EZAHEZI: NE BA BANGA MWANA YA IPANGUZI

BUPILO BWA KA BWA KWAMULAHO: Ne ni hulezi mwa munzi o bizwa Bertrange, munzi o kenile, o na ni kozo ili munzinyana o onyokile o no li bukaufi ni tolopo ya Luxembourg. Ki na ñomba mwa lubasi lwa bana ba ba ketalizoho. Bashemi ba ka ki Lipaki za Jehova, mi ba sebelize ka taata ku luta na ni bahulwani ba ka likuka za Bibele.

Ha ne ni sa zo nonoboka, na kala ku kakanya hahulu ze ne ba lutanga Lipaki za Jehova. Pili, na lika ku sa isa pilu kwa lika ze ne ni kakanya ze ama lituto za Lipaki za Jehova, kono hamulaho wa nako tumelo ya ka ya kala ku fokola hahulu. Bashemi ba ka ba lika ka mo ne ba konela kaufela ku ni sikulula, kono na hana tuso ya bona. Ne ni tandanga nako ye ñata ni litaka za ka ili batu ba ne ba sa kuteki zamaiso, mi bashemi ba ka ne ba sa zibi swalisano ya ka ni batu bao. Ne ni bata tukuluho ye ne ba na ni balikani ba ka. Ne lu yanga kwa mikiti ye miñata, ne lu ezanga somano ni batu ba ba shutana-shutana, ne lu itusisanga milyani ye kola ni ku itupwaela macwala. Kwa makalelo, ne ni ikutwanga tabo ku swalisana ni batu ba ne ba bonahala kuli ne ba ikola bupilo ka ku tala.

Kono ku bulela feela niti, ne ni si na tabo ya luli. Swalisano ya ka ni balikani ba ka bao ne i sa ni fi mulelo mwa bupilo kakuli mañi ni mañi na ikezeza lika mwa na hupulela. Mane ne ni katazwa hahulu ki taba ya ketululo ye yambile lifasi kaufela. Nako ha ne inze i ya, naa ikutwa ku lembwala hahulu.

MO NE I CINCELIZE BUPILO BWA KA BIBELE: Zazi le liñwi ha ne ni li wa lilimo ze 17, ne ni ikutwa ku lembwala hahulu. Ka ku lemuha kuli ne ni sina tabo, bo me ba ni kupa kuli ni nahane hape za ku ituta Bibele. Ba ni bulelela kuli ni tatubisise lituto za Bibele ni ku ikatulela haiba ne ni bata ku pila ka ku lumelelana ni lituto zeo kamba kutokwa. Puisano yeo ne i tahisize kuli ni cince mupilelo wa ka. Na lumela ku ituta Bibele ni bahulwani ba ka bo Caroline hamohocwalo ni bakubona bo Akif. Nihaike kuli bo muunaa bo Caroline ne ba si ka huliswa ki Lipaki za Jehova, ne ba tilo ikatulela ku ba lipaki. Bakeñisa bupilo bwa bona  bwa kwamulaho, ne ni ikutwanga ku lukuluha ku ambola ni bo Akif mi ku eza cwalo ne ku ni tusize hahulu.

Nihaike kuli ne ni lumela kuli na kona ku iketela mo ni pilela bupilo bwa ka, ne ni ziba kuli mupilelo wa ka ne u sa swaneli mutu ya na ipapata ku ba Paki. Nihakulicwalo na ituta ku zwa mwa Bibele kuli ze ni eza mwa bupilo za kona ku tabisa kamba ku nyemisa Jehova. (Samu 78:40, 41; Liproverbia 27:11) Na utwisisa hape kuli ze ni eza li kona ku tabisa kamba ku nyemisa batu ba bañwi.

Ha ne ni nze ni tatuba Bibele, na fumana kuli ku na ni mabaka a utwahala ni a kolwisa a ku lumelela kuli Bibele ki linzwi la Mulimu. Ka mutala, ne ni itutile bupolofita bo buñata bwa mwa Bibele bo bu talelelizwe ka ku nepahala luli. Ku ba ni zibo yeo ne ku ni tusize ku sa kakanya lituto za Lipaki za Jehova.

Ibato ba hamulaho wa silimo ku zwa fo ne ni kalezi ku ituta Bibele, na ni bashemi ba ka lwa yo potela muhulwanaa ka wa muuna, ya naa sebeza sina muitateli fa ofisi ya mutai ya Lipaki za Jehova kwa Germany. Ha ne ni boni tabo ya naa na ni yona muhulwanaa ka, na susuezwa hahulu. Ne ni bata kuli ni na ni be ni tabo ye cwalo. Hape ne ni tabisizwe ki baitateli ba bañwi ba ne ba li fa mutai wo. Ne ba shutanela kwahule ni batu ba ne ni swalisananga ni bona ili bao ne ba sa sepahali mi ne ba lata hahulu minyaka. Hamulahonyana wa fo, na lapela ku Jehova ku zwelela kwatasaa pilu ili ku mu sepisa kuli ni ka mu sebeleza mwa bupilo bwa ka kaufela. Ha ni to ba wa lilimo ze 19, na bonisa buineelo bwa ka, ka ku kolobezwa.

MO NI TUSELIZWE: Cwale se ni ziba ze ni pilela. Ni fumana tabo ka ku luta ba bañwi Bibele ili ku ba tusa ku ituta ka za Jehova ni lisepiso za hae za kwapili. Lubasi lwa ka ni lona lu tusehile kakuli ha lu sa bilaezwa ki na.

Na ziba mafosisa a ka a kwamulaho, kono ni likanga ku sa isa pilu kwa mafosisa ao. Mane ni itumelanga hahulu kuli Jehova u ni swalezi mi wa ni tokomela ka lilato. Na lumelelana ka ku tala ni manzwi a kwa Liproverbia 10:22, a li: “Ku fuyolwa ki Muñaa Bupilo ku fumisa mutu; Ku ipilaeza mwa pilu ha ku tusi se siñwi.”

[Manzwi a fa likepe 10]

“Ne lu yanga kwa mikiti ye miñata, ne lu ezanga somano ni batu ba ba shutana-shutana, ne lu itusisanga milyani ye kola ni ku itupwaela macwala”

[Manzwi a fa likepe 11]

“Na ziba mafosisa a ka a kwamulaho, kono ni likanga ku sa isa pilu kwa mafosisa ao”